Ibali Lobomi
Ukwamkela Izimemo ZikaYehova Kunomvuzo
NGOKUBALISWA NGUMARIA DO CÉU ZANARDI
“UYehova uyakwazi akwenzayo. Ukuba ukuthumelela isimemo, ngokuthobeka umele usamkele.” La mazwi kaTata, awawathetha kwiminyaka engama-45 edluleyo, andinceda ndamkela isimemo sokuqala endasifumana kwintlangano kaYehova, sokukhonza njengomlungiseleli wexesha elizeleyo. Nanamhlanje, ndinombulelo ongazenzisiyo ngecebiso likaTata ngenxa yokuba ukwamkela izimemo ezinjalo kuye kwanomvuzo omkhulu.
NGOWE-1928, uTata warhumela iphephancwadi IMboniselo (yesiNgesi) waza waba nomdla eBhayibhileni. Njengoko wayehlala kumbindi wePortugal, okuphela konxibelelwano awayenalo nebandla likaThixo yayiziimpapasho awayezifumana ngeposi neBhayibhile yabazali bakhe. Ngowe-1949, xa ndandineminyaka eli-13 ubudala, intsapho yakowethu yafudukela eBrazil, apho uMama wazalelwa khona, yaza yahlala emaphandleni eRio de Janeiro.
Abamelwane bethu abatsha basimema ukuba siye kwicawa yabo, yaye saya izihlandlo ezimbalwa. UTata wayethanda ukubabuza ngesihogo somlilo, umphefumlo nekamva lomhlaba—kodwa babengenazo iimpendulo. UTata wayedla ngokuthi: “Kuya kufuneka silinde abafundi beBhayibhile bokwenene.”
Ngenye imini, ekhaya kwafika indoda eyimfama ihambisa IMboniselo noVukani! UTata wayibuza ngezinto ezifanayo, yaye yamnika iimpendulo ezicacileyo ezisekelwe eBhayibhileni. Kwiveki elandela leyo, satyelelwa ngomnye wamaNgqina kaYehova. Emva kokuphendula imibuzo engakumbi, lacela indlela laza lathi liya enkonzweni yasentsimini. Xa uTata engazange akuqonde oko lalikuthetha, lamfundela uMateyu 13:38 othi: “Intsimi lihlabathi.” UTata wabuza: “Ngaba nam ndingaya?” Laphendula: “Kakade, kwalani?” Sasiphuphuma luvuyo ngenxa yokuba siphinde sayifumana inyaniso yeBhayibhile! UTata wabhaptizwa kwindibano eyalandelayo, yaye nam ndabhaptizwa kungabanga thuba lide emva koko, ngoNovemba 1955.
Ukwamkela Isimemo Sam Sokuqala
Emva konyaka, ndafumana imvulophu enkulu enombala omdaka evela kwiofisi yesebe yamaNgqina kaYehova yaseRio de Janeiro enesimemo sokuba ndingenele umsebenzi wokushumayela wexesha elizeleyo. Ngelo xesha uMama wayenempilo enkenenkene, ngoko ndacela uTata ukuba andicebise. Waphendula ngelithi: “UYehova uyakwazi akwenzayo. Ukuba ukuthumelela isimemo, ngokuthobeka umele usamkele.” Loo mazwi andomeleza, ndaza ndazalisa loo fomu yesicelo yaye ndaqalisa inkonzo yexesha elizeleyo ngoJulayi 1, 1957. Isabelo sam sokuqala sasiseTrês Rios, idolophu ekwiLizwekazi laseRio de Janeiro.
Ekuqaleni, abahlali baseTrês Rios babengafuni ukusiphulaphula isigidimi sethu ngenxa yokuba sasingasebenzisi iBhayibhile yohlelo lwamaKatolika. Sancedwa kukuqalisa isifundo seBhayibhile noGeraldo Ramalho, ongumKatolika ozinikeleyo. Ngoncedo lwakhe ndakwazi ukufumana iBhayibhile etyobelwe ngumfundisi wasekuhlaleni. Ukususela ngoko, xa ubani eqalisa ukuchasa, ndandimbonisa utyobelo lomfundisi yaye lowo uchasayo wayesuka abe yinkuku esikw’ umlomo. Kamva uGeraldo wabhaptizwa.
Ndandiphuphuma luvuyo xa indibano yesiphaluka yaqhutyelwa kanye kumbindi weTrês Rios ngowe-1959. Intsumpa yamapolisa, eyayifunda iBhayibhile ngelo xesha, yada yalungiselela ukuba kuxhonywe iibhodi zokusasaza olo cwangciso kwidolophu yonke. Emva kokusebenza iminyaka emithathu eTrês Rios, ndamenyelwa kwisabelo esitsha eItu, emalunga neekhilomitha ezili-110 kwintshona yeSão Paulo.
