Ilungelo Onalo Lokukholelwa
Kusenokwenzeka ukuba uyalixabisa ilungelo onalo lokukholelwa nantoni na ofuna ukuyikholelwa. Kunjalo phantse kuye wonke umntu. Ngokusebenzisa eli lungelo, abemi behlabathi abangamawaka amathandathu ezigidi baye baneenkolelo ezahlukahlukeneyo ngendlela emangalisayo. Njengokwahlukahlukana kwemibala, ukumila, ukwakhiwa kwento ethile, incasa, ivumba nezandi ezenziwa zizidalwa, ngokufuthi iinkolelo ezahlukahlukeneyo zibangela umdla, uvuyo nolonwabo ebomini. Eneneni, ukwahluka okunjalo kungenza ubomi bubangele umdla yaye bube mnandi.—INdumiso 104:24.
KODWA kufuneka ubani alumke. Ezinye iinkolelo azahlukanga nje kuphela kodwa zikwayingozi. Ngokomzekelo, ekuqaleni kwenkulungwane yama-20 abanye abantu babekholelwa ukuba amaYuda neeFreemason babecebe “ukuphazamisa impucuko yamaKristu baze bamisele ulawulo lwehlabathi phantsi kolawulo lwabo oludibeneyo.” Omnye umthombo wale nkolelo yayiliphecana labachasi bamaSemite elalinomxholo othi Protocols of the Learned Elders of Zion. Eli phecana lathi eli phulo laliquka ukukhuthaza ukufunwa kwerhafu engaphaya kwengqondo, ukukhuthaza ukwenziwa kwezixhobo, ukukhuthaza ukuba kwenziwe inkampani enkulu elawula onke amashishini ukuze ‘kutshatyalaliswe ubutyebi beeNtlanga ngephanyazo.’ Ezi zityholo ziquka ukulawula inkqubo yemfundo ukuze ‘abeeNtlanga babe ngamarhamncwa angakwaziyo ukucinga,’ nokwakha iziporo phantsi komhlaba ukuze kwenziwe isixeko esilikomkhulu ukuze abadala abangamaYuda bakwazi ‘ukoyisa nabaphi na abachasi ngokubabulala.’
Kakade ke, obu yayibubuxoki—obabenzelwe ukuxhokonxa iimvakalelo zokuchasa amaSemite. UMark Jones weMyuziyam yaseBritani uthi: ‘Le ntsomi ingekho ngqiqweni yasasazeka ukusuka eRashiya,’ apho yavela okwesihlandlo sokuqala kwinqaku lephephandaba ngowe-1903. Yapapashwa nakwiThe Times yaseLondon ngoMeyi 8, 1920. Kwisithuba esingaphezu konyaka emva koko, iThe Times yalubhenca olu xwebhu lububuxoki. Ngelo xesha, kwakusele kwenzeke umonakalo. UJones uthi: ‘Ubuxoki obufana nobu kunzima ukubuphelisa.’ Xa abantu bebamkela, kubakho iinkolelo zobutshaba, eziyityhefu neziyingozi—ngokufuthi bubangela imiphumo emibi, njengokuba imbali yenkulungwane yama-20 ibonisa.—IMizekeliso 6:16-19.
Inkolelo Nxamnye Nenyaniso
Kakade ke, iinkolelo eziphosakeleyo azibikho ngenxa yokuba kuxokwa ngabom. Maxa wambi, siye siziqonde ngokuphosakeleyo izinto. Bangaphi abantu abaye bafa ngesiquphe besenza into abakholelwa ukuba ilungile? Kwakhona, ngokufuthi sikholelwa into kuba nje sifuna ukuyikholelwa. Omnye unjingalwazi uthi nezazinzulu “ngokufuthi ziyazixabisa iingcamango nezigqibo zazo.” Iinkolelo zazo zenza kungabi lula ukuhlola iimeko ngaphandle kwekhethe. Zisenokwandula ke zichithe bonke ubomi bazo zizama ukuxhasa iinkolelo eziphosakeleyo.—Yeremiya 17:9.
Kuye kwenzeka izinto ezifanayo nakwiinkolelo zonqulo—apho kukho iimpikiswano ezinzulu. (1 Timoti 4:1; 2 Timoti 4:3, 4) Enye indoda inokholo olunzulu kuThixo. Omnye uthi le ndoda “inokholo kwinto engenabungqina bayo.” Omnye ukholelwa ukuba unomphefumlo ongafiyo osindayo ekufeni. Omnye ukholelwa ukuba xa usifa akubikho ngokupheleleyo. Kucacile ukuba, iinkolelo eziphikisana ngolu hlobo azinakuba ziyinyaniso zonke. Ngoko ke, ngaba akulokhondo lobulumko ukuqiniseka ukuba oko ukukholelwayo ngokwenene kuyinyaniso kungekhona nje kuba ufuna ukukukholelwa? (IMizekeliso 1:5) Unokukwenza njani oko? Inqaku elilandelayo liya kukuhlolisisa oku.
[Umfanekiso okwiphepha 3]
Inqaku lowe-1921 libhenca i-“Protocols of the Learned Elders of Zion”