Ngaba Uphila Ngokuvisisana Nozahlulelo Lwakho?

“Nayiphi na into eniyenzayo, yenzeni ngomphefumlo uphela ngokungathi niyenzela uYehova, kungekhona abantu.”—KOLOSE 3:23.

1. Ngokwembono yehlabathi, lithetha ntoni igama elithi “ukuzinikela”?

BENZA njani abadlali ukuze babe ziincutshe kwimidlalo yabo? Kwintenetya, ibhola ekhatywayo, ibhola yomnyazi, ibaseball, ugqatso lokubaleka, igalufa, okanye nawuphi na umdlalo, abadlali baba ziincutshe kuphela ngokuzinikela ngokupheleleyo. Eyona nto ingundoqo kukuqeqesha umzimba nengqondo. Oku kuvisisana kakuhle nenkcazelo yegama elithi “ukuzinikela,” ethi “kukuzibophelela ngokupheleleyo kwindlela ethile yokucinga okanye kwisenzo esithile.”

2. EBhayibhileni kuthetha ntoni “ukuzinikela”? Zekelisa.

² Noko ke, ngokwengqiqo yeBhayibhile lithetha ntoni igama elithi “ukuzinikela”? “Ukuzinikela” yinguqulelo yesenzi sesiHebhere esithetha “ukwahlula; ukwahlukaniswa; ukuzikhetha.”a KuSirayeli wamandulo, uMbingeleli Omkhulu uAron wayefaka ‘umqondiso ongcwele wokuzinikezela’ elunkontshweni lwakhe, owawuyipleyiti ekhazimlayo eyenziwe ngegolide esulungekileyo ekukrolwe kuyo amagama esiHebhere athi “Ubungcwele bobukaYehova.” Oko kwakukhumbuza umbingeleli omkhulu ukuba umele aphephe ukwenza nantoni na eza kuhlambela ingcwele “ngokuba umqondiso wokuzinikezela, oyioli yokuthambisa kaThixo wakhe, [wawuphezu] kwakhe.”—Eksodus 29:6; 39:30; Levitikus 21:12.

3. Uzahlulelo lwethu lumele luyichaphazele njani ihambo yethu?

³ Ngokwalo mongo, sinokubona ukuba ukuzahlulela ngumbandela onzulu. Kuthetha ukuzikhethela ukuba ngumkhonzi kaThixo, yaye oko kufuna ukuba ubani abe nehambo ecocekileyo. Ngoko ke, sinokusiqonda isizathu sokuba umpostile uPetros acaphule amazwi awathethwa nguYehova athi: “Nimele nibe ngcwele, ngenxa yokuba ndingcwele mna.” (1 Petros 1:15, 16) NjengamaKristu azahluleleyo, sinembopheleleko enzulu yokuphila ngokuvisisana nozahlulelo lwethu, sithembeke de kuse ekupheleni. Kodwa yintoni ebandakanyekileyo ekuzahluleleni komKristu?—Levitikus 19:2; Mateyu 24:13.

4. Sifikelela njani kwinqanaba lokuzahlulela, yaye linokufaniswa nantoni?

⁴ Emva kokuba sizuze ulwazi oluchanileyo ngoYehova uThixo nangeenjongo zakhe nangoYesu Kristu nendima anayo kwezo njongo, sazenzela isigqibo sokukhonza uThixo ngentliziyo, ngengqondo, ngomphefumlo nangamandla ephela. (Marko 8:34; 12:30; Yohane 17:3) Oku kusenokugqalwa njengesibhambathiso sobuqu, ukuzahlulela kuThixo ungagogotye lutho. Asizange sizahlulele ngenxa nje yentabatheko. Sakucingisisa ngenyameko nangomthandazo, sisebenzisa amandla engqiqo. Ngaloo ndlela, yayingesosigqibo sokwexeshana. Asinakufana nomntu oqalisa ukulima intsimi aze ayeke phakathi ngenxa yokuba kungumsebenzi onzima okanye ngenxa yokuba isivuno sibonakala sikude okanye engaqinisekanga ngaso. Cinga ngemizekelo yabanye abaye ‘babeka izandla zabo ekhubeni’ lembopheleleko yobuthixo nokuba sekunzima.—Luka 9:62; Roma 12:1, 2.