Iincwadi Ezibomvu, Eziluhlaza Nezimthubi
Emva kokukhangela indawo yokuhlala, mna neqabane endandinguvulindlela nalo safumana iindawo zokuhlala ezisemgangathweni kumbindi wedolophu kwikhaya likaMaria, umhlolokazi onobubele. UMaria wasiphatha njengeentombi zakhe. Kodwa, kungabanga thuba lide, ubhishophu wamaRoma Katolika waseItu wamtyelela waza wamxelela ukuba asigxothe, kodwa waba nesibindi waza wathi: “Xa ndafelwa ngumyeni, nasong’ izandla anandithuthuzela. La maNgqina kaYehova aye andinceda nangona ndingelilo ilungu lonqulo lwawo.”
Malunga nelo xesha, elinye ibhinqa lasixelela ukuba umfundisi wamaKatolika waseItu uthe amarhamente akhe angayamkeli imibhalo “yencwadi ebomvu engoMtyholi.” Wayebhekisela kwincwadi ethi “UThixo Makabe Nenyaniso,” impapasho yeBhayibhile esasiyihambisa ebantwini ngaloo veki. Ekubeni incwadi ebomvu “yayivaliwe” ngabefundisi, salungiselela ukuhambisa incwadi eluhlaza (“New Heavens and a New Earth”). Kamva, xa umfundisi weva ukuba ngoku sele sihambisa ncwadi yimbi, sahambisa incwadi emthubi (What Has Religion Done for Mankind?), njalo njalo. Kwasinceda gqitha ukuba neencwadi ezininzi ezinamaqweqwe anemibala eyahlukahlukeneyo!
Emva kwexesha elimalunga nonyaka eItu, ndafumana itelegram eyayinesimemo sokuba ndiye kusebenza okwethutyana eBheteli, ikhaya labasebenzi besebe abangamaNgqina kaYehova eliseRio de Janeiro, ukulungiselela indibano kawonke-wonke. Ndasamkela ngezandla ezishushu.
Amalungelo Nocelomngeni Olungakumbi
EBheteli, kwakusoloko kukho umsebenzi omninzi yaye ndandikuvuyela ukuncedisa naphi na apho ndinokuncedisa khona. Hayi indlela ekwakusondla ngayo ukuya kwingxubusho yetekisi yosuku ntsasa nganye kuquka neSifundo seMboniselo sentsapho ngeengokuhlwa zangeMivulo! Imithandazo esuk’ entliziyweni kaOtto Estelmann namanye amalungu anamava entsapho yaseBheteli yayindichukumisa kakhulu.
Emva kwendibano kawonke-wonke, ndaqokelela iimpahla zam ndilungiselela ukubuyela eItu, kodwa ndathi manga xa isicaka sesebe, uGrant Miller, sandinika ileta eyayinesimemo sokuba ndibe lilungu lentsapho yaseBheteli ixesha elizeleyo. Ndandihlala kwigumbi elinye noDade uHosa Yazedjian, osakhonza kwiBheteli yaseBrazil nanamhlanje. Ngezo mini intsapho yaseBheteli yayincinane—sasingama-28 kuphela—yaye sonke sasingabahlobo abasenyongweni.
Ngowe-1964, uJoão Zanardi, umlungiseleli weendaba ezilungileyo wexesha elizeleyo, waza kuqeqeshwa eBheteli. Ngelo xesha wayabelwe njengesicaka sesiphaluka, okanye umveleli ohambahambayo, kwalapho kufuphi. Sasidla ngokudibana xa eze kufaka iingxelo zakhe eBheteli. Isicaka sesebe samvumela uJoão ukuba abekho kwisifundo sentsapho ngeengokuhlwa zangeMivulo, ngoko sasikwazi ukuchitha ixesha elininzi sikunye. Mna noJoão sazimanya ngeqhina lomtshato ngoAgasti 1965. Ndasamkela ngezandla ezishushu isimemo sokuba kunye nomyeni wam kumsebenzi wesiphaluka.
Ngezo mini umsebenzi wokuhambahamba kumbindi weBrazil wawungelula. Andisokuze ndisilibale isihlandlo esatyelela ngaso iqela labavakalisi kwiLizwekazi laseAranha Minas Gerais. Kwafuneka sikhwele uloliwe size sihambe umgama oseleyo ngeenyawo—sithwele iisutikheyisi, umatshini wokuchwetheza, umatshini weeslides, iibhegi zentsimi kunye noncwadi. Hayi indlela esavuya ngayo xa sifumana uLourival Chantal, umzalwana osele ekhulile, owayesoloko esilinda esikhululweni sikaloliwe ukuze asiphathise iibhegi.
