Ncedani

“UTHIXO undilibele!” langqukruleka latsho elinye ibhinqa laseBrazil. Emva kokufa ngesiquphe komyeni walo, lalivakalelwa kukuba ubomi balo babungasenayo intsingiselo. Ngaba ukhe wazama ukuthuthuzela umntu odandathekileyo okanye mhlawumbi ocela uncedo?

Abanye baphelelwa lithemba de bazibulale—kwaye uninzi lwabo lulutsha. Ngokutsho kwephephandaba iFolha de S Paulo, uhlolisiso olwenziwe eBrazil lubonisa ukuba “inani labaselula abazibulalayo lande ngama-26 ekhulwini.” Ngokomzekelo, khawuqwalasele imeko kaWalter,a umfana waseSão Paulo. Wayengenabazali, engenakhaya, engenakuzenzela izinto zakhe ngasese, engenabahlobo anokubathemba. Ukuze acim’ ezo ntsizi, uWalter wagqiba kwelokuba akhwele phezu kwebhulorho aze aziphose ezantsi.

Omnye umama ongatshatanga, uEdna, wayesele enabantwana ababini xa wadibana nenye indoda. Emva kwenyanga nje, baqalisa ukuhlalisana endlwini yonina wale ndoda, owayeman’ ukunqula izinyanya yaye elikhoboka lotywala. UEdna waba nomnye umntwana, waqalisa ukuzintyintya ngobhelu lomsele, waza wadandatheka kangangokuba wada wazama ukuzibulala. Ekugqibeleni, wahluthwa abantwana bakhe.

Kuthekani ngabantu abasele bekhulile? UMaria wayengumntu othanda ulonwabo yaye eliqhakraqhakra lencoko. Noko ke, njengoko wayesaluphala, waqalisa ukuxhalatyiswa ngumsebenzi wakhe wokuba ngumongikazi kuba esoyika ukwenza iimpazamo. Loo nto yamdandathekisa. Emva kokuba ezame ukuzinyanga ngokwakhe, wafuna unyango lwezamayeza, kwaye lwabonakala luluncedo. Kodwa wathi akuphelelwa ngumsebenzi eneminyaka engama-57 ubudala, lwaqala phantsi udandatheko kwaye lwabuya ngamandla kangangokuba wabona ngathi kwakungayi kubakho sicombululo. UMaria waqalisa ukucinga ngokuzibulala.

UNjingalwazi José Alberto Del Porto weSão Paulo University uthi: “Bamalunga ne-10 ekhulwini abantu abadandathekileyo abazama ukuzibulala.” UGqr. David Satcher, umphathiswa wezempilo waseUnited States, unikela le ngxelo: “Kunzima ukuyikholelwa into yokuba abantu abafa ngokuzibulala baninzi ngaphezu kwabagetyengiweyo, ilusizi ngokwenene loo nto.”

Maxa wambi xa umntu ezama ukuzibulala, ngokungathi kunjalo, ucela uncedo. Kwaye ngokuqinisekileyo amalungu entsapho kunye nabahlobo bafanele bamenzele okulungileyo lowo uphelelwe lithemba. Kakade ke, akuyi kunceda ukuthetha amazwi anjengathi: “Khawahlukane nokuzisizela,” “Abantu abaninzi baphila kubugxwayiba obungaphezu kobu bakho” okanye, “Sonke siye sihanjelwe kakubi zizinto ngamaxesha athile.” Kunoko, kutheni ungabi ngumhlobo wokwenene nomphulaphuli olungileyo? Ewe, zama ukumnceda lowo uphelelwe lithemba ukuze abone ukuba kusekho anokukuzuza ebomini.

Umbhali ongumFrentshi uVoltaire wabhala: “Umntu othi, akuhlaselwa ludandatheko, azibulale ngoko nangoko, ebenokunqwenela ukuphila ukuba ebenokulinda iveki.” Ngoko ke, abantu abaphelelwe lithemba banokuyibona njani into yokuba ubomi bunokuthile obusifumbathele kona?

[Umbhalo osemazantsi]

[Umfanekiso okwiphepha 3]

Liyanda inani lolutsha nelabantu abakhulu abazibulalayo

[Umfanekiso okwiphepha 4]

Unokumnceda njani umntu ophelelwe lithemba?