Ukhokelo Olufanelekileyo—Sinokulufumana Phi?

IBHAYIBHILE ithi: ‘Ndlu nganye inomakhi wayo, kodwa lowo wazakhayo zonke izinto nguThixo.’ (Hebhere 3:4; ISityhilelo 4:11) Ekubeni uThixo oyinyaniso, uYehova, enguMdali wethu, “uyakwazi ukuyilwa kwethu.” (INdumiso 103:14) Unolwazi olupheleleyo ngeentsilelo nangeemfuno zethu. Yaye kuba enguThixo onothando, ufuna ukwanelisa ezo mfuno. (INdumiso 145:16; 1 Yohane 4:8) Kunjalo nangokhokelo olufanelekileyo.

Esebenzisa umprofeti uIsaya, uYehova wathi: “Khangelani! Ndimnike ukuba abe lingqina kumaqela eentlanga, inkokeli nomphathi wamaqela eentlanga.” (Isaya 55:4) Isicombululo kwingxaki yokhokelo lwanamhlanje siquka ukuyazi le Nkokeli—emiselwe nguSomandla ngokwakhe—nokwamkela ukhokelo lwayo. Ngoko ke, ngubani le Nkokeli noMphathi owayexelwe ngaphambili? Ziziphi iimfaneleko enazo njengenkokeli? Iya kusikhokelela phi? Simele senze ntoni ukuze singenelwe kukhokelo lwayo?

INkokeli Ethenjisiweyo Iyafika

Kwiminyaka enokuba ngama-2 500 eyadlulayo, ingelosi uGabriyeli yavela kumprofeti uDaniyeli yaza yamxelela oku: “Yazi ke, uqonde ukuba, ukususela ekuphumeni kwelizwi lokuba ibuyiselwe ize yakhiwe kwakhona iYerusalem kude kuse kuMesiya iNkokeli, yoba ziiveki ezisixhenxe, neeveki ezingamashumi amathandathu anesibini. Iya kubuyiswa, yakhiwe kwakhona, ibe nendawo yembutho nomjelo wamanzi, kodwa ngamaxesha okubandezeleka.”—Daniyeli 9:25.

Kucacile ukuba, ingelosi yayixelela uDaniyeli ngexesha elingqalileyo eyayiza kuza ngayo iNkokeli kaYehova ekhethiweyo. “UMesiya iNkokeli” uya kuvela ekupheleni kweeveki ezingama-69, okanye iminyaka engama-483, ukususela ngowama-455 B.C.E., xa kwaphuma ilizwi lokuba kuphinde kwakhiwe iYerusalem.a (Nehemiya 2:1-8) Kwenzeka ntoni ekupheleni kwelo xesha? Umbhali weVangeli uLuka uyabalisa: “Ngonyaka weshumi elinesihlanu wolawulo lukaTibheriyo Kesare, xa uPontiyo Pilato wayeyirhuluneli yelakwaYuda, noHerode engumlawuli wesithili saseGalili [29 C.E.], . . . kwafika ilizwi likaThixo kuYohane unyana kaZekariya esentlango. Ngoko wafika kulo lonke ilizwe elijikeleze iYordan, eshumayela ubhaptizo olufuzisela inguquko ukuze kuxolelwe izono.” Ngelo xesha, “abantu babenolindelo” lukaMesiya iNkokeli. (Luka 3:1-3, 15) Nangona izihlwele zeza kuYohane, wayengeyiyo loo Nkokeli.

Kwandula ke ngo-Oktobha wama-29 C.E., uYesu waseNazarete weza kuYohane ukuze abhaptizwe. Yaye uYohane wangqina, esithi: “Ndawubona umoya usihla njengehobe uphuma ezulwini, waza wahlala phezu kwakhe. Nam ndandingamazi, kodwa Lowo wandithumayo ukubhaptiza emanzini wathi kum, ‘Othe wambona kusihla umoya phezu kwakhe, nguye obhaptizela kumoya oyingcwele.’ Kwaye ndiwubonile, ndaza ndangqina ukuba lo nguye uNyana kaThixo.” (Yohane 1:32-34) Xa wayebhaptizwa, uYesu waba yiNkokeli ethanjisiweyo—uMesiya okanye uKristu.

Ewe, “inkokeli nomphathi wamaqela eentlanga” owayethenjisiwe yangqineka inguYesu Kristu. Yaye xa sihlolisisa iimpawu zakhe njengenkokeli, sikuqonda ngokucacileyo ukuba ukhokelo lwakhe lukudlula lee oko kufunekayo kwinkokeli efanelekileyo yezi mini.

