Ingcinezelo Yoontanga Ngaba Isenokuba Yingenelo Kuwe?
Sonke sizalwa sinomnqweno wokufuna ukwamkelwa ngoontanga bethu. Akakho umntu ofuna ukungathandwa, ukubukulwa. Ngenxa yoko, ngeendlela ezahlukahlukeneyo, oontanga bethu bayasiphembelela.
UNTANGA uchazwa “njengobani olinganayo nomnye; . . . ubani okwiqela elinye lebutho labantu, ingakumbi elisekelwe kubudala, kwibanga lesikolo okanye kwiwonga elithile lasentlalweni.” Ngenxa yoko, ingcinezelo yoontanga ngamandla avela koontanga bethu, ukuze, enoba siyakuphawula oko okanye akunjalo, sizivumelanise nendlela abacinga ngayo okanye abenza ngayo izinto. Ngokuqhelekileyo ingcinezelo yoontanga ijongwa njengento engentle. Sekunjalo, njengoko siza kubona, sisenokuyenza ibe yingenelo.
Iphembelela Abakhulileyo Nabaselula
Ingcinezelo yoontanga ayiphelelanga nje kwabaselula; ichaphazela nabakhulileyo. Iyabonakala impembelelo yayo xa sizifumanisa sizibuza imibuzo enjengale: “Abanye bayakwenza, kutheni mna ndingenakukwenza?” “Kutheni kufuneka ndisoloko ndahlukile?” “Baza kucinga ntoni okanye bathini abanye?” “Bonke abahlobo bam bayathandana yaye bayatshata, kodwa akunjalo kum. Ngaba kukho into ephosakeleyo ngam?”
Nangona abakhulileyo nabaselula bechatshazelwa yingcinezelo yokufuna ukuvumelana, kubonakala ukuba le ngcinezelo iza ngamandla xa ubani ekwishumi elivisayo. IThe World Book Encyclopedia ithi “inkoliso yabakwishumi elivisayo ibandakanyeka ngokunzulu kumaqela oontanga—oko kukuthi, kumaqela abahlobo babo nababaziyo. Aba bakwishumi elivisayo bafuna ukwamkelwa liqela loontanga babo, kunokuba bamkelwe ngabazali babo, yaye basenokuguqula indlela abaziphatha ngayo ukuze bamkelwe ngabo.” Yongezelela isithi, abakwishumi elivisayo “bacinga ukuba bakhula ngokuqhelekileyo ukuba oontanga babo bayabamkela kwaye bayabathanda.” Ukuze bakufeze oko “babandakanyeka kwimibandela abacinga ukuba ichaphazela udumo lwabo, njengendlela abanxiba ngayo, ubuchule babo bokukhokela nempumelelo yabo ekwenzeni amadinga.”
Izibini ezitshatileyo zisenokuzifumanisa zisenza izigqibo ngohlobo lwendlu ezimele ziyithenge okanye ziyiqeshe, uhlobo lwenqwelo-mafutha ezimele ziyiqhube, enoba zimele zibe nabantwana okanye zingabi nabo kusini na, neminye imibandela iphenjelelwa yingcinezelo yoontanga—into eyamkelekayo kwibutho lazo, phakathi kwezinxulumani zazo okanye iqela lazo lohlanga. Ezinye iintsapho zide zizifake zwabha ematyaleni ukuze nje zibe nezinto eziphathekayo abamelwane noontanga abanazo. Ewe, usukelo lwethu, indlela esicinga ngayo, nezigqibo esizenzayo ngokufuthi zibonakalisa amandla achuliweyo engcinezelo yoontanga. Ngenxa yala mandla ayo, ngaba singayisebenzisa ingcinezelo yoontanga ngendlela engaba yingenelo, ukuze isincede sihambe ngendlela esifuna ukuhamba ngayo? Eneneni, singanako!
