Imitshato Evuyisayo Ezukisa UYehova

Uwelsh Noelthea Batshatela Esoweto, Emzantsi Afrika, Ngowe-1985. Ngokufuthi Bakhangela Kwialbham Yabo Yomtshato Nentombi Yabo, Uzinzi, Baze Bacinge Ngolo Suku Luvuyisayo. Uzinzi Uyakuthanda Ukuchaza Iindwendwe Ezazisemtshatweni Yaye Uyithanda Ngokukhethekileyo Imifanekiso Kanina Enxibe Eyinzwakazi.

UMTSHATO waqalisa ngentetho yomtshato eyanikelwa kwiholo yasekuhlaleni eSoweto. Kwandula ke kwacula ikwayara yolutsha olungamaKristu iingoma zokudumisa uThixo ngendlela eyondeleleneyo. Ngokulandelayo, iindwendwe zanandipha isidlo ngoxa kwakudlalelwa phantsi iikhasethi zeengoma zoBukumkani. Akuzange kuhanjiswe iziselo ezinxilisayo, yaye kwakungekho mculo ungxolayo nokungqungqa. Kunoko, iindwendwe zakunandipha ukunxulumana kunye nokuvuyisana nesi sibini. Kukonke oku kwaqhubeka malunga neeyure ezintathu. URaymond, umdala ongumKristu uthi: “Lowo ngumtshato endiya kuhlala ndiwukhumbula ngovuyo.”

Ngexesha lomtshato wabo, uWelsh noElthea babengamatsha-ntliziyo kwisebe laseMzantsi Afrika leWatch Tower Bible and Tract Society. Babengenakukwazi ukwenza isihikahika somtshato. Amanye amaKristu aye akhetha ukushiya inkonzo yexesha elizeleyo aze afumane umsebenzi wengqesho ukuze ahlawulele iindleko zomtshato omkhulu. Ngoko ke, uWelsh noElthea abazisoli kuba bakhetha ukwenza umtshato omncinane kuba kwabavumela baqhubeka bekhonza uThixo njengabalungiseleli bexesha elizeleyo de bazala uZinzi.

Noko ke, kuthekani ukuba isibini sikhetha ukuba nomculo wehlabathi nomngqungqo kumtshato waso? Kuthekani ukuba sifuna kubekho iwayini okanye ezinye iziselo ezinxilisayo? Kuthekani ukuba singakwazi ukwenza isihikahika somtshato nonobugocigoci? Sinokuqinisekisa njani ukuba esi siganeko siya kuba sisihlandlo esivuyisayo esifanele abakhonzi bakaThixo? Imibuzo enjalo ifuna ukuhlolisiswa ngenyameko, kuba iBhayibhile ithi: “Enoba niyatya okanye niyasela okanye nenza nantoni na eyenye, zonke izinto zenzeleni uzuko lukaThixo.”—1 Korinte 10:31.

Ukuphepha Isiyunguma

Kunzima ukucinga ngomtshato ongonwabisiyo. Noko ke, kukho ubungozi obukhulu bokubaxwa kwezinto nokuba nesiyunguma esingalawulekiyo. Kwimitshato emininzi yabo bangengawo amaNgqina, kwenzeka izinto ezingamzukisiyo uThixo. Ngokomzekelo, ukusetyenziswa kotywala de kunxilwe kuqhelekile. Okubuhlungu kukuba oku kuye kwenzeka nakweminye imitshato yamaKristu.

IBhayibhile ilumkisa isithi “singumxokozelisi isiselo esinxilisayo.” (IMizekeliso 20:1) Igama lesiHebhere eliguqulelwe ngokuthi “umxokozelisi” lithetha “ukwenza ingxolo.” Ukuba utywala bungenza umntu omnye angxole, khawufane ucinge ngoko bunokukwenza kwisihlwele esikhulu sabantu abandawonye baze basele kakhulu! Licacile elokuba, ngokulula izihlandlo ezinjalo zingaphumela ‘kwiindywala, iziyunguma, nezinto ezinjengezi,’ ezibhalwe eBhayibhileni ‘njengemisebenzi yenyama.’ Imikhwa enjalo ingathintela nabani na ongaguqukiyo ukuba afumane ubomi obungunaphakade phantsi kolawulo loBukumkani bukaThixo.—Galati 5:19-21.

