Isidima Novuyo Olungakumbi Ngosuku Lomtshato Wakho

UGORDON oneminyaka enokuba ngama-60 etshatile, uthi: “Usuku lwam lomtshato, lolona suku lubalulekileyo nolwalusonwabisa ebomi bam.” Yintoni ebangela usuku lomtshato lubaluleke kangaka kumaKristu okwenyaniso? Lusuku enza ngalo isifungo kwabo abathanda kakhulu—amaqabane awo noYehova uThixo. (Mateyu 22:37; Efese 5:22-29) Liyinyaniso elokuba, abo baceba ukutshata bafuna lube mnandi usuku lwabo lomtshato, kodwa kwangaxeshanye bafuna nokukholisa uMsunguli womtshato.—Genesis 2:18-24; Mateyu 19:5, 6.

Umyeni unokwenza njani ukuze olu suku lube nesidima? Umtshakazi umele enze ntoni ukuze akholise indoda yakhe noYehova? Yintoni enokwenziwa ngabo bamenyiweyo ukuze olu suku lube loluvuyisayo? Ukuqwalasela imigaqo yeBhayibhile kunokusinceda ukuba siyiphendule le mibuzo, ukusebenzisa loo migaqo kunokunciphisa iingxaki ezinokugxobha esi sihlandlo sikhethekileyo.

Yimbopheleleko Kabani?

Kumazwe amaninzi, kusenokwenzeka ukuba umtshato ubhaliswa ngokusemthethweni liNgqina likaYehova. Nakumazwe apho kutshatisa igosa laseburhulumenteni, abo batshatayo basenokufuna kunikelwe intetho esekelwe eBhayibhileni. Kule ntetho, umyeni uboniswa imbopheleleko ayinikwe nguThixo yokuba yintloko-ntsapho. (1 Korinte 11:3) Ngoko ke, umyeni unembopheleleko ngento yonke eyenzeka ebudeni bomtshato. Kakade, amalungiselelo etheko lomtshato enziwa kuselithuba. Yintoni enokwenza oku kube ngumthwalo onzima emagxeni omyeni?

Esinye isizathu kukuba iintsapho zabo batshatayo zinokuba ngoogqada mbekweni kumalungiselelo omtshato. URodolfo, oye watshatisa abantu abaninzi, uthi: “Ngamany’ amaxesha, umyeni uhliswa enyuswa zizalamane, ngakumbi ukuba zifaka isandla ekuhlawuleni iindleko zomtshato. Zisenokunyanzelisa ngezinto ezimele zenziwe kumsitho womtshato. Oku kusenokubonakalisa ukungayihloneli imbopheleleko yomyeni engokweZibhalo kwelo theko.”

UMax, uneminyaka engaphezu kwama-35 ngoku etshatisa, uthi: “Ndiye ndaphawula ukuba abatshakazi abathile batshotsh’ entla koko kwenzeka kumatheko nakwimisitho yemitshato yabo, umyeni yena usuka abe ngathi yinkuk’ esikw’ umlomo.” UDavid, naye ongumtshatisi onamava, uthi: “Kusenokwenzeka ukuba abayeni abakuqhelanga ukukhokela, yaye kusenokwenzeka ukuba bebengenanxaxheba ngokwaneleyo kumalungiselelo omtshato.” Umyeni unokuyithwala njani imbopheleleko yakhe?

Ukuthetha Ngokukhululekileyo Kwandisa Uvuyo

Ukuze umnyeni akwazi ukuthwala imbopheleleko yakhe ngokuphumelelayo kumalungiselelo omtshato, kufuneka akwazi ukuthetha ngokukhululekileyo. IBhayibhile ayijikelezi, ithi: “Amacebo ayatshitsha apho kungekho gqugula.” (IMizekeliso 15:22) Noko ke, iingxaki ezininzi zinokuphetshwa ukuba umyeni uqala athethe ngokukhululekileyo nomtshakazi ngamalungiselelo omtshato, athethe namalungu entsapho nabanye abanokumcebisa ngokusekelwe eBhayibhileni.