Ukuyisebenzisa Kakuhle Impembelelo Yoontanga Efanelekileyo
Oogqirha namanye amagosa empilo bayakwazi ukubaluleka kokuba abaguli babo barhanqwe ngabantu abakhuthazayo nabanempembelelo entle. Ukuba phakathi kweemeko ezinjalo kunokubangela othile achache. Ngokomzekelo, abantu abaphulukene nelungu lomzimba ngokufuthi bancedwa ngenkqubo ethabatha ixesha elide yokubabuyisela kwimeko yabo yempilo nokuchacha ngokweemvakalelo ngemizekelo emihle nokhuthazo lwabanye abaye babandezeleka ngokufanayo. Licacile elokuba, ukuba phakathi kweemeko ezikhuthazayo eziquka imizekelo yabantu abanethemba nabakhuthazayo yindlela yokusebenzisa kakuhle uhlobo oluhle lwengcinezelo yoontanga.
Lo mgaqo uyasebenza nakwibandla lamaKristu, kuba impembelelo ekhuthazayo yoontanga sesinye sezizathu ezibangela ukuba uYehova alathise abantu bakhe ukuba bahlanganisane kunye rhoqo. UThixo usibongoza ukuba ‘sivuselelane eluthandweni nasemisebenzini emihle size sikhuthazane.’ (Hebhere 10:24, 25) Ukhuthazo olunjalo luxabisekile ngenxa yeengcinezelo ezininzi ezidimazayo nezingentle kwihlabathi lanamhlanje. Ngenxa yezi ngcinezelo, amaKristu afanele ‘azibhokoxe ngamandla’ ukuze ahlale omelele ngokomoya. (Luka 13:24) Ngaloo ndlela, siyayifuna kwaye siyayixabisa inkxaso enothando evela kwamanye amakholwa. Ngapha koko, abanye kunokufuneka banyamezele ‘iliva enyameni,’ mhlawumbi isigulo okanye isiphene. (2 Korinte 12:7) Abanye basenokuwa bevuka bezama ukoyisa imikhwa emibi okanye ukudandatheka, okanye basenokufumanisa kunzima ukuhlangabezana noko kufunekayo ebomini. Ngoko ke, siya kuba senza ngobulumko ukuba siba phakathi kwabantu abahlala besondele kuYehova uThixo nabakuthandayo ukumkhonza. Oontanga abanjalo baya kusikhuthaza baze basincede ‘sinyamezele ngokuthembekileyo kude kube sekupheleni.’—Mateyu 24:13.
Ngoko, ngokukhetha oontanga abafanelekileyo, sinokuyilawula indlela abasiphembelela ngayo. Ngaphezu koko, ukutya kokomoya okuhle nemigaqo esebenzisekayo efunyanwa kwiintlanganiso zamaKristu ilubethelela ngakumbi ukhuthazo lobuqu esilufumanayo koontanga bethu.
Kakade ke, ukuya kwiintlanganiso zamaKristu akusoloko kulula. Abanye basenokuba abaxhaswa kangako okanye abaxhaswa kwaphela ngamaqabane abo omtshato, abanye basenokuba bafanele balungiselele abantwana, yaye into yokuhamba isenokuba yingxaki kwabanye. Kodwa khawucinge: Ukuba akuyivumeli le miqobo ukuba ikuthintele, ngoko umzekelo wakho unokubaphembelela abanye abajamelene neemeko ezifanayo. Ngamanye amazwi, wena nabanye abanjengawe aninikeli nje imizekelo emihle kodwa kwakhona impembelelo efanelekileyo yoontanga—yaye oko nikwenza ngaphandle kokunyanzelisa.
Enyanisweni, umpostile uPawulos, naye ekwakufuneka anyamezele ubunzima nemiqobo emininzi, wakhuthaza amaKristu ukuba axelise umzekelo wakhe omhle nowamanye amaKristu aqolileyo. Wathi: “Yithini ngokumanyeneyo nibe ngabaxelisa mna, bazalwana, nize niphose iliso kwabo bahamba ngendlela evumelana nomzekelo esinimisele wona.” (Filipi 3:17; 4:9) AmaKristu okuqala eTesalonika ayekhangele kumzekelo omhle kaPawulos. Ngawo uPawulos wathi: “Nani naxelisa thina neNkosi, ekubeni nathi nalamkela ilizwi phantsi kwembandezelo enkulu ngovuyo lomoya oyingcwele, kangangokuba naba ngumzekelo kuwo onke amakholwa eMakedoniya naseAkhaya.” (1 Tesalonika 1:6, 7) Isimo sethu esihle sengqondo nomzekelo wethu usenokuba nempembelelo efanayo kwabo sinxulumana nabo.