Igama lesiGrike eliguqulelwe ngokuthi “isiyunguma” lalisetyenziswa ukuchaza ungcelele lolutsha olunxilileyo esitratweni nolunengxolo olwalucula, lungqungqa yaye ludlala umculo. Ukuba utywala budlal’ abantwana emtshatweni, yaye ukuba kukho umculo ongxolayo nokungqungqa okungasikelwanga mda, kukho ingozi yokuba esi sihlandlo siya kuba sisiyunguma. Kwimeko enjalo, ngokulula ababuthathaka basenokuwela esilingweni baze benze eminye imisebenzi yenyama ‘enjengokuhenyuza, ukungahlambuluki, ihambo evakalala okanye ukugqajukelwa yimisindo.’ Yintoni enokwenziwa ukuthintela imisebenzi enjalo yenyama ekupheliseni ulonwabo lomtshato wamaKristu? Ukuze siphendule lo mbuzo, makhe siqwalasele oko iBhayibhile ikuthethayo ngomtshato othile.

Umtshato UYesu Awaya Kuwo

UYesu nabafundi bakhe bamenywa emtshatweni eKana yaseGalili. Basamkela esi simemo, yaye noYesu waba negalelo kulonwabo lwesi sihlandlo. Xa kwaphela iwayini, ngommangaliso wayongeza yaye yayiyeyodidi oluphezulu. Alithandabuzeki elokuba okwasalayo, emva komtshato, kwanceda umyeni nentsapho yakhe kangangexesha elithile.—Yohane 2:3-11.

Sinezifundo eziliqela esingazifunda kumtshato awaya kuwo uYesu. Okokuqala, uYesu nabafundi bakhe abazange baye kumsitho womtshato bengamenywanga. IBhayibhile ichaza ngokukhethekileyo ukuba babemenyiwe. (Yohane 2:1, 2) Ngokukwanjalo, kwimizekeliso emibini yomsitho womtshato, ngokuphindaphindiweyo uYesu wathetha ngeendwendwe njengezikhoyo kuba zazimenyiwe.—Mateyu 22:2-4, 8, 9; Luka 14:8-10.

Kwamanye amazwe kulisiko ukuba bonke abantu basekuhlaleni bazive bekhululekile ukuya kumsitho womtshato enoba bamenyiwe okanye akunjalo. Noko ke, oku kusenokuphumela kwiingxaki zemali. Isibini esingenamali sisenokuzifaka ematyaleni ukuze siqiniseke ukuba kukho ukutya neziselo ezaneleyo zesihlwele esingasikelwanga mda. Ngoko ke, ukuba isibini esingamaKristu sigqiba ekubeni sibe netheko elincinane elineendwendwe ezilinani elilinganiselweyo, amaKristu akhonza naso angamenywanga afanele akuqonde aze akuhlonele oku. Enye indoda eyatshata eKapa, eMzantsi Afrika, ikhumbula imema iindwendwe ezingama-200 emtshatweni wayo. Noko ke, kwafika ezingama-600, yaye ngokukhawuleza baphelelwa kukutya. Phakathi kwabo bangamenywanga kwakukho ibhasi ezele ziindwendwe ezazikhenketha eKapa ngaloo mpela-veki yomtshato. Umkhenkethisi kule bhasi ngandlel’ ithile wayesisalamane somtshakazi yaye wayekholelwa kukuba wayenelungelo lokuza neli qela ngaphandle kokuthetha nomtshakazi okanye umyeni!