UMesiya—INkokeli Efanelekileyo

Inkokeli efanelekileyo inikela ulwalathiso olucacileyo yaye inceda abantu abaphantsi kwayo babe namandla nezinto ukuze bakwazi ukucombulula iingxaki ngokuphumelelayo. Incwadi ethi 21st Century Leadership: Dialogues With 100 Top Leaders ithi: ‘Oku koko kufunekayo kwinkokeli ephumeleleyo kwinkulungwane yama-21.’ Hayi indlela awabalungiselela ngayo ngokuphumelelayo uYesu abaphulaphuli bakhe ukuba basingathe iingxaki zemihla ngemihla! Cinga nje ngeyona ntetho yakhe edumileyo—INtshumayelo yaseNtabeni. Amazwi anamacebiso asebenzisekayo abhalwe kuMateyu isahluko 5 ukusa kwesesi-7.

Ngokomzekelo, cinga ngecebiso likaYesu ekuzinziseni ukungavisisani. Wathi: “Ukuba, ngoko, uzisa isipho sakho esibingelelweni, uthi ulapho ukhumbule ukuba umzalwana wakho unento ngakuwe, sishiye isipho sakho apho phambi kwesibingelelo, uze uhambe uye kuxolelana nomzalwana wakho kuqala, wandule ke, wakubuya, unikele isipho sakho.” (Mateyu 5:23, 24) Ukuthabatha amanyathelo okuqala ekudaleni uxolo nabanye kuza kuqala—kubaluleke ngaphezu kokufeza imisebenzi yonqulo, njengokunikela isipho kwisibingelelo setempile eYerusalem njengoko wawusitsho uMthetho kaMoses. Kungenjalo, unqulo alwamkelekanga kuThixo. Icebiso likaYesu liyasebenza namhlanje njengoko kwakunjalo kwiinkulungwane ezadlulayo.

UYesu wanceda abaphulaphuli bakhe ukuba bawuphephe umgibe wokuziphatha okubi. Wabayala esithi: “Nivile ukuba kwathiwa, ‘Uze ungakrexezi.’ Kodwa mna ndithi kuni wonk’ ubani oqhubeka ekhangela umfazi ngokokude amkhanuke sele emkrexezile entliziyweni yakhe.” (Mateyu 5:27, 28) Esinjani sona ukufaneleka isilumkiso! Kutheni sifanele siqalise ukukrexeza ngokucinga ngako? UYesu wathi entliziyweni kuphuma uhenyuzo nokukrexeza. (Mateyu 15:18, 19) Siya kuba senza ngobulumko ukuba silondoloza intliziyo yethu.—IMizekeliso 4:23.

INtshumayelo yaseNtabeni iqulethe icebiso elihle ekuthandeni iintshaba zikabani, ekuboniseni isisa, ukuba nembono efanelekileyo ngezinto eziphathekayo nezokomoya, nokufanayo. (Mateyu 5:43-47; 6:1-4, 19-21, 24-34) UYesu wabonisa abaphulaphuli bakhe indlela yokufuna uncedo lukaThixo ngokubafundisa indlela yokuthandaza. (Mateyu 6:9-13) UMesiya iNkokeli uqinisa yaye ulungiselela abalandeli bakhe ukusingatha iingxaki eziqhelekileyo kubantu.

Izihlandlo ezithandathu kwiNtshumayelo yaseNtabeni, uYesu uqalisa isivakalisi sakhe ngala mazwi athi, “nivile ukuba kwathiwa” okanye “ngaphezu koko kwathiwa,” kodwa wandula ke anikele olunye uluvo, esithi “ke mna ndithi kuni.” (Mateyu 5:21, 22, 27, 28, 31-34, 38, 39, 43, 44) Oku kubonisa ukuba abaphulaphuli bakhe babeqhelene nokwenza izinto ngendlela ethile, ngokwezithethe zomlomo zabaFarisi. Kodwa ngoku uYesu wayebabonisa indlela eyahlukileyo—eyayibonisa umongo woMthetho kaMoses. Ngaloo ndlela uYesu wayebonisa umahluko, yaye wakwenza oku ngendlela ekwenza kube lula ngabalandeli bakhe ukuba bayamkele. Ewe, uYesu wayeshukumisela abantu ukuba benze iinguqulelo ezibonakalayo ebomini babo, ngokomoya nangokuziphatha. Olu luphawu lwenkokeli yokwenyaniso.

