Yibani Novuyo Ngethemba LoBukumkani!
IBISISIHLANDLO sovuyo xa ababukeli abangama-5 784 babehlanganisene kwizakhiwo ezintathu ezisetyenziswa yintsapho enkulu yaseBheteli yeLizwekazi laseNew York ngoMatshi 10, 2001. Esi yayisisihlandlo sokuvuyisana nabaphumelele kwiklasi ye-110 yesikolo sabavangeli basemazweni saseGiliyadi.
UCarey Barber, ilungu leQumrhu Elilawulayo lamaNgqina kaYehova, wamkela zonke iindwendwe waza waqalisa ucwangciso, esithi: “Kuyasivuyisa ukwazi ukuba abafundi beeklasi zaseGiliyadi ezili-110 baye baqeqeshwa njengabavangeli basemazweni baza bathunyelwa ehlabathini lonke.”
Indlela Yokuhlala Uvuya
Emva kwamagqabaza okuvula kaMzalwan’ uBarber, uDon Adams wathetha nabaphulaphuli, kuquka abafundi abangama-48 abaphumeleleyo ngomxholo othi “Intsikelelo KaYehova Iyasityebisa.” Ngentetho ayisekele kwiMizekeliso 10:22, wakhumbuza abaphulaphuli ukuba uYehova uyabagcina aze abasikelele abakhonzi bakhe xa bebeka izilangazelelo zoBukumkani kwindawo yokuqala ebomini babo. Wakhuthaza abafundi ukuba bamkele izabelo zabo ngomoya ovumayo ofana nalowo wabonakaliswa ngumpostile uPawulos xa wamenywa ukuba ‘awelele eMakedoni aye kunceda.’ (IZenzo 16:9) Nangona kwakufanele oyise imiqobo ethile, ukulangazelela kukaPawulos ukushumayela apho wayesalathiswa khona kwabangela ukuba afumane iintsikelelo ezininzi ezibangela uvuyo.
Abafundi abaphumeleleyo babekugqibile ukufunda iBhayibhile okuthabatha iinyanga ezintlanu noqeqesho olwalubalungiselela umsebenzi wokushumayela emazweni. Sekunjalo, uDaniel Sydlik, ilungu leQumrhu Elilawulayo lamaNgqina kaYehova, wabakhuthaza ukuba baqhubeke bengabafundi. Ethetha ngomxholo othi “Yibani Ngabafundi Bokwenene,” wathi: “Ukuba ngumfundi kuthetha ukuthobela amazwi kaYesu ngokuqhubekayo. Oku kuquka ukuba sivume ukuphulaphula amazwi akhe, umyalelo wakhe kunye neemfundiso zakhe rhoqo.” Wabethelela ingongoma yokuba abafundi bakaKristu abaze benze izigqibo bengaliphulaphulanga ilizwi leNkosi; uKristu nguvimba wobulumko bukaThixo. (Kolose 2:3) Akukho namnye kuthi onokuva amazwi kaYesu kube kanye aze agqibe kwelokuba wazi konke ngaye, ngoko uMzalwan’ uSydlik wakhuthaza bonke abafundi abaphumeleleyo ukuba baqhubeke befunda, beqhelisela yaye befundisa inyaniso yobuKristu, ekhululayo.—Yohane 8:31, 32.
Ukuze ubani aqhubeke evuya kwinkonzo kaThixo, kufuneka amkele uqeqesho nokulungiswa. Umqeqeshi waseGiliyadi uLawrence Bowen wabuza: “Ngaba Izintso Zakho Ziza Kukulungisa?” Wabonisa ukuba eBhayibhileni izintso zisetyenziswa ngokufuziselayo ukumela iingcinga neemvakalelo zikabani ezinzulu. Zinokumlungisa ubani ukuba icebiso elivela kwiLizwi likaThixo liye langena nzulu kubuntu bakhe. (INdumiso 16:7; Yeremiya 17:10) Indlela ubani athembeke ngayo inokude ichukumise uYehova ngokunzulu. Emva kokufunda IMizekeliso 23:15, 16, isithethi sabuza: “Ngaba izintso zakho ziza kukulungisa?” Songezelela: “Sithandazela ukuba zibe kanti ziya kwenjenjalo, zize ngoko zibangele ukuba uYehova aneliseke kakhulu ngaye siqu. Niya kuchukumisa iimvakalelo zakhe ezinzulu. Ewe, ngokubambelela kwizabelo zenu niya kwenza izintso zikaThixo zigcobe.”