Ngaphandle kokuba kuchaziwe ukuba wonke umntu wamkelekile ukuza kwitheko, umlandeli wokwenyaniso kaYesu uya kukuphepha ukuya kwitheko lomtshato engamenywanga okanye ukutya ukutya nokusela iziselo ezilapho ezenzelwe iindwendwe ezimenyiweyo. Abo bazama ukuya bengamenywanga bafanele bazibuze, ‘Ukuba ndiya kulo msitho womtshato ngaba oko akusayi kubonisa ukungasithandi esi sibini sisandul’ ukutshata? Ngaba andisayi kubangela iingxaki okanye ndiphelise ulonwabo lwesi sihlandlo?’ Kunokuba akhathazeke kuba engamenywanga, umKristu oqondayo ngothando angathumela incwadi evuyisana nesi sibini aze asinqwenelele intsikelelo kaYehova. Usenokucinga kwanokunceda esi sibini ngokusithumelela isipho ukuze songeze kulonwabo losuku lomtshato waso.—INtshumayeli 7:9; Efese 4:28.

Yimbopheleleko Kabani?

Kwezinye iindawo zeAfrika, kulisiko ukuba ibe zizalamane ezikhulileyo ezisingatha amalungiselelo omtshato. Isibini sisenokukuvuyela oku, ekubeni kusisusela umthwalo wemali. Kwakhona sisenokuvakalelwa kukuba kusikhulula kwimbopheleleko yayo nantoni na enokwenzeka. Noko ke, ngaphambi kokwamkela naluphi na uncedo oluvela kwizalamane ezineenjongo ezintle, isibini sifanele siqiniseke ukuba iminqweno yaso iza kuhlonelwa.

Nangona uYesu wayenguNyana kaThixo ‘owehla evela ezulwini,’ akukho nantoni na ebonisa ukuba wathabathela kuye waza wanikela ulwalathiso kwinkoliso yezinto kumtshato waseKana. (Yohane 6:41) Kunoko, ingxelo yeBhayibhile isixelela ukuba othile wamiselwa ukuba abe ‘ngumalathisi wetheko.’ (Yohane 2:8) Ngoko ke, le ndoda yiyo eyayimele iphendule kwintloko-ntsapho entsha, umyeni.—Yohane 2:9, 10.

Izalamane ezingamaKristu zifanele ziyihlonele intloko emiselwe nguThixo yentsapho entsha. (Kolose 3:18-20) Yiyo emele ibe nembopheleleko yoko kwenzekayo emtshatweni wayo. Ngokwemvelo, umyeni ufanele abe sengqiqweni yaye, ukuba kuyenzeka, azame ukufeza iminqweno yomtshakazi wakhe, abazali bakhe, nabantu basebukhweni. Sekunjalo, ukuba izalamane zibetha ngenqindi phantsi zisithi zifuna ukwenza izinto ezingavisisaniyo neminqweno yeso sibini, ngoko eso sibini sisenokungalwamkeli uncedo lwazo size sizihlawulele umtshato waso omncinane. Ngale ndlela akukho nto inokwenzeka enokushiya eso sibini sineenkumbulo ezingemnandi. Ngokomzekelo, kumtshato wamaKristu eAfrika, isalamane esingakholwayo esasingumququzeli kweli theko senza umbulelo kwizinyanya ezifileyo!

Maxa wambi isibini esitshatileyo siyahamba siye kwiholide yabasandul’ ukutshata ngaphambi kokuba umsitho womtshato uphele. Kwimeko enjalo, umyeni ufanele alungiselele abantu abanembopheleleko ukuze baqiniseke ukuba kugcinwa imilinganiselo yeBhayibhile yaye umbhiyozo uphela ngexesha elisengqiqweni.