Abazange Barhoxe Kuzahlulelo Lwabo

5. UYeremiya wayenguwo njani umzekelo obalaseleyo womkhonzi kaThixo ozahluleleyo?

⁵ Ubulungiseleli bukaYeremiya bokuba ngumprofeti bathabatha ithuba elingaphezu kweminyaka engama-40 (647-607 B.C.E.), yaye eso yayingesosabelo silula. Wayeziqonda kakuhle iintsilelo zakhe. (Yeremiya 1:2-6) Kwakufuneka abe nenkalipho yaye anyamezele yonke imihla ukuze amelane nabantu bakwaYuda ababeneentloko ezilukhuni. (Yeremiya 18:18; 38:4-6) Noko ke, uYeremiya wayekholose ngoYehova uThixo, owamomelezayo ukuze abe ngumkhonzi kaThixo ozahlulele ngokupheleleyo.—Yeremiya 1:18, 19.

6. Nguwuphi umzekelo esawumiselwa ngumpostile uYohane?

⁶ Kuthekani ngompostile uYohane othembekileyo, owayaluphele nowagxothelwa kwisiqithi sasePatmos esingumqwebedu ngenxa “yokuthetha ngoThixo nokunikela ubungqina ngoYesu”? (ISityhilelo 1:9) Wanyamezela waza wenza ngokuvisisana nozahlulelo lwakhe njengomKristu kangangeminyaka engama-60. Waqhubeka ephila nasemva kokutshatyalaliswa kweYerusalem yimikhosi yaseRoma. Waba nelungelo lokubhala incwadi yeVangeli, iileta ezintathu eziphefumlelweyo, nencwadi yeSityhilelo, leyo wabona kuyo imfazwe yeArmagedon. Ngaba warhoxa akufumanisa ukuba iArmagedon yayingayi kufika ebudeni bexesha lokudla kwakhe ubomi? Ngaba waqalisa ukungakhathali? Akunjalo, uYohane wahlala ethembekile de wafa, esazi ukuba nangona ‘ixesha elimisiweyo lalikufuphi,’ imibono yakhe yayiza kuzaliseka kwixesha elizayo.—ISityhilelo 1:3; Daniyeli 12:4.

Imizekelo Yanamhlanje Yabo Bazahluleleyo

7. Omnye umzalwana waba ngumzekelo wozahlulelo lobuKristu njani?

⁷ Kumaxesha anamhlanje, amawaka amaKristu athembekileyo aye anamathela kuzahlulelo lwawo nakuba esifa engekayiboni iArmagedon. Omnye wawo nguErnest E. Beavor waseNgilani. Waba liNgqina ngowe-1939 ekuqaliseni kweMfazwe Yehlabathi II, yaye wayeka ishishini lakhe lokufota elalichumile ukuze angenele ubulungiseleli bexesha elizeleyo. Ngenxa yokuba walondoloza ubundilele bakhe bobuKristu, wafakwa entolongweni iminyaka emibini. Intsapho yakhe yamxhasa, yaye ngowe-1950 abantwana bakhe abathathu baya kuqeqeshwa kwiSikolo SeBhayibhile SeWatchtower SaseGiliyadi, eNew York. UMzalwan’ uBeavor wayenenzondelelo kumsebenzi wakhe wokushumayela kangangokuba abahlobo bakhe babembiza ngokuthi nguArmagedon Ernie. Waphila ngokuvisisana nozahlulelo lwakhe ngokunyaniseka, yaye wayevakalisa ukusondela kwemfazwe kaThixo yeArmagedon de kwaba sekufeni kwakhe ngowe-1986. Akazange akugqale ukuzahlulela kwakhe njengesivumelwano sokwexeshana noThixo!b—1 Korinte 15:58.

8, 9. (a) Nguwuphi umzekelo owamiselwa ngabafana abaninzi baseSpeyin ebudeni bolawulo lukaFranco? (b) Yiyiphi imibuzo efanelekileyo?

⁸ Omnye umzekelo wenzondelelo engapheliyo ngowaseSpeyin. Ebudeni bolawulo lukaFranco (ngowe-1939-75), amakhulu amaNgqina aselula azahluleleyo aba ngamaKristu angoondilele. Uninzi lwabo lwachitha iminyaka elishumi nangaphezulu kwiintolongo zasemkhosini. Elinye iNgqina uJesús Martín, lagwetywa izihlandlo eziliqela ezaba yiminyaka engama-22 entolongweni. Labethwa kanobom ngoxa lalivalelwe kwintolongo yasemkhosini kumNtla Afrika. Kwakungelula, kodwa akazange avume ukulalanisa.

