Ngaba Abanogonyamelo Ubajonga Ngendlela UThixo Abajonga Ngayo?

Kudala abantu bewabuka yaye bewabeka amadoda anamandla, amadoda azizigantsontso nakhaliphileyo. Enye yaloo madoda yayiliqhawe lasentsomini leGrisi yamandulo, uHeroklesi, okanye uHercules njengoko wayesaziwa ngelo gama kumaRoma.

UHEROKLESI lo wayeyindumasi yeqhawe lamaqhawe, elona gorha lakha lanamandla. Ngokutsho kwale ntsomi, wayesisidalwa esinamandla aphakathi kothixo nomntu, engumntwana wothixo wamaGrike uZeyus, yaye unina, uAlcmene, engumntu. Izenzo zakhe zobugorha zaqala xa wayeselusana elele kwibhedana yakhe. Xa uthixokazi othile owayenomona wathumela iinyoka ezimbini ezinkulu ukuba zize kumbulala, uHeroklesi wazikrwitsha. Kamva ebomini walwa amadabi, woyisa amagongqongqo waza walwa nokufa ukuze asindise umhlobo wakhe. Watshabalalisa izixeko, wadlwengula amabhinqa, waphosa inkwenkwe ethile ezantsi esenqabeni waza wabulala umkakhe nabantwana bakhe.

Nangona engengomntu wokoqobo, kwakude kudala uHeroklesi wasentsomini kwakuthethwa ngaye kumabali amazwe amandulo awayesaziwa ngamaGrike. AmaRoma ayemnqula njengothixo; abarhwebi nabakhenkethi bethandaza kuye ukuze babe nenkqubela yaye bakhuseleke engozini. Amabali abalisa ngezenzo zakhe aye abangel’ umdla ebantwini kangangamawaka eminyaka.

Imvelaphi Yale Ntsomi

Ngaba amabali angoHeroklesi namanye amaqhawe asentsomini asekelwe kwinyaniso? Kungenzeka ukuba kunjalo ngangqiqo ithile. IBhayibhile isixelela ngexesha, ngasebutsheni bembali yabantu, apho ngokwenene kwakukho “oothixo” kunye “nezidalwa ezinamandla aphakathi kothixo nomntu” emhlabeni.

Echaza elo xesha, uMoses wabhala: “Kuthe bakuqala ukwanda abantu phezu komhlaba bazala neentombi, baziphawula ke oonyana boThixo oyinyaniso iintombi zabantu, ukuba zintle ngenkangeleko; baza bazithabathela abafazi kuzo zonke abazikhethayo.”—Genesis 6:1, 2.

Abo “nyana boThixo oyinyaniso” babengengobantu; babengoonyana abaziingelosi bakaThixo. (Thelekisa uYobhi 1:6; 2:1; 38:4, 7.) Umbhali weBhayibhile uYude ubalisa esithi iingelosi ezithile ‘azisigcinanga isigxina sazo santlandlolo, zasuka zayishiya indawo yazo efanelekileyo yokuhlala.’ (Yude 6) Ngamany’ amazwi, zashiya indawo eziyabelweyo kwintlangano kaThixo yasezulwini kuba zakhetha ukuhlala neenzwakazi zasemhlabeni. UYude wongezelela esithi ezi ngelosi zinemvukelo zazifana nabantu baseSodom naseGomora, ‘abahenyuza ngokugqithiseleyo baza balandela inyama ngokuchasene nemvelo.’—Yude 7.

IBhayibhile ayinikeli zinkcukacha zizeleyo ngezinto ezazisenziwa zezi ngelosi zingathobeliyo. Noko ke, iintsomi zamandulo zaseGrisi nakwezinye iindawo zichaza oothixo noothixokazi abaliqela ababephila phakathi kwabantu, ababebonakala nababengabonakali. Xa babesiba ngabantu, babesiba bahle ngolona hlobo. Babesitya, besela, balale yaye besiba neentlobano zesini bodwa okanye nabantu. Nangona babefanele babe ngcwele baze bangafi, babexoka yaye beqhatha, bexabana baze balwe, berhwebesha yaye bedlwengula. Ezo ntsomi, nangona ziye zaqholwa zaza zagqwethwa, zisenokuba zichaza iimeko zangaphambi koMkhukula ezichazwe kwincwadi yeBhayibhile yeGenesis.

Amadoda Akudala Anamandla, Adumileyo

Iingelosi ezingathobeliyo zambatha imizimba yenyama zaza zaba neentlobano zesini namabhinqa, ibe loo mabhinqa aba nabantwana. Yayingengobantwana baqhelekileyo aba. BabeziiNefili, bengumxube ozalwa ngumntu nengelosi. Ingxelo yeBhayibhile ithi: “Kwaye kukho iiNefili emhlabeni ngaloo mihla, yaye emva koko, xa oonyana boThixo oyinyaniso baba neentlobano zokwazana neentombi zabantu zaza zabazalela oonyana, baba ngamadoda akudala anamandla, nadumileyo.”—Genesis 6:4.