Ukuceba Ngenyameko Nokulungelelana

Kuyabonakala ukuba kwakukuninzi ukutya okumnandi kumtshato uYesu awaya kuwo, kuba iBhayibhile ithi yayingumsitho womtshato. Njengoko sele kukhankanyiwe, kwakukho newayini eninzi. Alithandabuzeki elokuba kwakukho umculo ofanelekileyo yaye kungqungqwa ngendlela enesidima kuba oku bekuyinto eqhelekileyo kubomi bamaYuda. UYesu wakubonisa oku ngomzekeliso wakhe odumileyo wonyana wolahleko. Ubawo osisinhanha kwelo bali wayonwabe kakhulu ngokubuya konyana wakhe oguqukileyo kangangokuba wathi: ‘Masitye, siziyolise.’ Ngokokutsho kukaYesu, lo mbhiyozo waquka “ikonsathi yomculo nokungqungqa.”—Luka 15:23, 25.

Noko ke, okubangela umdla kukuba iBhayibhile ayibhekiseli ngokukhethekileyo kumculo nokungqungqa kumtshato waseKana. Enyanisweni, ukungqungqa akukhankanywa nakuyiphi na ingxelo yeBhayibhile engemitshato. Kubonakala ngathi phakathi kwabakhonzi bakaThixo abathembekileyo bamaxesha okubhalwa kweBhayibhile, ukungqungqa kwakusenzeka nje ngesiquphe yaye kwakungeyonto iphambili emitshatweni yabo. Ngaba sinokufunda okuthile koku?

Kweminye imitshato yamaKristu eAfrika, kusetyenziswa izixhobo zomculo ze-elektroniki ezinamandla. Umculo ungaba namandla de abamenyiweyo bangakwazi ukuncokola. Maxa wambi ukutya kuyaphela kodwa wona umngqungqo ungalawuleki. Kunokuba zibe ngumsitho womtshato, izihlandlo ezinjalo ngokulula zingaba litheko lokungqungqa. Ngokubhekele phaya, ngokufuthi umculo ongxolayo utsala abantu abaza kudala inkathazo, abangaziwayo abazizela nje ngaphandle kokumenywa.

Ekubeni ingxelo yeBhayibhile ingacinezeli kakhulu kumculo nokungqungqa, ngaba oku akufanele kukhokele isibini esiceba umtshato oya kuzukisa uYehova? Sekunjalo, lulungiselela imitshato eliqela eMzantsi Afrika, ulutsha olungamaKristu oluye lwakhethwa ukuba lukhaphe luchitha iiyure ezininzi luziqhelanisa nesingqi sokungqungqa esintsonkothileyo. Kangangeenyanga lusebenzisa ixesha lalo elininzi ngale ndlela. Kodwa amaKristu amele ‘azongele ixesha’ ‘lezinto ezibaluleke ngakumbi,’ njengomsebenzi wokushumayela, ufundisiso lobuqu, nokuya kwiintlanganiso zamaKristu.—Efese 5:16; Filipi 1:10.

Ngokuphathelele ubungakanani bewayini uYesu awayinikelayo, kuyabonakala ukuba lo mtshato wawuseKana wawumkhulu. Noko ke, singaqiniseka ukuba esi sihlandlo yayingesiso esingalawulekiyo yaye abamenyiweyo babengabusebenzisi kakubi utywala njengoko kwakunjalo kwimitshato ethile yamaYuda. (Yohane 2:10) Sinokuqiniseka njani ngoku? Kuba iNkosi uYesu Kristu yayilapho. Kubo bonke abantu, uYesu nguyena owayenokulumka kakhulu ukuze athobele umyalelo kaThixo ophathelele ulwalamano olubi: “Musa ukuba phakathi kwabasela iwayini kakhulu.”—IMizekeliso 23:20.