⁹ Amaxesha amaninzi, aba bafana babengenalo nofifi lokuba baya kuze bakhululwe nini, ukuba babeya kuze bakhululwe kwaukukhululwa, kuba babefumana izigwebo ezininzi ezilandelelanayo. Ukanti, bagcina ingqibelelo yabo baza bahlala benenzondelelo ngobulungiseleli ngoxa babevalelwe. Xa ekugqibeleni iimeko zaphucukayo ngowe-1973, uninzi lwala maNgqina, olwaluqalisa iminyaka yalo yama-30 ngelo xesha, lwakhululwa entolongweni lwaza lwangenela ubulungiseleli bexesha elizeleyo, bambi baba ngoovulindlela abakhethekileyo nabaveleli abahambahambayo. Baphila ngokuvisisana nozahlulelo lwabo entolongweni, yaye inkoliso yabo yaqhubeka isenjenjalo ukususela ekukhululweni kwabo.c Kuthekani ngathi namhlanje? Ngaba sithembekile kuzahlulelo lwethu njengaba banyanisekileyo?—Hebhere 10:32-34; 13:3.

Imbono Efanelekileyo Ngozahlulelo Lwethu

10. (a) Sifanele silujonge njani uzahlulelo lwethu? (b) UYehova uyigqala njani indlela esimkhonza ngayo?

¹⁰ Silujonga njani uzahlulelo lwethu lokwenza ukuthanda kukaThixo? Ngaba yinto yokuqala ebomini bethu? Kungakhathaliseki ukuba iimeko zethu zinjani, enoba siselula okanye sibadala, sitshatile okanye asitshatanga, siphilile okanye siyagula, sifanele sizabalazele ukuphila ngokuvisisana nozahlulelo lwethu, ngokweemeko zethu. Iimeko zomnye umntu zinokumvumela ukuba akhonze kubulungiseleli bexesha elizeleyo njengovulindlela, njengomsebenzi wokuzithandela kwiofisi yesebe yeWatch Tower Society, njengomvangeli wasemazweni okanye kubulungiseleli bokuhambahamba. Kwelinye icala, abanye abazali basenokuxakeka kukunyamekela iimfuno zentsapho zenyama nezokomoya. Ngaba iiyure ezimbalwa ngentelekiso abazichithela kubulungiseleli nyanga nganye azibalulekanga kangako emehlweni kaYehova njengeeyure ezininzi ezichithwa ngumkhonzi wexesha elizeleyo? Akunjalo. UThixo akalindeli ukuba senze oko singenako. Umpostile uPawulos wachaza lo mgaqo: “Ukuba umntu unolangazelelo kuqala, umnikelo wakhe wamkeleka ngakumbi ngokoko anako, kungekhona ngokoko angenako.”—2 Korinte 8:12.

11. Luxhomekeke entwenini usindiso lwethu?

¹¹ Enoba kuyintoni na, usindiso lwethu luxhomekeke, kungekhona kwinto esinokuyenza kodwa kububele bukaYehova obungasifanelanga ngoKristu Yesu, iNkosi yethu. UPawulos wachaza ngokucacileyo esithi: “Bonke bonile baza basilela kuzuko lukaThixo, yaye kunjengesipho sesisa ukuvakaliswa kwabo bengamalungisa ngobubele bakhe obungasifanelanga ngako ukukhululwa ngentlawulelo ngoKristu Yesu.” Noko ke, imisebenzi esiyenzayo ibubungqina bokuba sinokholo kumadinga kaThixo.—Roma 3:23, 24; Yakobi 2:17, 18, 24.

12. Kutheni singafanele senze uthelekiso?

¹² Akuyomfuneko ukuba sizithelekise nabanye ngokuphathelele ixesha esilichithela enkonzweni kaThixo, uncwadi lweBhayibhile esiluhambisileyo, okanye inani lezifundo zeBhayibhile esiziqhubayo. (Galati 6:3, 4) Kungakhathaliseki ukuba sifeza okungakanani na kubulungiseleli bobuKristu, sonke simele sikhumbule amazwi kaYesu entobeko athi: “Nani ke, xa nenze zonke izinto enizabelweyo, yithini, ‘Singamakhoboka angancedi nganto. Oko sikwenzileyo koko besifanele sikwenze.’” (Luka 17:10) Sinokutsho ngokufuthi kangakanani ukuba ‘sizenzile zonke izinto esizabelweyo’? Ngoko umbuzo ngulo, Ifanele ibe njani inkonzo yethu kuThixo?—2 Korinte 10:17, 18.

