Ibhokisi Yemibuzo

◼ Xa isibini sifuna ukutshatela kwiHolo yoBukumkani, ziziphi izinto ekufuneka sizixubushe nabadala?

Imitshato elungiselelwa ngokuvisisana nemigaqo yeBhayibhile iyamzukisa uYehova. Loo nto injalo ngokukodwa kwimitshato eqhutywa kwiHolo yoBukumkani, ekubeni abantu basekuhlaleni bejonga izinto ezenzeka kuyo njengezinto zentlangano yethu. Ukuze ‘zonke izinto zenzeke ngokundilisekileyo nangolungelelwano,’ kufanelekile ukuba abadala bebandla lasekuhlaleni babandakanyeke xa kucelwe iHolo yoBukumkani ukuze kuqhutywe umtshato.—1 Kor. 14:40.

Isibini esifuna ukutshatela kwiHolo yoBukumkani sifanele sibhale ileta yesicelo siyinike ikomiti yenkonzo yebandla elihlanganisana kuloo holo. Ileta yaso ifanele ithunyelwe kuselithuba kwaye ifanele ichaze umhla nexesha esinqwenela ukusebenzisa ngalo iholo. Sifanele sikhumbule ukuba abadala abayi kutshintsha ucwangciso lweentlanganiso ngenxa yomtshato. Ukongezelela koko, umtshakazi kunye nomyeni bamele babe banodumo oluhle ebandleni, bephila ngemigaqo yeBhayibhile nemilinganiselo yobulungisa kaYehova.

Ukuze siqiniseke ukuba umtshato awulingcolisi igama loThixo wethu onesidima, isibini sifanele sixubushe amalungiselelo omtshato nekomiti yenkonzo ngaphambi kokuba senze izigqibo ngawo. Nangona abadala bengayi kuzama ukunyanzelisa iimbono zabo kweso sibini, xa kukho nantoni na ekhwinisayo ecetywayo, kufanele kwenziwe utshintsho. Ngumculo okwiiKingdom Melodies okanye ofumaneka kumaculo ethu kuphela oya kusetyenziswa. Nakuphi na ukuhonjiswa kweHolo yoBukumkani nokubekwa ngenye indlela kwezitulo kufanele kugunyaziswe ngabadala. Ukuba kuza kufotwa, loo nto mayingathobi isidima sesi sihlandlo. Abadala banokuvuma ukuba kuqheliselwe kwiHolo yoBukumkani ukuba loo nto ayiyi kuphazamisana namanye amalungiselelo ebandla. Ningabeki zimemo kwibhodi yezaziso. Noko ke, abadala banokwenza isaziso esifutshane ebudeni beNtlanganiso Yenkonzo esazisa ibandla ngomtshato oza kuqhutywa kwiHolo yoBukumkani.

Nangona kungekho mthetho uthi abakhaphi bamele babe babhaptiziwe, bekungayi kuba yinto efanelekileyo ukuba abakhaphi ibe ngabantu abaphila ngendlela engqubana kakhulu nemigaqo yeBhayibhile okanye abanehambo eya kuphakamisa imibuzo kubantu abezileyo. Umtshato umele uqhutywe ngumdala omiselwe, ukuba ukho. Abadala ngabafundisi beLizwi likaThixo abafanelekayo, ngoko ngabo abafanelekela ukubethelela imigaqo yeZibhalo esebenza kwesi sihlandlo sibalulekileyo.—1 Tim. 3:2.

Ekubeni umtshato uphinda uchaphazele negama lomdala owuqhubayo, naye ufanele aziswe ngamalungiselelo omsitho. Uya kusibuza isibini eso ngendlela ebesiziphethe ngayo ngexesha sisenza amadinga; eso sibini sifanele sichaze yonke into kwaye sinyaniseke kuye. Ukuba umtshakazi okanye umyeni wayekhe watshata ngaphambili, umele aqiniseke enoba ukhululekile ngokweZibhalo nangokomthetho ukuba aphinde atshate. (Mat. 19:9) Loo nto iquka ukubonisa loo mdala ikopi yomyalelo wokugqibela woqhawulo-mtshato (divorce decree).

Xa isibini sinxibelelana kakuhle nabadala kwaye sisebenzisana nabo ngokupheleleyo, umsitho womtshato uya kuba sisihlandlo esonwabisa wonk’ ubani.—IMize. 15:22; Heb. 13:17.