Enyanisweni, kubalulekile ngabo baza kutshata ukuba baqale bathethe ngoko baceba ukukwenza kwitheko lomtshato. Ngoba? Khawuphulaphule oko kuthethwa nguIvan nomfazi wakhe uDelwyn abasele beneminyaka emininzi betshatile nabaneemvelaphi ezahlukeneyo. Ecinga ngosuku lomtshato wakhe uIvan uthi: “Ndandingathi ndiyawubona umtshato endandiwufuna, kwitheko lomtshato kukho abahlobo, ikeyiki yomtshato nomtshakazi wam enxibe ilokhwe emhlophe qhwa. Kodwa yena uDelwyn wayengayiginyi loo nto, wayefuna umtshato onabantu abambalwa kungabikho naloo keyiki. Wada wacinga nangokunxiba enye ilokhwe kunelokhwe emhlophe.”

Bakucombulula njani ukwahlukana kwabo ngezimvo? Ngokuphalaza imbilini yabo ngobubele nangokunyanisekileyo. (IMizekeliso 12:18) UIvan wongezelela athi: “Safunda amanqaku asekelwe eBhayibhileni athetha ngomtshato afana neMboniselo kaOktobha 15, 1984.a Le nkcazelo yasinceda ukuze sibe nembono kaThixo ngetheko lomtshato. Ngokuphathelele iimvelaphi zethu ezahlukeneyo, kwafuneka sincame izinto ezininzi zobuqu. Kwafuneka siguqule indlela yethu yokucinga.”

UAret noPenny benza into efanayo. UAret uthi ngomtshato wabo: “Mna noPenny sathetha ngendlela iminqweno yethu yayahluke ngayo ngomtshato, saza safikelela kwisigqibo esinye. Sathandazela intsikelelo kaYehova kusuku lwethu. Nam, ndafuna amacebiso kubazali bethu nakwamanye amaKristu aqolileyo nasele eneminyaka etshatile. Amacebiso abo asinceda kakhulu. Umtshato wethu wawusemagqabini.”

Ukuba Nesidima Kwisinxibo Nakwindlela Yokuzilungisa

Yaziwa nanguthathatha into yokuba umtshakazi nomyeni bafuna ukunxiba kakuhle ngosuku lwabo lomtshato. (INdumiso 45:8-15) Basenokuchitha ixesha, imali yaye basenokuwa bevuka beqinisekisa ukuba impahla yabo iyafaneleka. Nguwuphi umgaqo oseBhayibhileni onokusinceda sikhethe iimpahla ezintle nezinesidima?

Khawucinge ngoko kunxitywa ngumtshakazi ngosuku lomtshato. Nakuba iindlela zethu zokunxiba zahlukile kumntu ngamnye nakumazwe ngamazwe, isiluleko seBhayibhile sisebenza kuzo zonke iinkalo. Abafazi bamele “bazihombise ngesinxibo esilungiswe kakuhle, ngokuthozama nangengqondo ephilileyo.” Oku kusebenza kubafazi abangamaKristu ngalo lonke ixesha nakusuku lomtshato. Inyaniso ikukuba, ukuze wonwabe emtshatweni, akunyanzelekanga ukuba unxibe “izambatho zexabiso elikhulu.” (1 Timoti 2:9; 1 Petros 3:3, 4) Hayi indlela ekuluncedo ngayo ukusebenzisa eli cebiso!