Gqala Suku Ngalunye Njengolubalulekileyo

13. Sifanele sibe nasiphi isimo sengqondo xa siphumeza uzahlulelo lwethu?

¹³ Emva kokululeka amakhosikazi, abayeni, abantwana, abazali namakhoboka, uPawulos ubhala esithi: “Nayiphi na into eniyenzayo, yenzeni ngomphefumlo uphela ngokungathi niyenzela uYehova, kungekhona abantu, kuba niyazi ukuba niya kuwamkela kuYehova umvuzo ofanelekileyo welifa. Yibani ngamakhoboka eNkosi, uKristu.” (Kolose 3:23, 24) Asikhonzi ngenjongo yokukholisa abantu ngoko sikwenzayo enkonzweni kaYehova. Sizama ukukhonza uThixo ngokulandela umzekelo kaYesu Kristu. Ubulungiseleli bakhe obabubufutshane ngentelekiso wabuphumeza enemvo yongxamiseko.—1 Petros 2:21.

14. Sisiphi isilumkiso esanikelwa nguPetros ngokuphathelele imihla yokugqibela?

¹⁴ Nompostile uPetros wabonakalisa imvo yongxamiseko. Kwincwadi yakhe yesibini, walumkisa esithi ngemihla yokugqibela, kuya kubakho abagculeli—abawexuki nabantu abathandabuzayo—abo, ngokuvisisana neminqweno yabo, baya kubuthandabuza ubukho bukaKristu. Noko ke, uPetros wathi: “UYehova akacothi ngokuphathelele isithembiso sakhe, njengoko abanye becinga njalo, kodwa unomonde kuni ngenxa yokuba akanqweneli ukuba kutshabalale nabani na kodwa unqwenela ukuba bonke bafikelele enguqukweni. Ke yona imini kaYehova iya kuza njengesela.” Ewe, imini kaYehova iyeza ngokuqinisekileyo. Ngoko ke, sifanele sihlale siyixhalabele indlela oluqine nolomelele ngayo ukholo lwethu kumadinga kaThixo.—2 Petros 3:3, 4, 9, 10.

15. Sifanele silugqale njani suku ngalunye lobomi bethu?

¹⁵ Ukuze siphile ngokuvisisana nozahlulelo lwethu, usuku ngalunye sifanele silusebenzisele ukudumisa uYehova. Ekupheleni kosuku ngalunye, ngaba sinokukhangela emva size sibone indlela esiye ngandlel’ ithile safak’ isandla ngayo ekungcwalisweni kwegama likaThixo nasekuvakaliseni iindaba ezilungileyo zoBukumkani? Mhlawumbi ngehambo ecocekileyo, incoko yethu eyakhayo okanye inkxalabo yethu enothando ngentsapho nabahlobo. Ngaba siye sawasebenzisa amathuba aye avela okwabelana nabanye ngethemba lethu lobuKristu? Ngaba siye sanceda uthile acinge ngokunzulu ngamadinga kaThixo? Masiziqwebele okuthile okuxabisekileyo ngokomoya suku ngalunye, sizakhele, ngokungathi kunjalo uvimba onentabalala yobutyebi bokomoya.—Mateyu 6:20; 1 Petros 2:12; 3:15; Yakobi 3:13.

Hlala Unombono Ocacileyo

16. USathana uzama njani ukulwenza buthathaka uzahlulelo lwethu kuThixo?

¹⁶ Siphila kumaxesha aya esiba nzima ngokuba nzima kumaKristu. USathana nabameli bakhe bazama ukuwenza ufiphale umahluko phakathi kokulungileyo nokubi, into ecocekileyo nengacocekanga, ukuziphatha okuhle nokuziphatha okubi, okusesikweni nokungekho sikweni. (Roma 1:24-28; 16:17-19) Wenze kwaba lula ukuba singcolise iintliziyo neengqondo zethu ngezinto esizibukela kumabonwakude okanye kwikhompyutha. Umbono wethu wokomoya unokufiphala, ube luzizi, kangangokude singakwazi ukuziqonda izenzo zakhe zobuqhophololo. Isigqibo sethu sokuphila ngokuvisisana nozahlulelo lwethu sinokwenziwa buthathaka nesandla sethu sinokuyekelela “ekhubeni” ukuba siyalalanisa kwimilinganiselo yethu yokomoya.—Luka 9:62; Filipi 4:8.