Igama lesiHebhere eliguqulelwe ngokuthi “nefili” lithetha “abawisi,” abo bawisa abanye, okanye ababangela ukuba abanye bawe, ngokubagonyamela. Ngaloo ndlela, akumangalisi ukuba ingxelo yeBhayibhile yongezelele isithi: “Umhlaba wawuzaliswe lugonyamelo.” (Genesis 6:11) Izidalwa ezinamandla aphakathi kwawomntu nothixo, ezinjengoHeroklesi neqhawe laseBhabhiloni uGilgamesh, zifana kakhulu neeNefili.

Phawula ukuba iiNefili zazibizwa ngokuba ‘ngamadoda anamandla nadumileyo.’ Ngokungafaniyo nendoda elilungisa enguNowa, eyayiphila ngelo xesha nayo, iiNefili zazingenamdla wokwenzela uYehova udumo. Zazinomdla kudumo, uzuko nakwigama lazo. Ngokusebenzisa kwazo amandla, ngokuqinisekileyo okwakubandakanya ugonyamelo nokuphalazwa kwegazi, zalufumana udumo ezazilufuna kubantu abangenabuthixo ababephila nazo. Zazingamaqhawe ngomhla wazo—zisoyikwa, zihlonelwa yaye zibonakala zingenakoyiswa mntu.

Ngoxa iiNefili kunye nooyise abaziingelosi ezazithob’ isidima zisenokuba zalufumana udumo kubantu ababephila nazo, ngokuqinisekileyo zazingadumanga emehlweni kaThixo. Indlela ezaziphila ngayo yayinezothe. Ekugqibeleni, uThixo wathabatha amanyathelo nxamnye nezo ngelosi ziwileyo. Umpostile uPetros wabhala: “UThixo akazange ayeke ukohlwaya iingelosi ezonayo, kodwa, wazinikela kwimihadi yentsunguzi yobumnyama, ngokuthi aziphose eTartaro, ukuze zibekelwe umgwebo; engazange ayeke nokohlwaya ihlabathi lamandulo, kodwa wagcina uNowa, umshumayeli wobulungisa ekhuselekile kunye nabanye abasixhenxe xa wazisa unogumbe phezu kwehlabathi labantu abangenabuthixo.”—2 Petros 2:4, 5.

Kwathi kwakufika uMkhukula wehlabathi lonke, iingelosi ezinemvukelo zambatha imizimba yomoya zaza zabuyela kwelemimoya zihlazeke zinjalo. UThixo wazohlwaya ngokuzithintela ukuba zingaphindi zambathe imizimba yabantu. IiNefili, inzala yeengelosi ezingazange zithobele ezazinamandla angaphaya kwawomntu, zatshabalala zonke. NguNowa nentsapho yakhe encinane kuphela abasindayo ngoNogumbe.

Amadoda Odumo Ale Mihla

Namhlanje, oothixo kunye nezidalwa eziphakathi kothixo nomntu azisekho emhlabeni. Noko ke, ugonyamelo luseluninzi. Amadoda odumo ale mihla azukiswa ngeencwadi, ngemifanekiso eshukumayo, ngomabonwakude nangomculo. Awayicingi nokuyicinga into yokuphethulela omnye umntu nesinye isidlele, ukuthanda iintshaba zawo, ukudala uxolo, ukuxolela, okanye ukucezela kude kugonyamelo. (Mateyu 5:39, 44; Roma 12:17; Efese 4:32; 1 Petros 3:11) Kunoko, abo banamandla bale mihla bayabukwa ngenxa yokomelela nangenxa yobuchule babo bokulwa, ukuziphindezelela nokulwa ugonyamelo ngogonyamelo oluthe chatha.a

Indlela uThixo abajonga ngayo abanjalo isafana naleyo yomhla kaNowa. UYehova akabathandi abo bathanda ugonyamelo, engonwatyiswa kananjalo zizenzo zabo. Umdumisi wavuma ingoma esithi: “UYehova uhlolisisa lowo ulilungisa kwanalowo ungendawo, yaye umphefumlo Wakhe umthiyile ngokuqinisekileyo nabani na othanda ugonyamelo.”—INdumiso 11:5.

Uhlobo Olwahlukileyo Lokomelela

Indoda eyahluka ngokupheleleyo kumadoda anamandla nanogonyamelo ngoyena mntu udumileyo kwabakha baphila, uYesu Kristu, indoda yoxolo. Xa wayesemhlabeni ‘akenzanga lugonyamelo.’ (Isaya 53:9) Xa iintshaba zakhe zeza kumbamba kumyezo waseGetsemane, abalandeli bakhe babephethe amakrele. (Luka 22:38, 47-51) Ngebabeyile ibutho elithile elaliza kulwa ukuze anganikelwa kumaYuda.—Yohane 18:36.