UDavid okhankanywe ngaphambilana, uthi: “Abantu abaninzi bayayilandela imigaqo yeBhayibhile yaye kufuneka banconywe. Noko ke, ngamanye amaxesha iilokhwe zabatshakazi nabakhaphi azindilisekanga, zisuka zivuleke gqitha apha ngasentla okanye zithungwe ngelaphu eliyasuyasu de ubone ngaphaya kwelokhwe.” Omnye umdala oligqala kwintlanganiso aba nayo nomtshato nomyeni ubanceda babe nembono yobuthixo ngalo mba. Ukwenza njani oku? Ubabuza enoba impahla abaza kuyinxiba indiliseke kangangokuba basenokuyinxiba nakwiintlanganiso zebandla kusini na. Ewe, indlela esinxiba ngayo emtshatweni yahlukile kwindlela esinxiba ngayo kwiintlanganiso zebandla yaye noko kunxitywa emtshatweni kunokuxhomekeka kwisiko lasekuhlaleni. Noko ke, loo nto siyinxibileyo ifanele ibe nesidima ngokuvisisana nemilinganiselo yobuKristu. Nokuba abantu behlabathi banokucinga ukuba imilinganiselo yokuziphatha yeBhayibhile ingqongqo ngokugqithiseleyo, amaKristu okwenyaniso alwa kuqhawuk’ unobathana ukuze ahluke ehlabathini.—Roma 12:2; 1 Petros 4:4.

UPenny uthi: “Kunokucinga ukuba iimpahla netheko lomtshato zezona zinto zibalulekileyo, mna noAret sacinga ngentetho yomtshato, inxalenye yokomoya yomtshato wethu. Yayiyeyona nto ibalulekileyo kusuku lwethu. Eyona nto ndiyikhumbula ngokukhethekileyo, asikokutya okanye ilokhwe endandiyinxibile, kodwa ngabantu endandikunye nabo nendlela endandivuya ngayo kuba ndanditshate indoda endiyithandayo.” Kuyinto entle ngabo batshatayo ukuba bacinge ngezi zinto ngoxa beceba umtshato wabo.

IHolo YoBukumkani—Indawo Enesidima

AmaKristu amaninzi atshatayo anqwenela ukuba umtshato wawo uqhutyelwe kwiHolo yoBukumkani ukuba ikho ekuhlaleni. Kutheni enqwenela oku? Esinye isibini siqiqa ngale ndlela: “Siyazi ukuba umtshato lilungiselelo likaYehova elingcwele. Ukutshata kwiHolo yoBukumkani, indawo esinqulela kuyo, kwasinceda saqonda zisuka nje ukuba simele sibandakanye uYehova ukuze abe yinxalenye yomtshato wethu. Enye inzuzo ngokusebenzisa iHolo yoBukumkani kunenye indawo kukubonisa indlela esiluxabisa ngayo unqulo lwethu kuYehova kwizalamane zethu ezingakholwayo.”

Ukuba abadala bebandla elineHolo yoBukumkani bayavuma ukuba umtshato uqhutyelwe apho, abo batshatayo bafanele babaxelele kuselithuba ngamalungiselelo abo. Enye indlela abo batshatayo abanokubonisa ngayo ukuba bayabahlonela abamenyiweyo kukuqiniseka ukuba bafika ngexesha elimisiweyo. Kwaye kufuneka baqiniseke ukuba izinto zenzeka ngokundilisekileyo.b (1 Korinte 14:40) Ngaloo ndlela baya kukuphepha ukwenza imitshato ethoba isidima efana neyabantu behlabathi.—1 Yohane 2:15, 16.

Abamenyiweyo nabo bamele babonise ukuba banembono kaYehova ngomtshato. Ngokomzekelo, bebengayi kulindela ukuba omnye umtshato ugqwese omnye, ngokungathi kukho ukhuphiswano lowona mtshato usemagqabini. AmaKristu aqolileyo ayaqonda ukuba ukubakho kwiHolo yoBukumkani xa kunikelwa intetho yeBhayibhile kubalulekile yaye kuyinzuzo ngaphezu kokuya kwitheko lomtshato okanye imbutho enokubakho emva koko. Ukuba ixesha neemeko ziyavuma, amaKristu anokubakho kwiHolo yoBukumkani kokona kubhetele. Umdala ogama linguWilliam uthi: “Ukuba iindwendwe ziphoswa yintetho kwiHolo yoBukumkani zize zibekho kwitheko lomtshato kamva, oko kubonisa ukungaqondi ubungcwele beso sihlandlo. Nokuba asimenywanga kwitheko lomtshato, sinokubonisa inkxaso yethu kumyeni nomtshakazi size sinikele ubungqina kwizalamane ezingakholwayo ngokubakho kwiHolo yoBukumkani.”