17. Isiluleko sikaPawulos sinokusinceda njani ukuba silondoloze ulwalamano lwethu noThixo?

¹⁷ Ngaloo ndlela, amazwi kaPawulos aya kwibandla laseTesalonika afike ngexesha elifanelekileyo: “Kukuthanda kukaThixo, ukuba ningcwaliswe, nikhwebuke kuhenyuzo; ukuze ngamnye wenu akwazi ukusizuza esakhe isitya ngobungcwalisa nembeko, kungekhona ngenkanuko yesini njengeentlanga ezingamaziyo uThixo.” (1 Tesalonika 4:3-5) Ukuziphatha okubi kuye kwabangela ukuba abanye basuswe kwibandla lobuKristu—abo baye bakutyeshela ukuzahlulela kwabo kuThixo. Baye bavumela ukuba ulwalamano lwabo noThixo lube buthathaka, kangangokude angabi ngumntu obalulekileyo ebomini babo. Ukanti, uPawulos wathi: “UThixo akasibizelanga ekungcoleni, kodwa ebungcwaliseni. Ngoko ke, umntu okugatyayo oku, ugatya, kungekhona umntu, kodwa uThixo, oninika umoya wakhe oyingcwele.”—1 Tesalonika 4:7, 8.

Uzimisele Ukwenza Ntoni?

18. Sifanele sizimisele ukwenza ntoni?

¹⁸ Ukuba siyabuqonda ubunzulu bokuzahlulela kwethu kuYehova uThixo, sifanele sizimisele ukwenza ntoni? Sifanele sizimisele ukuba nesazela esihle ngokubhekisele kwihambo yethu nobulungiseleli bethu. UPetros wabongoza esithi: “Yibani nesazela esilungileyo, khon’ ukuze kuloo nto kuthethwa ngokunxamnye nani babe neentloni abo bathetha ngendelelo ngehambo yenu elungileyo kuKristu.” (1 Petros 3:16) Sisenokubandezeleka size sijamelane nokuxhatshazwa ngenxa yehambo yethu yobuKristu, kodwa kwaba njalo nangoKristu ngenxa yokholo nokunyaniseka kwakhe kuThixo. UPetros wathi: “Ngoko ke ekubeni uKristu wabandezeleka enyameni, nani zimiseleni ngokufanayo; ngenxa yokuba umntu obandezelekileyo enyameni uziyekile izono.”—1 Petros 4:1.

19. Sifuna ukuba kuthiweni ngathi?

¹⁹ Eneneni, ukuzimisela ukuphila ngokuvisisana nozahlulelo lwethu kuya kusikhusela kwimigibe yehlabathi likaSathana eligulayo ngokomoya, ngokuziphatha nangokwenyama. Kodwa ngaphezu koko, siya kuqiniseka ukuba sinenkoliseko kaThixo, nto leyo elunge ngaphezu kwayo nantoni na enokufunyanwa kuSathana nabameli bakhe. Ngaloo ndlela, kungaze kutshiwo ukuba asisenalo uthando esasinalo ukuqala kwethu ukuva inyaniso. Kunoko, makuthethwe ngathi ngendlela ekwathethwa ngayo ngabo babekwibandla laseTiyatira lenkulungwane yokuqala: “Ndiyazazi izenzo zakho, nothando nokholo nobulungiseleli nonyamezelo lwakho, nokuba izenzo zakho zamva zingaphezulu kwezo zangaphambili.” (ISityhilelo 2:4, 18, 19) Ewe, masingabi dikidiki ngokuphathelele uzahlulelo lwethu, kodwa ‘masivuthe emoyeni,’ sibe nenzondelelo de kuse ekupheleni—yaye isiphelo sikufuphi.—Roma 12:11; ISityhilelo 3:15, 16.

[Imibhalo esemazantsi]

Uyakhumbula Na?

• Lubandakanya ntoni uzahlulelo?

• Yiyiphi imizekelo yabakhonzi bakaThixo abazahluleleyo bamandulo nabanamhlanje esifanele siyixelise?

• Sifanele siyijonge njani inkonzo yethu kuThixo?

• Sifanele sizimisele ukwenza ntoni ngokuphathelele uzahlulelo lwethu kuThixo?

[Umfanekiso okwiphepha 15]

UYeremiya wahlala ethembekile nangona wayephathwa ngendlela emanyumnyezi

[Umfanekiso okwiphepha 16]

UErnest Beavor wamisela abantwana bakhe umzekelo ngokuba ngumKristu onenzondelelo

[Umfanekiso okwiphepha 17]

Amakhulu amaNgqina aselula agcina ingqibelelo yawo kwiintolongo zaseSpeyin

[Imifanekiso ekwiphepha 18]

Masiziqwebele okuthile okuxabisekileyo ngokomoya suku ngalunye