Amaqhina KaThixo Nenjongo Yakhe
XA UBANI engayazi into ethile, uthi yinto; kodwa xa eyazi, uthi asiyonto. Yintoni le sithetha ngayo? Liqhina.
Kweli butho lanamhlanje leenkcuba-buchopho, abantu batyekele ekujongeni amaqhina njengomdlalo wabantwana, kodwa mandulo iqhina laliyinto “yokuvavanya ubulumko,” njengoko isitsho iThe Interpreter’s Dictionary of the Bible.—Thelekisa IMizekeliso 1:5, 6.
Kunokuba achaze ukuthanda okanye injongo yakhe ngendlela elula, maxa wambi uYehova ngabom uye asifihle isiprofeto, esebenzisa izifanokuthi, “iintetho ezintsonkothileyo,” okanye amaqhina ayinkohla. (INdumiso 78:2, King James Version; Numeri 12:8, The Emphasized Bible) Enyanisweni, ngoxa igama lesiHebhere elithetha iqhina lisetyenziswe izihlandlo ezili-17 kuphela eBhayibhileni, iZibhalo zizaliswe ngamaqhina nemizekeliso.
Amaqhina Amaninzi EBhayibhile
UKumkani uSolomon wachazwa njengowayekwazi ukucombulula neyona mibuzo intsonkothileyo, okanye amaqhina, awayebhekiswa kuye. (1 Kumkani 10:1, umbhalo osemazantsi weNW) Ngokuqinisekileyo oku kwakubangelwa bubulumko awabunikwa nguThixo. Ukuba inyanisile ingxelo yababhali-mbali bamandulo yokuba uSolomon wakha walahlekwa liqhina likaKumkani uHiram waseTire, kusenokuba oko kwenzeka emva kokuba ephulukene nomoya kaYehova ngenxa yokuwexuka kwakhe. Ngokufanayo uMgwebi uSamson wabonakala ewathanda amaqhina. Ngesinye isihlandlo, ezele ngamandla omoya oyingcwele, wenza iqhina elazitsho zankwantya iintshaba zikaThixo.—ABagwebi 14:12-19.
Noko ke, amaqhina amaninzi eBhayibhile, ngokungqalileyo anokuthanani neenjongo zikaYehova. Ngokomzekelo, khawuqwalasele iGenesis 3:15. Esi siprofeto, nesisesona usekelwe kuso umxholo weBhayibhile, ngokwaso siyinto entsonkothileyo, ‘imfihlelo engcwele.’ (Roma 16:25, 26) Ngaphezu kwako nje ukuba wabona imibono engaphezu kwamandla emvelo nezityhilelo, umpostile uPawulos wabona neenkalo ezithile zenjongo kaThixo ‘kuyilo olumfiliba,’ okanye ngokoqobo, ‘amazwi antsonkothileyo.’ (1 Korinte 13:12; 2 Korinte 12:1-4) Yaye kuthekani ngolindelo olungapheliyo lwentsinda-badala yenani lerhamncwa—‘elingamakhulu amathandathu anesithandathu’—elisuke nje lachazwa ngaphandle kwengcaciso kwiSityhilelo 13:18? Ngubani onako ukucombulula la maqhina, yaye anayiphi injongo?
Ukutyhila Iimfihlelo Ezingcwele
Kuninzi lwethu, ukubona sesona sivamvo sixabisekileyo kwezihlanu esinazo. Kodwa ngaphandle kokukhanya, phantse abantu bebengayi kukwazi ukubona. Phantse besiya kuba ziimfama. Kukwanjalo ke, nangengqondo yomntu. Inamandla amangalisayo okufanisa izinto, isebenzisa ingqiqo, ize ke, icombulule izinto ezinzima. Sekunjalo, kufuneka okuthile okungakumbi ukuze kutyhilwe iimfihlelo ezingcwele. Ngoxa abanye besenokunikela izicombululo kumaqhina eBhayibhile, nguMbhali wawo kuphela, uYehova, uThixo wokukhanya, onokutyhila intsingiselo yawo.—1 Yohane 1:5.
Ngelishwa, abantu basoloko benekratshi yaye abalindeli impendulo kaYehova. Bedidekile, abanye bafuna into eza kulola iingqondo zabo enoba asiyonyaniso, bafuna iimpendulo ezingekho kwiLizwi likaThixo. Ngokomzekelo, ubugqi bamaYuda njengoko buchazwe kwiCabala babuhlola intsingiselo yobugqi bamanani neyoonobumba bamagama esiHebhere. Kwelinye icala, amaGnostiki enkulungwane yesibini ayesebenzisa iZibhalo zesiHebhere nezesiGrike ukuzama ukufumana iintsingiselo ezifihlakeleyo kuzo.