Incwadi yokufunda ngemibandela yokulawula ibonisa indlela ekunzima ngayo ukwenza inguqulelo enjalo. Ithi: “Ummeli [inkokeli] obangela kubekho inguqulelo ufanele avakalelwe njengonontlalo-ntle, aqonde njengesazi sengqondo, abe nomxhino njengembaleki yemigama emide, abe nenkalipho njengonomasinana, akwazi ukuzimela njengekheswa, aze abe nomonde njengengcwele. Yaye nokuba unazo zonke ezi mpawu, akanakuqiniseka ukuba uza kuphumelela.”

Inqaku elinomxholo othi, “Ukukhokela: Ngaba Kubalulekile Ukuba Neempawu Ezifanelekileyo?” lathi: “Iinkokeli zimele ziziphathe ngendlela ezifuna abalandeli bazo baziphathe ngayo.” Eneneni, inkokeli efanelekileyo yenza ngokwamazwi ayo. Hayi indlela okwakuyinyaniso ngayo oko ngoYesu Kristu! Ewe, wafundisa abo wayenabo ukuba bathobeke, kodwa wanikela isifundo sokoqobo kubo ngokubahlamba iinyawo. (Yohane 13:5-15) Akazange athume abalandeli bakhe ukuba bashumayele iindaba ezilungileyo zoBukumkani bukaThixo kuphela, kodwa wazibhokoxa kuloo msebenzi. (Mateyu 4:18-25; Luka 8:1-3; 9:1-6; 10:1-24; Yohane 10:40-42) Yaye kumbandela wokwamkela ukhokelo, uYesu wamisela umzekelo. Wathi ngaye: “UNyana akanakwenza nanye into ngokwakhe, ngaphandle koko abona uYise ekwenza.”—Yohane 5:19.

Ukuqwalasela oko wakuthethayo nawakwenzayo uYesu kubonisa ukuba uyiNkokeli efanelekileyo. Enyanisweni, uyidlula lee yonke imilinganiselo yabantu yenkokeli efanelekileyo. UYesu ufezekile. Ekubeni efumene ukungafi emva kokufa nokuvuswa kwakhe, uphila ngonaphakade. (1 Petros 3:18; ISityhilelo 1:13-18) Yiyiphi inkokeli engumntu enazo ezi mfanelo?

Yintoni Esimele Siyenze?

NjengoKumkani olawulayo woBukumkani bukaThixo, “uMesiya iNkokeli” uya kuluthululela iintsikelelo uluntu oluthobelayo. Ngokuphathelele oku, iZibhalo ziyathembisa: “Umhlaba ngokuqinisekileyo uya kuzaliswa kukwazi uYehova njengamanzi egubungele ulwandle.” (Isaya 11:9) “Abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo.” (INdumiso 37:11) “Okunene baya kuhlala, ngamnye phantsi komdiliya wakhe naphantsi komkhiwane wakhe, yaye akuyi kubakho bani ubangcangcazelisayo.” (Mika 4:4) “Naye abe nguThixo walo. Uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.”—ISityhilelo 21:3, 4.

Ihlabathi namhlanje linengxaki yokhokelo. Noko ke, uYesu Kristu ukhokelela abalulamileyo kwihlabathi elitsha elinoxolo, apho uluntu oluthobelayo luya kumanyana ekunquleni uYehova uThixo luze luzabalazele ukufikelela imfezeko. Hayi indlela ekubaluleke ngayo ukuzuza ulwazi ngoThixo oyinyaniso neNkokeli ayimiseleyo size senze ngokuvisisana nolo lwazi!—Yohane 17:3.

Eyona ndlela esinokumhlonela ngayo omnye umntu kukumxelisa. Ngoko ke ngaba asimele sizame ukuxelisa eyona Nkokeli inkulu kwimbali yoluntu—uYesu Kristu? Sinokukwenza njani oko? Ukwamkela ukhokelo lwakhe kuya kuba naliphi igalelo kubomi bethu? Le mibuzo neminye iya kuxutyushwa kumanqaku amabini alandelayo.

[Umbhalo osemazantsi]

[Umfanekiso okwiphepha 4]

UDaniyeli waxela kwangaphambili ngeNkokeli ezayo ekhethwe nguThixo

[Imifanekiso ekwiphepha 7]

Iimfundiso zikaYesu zalungiselela abantu ukuba basingathe iingxaki zobomi

[Umfanekiso okwiphepha 7]

UYesu uya kukhokelela uluntu oluthobelayo kwihlabathi elitsha elinoxolo