Uyakhumbula Na?

Ngaba uye wakuxabisa ukufunda iinkupho zakutshanje zeMboniselo? Kaloku, bona enoba unokukwazi ukuphendula le mibuzo ilandelayo:

• Kutheni imibuzo ebuzwe kuYobhi isahluko sama-38 kubalulekile ukuba iqwalaselwe nanamhlanje?

Imisebenzi emininzi emangalisayo uThixo awanikela kuyo ingqalelo ayinakuqondwa ngokupheleleyo naziinzululwazi zezi mini. Le misebenzi iquka indlela umxhuzulane ogcina ngayo umhlaba ujikeleza, oko ngokwenene kukuko ukukhanya, isizathu sokuba kukho amahlwantsi amaninzi ahlukahlukeneyo ekhephu, indlela abumbeka ngayo amathontsi emvula nendlela amandla abandakanyeke ngayo kwisiphango.—4/15, iphepha 4-11.

• Yiyiphi imizekelo eseBhayibhileni enokusinceda sihlangabezane neemvakalelo ezingentle?

UAsafu, uBharuki noNahomi bajamelana namaxesha okudimazeka okanye ezinye iimvakalelo ezingentle, yaye ingxelo engokweZibhalo yendlela abaphumelela ngayo ekuhlangabezaneni neemeko ezinjalo inokusinceda.—4/15, iphepha 22-4.

• Ziziphi ezinye iindlela ezisebenzisekayo zokunceda abahlolokazi abangamaKristu?

Abahlobo banokunikela uncedo ngendlela enobubele nengqalileyo. Amalungu entsapho nabanye banokunikela uncedo ngemali okanye ngezinto eziphathekayo, apho kukho imfuneko yokwenene. AmaKristu akhonza nabo anokunceda ngokuba ngabahlobo, enikela inkxaso nentuthuzelo yokomoya.—5/1, iphepha 5-7.

• Kutheni kubalulekile ukutshata “kuphela eNkosini” njengoko eyoku-1 kwabaseKorinte 7:39 icebisa?

Ukutshata nabantu abangakholwayo ngokufuthi kuye kwaba yintlekele yodwa. Ngaphezu koko, ukulandela icebiso likaThixo ngumbandela wokunyaniseka kuYehova uThixo. Xa sisenza ngokuvisisana neLizwi likaThixo, iintliziyo zethu azisigwebi. (1 Yohane 3:21, 22)—5/15, iphepha 20-1.

• Ekubeni inguYehova onako ukuxolela izono zethu, kutheni amaKristu evuma izono zawo ezinzulu kubadala bebandla?

Ewe, umKristu ufanele afune ukuxolelwa izono ezinzulu nguYehova. (2 Samuweli 12:13) Kodwa njengokuba umprofeti uNatan wanceda uDavide, amadoda amakhulu aqolileyo ebandleni anokunceda aboni abaguqukileyo. Ukuya kubadala kuyavisisana nolwalathiso olunikelwa kuYakobi 5:14, 15.—6/1, iphepha 31.

• Bubuphi ubungqina bokuba sifanele sinyamekele iinkedama nabahlolokazi abasweleyo?

Ingxelo yembali ibonisa ukuba ukunikela ngenyameko enjalo kwakuphawula unqulo lokwenyaniso phakathi kwamaHebhere amandulo namaKristu okuqala. (Eksodus 22:22, 23; Galati 2:9, 10; Yakobi 1:27) Umpostile uPawulos waquka kwiZibhalo imiyalelo ecacileyo kumaKristu ukuba anyamekele abahlolokazi abasweleyo. (1 Timoti 5:3-16)—6/15, iphepha 9-11.

• Sisiphi isikhokelo kubomi obonwabisayo nobunenjongo?

Sifanele sihlakulele yaye sigcine ulwalamano oluhle noYehova, uBawo wethu osezulwini. Ukufundisisa iBhayibhile luncedo olubalulekileyo kanye ekwenzeni oko.—7/1, iphepha 4-5.

• Ngaba mntu ngamnye unomoya ongafiyo osindayo ekufeni?

Nangona abanye abantu bekholelwa ukuba umoya—kungekhona umphefumlo—awufi, iBhayibhile ayiyixhasi le ngcamango. Ibonisa ukuba xa umntu esifa, ubuyela eluthulini yaye akabikho. Kodwa uThixo ugcina amandla okumbuyisela ebomini, ngoko naliphi ithemba lobomi bekamva, ngovuko, lixhomekeke kuThixo. (INtshumayeli 12:7)—7/15, iphepha 3-6.

• Wayephi uDaniyeli xa amaHebhere amathathu ayevavanywa kwithafa laseDura?

IBhayibhile ayisixeleli. Kusenokwenzeka ukuba kwakungeyomfuneko ukuba uDaniyeli abe lapho ngenxa yesikhundla awayekuso, okanye kusenokwenzeka wayengekho eye kwisabelo sasebukhosini. Kodwa sisenokuqiniseka ukuba akazange alalanise ukuthembeka kwakhe kuYehova.—8/1, iphepha 31.