Zijongeni Izinto Ngendlela UThixo Azijonga Ngayo
ENEW YORK, eUnited States, uSeptemba 14, 2002 yayilusuku olufudumeleyo nolunelanga. Ngolo suku, izihlwele ezisuka kumazwe ngamazwe ezingama-6 521 zazihlanganisene kwiZiko Lemfundo lasePatterson nakwezinye izakhiwo ezibini zamaNgqina kaYehova kuloo mmandla. Ezi zihlwele zazihlanganisene ukuza kuvuyisana nabo baphumeleleyo kwiklasi ye-113 yeSikolo seBhayibhile seWatchtower saseGiliyadi. Abafundi babesuka kumazwe ali-14 yaye babechithe iinyanga ezintlanu belungiselela inkonzo yobuvangeli kumazwe ali-19 ababelwa kuwo.
UCarey Barber, okunyaka wakhe wama-98 ubudala nolilungu leQumrhu Elilawulayo lamaNgqina kaYehova, wayengusihlalo kolu cwangciso. Wathetha ngelifa leSikolo saseGiliyadi esineminyaka emalunga nama-60 sikho, esiye saxhobisela amawaka ukuba aye kwintsimi yobuvangeli basemazweni. UMzalwan’ uBarber wathi: “Asikokuzibaxa izinto xa sisithi uqeqesho olungakumbi abaye balufumana luye lwanemiphumo emihle kakhulu. Ngokoqobo amakhulu amawaka abantu abalulamileyo ehlabathini lonke baye bahlulela ubomi babo kuYehova baza bamkela unqulo lwakhe lokwenyaniso nenkonzo engcwele ngenxa yokuncedwa ngabavangeli basemazweni abaqeqeshiweyo.”
Ngaphambi kokuba baye eGiliyadi, abafundi abaninzi baye babonakalisa umdla wokwandisa ubulungiseleli babo. Esinye isibini siye sachitha ngaphezu konyaka sifunda isiMandarin kuba sifuna ukushumayela kubantu abaninzi abangamaTshayina kwindawo esihlala kuyo eKhanada. Esinye isibini saqalisa ukuzifundela ukuthetha isiAlbania saza ekugqibeleni safudukela eAlbania ukuya kunceda abantu abandayo balapho abanomdla eBhayibhileni. Bambi ababeze kule klasi yaseGiliyadi babesuka eHungary, eGuatemala, naseDominican Republic, amazwe ababefudukele kuwo ukuze baye kunceda apho imfuneko inkulu khona yabafundisi beLizwi likaThixo.
Ngoku, ngaphambi kokuba baye kwizabelo zabo eAfrika, eMpuma Yurophu, kuMbindi naseMzantsi Merika, nakwiMpuma Ekude, bonke abafundi abaphumelelayo bakhuthazwa ukuba bacinge ngoThixo kuko konke abakwenzayo.
Zijongeni Izinto Ngendlela UThixo Azijonga Ngayo
Emva kwamazwi akhe okuvula, uMzalwan’ uBarber wabiza uMaxwell Lloyd, ilungu leKomiti yeSebe laseUnited States. Yena wathetha ngomxholo othi “Zijongeni Zonke Izinto Ngendlela UThixo Azijonga Ngayo.” UMzalwan’ uLloyd wathetha ngomzekelo kaDavide nowoNyana kaThixo, uYesu. (1 Samuweli 24:6; 26:11; Luka 22:42) Emva kokukhumbuza abafundi ukuba ukufundisisa kwabo iBhayibhile iinyanga ezintlanu kuye kwabaqeqeshela ukuba bazijonge izinto ngendlela uThixo azijonga ngayo, esi sithethi sababuza: “Xa niqhuba izifundo zeBhayibhile kwisabelo senu esitsha, ngaba niya kuzinceda ziqiqe ngezinto ngendlela kaThixo?” Yaye ngokuphathelele ukululeka abanye, wacebisa aba bafundi esithi: “Musani ukuthi, ‘Ngokwembono yam, ndivakalelwa kukuba . . . ’ Kunoko, bancede babone imbono kaThixo. Xa nisenjenjalo, niya kuba yintsikelelo yokwenene kwabo ninxulumana nabo kwisabelo senu.”
