Amandla Omthandazo
Kusekutshoneni kwelanga kwisixeko sakwaNahore kuMbindi Mpuma. Indoda yaseSiriya egama linguEliyezere ifika emthonjeni ongaphandle kwesixeko ihamba neenkamela ezilishumi. Nangona ngokungathandabuzekiyo ediniwe yaye enxaniwe, uEliyezere uxhalabele iintswelo zabanye. Uvela kwilizwe lasemzini eze kufunela unyana wenkosi yakhe umfazi. Ngaphezu koko, lo mfazi ufanele amfumane phakathi kwezalamane zenkosi yakhe. Uza kuwenza njani lo msebenzi unzima kangaka?
UELIYEZERE uyakholelwa kumandla omthandazo. Enokholo olungummangaliso olufana nolomntwana, ngokuzithoba wenza esi sicelo: “Yehova Thixo wenkosi yam uAbraham, nceda ukwenze oku ngawo lo mhla phambi kwam, uyenzele ububele bothando inkosi yam uAbraham. Yabona, ndimi ngasemthonjeni wamanzi, yaye iintombi zabantu besi sixeko ziyaphuma ukuza kukha amanzi. Maze kuthi ke ibhinqa eliselula endothi kulo, ‘Nceda uthobe ingqayi yakho, ndisele,’ lize ngenene lithi lona, ‘Sela, neenkamela zakho ndoziseza,’ ibe lilo olabele umkhonzi wakho, uIsake; ndize ngale ndlela ndazi mna ngoko ukuba ubonakalise uthando olunyanisekileyo kwinkosi yam.”—Genesis 24:12-14.
Intembelo anayo uEliyezere kumandla omthandazo ayilolize. Kaloku, ibhinqa lokuqala ngqa eliza equleni ngumzukulwana womntakwabo Abraham! Igama lalo nguRebheka, yaye alitshatanga, liziphethe kakuhle ibe limanz’ andonga. Okuphawulekayo kukuba, alaneli nje kukupha uEliyezere amanzi kodwa ngobubele liseza neenkamela zakhe zonke. Kamva, emva kokuba kwenziwe uthethathethwano nentsapho, uRebheka ngokuzithandela uyavuma ukuhamba noEliyezere aye elizweni elikude aye kuba ngumfazi kaIsake unyana ka-Abraham. Enjani yona ukubalasela indlela ecacileyo yokuphendula umthandazo kaEliyezere ngelo xesha apho uThixo wayengenelela ngokungummangaliso ngamaxesha athile kwiziganeko!
Kuninzi esinokukufunda kulo mthandazo kaEliyezere. Wabonisa ukholo olubalaseleyo, ukuthobeka nenkxalabo yakhe yokungazingci ngeentswelo zabanye. Umthandazo kaEliyezere wabonisa nokuzithoba kwakhe kwindlela uYehova aqhubana ngayo noluntu. Ngokungathandabuzekiyo wayesazi ukuba uThixo wayemthanda ngokukhethekileyo uAbraham esazi nangesithembiso Sakhe sokuba kwixa elizayo lonke uluntu lwaluya kusikelelwa ngoAbraham. (Genesis 12:3) Ngaloo ndlela, uEliyezere waqalisa umthandazo wakhe ngala mazwi: “Yehova Thixo wenkosi yam uAbraham.”
UYesu Kristu wayeyinzala ka-Abraham olwaluza kusikelelwa ngayo lonke uluntu oluthobelayo. (Genesis 22:18) Ukuba sifuna imithandazo yethu iphendulwe namhlanje, kufuneka sibonise ukuba ngokuzithoba siyayiqonda indlela uThixo aqhubana ngayo noluntu ngoNyana wakhe. UYesu Kristu wathi: “Ukuba nihlala nimanyene nam nawo amazwi am ahlale kuni, celani nakuphi na enikunqwenelayo yaye kuya kwenzeka ngenxa yenu.”—Yohane 15:7.
Umlandeli kaKristu owazibonela ngokwakhe ubunyaniso bala mazwi kaYesu ngumpostile uPawulos. Ngokuqinisekileyo ukukholelwa kwakhe kumandla omthandazo akuzange kube lilize. Wakhuthaza amanye amaKristu ukuba aphose onke amaxhala awo kuThixo ngomthandazo waza wakungqina oko esithi: “Ezintweni zonke ndinamandla ngenxa yalowo undomelezayo.” (Filipi 4:6, 7, 13) Ngaba oku kuthetha ukuba zonke izinto uPawulos awazicela ngomthandazo kuThixo wazinikwa? Makhe sibone.