EAranha iintlanganiso zaziqhutyelwa kwindlu eqeshiweyo. Sasilala kwigumbi elincinane elingasemva. Kwelinye icala leli gumbi, kwakukho umlilo weenkuni esasipheka kuwo sifudumeze namanzi ababesiphathela wona abazalwana ngee-emele. Sasisebenzisa umngxuma owawuphakathi kwehlathi loqalo njengendlu yangasese. Ebusuku sasishiya isibane segesi sikhanya ukuze sigxothe iibarber beetles—izinambuzane ezinokusasaza isifo sikaChagas. Sasidla ngokuvuka iimpumlo zethu zimnyama ngumsi. Amava abangel’ umdla ngokwenene!
Ngoxa sasikhonza kwisiphaluka kwiLizwekazi laseParaná, saphinda safumana enye yeza mvulophu zinkulu zinombala omdaka evela kwiofisi yesebe. Yayisesinye isimemo esivela kwintlangano kaYehova—ngoku sokuba siye kukhonza ePortugal! Ileta eyayihambisana naso yasicebisa ukuba sicamngce ngomgaqo ofumaneka kuLuka 14:28 size sibale iindleko ngaphambi kokwamkela esi sabelo kuba umsebenzi wethu wobuKristu wawuvaliwe apho, yaye urhulumente wasePortugal wayesele evalele abazalwana abaninzi.
Ngaba sasiza kuya kwilizwe apho sasiza kujamelana nentshutshiso enjalo? UJoão wathi: “Ukuba abazalwana bethu basePortugal banokuhlala apho baze bakhonze uYehova ngokuthembeka, yintoni enokubangela ukuba thina singakwazi?” Ndikhumbula amazwi kaTata akhuthazayo, ndavuma: “Ukuba uYehova usithumelele esi simemo, simele sisamkele size sithembele kuye.” Kungekudala emva koko, sasiseBheteli eSão Paulo, sisamkela imiyalelo engakumbi yaye silungisa namaphepha ethu okuhamba.
UJoão Maria noMaria João
Iphenyane lethu, uEugênio C, landuluka kunxweme lwaseSantos, kwiLizwekazi laseSão Paulo, ngoSeptemba 6, 1969. Emva kweentsuku ezisithoba elwandle, sagaleleka ePortugal. Ekuqaleni, sachitha iinyanga eziliqela sisebenza nabazalwana abanamava kwizitrato ezixineneyo zaseAlfama naseMouraria, kwisithili esidala saseLisbon. Basiqeqeshela ukuba silumke ukuze singabanjwa lula ngamapolisa.
Iintlanganiso zebandla zaziqhutyelwa kumakhaya amaNgqina. Xa siphawula ukuba abamelwane baqalisa ukurhana, iintlanganiso sasiziqhubela kwenye indawo ukuze indlu ingagqogqwa okanye kubanjwe abazalwana. Iipikniki, njengoko sasizibiza njalo iindibano zethu, zaziqhutyelwa eMonsanto Park, kwimida yeLisbon, naseCosta da Caparica, indawo enemithi ekwingingqi yonxweme. Sasinxiba iimpahla zokuphola kwezo zihlandlo, yaye iqela labalindi abakhaliphileyo lalisima kwiindawo ezifanelekileyo livul’ amehlo. Ukuba kwakusithi gqi nabani na ongaqondakaliyo, sasiqalisa ukudlala, siqalise ipikniki okanye sicule ingoma yolonwabo yasekuhlaleni.
Ukuze senze kube nzima ukuba amapolisa asiqonde, sasikuphepha ukusebenzisa amagama ethu. Abazalwana babesazi njengoJoão Maria noMaria João. Amagama ethu ayengasetyenziswa kuyo nayiphi na imbalelwano okanye iingxelo. Kunoko, sasisebenzisa amanani. Ndenza isigqibo sokuba ndingazazi ngentloko idilesi zabazalwana. Ngaloo ndlela, ukuba ndandinokubanjwa, ndandingayi kukwazi ukubathengisa.