Uvuyo Oluya Kubakho Nasemva Kosuku Lomtshato

Abarhwebi baye bajika usuku lomtshato lwaba lishishini elaphul’ izikeyi. Ngokutsho kwengxelo yakutshanje, umtshato oqhelekileyo eUnited States “uxabisa ii-$22 000 [R145 000], okanye isiqingatha somvuzo wonyaka kumakhaya amaninzi aseMerika.” Befathuliswa ziintengiso ezilahlekisayo, abo baza kutshata okanye iintsapho zabo bazifak’ ematyaleni aya kuthabatha iminyaka ukuwahlawula ngenxa yosuku nje olunye. Ngaba leyo yindlela yobulumko yokuqalisa umtshato? Abo bangayikhathalelanga okanye abangayaziyo imigaqo yeBhayibhile basenokukhetha loo ndlela igabadeleyo, kodwa amaKristu okwenyaniso enza okwahlukileyo.

Ngokunciphisa inani leendwendwe libe sengqiqweni lize lifikeleleke nokunikela ingqalelo kwinxalenye yokomoya yesi sihlandlo, amaKristu amaninzi atshatayo aye akwazi ukusebenzisa ixesha lawo ngokuvisisana nozahlulelo lwawo kuYehova. (Mateyu 6:33) Khawucinge ngomzekelo omhle kaLloyd noAlexandra, abaye baqhubeka bekwinkonzo yexesha elizeleyo kangangeminyaka eli-17 emva kokutshata kwabo. ULloyd uthi: “Abanye kusenokwenzeka ukuba babesithi umtshato wethu wawuphole kakhulu, kodwa mna noAlexandra sasonwabe gqitha. Saqonda ukuba kwakungafanelanga ukuba umtshato wethu ube ngumthwalo esingenakukwazi ukuwuthwala, kodwa ube kukubhiyozela ilungiselelo likaYehova elizisa uvuyo olukhulu kubantu ababini.”

UAlexandra wongezelele esithi: “Ndandinguvulindlela ngaphambi kokuba sitshate yaye ndandingafuni ukuyeka lo msebenzi ukhethekileyo kuba nje ndifuna umtshato onobuyokoyoko. Usuku lwethu lomtshato lwalukhethekile. Phofu, yayisisiqalo sobomi bethu sikunye. Sasebenzisa icebiso lokuba singacingi kakhulu ngokutshata kodwa sifune ulwalathiso lukaYehova njengabantu abatshatileyo. Ngokwenene uYehova uye wasisikelela.”c

Ewe, usuku lwakho lomtshato lusuku olubalulekileyo. Isimo sengqondo kunye nezinto ozenzayo ngaloo mini zinokuba sisiseko somtshato wakho kwiminyaka ezayo. Ngenxa yoko, thembela ngolwalathiso lukaYehova. (IMizekeliso 3:5, 6) Gcina imbono yokomoya iyeyona iphambili engqondweni yakho ngaloo mini yomtshato. Lixhase iqabane lakho kwimbopheleleko eniyinikwe nguThixo. Ngaloo ndlela niya kubeka isiseko esiluqilima somtshato wenu yaye ngentsikelelo kaYehova, niya kuba novuyo oluya kuhlala luhleli de kube ngemva kosuku lomtshato.—IMizekeliso 18:22.

[Imibhalo esemazantsi]

[Umfanekiso okwiphepha 29]

Abo batshatayo bafanele bancokole ngokukhululekileyo kodwa ngentlonelo oko baceba ukukwenza emtshatweni wabo

[Umfanekiso okwiphepha 31]

Gcina imbono yokomoya iyeyona iphambili engqondweni yakho ngaloo mini yomtshato