Wanceda Ukusasaza Ukukhanya “Ukusa Eziphelweni Zomhlaba”
UMPOSTILE uPawulos wayedla ngokusasaza ukukhanya “ukusa eziphelweni zomhlaba.” Ngenxa yoko, abaninzi ‘kwabo babenotyekelo olufanelekileyo ngobomi obungunaphakade baba ngamakholwa.’—IZenzo 13:47, 48; Isaya 49:6.
Umnqweno omkhulu wokusasaza ukukhanya kwakhona wabonakala kubomi bokuzinikela nemigudu engapheliyo yobuKristu kaWilliam Lloyd Barry, ilungu leQumrhu Elilawulayo lamaNgqina kaYehova. UMzalwan’ uBarry wafa ngoJulayi 2, 1999, ngoxa wayenesabelo ngokungqalileyo kwindibano yesithili eHawaii.
ULloyd Barry wazalelwa eNew Zealand ngoDisemba 20, 1916. Unina noyise baba nomdla omkhulu kwiinyaniso zeBhayibhile ezazikwiimpapasho zikaC. T. Russell, njengoko zazisasazwa yiWatch Tower Bible and Tract Society. Ngenxa yoko, uMzalwan’ uBarry wakhulela kwikhaya lamaKristu azinikeleyo.
Nangona wayenomdla kwimidlalo nakwimfundo, kwanakwinqanaba lokufumana isidanga kwezenzululwazi, uMzalwan’ uBarry wagcina ingqalelo yakhe ikwizinto zokomoya. Ngenxa yoko, ngoJanuwari 1, 1939, waqalisa inkonzo yexesha elizeleyo, esiba lilungu lentsapho yaseBheteli kwiofisi yoMbutho eOstreliya. Emva kokuba urhulumente ewuvalile umsebenzi woMbutho ngowe-1941, uMzalwan’ uBarry wazigcina exakekile kumsebenzi weofisi, maxa wambi esabelwa ukuba abhalele amanye amakholwa ukuze awakhuthaze. Kwakhona wayengumzekelo wokukhokela kubulungiseleli basesidlangalaleni.
NgoFebruwari 1942, uMzalwan’ uBarry watshata nomnye umkhonzi wexesha elizeleyo. Umfazi wakhe othandekayo, uMelba, uye ngokuthembeka wasebenza kunye naye kuyo yonke le minyaka kwiindawo ezininzi emhlabeni. Bathabatha inyathelo elikhulu lenkonzo kwintsimi yasemzini ngokuya kwiklasi ye-11 yeSikolo seBhayibhile seWatchtower saseGiliyadi eUnited States. Isabelo sabo yayiseso abaninzi babenokusigqala ‘njengesiseziphelweni zomhlaba’—eJapan. Emva kokufika ngoNovemba 1949, baqalisa ukukhonza njengabavangeli basemazweni kwizibuko lesixeko saseKobe. Ngelo xesha, ngabantu abali-12 kuphela ababeshumayela iindaba ezilungileyo eJapan. UMzalwan’ uBarry wafunda ulwimi neendlela zekhaya lakhe elitsha waza wabathanda kakhulu abantu baseJapan, awayekhonza nabo iminyaka engama-25 eyalandelayo. Uthando lwakhe ‘ngabo babenotyekelo olufanelekileyo ngobomi obungunaphakade’ lwabonakala ekukhuleni kobuzalwana bobuKristu eJapan, kwamnceda ukuba aphumelele ekongameleni isebe kangangamashumi eminyaka.
Phakathi kowe-1975, xa kwakukho amaNgqina kaYehova anokuba ngama-30 000 eJapan, abakwaBarry bathunyelwa eBrooklyn, eNew York. NjengomKristu othanjiswe ngomoya, uMzalwan’ uBarry wayemenyelwe ukuba akhonze njengelungu leQumrhu Elilawulayo lamaNgqina kaYehova. (Roma 8:16, 17) Amava akhe okubhala aba luncedo kakhulu kwindima yakhe entsha kwiSebe Lokubhala. Yaye amava akhe amaninzi gqitha kwimibandela yesebe neyamazwe ngamazwe amxhobisela ukuba abe negalelo elixabisekileyo njengelungu leKomiti Yokupapasha yeQumrhu Elilawulayo.
Kangangeminyaka, uMzalwan’ uBarry waqhubeka eyithanda iMpuma nabantu bayo. Abafundi beSikolo saseGiliyadi namalungu entsapho yaseBheteli bangaqiniseka ukuba iintetho zakhe namagqabaza akhe aya kubalaselisa amabali achukumisayo ngabaninzi abaye bakhonza kumsebenzi wobuvangeli basemazweni. Imisebenzi yokushumayela uBukumkani ‘eziphelweni zomhlaba’ yabonakala kakuhle njengoko ngehlombe uMzalwan’ uBarry wayebalisa amava akhe. Amanye awo achazwe kwibali lakhe lobuqu elipapashwe kwiMboniselo yesiNgesi kaSeptemba 15, 1960.
Siqinisekile ukuba ‘njengendlalifa emanyene noKristu’ umdla kaMzalwan’ uBarry kwabo ‘banotyekelo olufanelekileyo ngobomi obungunaphakade’ uya kuqhubeka. Kakade ke, uya kukhunjulwa kakhulu ngabo bebemazi nabebemthanda njengendoda yokomoya, ezinikele ngokwenene kuYehova nebinothando olufudumeleyo ngabantu bakaThixo. Sekunjalo, siyavuya kuba uMzalwan’ uBarry uye wanyamezela ethembekile de kwaba sekupheleni kobomi bakhe emhlabeni.—ISityhilelo 2:10.
[Umfanekiso okwiphepha 16]
ULloyd Barry noJohn Barr xa kwakukhululwa i-“Insight on the Scriptures” ngowe-1988
[Umfanekiso okwiphepha 16]
Abaphumeleleyo kwiklasi ye-11 yaseGiliyadi, bahlanganisana eJapan emva kweminyaka engama-40