Ukuphila Neengozi

“Akukho nanye into onokuyenza imihla ngemihla—kuquka ukulala—engenakubeka ubomi bakho esichengeni.”—Iphephancwadi iDiscover.

UBOMI buye bathelekiswa nokuhamba kwindawo ekutyalwe kuyo izigcayiseli, kuba umntu unokwenzakala okanye afe nanini na, ngokufuthi ngaphandle kwesilumkiso. Izinto ezinokubangela ingozi zahlukile kumazwe ngamazwe. Ziquka iingozi zendlela, iimfazwe zamakhaya, indlala, uGawulayo, umhlaza, isifo sentliziyo nezinye izinto ezininzi. Ngokomzekelo, kwimimandla yaseAfrika engezantsi kweSahara uGawulayo uye waba ngumbulali ophambili, kunyaka wakutshanje “ubulele abantu abazizigidi ezisisi-2,2, abaliphinda kali-10 inani labantu abaye bafa kwiimfazwe zamakhaya zaseAfrika,” itsho iU.S.News & World Report.

Kungokunje, ihlabathi lichitha amawaka ezigidi lizama ukulondoloza ubomi linciphise nengozi yokugula nokuba nesiphene. Uninzi lweembono ezikhuthazwayo, ezifana nokutya nokusela ngendlela elungeleleneyo nokwenza umthambo, lunokuvelisa imiphumo eyingenelo. Noko ke, kukho umthombo wenkcazelo onokuthenjwa kuzo zonke iinkalo ezibalulekileyo zokuphila ezinokukunceda unandiphe ubomi obukhuselekileyo nobunqabiseke ngakumbi. Loo mthombo yiBhayibhile. Iqulethe ukhokelo ngendlela yokusingatha uthotho lwezinto ezahlukahlukeneyo ezixhalabisayo ezichaphazela impilo nentlalo-ntle yethu. Kakade ke, iBhayibhile ayixubushi ngazo zonke iingxaki ngokweenkcukacha. Sekunjalo, inikela imilinganiselo esemagqabini ukuze isikhokele kwimibandela enjengendlela yokutya, ukomelela ngokwasemzimbeni, isimo sengqondo, isini, ukusebenzisa utywala, icuba, noko kubizwa ngokuba ziziyobisi zokuzihlaziya nezinye izinto ezininzi.

Ingxaki yabanye ebomini kukungaqiniseki ngemali. Nalapha, iBhayibhile iyasinceda. Ayaneli kusikhuthaza ukuba sibe zizilumko ngendlela esiyijonga nesiyiphatha ngayo imali kodwa ikwabonisa nendlela esinokuba ngabaqeshwa okanye abaqeshi abafanelekileyo. Ngamafutshane, iBhayibhile isisikhokelo esihle, kungekuphela nje kunqabiseko lwemali nentlalo-ntle, kodwa nasebomini. Ngaba ungathanda ukubona indlela iBhayibhile enokusebenza ngayo namhlanje? Ngoko ke nceda uqhubeke ufunda.