Intetho yokugqibela kule nxalenye yolu cwangciso yanikelwa nguMark Noumair, owakhonza njengomvangeli wasemazweni eKenya ngaphambi kokuba abe ngumqeqeshi waseGiliyadi. Intetho yakhe eyayinomxholo othi “Ulunge Ngakumbi Lowo Ubonayo Ngamehlo” yabalaselisa imfuneko yokuhlakulela ulwaneliseko. Ngokuvumelana neNtshumayeli 6:9, uMzalwan’ uNoumair wacebisa esithi: “Zamkele izinto njengokuba zinjalo. Oko ‘kukubona ngamehlo.’ Kunokuba uphuphe ngento ofuna ukuyenza kodwa ube ungayenzi, yenza konke onokukwenza ngale meko ukuyo ngoku. Ukuhlala emaphupheni, ukuba nolindelo olungekho ngqiqweni okanye ukuzikhathaza ngezinto eziyingxaki ngesabelo sakho kuya kukwenza unganeliseki.” Ewe, kungakhathaliseki ukuba siphi na okanye zinjani na iimeko, ukuhlakulela ulwaneliseko lobuthixo ngeemeko esikuzo kubangela ukuba sivuye ngokukhonza uMdali wethu Ozukileyo.
Amava Avuyisayo Kwinkonzo YoBukumkani NaseGiliyadi
Emva kwesiluleko esisebenzisekayo esifumaneka kwezo ntetho, abafundi baye babalisa amava abaye bawanandipha ngoxa babekubulungiseleli basesidlangalaleni ngethuba lezifundo zabo ezithabathe iinyanga ezintlanu. Besalathiswa nguWallace Liverance, umamkeli wabafundi kwiSikolo saseGiliyadi, abafundi abaphumeleleyo bachaza indlela abaye bazingqina ngayo bengabalungiseleli bakaThixo. (2 Korinte 4:2) Bakwazile ukuvuselela izazela zabathile abazinikwe nguThixo. Amava abafundi abonise indlela eziye zaqaliswa ngayo izifundo zeBhayibhile nabantu abanyanisekileyo abadibene nabo esitratweni, kubulungiseleli bendlu ngendlu nakwezinye iindawo. Kwizihlandlo ezahlukeneyo, abantu abanomdla bathe iimpapasho zentlangano kaYehova ezisekelwe eBhayibhileni zivakala zinenyaniso. Omnye umninimzi waba nomdla kwindinyana ethile yeBhayibhile. Ngoku ufunda iBhayibhile namaNgqina kaYehova.
Wandula ke uJoel Adams wanodliwano-ndlebe nabaphumelela eGiliyadi kwiminyaka edluleyo. Umxholo wakhe wawusithi “Ungaze Uyeke Ukufunda, Ungaze Uyeke Ukukhonza uYehova.” Abo wayenodliwano-ndlebe nabo babenecebiso elisexesheni kubavangeli basemazweni abatsha. Ekhumbula iimini zakhe esengumfundi kwiklasi yama-26 yaseGiliyadi, uHarry Johnson wathi: “Safundiswa ukuba uYehova ubebakhokela abantu bakhe ngamaxesha onke yaye usaya kubakhokela abantu bakhe. Loo ntembelo ibe lukhuthazo kuyo yonke le minyaka.” UWilliam Nonkes, ilungu leklasi yama-53 yaseGiliyadi, wabacebisa abaphumeleleyo ngelithi: “Ngaphezu kwako konke, gcinani imigaqo yeBhayibhile ezingqondweni zenu, nize niyisebenzise kuzo zonke izigqibo ekufuneka nizenze ebomini ngoku kude kube ngunaphakade. Ngenxa yoko, niya kukwazi ukunamathela kwizabelo zenu, yaye uYehova uya kunisikelela.”