Ngoko ke, ukuba isibini sigqiba kwelokuba sibe newayini okanye ezinye iziselo ezinxilisayo emtshatweni waso, sifanele sikulungiselele oku ukuze kube phantsi kweliso elibukhali labantu abanembopheleleko. Yaye ukuba sigqiba kwelokuba sibe nomculo, sifanele sikhethe iingoma ezifanelekileyo size sibe nomntu onembopheleleko oza kukwazi ukuqinisekisa ukuba umculo awudlalelwa phezulu. Iindwendwe azifanele zivunyelwe ukuba zilawule okanye zidlale umculo othandabuzekayo okanye ziwuvulele ube phezulu ngokungekho ngqiqweni. Ukuba kuza kubakho umngqungqo, ungenziwa ngendlela enesidima. Ukuba izalamane ezingakholwayo okanye amaKristu angaqolanga angqungqa ngendlela engcolileyo okanye evus’ inkanuko engokwesini, umyeni unokuwutshintsha umculo okanye ngendlela echuliweyo acele ukuba kuyekwe ukungqungqwa. Kungenjalo umtshato unokuba mbi nangakumbi ube ngumcimbi onezidubedube uze ubangele izikhubekiso.—Roma 14:21.

Ngenxa yeengozi ezihambisana nolunye uhlobo lokungqungqa lwezi mini, umculo ongxolayo, notywala obudlal’ abantwana, inkoliso yabayeni abangamaKristu igqiba kwelokuba ingabi nazo ezi zinto kwimitshato yabo. Abanye baye bagxekwa ngenxa yoku, kodwa bekufanele ukuba bayanconywa ngomnqweno wabo wokuphepha nantoni na enokunyelisa igama elingcwele likaThixo. Kweliny’ icala, abanye abayeni balungiselela umculo ofanelekileyo, ixesha lokungqungqa, notywala obungebuninzi. Nokuba kuyiyiphi imeko ngumyeni onembopheleleko ngoko akuvumelayo ukuba kwenzeke emtshatweni wakhe.

EAfrika abanye abangaqolanga bayijongela phantsi imitshato yamaKristu ehloniphekileyo baze bathi injengemingcwabo. Noko ke, oko akuyombono elungeleleneyo. Imisebenzi yenyama enesono inokubangela ulonwabo lokwexeshana, kodwa ishiye amaKristu nezazela ezikhathazekileyo ize izise ugculelo kwigama likaThixo. (Roma 2:24) Kweliny’ icala, umoya oyingcwele kaThixo wenza ulonwabo lokwenene. (Galati 5:22) Izibini ezininzi ezingamaKristu zikhangel’ emva zinovuyo ngosuku lwazo lomtshato, zisazi ukuba yayisisihlandlo esivuyisayo yaye ingesiso “isikhubekiso.”—2 Korinte 6:3.

UWelsh noElthea basakukhumbula okuhle okwathethwa zizalamane ezingakholwayo ezeza emtshatweni wabo. Esinye sathi: “Sikruqukile yimitshato enengxolo ekhoyo kule mihla. Bekumnandi ukuya kumtshato onesidima.”

Okubaluleke nangakumbi kukuba, imitshato yamaKristu emnandi nenesidima izukisa uMsunguli womtshato, uYehova uThixo.

[Ibhokisi/Umfanekiso okwiphepha 22]

ULUDWE LWEZINTO EZIFANELE ZIQWALASELWE KWITHEKO LOMTSHATO

• Ukuba umema isalamane esingakholwayo ukuba kubekho amazwi esiwaphosayo, ngaba uye waqinisekisa ukuba asisayi kuvelisa isithethe esingesiso esobuKristu?

• Ukuba kuza kudlalwa umculo, ngaba uye wakhetha kuphela iingoma ezifanelekileyo?

• Ngaba umculo wakho awuyi kudlalelwa phezulu ngokungekho ngqiqweni?

• Ukuba ukungqungqa kuvumelekile, ngaba kuya kungqungqwa ngendlela enesidima?

• Ngaba kuza kuhanjiswa utywala ngobungcathu?

• Ngaba ngabantu abanembopheleleko abaya kulawula ukuhanjiswa kwabo?

• Ngaba ubeke ixesha elisengqiqweni lokuphela kwetheko lomtshato?

• Ngaba kuya kubakho abantu abanembopheleleko abaya kuqinisekisa ukuba kugcinwa ucwangco de kube sekupheleni?