Noko ke, uhlolisiso olunjalo, lwawakhokelela kwizithethe zabahedeni okanye kwiinkolelo luwatyhalela kude nenyaniso kaThixo. AmaGnostiki aqiqa ngelithi: ‘Ukuba ihlabathi lizaliswe bubungendawo, ngoko ke noMdali walo, uYahweh, akanakuba nguThixo olungileyo.’ Ngaba esi yayikuphela kwesona sigqibo sibhetele ayenokufikelela kuso? Hayi indlela engekho ngqiqweni ngayo indlela umntu acinga ngayo! Akumangalisi ke ngoko ukuba umpostile uPawulos xa wayesilwa neengcamango zabawexuki ezaveliswa kamva ngamahlelo amaGnostiki, abe walumkisa ngokungqongqo kwiileta zakhe esithi: “Musa ukuya ngaphaya kwezinto ezibhaliweyo”!—1 Korinte 4:6.
Ukutyhila ‘Iintetho Ezintsonkothileyo’
Kodwa, kutheni uThixo wokukhanya esebenzisa ‘iintetho ezintsonkothileyo’ nje? Indlela eliyiyo iqhina liwacel’ umngeni amandla engqondo kabani nendlela aqiqa ngayo. Ngoko ke, njengokuba efumaneka apha naphaya eZibhalweni njengezinto zokuhombisa ukutya kwisidlo sodidi oluphezulu, maxa wambi ayesetyenziselwa ukuvusa umdla wabaphulaphuli okanye enze isigidimi sidluliselwe ngendlela eqondakala ngakumbi. Kwezi meko, iingcaciso zidla ngokunikelwa ngokukhawuleza emva koko.—Hezekile 17:1-18; Mateyu 18:23-35.
UYehova unikela ubulumko ngesisa kodwa akaze akhethe. (Yakobi 1:5-8) Cinga ngencwadi yeMizekeliso, eyingqokelela yeentetho ezininzi ezintsonkothileyo eziphefumlelweyo zimbi zazo ezisenokujongwa njengamaqhina. Kuthabatha ixesha yaye kufuneka ucamngce ukuze uziqonde. Kodwa bangaphi abantu abazimiseleyo ukwenza loo mgudu? Ubulumko obukuzo bufunyanwa kuphela ngabo bazimiseleyo ukumba kuzo.—IMizekeliso 2:1-5.
Ngokufanayo noYesu wasebenzisa imizekeliso ukuze atyhile isimo sentliziyo sabo babemphulaphule. Wayengqongwe zizihlwele. Zaziwanandipha amabali akhe. Zaziyithanda imimangaliso yakhe. Kodwa, bangaphi ababekulungele ukuguqula indlela yabo yokuphila baze bamlandele? Hayi indlela ababohluke ngayo abafundi bakaYesu, ngokuphindaphindiweyo ababefuna ukuziqonda iimfundiso zikaYesu yaye bekulungele ukuzincama baze babe ngabalandeli bakhe!—Mateyu 13:10-23, 34, 35; 16:24; Yohane 16:25, 29.
Ukukhangela Ekukhanyeni
Omnye umbhali wathi: “Okubangela umdla kumaqhina, kukubonakala ukuba ayavisisana nala maxesha okukhanya.” Kule mihla sinelungelo elikhulu lokuba siphile kwixesha apho ‘ukukhanya kuye kwathi thaa’ kubantu bakaThixo. (INdumiso 97:11; Daniyeli 12:4, 9) Ngaba sinokulindela ngomonde kuYehova ukuze asityhilele iinjongo zakhe ngexesha lakhe? Okubaluleke ngakumbi kukuba, ngaba sikhawuleza senze utshintsho kubomi bethu xa sithe sayazi indlela esinokuzithoba ngayo ekuthandeni kukaThixo okutyhiliweyo? (INdumiso 1:1-3; Yakobi 1:22-25) Ukuba senjenjalo, uYehova uya kuyisikelela imigudu yethu, khon’ ukuze kanye njengokuba iindondo zisenza sikwazi ukuyibona kakuhle into ebesiyibona luzizi, umoya oyingcwele usibonise ngokucacileyo iinjongo ezintle zikaThixo kumehlo engqondo yethu, ukuze sikwazi ukubona ngokomoya.—1 Korinte 2:7, 9, 10.
Eneneni, amaqhina aseZibhalweni aphakamisa uYehova ‘njengoMtyhili weemfihlo.’ (Daniyeli 2:28, 29) Ngaphezu koko, ukwanguMphengululi wentliziyo. (1 Kronike 28:9) Akumele kusimangalise ukufumanisa ukuba ukutyhileka kokukhanya kwenyaniso kaThixo bekusoloko kuqhubela phambili. (IMizekeliso 4:18; Roma 16:25, 26) Kunokuba sifune ulwazi lwezinto ezinzulu zikaThixo kubugqi okanye kubulumko obungabhekele phi babantu, obunokusikhokelela kuphela kwilize, ngentembelo masikhangele kuYehova uThixo ukuze asityhilele ukukhanya kwenyaniso ‘kwiintetho ezintsonkothileyo’ zakhe, azise abakhonzi bakhe abanyanisekileyo iinjongo zakhe ezimangalisayo ngexesha lakhe alimisileyo.—Amosi 3:7; Mateyu 24:25-27.
[Inkcazelo Ngomfanekiso okwiphepha 26]
Biblia Hebraica Stuttgartensia, Deutsche Bibelgesellschaft Stuttgart