Kolu cwangciso uRichard Rian wakhetha umxholo othi “Somelezelwe Ukwenza Ukuthanda KukaYehova.” Omnye wabo wadlan’ indlebe nabo nguJohn Kurtz, owaphumelela kwiklasi yama-30, waza wachitha ngaphezu kweminyaka engama-41 eSpeyin njengomvangeli wasemazweni. Xa wabuzwa ngoqeqesho lwaseGiliyadi, uMzalwan’ uKurtz wathi: “Eyona ncwadi isisikhokelo yiBhayibhile. Kambe ke zikho nezinye iincwadi zokucacisa iBhayibhile ezisinceda siyiqonde iBhayibhile. Zinokufunyanwa nguye nabani na. Akukho lwazi lufihlakeleyo lufunyanwa eGiliyadi. Andikhe ndilibale ukugxininisa ukuba wonke umntu unelungelo lokufumana ulwazi olufumaneka eGiliyadi nanini na elufuna.”
UMzalwan’ uGerrit Lösch, ilungu leQumrhu Elilawulayo lamaNgqina kaYehova, waqukumbela olu cwangciso lokomoya ngomxholo othi “Kumaphiko Nangaphantsi Kwamaphiko KaYehova.” Wacacisa indlela ukukhusela nokuxhasa kukaThixo abakhonzi bakhe okuzekeliswe ngayo eBhayibhileni ngamaphiko okhozi. (Duteronomi 32:11, 12; INdumiso 91:4) Maxa wambi ukhozi oludala luye luwavule amaphiko alo kangangeeyure ukuze lukhusele amantshontsho alo. Maxa wambi, imazi yokhozi isenokuwagquma ngamaphiko amantshontsho ayo ukuze iwakhusele kwimimoya ebandayo. Ngendlela efanayo nangokuvumelana nenjongo yakhe, uYehova unokubakhusela abakhonzi bakhe abathembekileyo, ingakumbi xa bejamelene novavanyo lokomoya. UYehova akaze avumele abakhonzi bakhe balingwe ngaphezu koko banokukuthwala kodwa ubenzela indlela yokuba bakwazi ukunyamezela. (1 Korinte 10:13) UMzalwan’ uLösch waqukumbela ngokuthi: “Ukuze sihlale sikhuselekile ngokomoya, sifanele sihlale ngaphantsi kwamaphiko kaYehova. Oku kuthetha ukuba sifanele singabi nomoya wokufuna inkululeko. Ngalo lonke ixesha masihlale sisondele kuYehova nentlangano yakhe enjengomama, singazikhwebuli kulwalathiso namacebo akhe anothando.”
Usihlalo wafunda iileta nemibuliso evela kubantu ababebanqwenelela okuhle evela ehlabathini lonke. Kwandula kwalandela ithuba lokunikezelwa kweziqinisekiso. Xa kwasungulwa iSikolo saseGiliyadi, kwakucetywa ukuba kubekho iiklasi nje ezimbalwa kwisithuba seminyaka emihlanu. Kodwa kangangeminyaka engama-58 uYehova uThixo uye wasigcina sikho esi sikolo. Njengoko uMzalwan’ uBarber etshilo kumagqabaza akhe okuvula: “Enjani ukuvuyisa ingxelo abathe abo baphumelele eGiliyadi bayenza ukususela ngowe-1943, xa kwaqaliswa iGiliyadi! Imizamo yabo emanyeneyo iye yaphumela ekubeni kongezeleleke amakhulu amawaka abantu abalulamileyo bomhlaba kwintlangano kaYehova ezukileyo.” Ewe, esi sikolo sabavangeli basemazweni siye sanegalelo ekuvuyiseni izigidi zabantu ngenxa yethemba loBukumkani.
[Ibhokisi ekwiphepha 24]
INKCAZELO ENGABAFUNDI
Inani lamazwe abavela kuwo: 8
Inani lamazwe ababelwe kuwo: 18
Abafundi bebonke: 48
Umlinganiselo wobudala: 34
Umlinganiselo weminyaka besenyanisweni: 18
Umlinganiselo weminyaka bekubulungiseleli bexesha elizeleyo: 13
[Umfanekiso okwiphepha 25]
Abaphumelele kwiklasi ye-110 Yesikolo SeBhayibhile SeWatchtower SaseGiliyadi
Kuludwe olungezantsi, kuqalwa ukusuka kuluhlu olungaphambili ukuya kolungasemva, yaye amagama adweliswe ukusuka ngasekhohlo ukusa ngasekunene kuluhlu ngalunye.
(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.