Yiphephe Impembelelo Embi
Ukuba sifuna ukuphepha ingcinezelo yoontanga engakhiyo, simele siyixhathise impembelelo ‘yabo bahamba ngokuvumelana nenyama.’ (Roma 8:4, 5; 1 Yohane 2:15-17) Kungenjalo, ingcinezelo eyenzakalisayo yoontanga iya kusiphambukisa kuYehova nakwisiluleko sakhe sobulumko. IMizekeliso 13:20 ithi: “Ohamba nezilumko uba sisilumko naye; ke olikholwane lesidenge uya konakaliswa.” Ngaba unokucinga ngothile oye wonakaliswa ngenxa yengcinezelo yoontanga engakhiyo? Ngokomzekelo, wambi amaKristu aye athanda izinto eziphathekayo, aziphatha kakubi, okanye asebenzisa kakubi iziyobisi notywala ngenxa yempembelelo yoontanga.
Kwanakwibandla lamaKristu, singaphenjelelwa yingcinezelo eyenzakalisayo yoontanga ukuba sikhetha abantu ababuthathaka ngokomoya njengezinxulumani zethu ezisenyongweni. (1 Korinte 15:33; 2 Tesalonika 3:14) Ngokufuthi abanjalo abatyekelanga ekuxubusheni imibandela yokomoya; basenokude bahlekise ngabo bazinandiphayo iingxubusho ezinjalo. Ukuba sikhetha abanjalo ukuba babe zizinxulumani zethu ezisenyongweni, ingcinezelo yoontanga isenokusinyanzelela ukuba sifane nabo, yaye kungekudala singazifumanisa sicinga yaye siziphatha njengabo. Sisenokude siqalise ukubajongela phantsi abo banyanisekileyo elukholweni nabazama ukwenza inkqubela yokomoya.—1 Timoti 4:15.
Hayi indlela ekububulumko ngayo ukuhlakulela ubuhlobo nabo abakulwelayo ukukholisa uYehova, abazinandiphayo izinto zokomoya! Unxulumano olunjalo luya kusinceda ukuze sibonakalise “ubulumko obuvela phezulu.” “Okokuqala nje bunyulu, bandule ke bube boboxolo, bube nengqiqo, bulungele ukuthobela, buzele yinceba neziqhamo ezilungileyo, . . . bungabi naluhanahaniso.” (Yakobi 3:17) Oku akuthethi ukuthi abantu abatyekele kwizinto zokomoya abakwazi ukuthetha ngezinye izinto ngaphandle nje kwezinto zokomoya. Ngokwahlukileyo koko! Cinga nje ngemibandela eyahlukahlukeneyo ebangela umdla ekwiimpapasho zeWatch Tower njengephephancwadi uVukani! Eneneni mininzi imibandela eyakhayo enokuxutyushwa, yaye ngokubonakalisa umdla kwimibandela emininzi, sibonisa uthando ngobomi nangomsebenzi kaYehova.
Kanye kwanjengokuba incutshe kumdlalo wentenetya iyiphucula indlela edlala ngayo ngokudlala nezinye iincutshe, unxulumano olufanelekileyo luyasikhulisa engqondweni, ngokweemvakalelo nangokomoya. Kwelinye icala, izinxulumani ezibi zingasikhokelela ekubeni sihanahanise ngokusikhuthaza ukuba siphile ubomi obumbaxa. Hayi indlela ekulunge ngakumbi ngayo ukunandipha isazela esicocekileyo size sizihlonele!
Abanye Abaye Bangenelwa
Inkoliso yabantu ikufumanisa kungenzima kangako ukufunda iimfundiso ezisisiseko zeBhayibhile nemilinganiselo yayo yokuziphatha neyokomoya. Noko ke, okunokuba nzima kukwenza oko ikufundileyo. Njengokuba imizekelo elandelayo ibonisa, impembelelo eyakhayo yoontanga inokusinceda sikhonze uYehova ngomphefumlo uphela.