Olandelayo kolu cwangciso yayinguGerrit Lösch, ilungu leQumrhu Elilawulayo. Ethetha ngomxholo othi “Ndinawe,” wathetha ngamaxesha amaninzi xa uYehova wathi kubakhonzi bakhe abathembekileyo, “Ndinawe.” (Genesis 26:23, 24; 28:15; Yoshuwa 1:5; Yeremiya 1:7, 8) Kumhla wethu, sinokuba nentembelo efanayo kuYehova ukuba sihlala sithembekile. UMzalwan’ uLösch wathi: “Ngaba akuqinisekanga enoba uza kufumana abantu oza kufunda nabo iBhayibhile? Khumbula ukuba, uYehova wathi, ‘Ndinawe.’ Ngaba uzikhathaza ngokuba nezinto ezaneleyo eziphathekayo? UYehova wathi: ‘Andiyi kuze ndikushiye, ndingayi kuze ndikutyeshele.’” (Hebrews 13:5) UMzalwan’ uLösch waqukumbela ngokukhumbuza abafundi ukuba uYesu wathembisa abalandeli bakhe abathembekileyo esithi uya kuba nabo kumsebenzi wokwenza abafundi.—Mateyu 28:20.
“Ngaba Uya Kuziva Unqabisekile Ebudeni Bezilingo Eziqatha?” lowo yayingumxholo wentetho yomqeqeshi waseGiliyadi uLawrence Bowen. Wathi ngenxa yeembambano ezavela e-Eden, bonke abo baye banqwenela ukuzinikela kuYehova ngokupheleleyo baye bajamelana neengxaki yaye, maxa wambi, izilingo eziqatha. Wakhuthaza aba bafundi baphumeleleyo ukuba balandele umzekelo kaYesu, owafumana unqabiseko lokwenene ngokuthembela ngokupheleleyo kuYehova nokuzamkela izilingo eziqatha uYehova aye wazivumela ukuze uNyana wakhe afunde ukuthobela ngokugqibeleleyo. (Hebhere 5:8, 9) UYehova unokufaniswa nomnyibilikisi wegolide oyenza ibe kwiqondo elifanelekileyo lobushushu ukuze ayisulungekise. Kakade ke, ukholo oluvavanywe ngomlilo lunqabiseke ngakumbi kunegolide esulungekileyo. Ngoba? UMzalwan’ uBowen wathi, “Kuba ukholo olusulungekileyo lunokumelana nasiphi na isilingo yaye lusixhobisela ukuba sinyamezele de kube ‘sekupheleni.’”—Mateyu 24:13.
Omnye umqeqeshi waseGiliyadi, uMark Noumair, wabuza: “Ngaba Uza Kuthandwa?” Umxholo wakhe wawusekelwe kumazwi akweyoku-1 kaSamuweli 2:26, echaza uSamuweli ‘njengothandeka ngakumbi kokubini kuYehova nakubantu.’ Emva kokuqwalasela umzekelo kaSamuweli, uMzalwan’ uNoumair, oye wachitha ngaphezu kweminyaka elishumi kwinkonzo yobuvangeli basemazweni eAfrika, wathi: “Nawe unokuthandwa nguThixo ngokunamathela ngokunyanisekileyo kumsebenzi uThixo akunike wona. Uye wakunika isabelo esixabisekileyo sobuvangeli basemazweni.” Wandula ke uMzalwan’ uNoumair wakhuthaza aba baphumelele kule klasi ukuba bazijonge izabelo zabo njengezingcwele ezivela kuThixo baze bacinge ngendlela acinga ngayo uThixo kwizabelo zabo.