Akunikwa Yonke Into Oyicelayo
Ngoxa wayekubulungiseleli bakhe bokungazingci, uPawulos wabandezeleka koko wakuchaza ‘njengeliva enyameni.’ (2 Korinte 12:7) Oku kusenokuba kwakuyimbandezelo engqondweni nangokweemvakalelo eyayibangelwa ngabachasi ‘nabazalwana bobuxoki.’ (2 Korinte 11:26; Galati 2:4) Okanye kusenokwenzeka ukuba yayiyintlungu yasemzimbeni ngenxa yeliso lakhe elalingapholi. (Galati 4:15) Enoba yayiyintoni na, eli ‘liva enyameni’ lalimenza abe buthathaka uPawulos. Wabhala wathi: “Ndayibongoza izihlandlo ezithathu iNkosi ukuba lisuke kum.” Noko ke, uPawulos akazange akunikwe oko wayekucela. UPawulos waxelelwa ukuba iingenelo zokomoya awayesele ezifumene kuThixo, njengamandla okunyamezela iimvavanyo, zazanele. Ukongezelela, uThixo wathi: “Amandla am enziwa agqibelele kubuthathaka.”—2 Korinte 12:8, 9.
Yintoni esiyifundayo kumzekelo kaEliyezere nokaPawulos? UYehova uThixo uyayiphendula ngenene imithandazo yabo bafuna ukumkhonza ngokuthobeka. Kodwa oku akuthethi ukuba usoloko ebanika oko bakucelayo ngenxa yokuba uThixo ubona nezinto ezikude. Ukwazi ngaphezu kokuba sikwazi oko kusifaneleyo. Okona kubaluleke ngakumbi, usoloko esenza ngokuvisisana nenjongo yakhe echazwe eBhayibhileni.
Ixesha Lokuphilisa Ngokomoya
UThixo uthembisa ukuphilisa uluntu kuzo zonke izifo zokwenyama, zengqondo, nezeemvakalelo ebudeni boLawulo Lweminyaka Eliwaka loNyana wakhe lwasemhlabeni. (ISityhilelo 20:1-3; 21:3-5) AmaKristu anyanisekileyo alilinde ngolangazelelo eli kamva lithenjisiweyo, enentembelo epheleleyo kumandla kaThixo aza kuzalisekisa oku. Ngoxa engakulindelanga ngoku oko kuphiliswa ngokungummangaliso, ayathandaza kuThixo ukuze awathuthuzele aze awomeleze ukuba akwazi ukuhlangabezana neemvavanyo. (INdumiso 55:22) Xa egula, asenokuthandazela ulwalathiso lukaThixo ukuba afumane olona nyango lufanelekileyo anokukwazi ukulufikelela ngokwemali anayo.
Ezinye iinkonzo zikhuthaza abo bagulayo ukuba bathandazele ukuphiliswa ngoko nangoko, zisalatha ekuphiliseni ngokungummangaliso okwenziwa nguYesu nabapostile bakhe. Kodwa loo mimangaliso yenziwa ngenxa yenjongo ekhethekileyo. Yayingqina ukuba uYesu Kristu wayenguMesiya wokwenene yaye yabonisa ukuba inkoliseko kaThixo yayisusiwe kuhlanga lwamaYuda yanikwa ibandla elitsha lamaKristu. Emva phaya, iziphiwo zemimangaliso zazifuneka ukuze zomeleze ukholo lwebandla elitsha lamaKristu. Lwathi lwakomelela olo sana, ngokungathi kunjalo, lwakhula, ‘zabhangiswa’ iziphiwo zemimangaliso.—1 Korinte 13:8, 11.
Kweli xesha libalulekileyo, uYehova uThixo unikela ulwalathiso kubakhonzi bakhe njengoko besenza owona msebenzi ubalulekileyo wokuphilisa ngokomoya. Ngoxa lisekho ithuba, abantu kufuneka basabele ngokukhawuleza kwesi sibongozo: “Funani uYehova ngoxa esenokufunyanwa. Mbizeni ngoxa esekufuphi. Umntu ongendawo makashiye indlela yakhe, nomntu owenzakalisayo makashiye iingcamango zakhe; makabuyele kuYehova, oya kuba nenceba kuye, kuThixo wethu, kuba uya kuxolela ngokukhulu.”—Isaya 55:6, 7.
Ukuphiliswa ngokomoya kwaboni abaguqukayo kwenziwa ngokushunyayelwa kweendaba ezilungileyo zoBukumkani bukaThixo. (Mateyu 24:14) Ngokunika abakhonzi bakhe amandla okuqhubeka nalo msebenzi wokusindis’ ubomi, uYehova uThixo unceda izigidi zabantu eziphuma kuzo zonke iintlanga ukuba ziguquke kwizono zazo zize zibe nolwalamano oluhle naye ngaphambi kokuba le nkqubo ingendawo iphele. Bonke abo bakuthandazela ngokunyanisekileyo oko kuphiliswa ngokomoya kunye nabo bonke abathandazela uncedo lokwenza lo msebenzi wokuphilisa, imithandazo yabo iyaphendulwa.
[Inkcazelo Ngomfanekiso okwiphepha 3]
Eliezer and Rebekah/The Doré Bible Illustrations/Dover Publications