Enyanisweni, umpostile uPetros wakhupha ikrele lakhe ukuze akhusele uYesu, kodwa uYesu wathi kuye: “Buyisela ikrele lakho endaweni yalo, kuba bonke abathabatha ikrele baya kutshabalala ngekrele.” (Mateyu 26:51, 52) Ewe, ugonyamelo luzala olunye, njengoko imbali yabantu iye yabonisa ngokuphindaphindiweyo. Nangaphandle kwesibakala sokuba wayenokukwazi ukuzikhusela ngezixhobo, uYesu wayenayo nenye indlela yokuzikhusela. Emva koko wathi kuPetros: “Ucinga ukuba andinako ukubongoza uBawo andibonelele ngawo lo mzuzu ngemikhosi yeengelosi engaphezu kweshumi elinesibini?”—Mateyu 26:53.

Kunokuba abhenele kugonyamelo okanye ekukhuselweni ziingelosi, uYesu wavuma ukuba abanjwe ngabo bambulalayo. Ngoba? Esinye sezizathu yayikukuba wayesazi ukuba lalingekafiki ixesha lokuba uYise osemazulwini aphelise izenzo zobubi emhlabeni. Kunokuba awuthabathele ezandleni zakhe loo mbandela, uYesu wakholosa ngoYehova.

Ukwenjenjalo kwakungathethi kuthi ubuthathaka kodwa kwakuthetha ukuba unobuntu obomeleleyo. UYesu wabonakalisa ukholo olunamandla lokuba uYehova wayeza kuzilungisa izinto ngexesha Lakhe nangendlela afuna ngayo. Ngenxa yokuthobela kwakhe, uYesu waphakanyiselwa kwisikhundla sodumo esingaphantsi kwesikaYehova kuphela. Umpostile uPawulos wabhala wenjenje ngokuphathelele uYesu: “Wazithoba kwada kwasa ekufeni, ewe, ukufa kwisibonda sentuthumbo. Ngenxa kanye yesi sizathu uThixo wamphakamisela kwisigxina esongamileyo waza ngobubele wamnika igama elingaphezu kwawo onke amanye amagama, ukuze egameni likaYesu agobe onke amadolo abo basezulwini nawabo basemhlabeni nawabo baphantsi komhlaba, zize zonke iilwimi zivume ekuhleni ukuba uYesu Kristu uyiNkosi nto leyo eluzuko kuThixo uYise.”—Filipi 2:8-11.

Idinga LikaThixo Lokuphelisa Ugonyamelo

AmaKristu okwenyaniso aphila ngokulandela umzekelo kunye neemfundiso zikaYesu. Akabuki okanye axelise amadoda ehlabathi adumileyo nanogonyamelo. Ayazi ukuba ngexesha elifanelekileyo likaThixo, abanjalo baya kushenxiswa ngonaphakade, kanye njengokuba ngokuqinisekileyo abangendawo bashenxiswa ngomhla kaNowa.

UThixo unguMdali womhlaba noluntu. UkwanguMongami ofanelekayo. (ISityhilelo 4:11) Ukuba ijaji engumntu inegunya elingokwasemthethweni lokuwisa isigwebo senkundla, uThixo unegunya elide langaphezulu lokwenjenjalo. Ukuhlonela kwakhe imigaqo yakhe yobulungisa, kunye nokubathanda kwakhe abo bamthandayo, kuya kumshukumisela ekubeni aphelise ubungendawo kunye nabo babuqheliselayo.—Mateyu 13:41, 42; Luka 17:26-30.

Oku kuya kukhokelela kuxolo oluhlala luhleli emhlabeni, uxolo olusekelwe ngokuqinileyo kokusesikweni nakubulungisa. Oku kwaxelwa kwangaphambili kwisiprofeto esaziwayo esingoYesu Kristu esithi: “Sizalelwe umntwana, sinikwe unyana; yaye ukuphatha njengenkosana kuya kuba segxalabeni lakhe. Igama lakhe liya kubizwa ngokuba nguMcebisi Omangalisayo, uThixo Onamandla, uBawo ongunaPhakade, iNkosana yoXolo. Akayi kuyeka ukuphatha njengenkosana, noxolo aluyi kuphela etroneni kaDavide nasebukumkanini bakhe ukuze bumiselwe ngokuqinileyo nokuze buxhaswe ngokusesikweni nangobulungisa, ukususela ngoku kuse kwixesha elingenammiselo. Yona kanye inzondelelo kaYehova wemikhosi iya kukwenza oku.”—Isaya 9:6, 7.

Ngoko ke, ngesizathu esibambekayo amaKristu ayasithobela isiluleko sakudala esithi: “Musa ukuyimonela indoda enogonyamelo, unganyuli nayiphi na kwiindlela zayo. Kuba umntu otenxayo uyinto ecekisekayo kuYehova, kodwa ukusondelelana naye kokwabo bathe tye.”—IMizekeliso 3:31, 32.

[Umbhalo osemazantsi]

[Amagama acatshulweyo akwiphepha 29]

ABO BANAMANDLA KULE MIHLA BAYABUKWA NGENXA YOKOMELELA KWABO NANGENXA YOKUKWAZI KWABO UKULWA UGONYAMELO NGOGONYAMELO OLUTHE CHATHA

[Inkcazelo Ngomfanekiso okwiphepha 26]

Alinari/Art Resource, NY