Ebudeni besi sikolo, abafundi bafumana amathuba amaninzi ngeempela-veki ukuze babelane nabantu kulo mmandla ‘ngezinto zobungangamela zikaThixo’ ezifumaneka eBhayibhileni. (IZenzo 2:11) Eneneni, bakwazi ukuthetha ngezi zinto ngeelwimi ezilishumi ezahlukahlukeneyo. UWallace Liverance, omnye wabaqeqeshi baseGiliyadi, waba nodliwano-ndlebe neqela labafundi abanikela amava abo kumxholo othi “‘Izinto Zobungangamela ZikaThixo’ Zenza Abantu Benze Okuthile.” Wathi: “Umoya washukumisela abo babekwigumbi eliphezulu ngePentekoste ukuba bathethe ‘ngezinto zobungangamela zikaThixo.’ Ikwangumoya ofanayo osebenzayo namhlanje kubo bonke abakhonzi abathembekileyo bakaThixo.” Bambi baye bashukunyiselwa ukuba bafunde iilwimi ezintsha kuba befuna ukunikela ubungqina kubantu abaninzi abangakumbi.
Icebiso Elihle Ngokuzijonga Izinto Ngendlela UThixo Azijonga Ngayo
Emva kweentetho zokuvula, uGary Breaux noWilliam Young, amalungu esebe laseUnited States, aba nodliwano-ndlebe namalungu eekomiti zesebe ezahlukahlukeneyo kumazwe apho kukho abavangeli basemazweni kwakunye nesibini esachitha iminyaka engama-41 kwinkonzo yobuvangeli basemazweni. Enye into eyathethwayo yile: “Abo bangazifuneli izinto ezininzi bahlala ixesha elide. Bagxininisa kwinjongo yokuya kwabo kuloo ndawo. Bayazi ukuba baze ukuze bashumayele iindaba ezilungileyo nokunceda abantu bamazi uYehova.”
UDavid Splane, elinye ilungu leQumrhu Elilawulayo, waqukumbela olu cwangciso ngentetho enomxholo othi “Aniyi Kude!” Wayethetha ukuthini, ekubeni abo bangama-46 abaphumeleleyo ngoku babethunyelwa kumazwe asehlabathini lonke? Wacacisa esithi: “Naphi na apho uya khona emhlabeni uya kuhlala usendlwini kaThixo logama usathembekile.” Ewe, onke amaKristu athembekileyo, enoba aphi ngokoqobo, akhonza kwinxalenye yetempile, okanye kwindlu enkulu yokomoya kaThixo, eyaqalisa ngexesha lokubhaptizwa kukaYesu kwinkulungwane yokuqala. (Hebhere 9:9) Kwakuthuthuzela ngokwenene kwabo babekho ukwazi ukuba uYehova ukufuphi kubo bonke abakhonzi bakhe abathembekileyo emhlabeni! Kanye njengokuba uYehova wayenomdla kuYesu xa wayesemhlabeni, ngoko ke unomdla kuthi sonke nakwinkonzo yethu esiyinikela Kuye, enoba siphi na. Ngoko ke ngokuphathelele unqulo, asikude kubazalwana bethu nakuYehova noYesu.
Emva kokudlulisela imibuliso evela ehlabathi lonke, ukuchaza izabelo, nokufundwa kwencwadi evela kule klasi evakalisa uxabiso ngoqeqesho abalufumene eGiliyadi, usihlalo waluqukumbela kakuhle olu cwangciso. Wakhuthaza aba bavangeli basemazweni abatsha ukuba baqhubeke nomsebenzi wabo omhle nokuba bamkhonze uYehova bevuya.—Filipi 3:1.
[Ibhokisi ekwiphepha 23]
INKCAZELO ENGABAFUNDI
Inani lamazwe abavela kuwo: 14
Inani lamazwe ababelwe kuwo: 19
Inani labafundi: 46
Umlinganiselo wobudala: 35,0
Umlinganiselo weminyaka besenyanisweni: 17,2
Umlinganiselo weminyaka bekubulungiseleli bexesha elizeleyo: 13,7
[Umfanekiso okwiphepha 24]
Iklasi Ye-113 Ephumelele KwiSikolo SeBhayibhile SeWatchtower SaseGiliyadi
Kuluhlu olungezantsi, kuqalwa kuluhlu olungaphambili ukuya kolungasemva, yaye amagama adweliswe ukusuka ekhohlo ukuya ekunene kuluhlu ngalunye.
(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.