Phezu kwayo nje imiqathango, mna noJoão sasizimisele ukusebenzisa naliphi na ithuba elivelayo lokunikela ubungqina, ekubeni sasisazi ukuba inkululeko yethu yayinokuphela nangawuphi na umzuzu. Safunda ukuthembela kuBawo wethu wasezulwini, uYehova. NjengoMkhuseli wethu, wayesebenzisa iingelosi zakhe ngendlela eyayibangela ukuba sizive ngathi ‘siyambona Lowo ungabonakaliyo.’—Hebhere 11:27.
Ngesinye isihlandlo, ngoxa sasishumayela kwindlu ngendlu ePorto, sadibana nendoda eyasinyanzela ukuba singene ngaphakathi endlwini. Udade endandisebenza naye wavuma engalibazisanga, yaye kwakungekho ndlela yimbi ndinokwenza ngayo ngaphandle kokuba ndingene naye. Ndothuka ndabamb’ ongezantsi xa ndabona umfanekiso womntu onxibe impahla yasemkhosini epasejini. Sasiza kuthini bethu? Umninimzi wathi singahlala phantsi waza wandibuza: “Ngaba ubuya kumvumela unyana wakho aye kwinkonzo yasemkhosini xa ebizwa?” Kwafuneka ndisebenzise ubuchule. Ngelizwi eliphantsi, kodwa emva kokuba ndithandazile entliziyweni yam, ndaphendula: “Andinabantwana, yaye ndiqinisekile ukuba xa ndinokukubuza umbuzo ofuna wenze uqikelelo, ubuya kundiphendula ngendlela efanayo.” Wathi cwaka. Ngoko ndahlabela mgama ndathi: “Ngoku ukuba unokubuza ukuba kunjani ukufelwa ngumntakwenu okanye utata, loo mbuzo ndinokuwuphendula kuba umntakwethu notata bafile.” Amehlo am ayezele iinyembezi njengoko ndandithetha, yaye ndaphawula ukuba naye wayefuna ukulila. Wasixelela ukuba usandul’ ukufelwa ngumfazi. Waphulaphula ngenyameko njengoko ndandicacisa ithemba lovuko. Sandula ngobubele sacela indlela sanduluka ngoxolo, sawushiyela ezandleni zikaYehova loo mbandela.
Ngaphezu kwako nje ukuvalwa komsebenzi wethu, abantu abanyanisekileyo bancedwa bafumana ulwazi ngenyaniso. EPorto umyeni wam waqalisa ukufunda noHorácio, usomashishini owenza inkqubela ngokukhawuleza. Kamva unyana wakhe uEmílio, ingcungela yogqirha, naye wama ngakwicala likaYehova waza wabhaptizwa. Enyanisweni, akukho nto inokuthintela umoya oyingcwele kaYehova.
“Aninakuze Niyazi Into UYehova Anokuyivumela”
Ngowe-1973, mna noJoão samenywa ukuba siye kwindibano yezizwe ngezizwe ‘Yoloyiso Lobuthixo’ eBrussels, eBelgium. Kwakukho abazalwana abaninzi baseSpeyin nabaseBelgium, kuquka neendwendwe ezivela eMozambiki, eAngola, eCape Verde, eMadeira naseAzores. Kumazwi akhe okuqukumbela, uMzalwan’ uKnorr, owayevela kwikomkhulu eNew York, wasibongoza: “Qhubekani nikhonza uYehova ngokuthembeka. Aninakuze niyazi into uYehova anokuyivumela. Ngubani owaziyo, mhlawumbi indibano elandelayo yezizwe ngezizwe iya kube isePortugal!”
Kunyaka olandela lowo umsebenzi wokushumayela wavulwa ngokusemthethweni ePortugal. Yaye amazwi kaMzalwan’ uKnorr angqineka eyinyaniso xa ngowe-1978 saqhuba indibano yezizwe ngezizwe yethu yokuqala eLisbon. Hayi ilungelo ekwaba lilo ukuhamba kwizitrato zaseLisbon, sinikela ubungqina ngeeplakhadi, amaphephancwadi kunye nezimemo zentetho yesidlangalala! Oko yaba kukuzaliseka kweminqweno yethu.
Sasisele sibathanda abazalwana bethu basePortugal, uninzi lwabo olwalukhe lwavalelwa lwaza lathwaxwa kanobom ngenxa yokuba ngamaKristu angoondilele. Umnqweno wethu yayikukuba siqhubeke sikhonza ePortugal. Noko ke, izinto azizange zihambe ngaloo ndlela. Ngowe-1982, uJoão waba nengxaki yentliziyo exhomis’ amehlo, yaye iofisi yesebe yacebisa ukuba sibuyele eBrazil.