Elinye iNgqina elikwinkonzo yexesha elizeleyo nomfazi walo lathi imizekelo yoontanga balo iye yachaphazela usukelo lwalo ebomini. Ngoxa lalisakhula, kwakufuneka lihlangabezane neempembelelo ezingakhiyo. Kodwa lazikhethela abahlobo abalikhuthaza ukuba liye rhoqo kubulungiseleli nakwiintlanganiso zamaKristu. Ukuthi nca kwezi zinxulumani kwalinceda ukuba liqole ngokomoya.
Elinye iNgqina libhala lisithi: “Emva kokuba mna nomfazi wam sitshatile, safudukela kwibandla apho kwakukho isibini esingoontanga bethu esasingoovulindlela abathe ngxi. Umzekelo waso wasikhuthaza ukuba siqalise inkonzo yexesha elizeleyo. Ngoko nathi sasebenzela ekwakheni umoya wobuvulindlela ebandleni. Ngenxa yoko, abaninzi basithelela ekubeni ngoovulindlela.”
Ukunxulumana nabo banosukelo lobuthixo kunokwenza ukuba kube lula ukuthobela uYehova. Lo ngomnye wemiphumo eyingenelo yempembelelo eyakhayo yoontanga. INgqina elaqalisa inkonzo yexesha elizeleyo lisengumfana laza kamva laba ngumveleli ohambahambayo ngoku likhonza kwenye yeeofisi zesebe leWatch Tower Society. Libhala lisithi: “Ezinye izinto endizikhumbulayo nendandizithanda ndisemncinane lutyelelo lwabakhonzi bexesha elizeleyo ekhayeni lethu. Sasisoloko sikulungele ukwamkela naluphi na undwendwe ukuba lunandiphe isidlo kunye nathi. Omnye umveleli wesiphaluka wandipha ingxowa yasentsimini xa ndandineminyaka elishumi ubudala. Ndisayixabisa loo ngxowa unanamhla.”
Licinga ngeminyaka yalo yeshumi elivisayo, eli Ngqina longezelela lisithi: “Abafana abaninzi ebandleni babefuna ukuba nenxaxheba kwimisebenzi yebandla, yaye umzekelo wabo wakhuthaza abanye bethu ukuba babe nomnqweno ofanayo.” Oontanga abafanelekileyo bamnceda lo uselula, njengehlumelo, ukuba akhule njengendoda efanelekileyo yomKristu efana nomthi. Bazali, ngaba nimema emakhayeni enu abantu abanokuba nempembelelo ekhuthazayo neyakhayo kubantwana benu?—Malaki 3:16.
Kakade ke, ayisithi sonke esinokuba nesabelo kubulungiseleli bexesha elizeleyo njengaba bantu bakhankanywe apha. Kodwa sonke sinokufunda ukumthanda uYehova ‘ngentliziyo yethu iphela nangomphefumlo wethu uphela nangengqondo yethu iphela.’ (Mateyu 22:37) Ukhetho esilwenzayo loontanga lunendima enkulu ekuhlakuleleni olo thando, ngaloo ndlela, kuqinisa ithemba lethu lobomi obungunaphakade.
Umdumisi wanikela indlela elula kodwa esebenzayo yokuphumelela ngokwenene ebomini esithi: “Hayi, uyolo lomntu ongahambiyo ngecebo labangendawo, ongemiyo endleleni yaboni, ongahlaliyo embuthweni yabagxeki! Yena unonelela umyalelo kaYehova; ucamanga ngomyalelo wakhe imini nobusuku; unjengomthi omiliselwe phezu kwemijelo yamanzi, onika isiqhamo sawo ngexesha lawo, ogqabi lawo lingabuniyo; konke akwenzayo kophumelela.”—INdumiso 1:1-3.
Esinjani ukuba sihle isiqinisekiso! Nangona singafezekanga kwaye sisenza iimpazamo, siya kuphumelela ebomini ukuba sivumela uYehova asikhokele size sixhakamfule ilungelo esilinikwe nguThixo lempembelelo eyakhayo yoontanga—“umanyano lwabazalwana [bethu] luphela ehlabathini.”—1 Petros 5:9.
[Umfanekiso okwiphepha 24]
Ibandla linempembelelo yoontanga eyakhayo
[Umfanekiso okwiphepha 25]
Bazali, khuthazani abantwana benu banxulumane noontanga abakhayo