Ixesha Lobunzima
Abazalwana kwiofisi yesebe yaseBrazil basixhasa kakhulu yaye basabela ukuba sikhonze kwiBandla iQuiririm eTaubaté, kwiLizwekazi laseSão Paulo. Impilo kaJoão yaba mandundu ngokukhawuleza, yaye kungabanga thuba lide kwanyanzeleka ukuba asoloko esendlwini. Abantu abanomdla babesiza kwikhaya lethu ukuza kufunda iBhayibhile, yaye kwakubakho intlanganiso yentsimi yonke imihla, kuquka nesifundo sencwadi seveki ngeveki. La malungiselelo asinceda sahlala somelele ngokomoya.
UJoão waqhubeka esenza okusemandleni akhe enkonzweni kaYehova de wafa ngo-Oktobha 1, 1985. Ndandilusizi yaye ngandlel’ ithile ndidandathekile, kodwa ndandizimisele ukuqhubeka nesabelo sam. Enye ingxaki yavela ngoAprili 1986 xa kwangena amasela ekhayeni lam aza athabatha phantse yonke into ephambi kwawo. Ndaziva ndililolo yaye ndisoyika isihlandlo sokuqala ebomini bam. Esinye isibini sandimema ukuba ndihlale naso ithutyana, yaye ndakuxabisa kakhulu oko.
Ukufa kukaJoão nokubelwa ngamasela kwachaphazela nenkonzo yam kuYehova. Andizange ndiphinde ndizithembe kubulungiseleli. Emva kokubhalela iofisi yesebe ngobunzima endandikubo, ndafumana isimemo sokuba ndiye kuchitha ithutyana eBheteli ukuze ndiphinde ndilungelelane. Hayi indlela elandomeleza ngayo elo thutyana!
Kungabanga thuba lide emva kokuba ndiziva bhetele, ndamkela isabelo sokukhonza eIpuã, idolophu encinane kwiLizwekazi laseSão Paulo. Umsebenzi wokushumayela wawundigcina ndixakekile, kodwa ayekho amaxesha endandiziva ndidimazekile ngawo. Ngaloo maxesha, ndandiye nditsalele umnxeba abazalwana baseQuiririm, yaye intsapho ethile yayidla ngokundityelela iintsuku ezimbalwa. Ayesakha ngokwenene loo mathuba okutyelelwa! Bangama-38 abazalwana noodade abahlukahlukeneyo abahamba uhambo olude beze kundibona ngonyaka wokuqala ndiseIpuã.
Ngowe-1992, iminyaka emithandathu emva kokufa kukaJoão, ndafumana esinye isimemo esivela kwintlangano kaYehova, ngoku esokuba ndifudukele eFranca, kwiLizwekazi laseSão Paulo, apho ndiqhubeka ndikhonza khona njengomlungiseleli wexesha elizeleyo. Banomdla kakhulu abantu bale ndawo. Ngowe-1994, ndaqalisa isifundo seBhayibhile nosodolophu. Ngelo xesha, wayegaya abavoti efuna ukukhethwa abe nesikhundla kumbutho wezobupolitika waseBrazil, kodwa nangona wayexakeke ngolo hlobo, sasifunda rhoqo ngoMvulo emva kwemini. Ukuze angaphazanyiswa, wayedla ngokuvala umnxeba wakhe. Hayi indlela endavuya ngayo xa ekugqibeleni wahlukana nezobupolitika waza, ngoncedo lwenyaniso, walungisa iingxaki awayenazo emtshatweni wakhe! Yena nomfazi wakhe babhaptizwa ngowe-1998.
Xa ndijonga emva, ndingathi ubomi bam njengomlungiseleli wexesha elizeleyo bebuzele ziintsikelelo namalungelo. Ukwamkela izimemo endizinikwe nguYehova esebenzisa intlangano yakhe kuye kwandizisela iingenelo ezingummangaliso. Yaye enokuba ziziphi izimemo endinokuzifumana kwixesha elizayo, ndiya kuzamkela ngezandla ezishushu njengasekuqaleni.
[Imifanekiso ekwiphepha 25]
Ngowe-1957, xa ndangenela inkonzo yexesha elizeleyo, nanamhlanje
[Umfanekiso okwiphepha 26]
Ndikunye nentsapho yaseBheteli eBrazil ngowe-1963
[Umfanekiso okwiphepha 27]
Umtshato wethu ngoAgasti 1965
[Umfanekiso okwiphepha 27]
Indibano ePortugal ngoxa umsebenzi wawuvaliwe
[Umfanekiso okwiphepha 28]
Ukunikela ubungqina esitratweni eLisbon ebudeni beNdibano Yezizwe Ngezizwe ‘Yokholo Olweyisayo’