Ngaba Ukhokelo LukaKristu Lulokwenene Kuwe?
“Ningabizwa nangokuthi ‘iinkokeli,’ kuba inye iNkokeli yenu, uKristu.”—MATEYU 23:10.
1. Ngubani okuphela kweNkokeli yamaKristu okwenyaniso?
KWAKUNGOLWESIBINI, ngoNisan 11. Kwiintsuku ezintathu kamva, uYesu Kristu wayeza kubulawa. Yayisisihlandlo sokugqibela etyelele etempileni. Ngale mini, uYesu wazifundisa into ebalulekileyo izihlwele ezazihlanganisene apho kunye nabafundi bakhe. Wathi: “Ningabizwa kuthiwe Rabhi, kuba mnye umfundisi wenu, kanti nonke nina ningabazalwana. Ngaphezu koko, ningabizi nabani na ngokuthi nguyihlo emhlabeni, kuba mnye uYihlo, Lowo wasezulwini. Ningabizwa nangokuthi ‘iinkokeli,’ kuba inye iNkokeli yenu, uKristu.” (Mateyu 23:8-10) Ngokucacileyo, uYesu Kristu yiNkokeli yamaKristu okwenyaniso.
2, 3. Ukuphulaphula uYehova nokwamkela iNkokeli ayimiseleyo kunayiphi impembelelo ebomini bethu?
2 Hayi indlela oluyingenelo ngayo ukhokelo lukaYesu ebomini bethu xa silwamkela! Exela kwangaphambili ngokuza kwale Nkokeli, esebenzisa umprofeti uIsaya uYehova uThixo wathi: “Wenani, nonke nina ninxaniweyo! Yizani emanzini. Nabo bangenamali! Yizani, nithenge nize nidle. Ewe, yizani, nithenge iwayini nobisi ngaphandle kwemali nangaphandle kwexabiso. . . . Phulaphulani ngenyameko kum, nize nidle okulungileyo, yaye imiphefumlo yenu mayiyoliswe ngokugqibeleleyo kukutyeba. . . . Khangelani! Ndimnike ukuba abe lingqina kumaqela eentlanga, inkokeli nomphathi wamaqela eentlanga.”—Isaya 55:1-4.
3 UIsaya wasebenzisa iziselo eziqhelekileyo—amanzi, ubisi newayini—busafobe ukuze abonise indlela obuchaphazeleka ngayo ubomi bethu xa siphulaphula uYehova size silandele iNkokeli noMlawuli asinike yena. Umphumo woku uyahlaziya. Kunjengokusela iglasi yamanzi abandayo ngemini etshisayo. Unxano lwethu ngenyaniso nobulungisa luyaqabuleka. Njengoko ubisi lusomeleza iintsana luze luzincede zikhule, ‘ubisi lwelizwi’ luyasomeleza luze lusenze sikhule ngokomoya kulwalamano lwethu noThixo. (1 Petros 2:1-3) Yaye ngubani onokukhanyela ukuba iwayini ibangela uvuyo kwizihlandlo zolonwabo? Ngokufanayo, ukunqula uThixo wokwenyaniso nokulandela emanyathelweni eNkokeli ayimiseleyo kwenza ubomi ‘buzaliswe luvuyo kuphela.’ (Duteronomi 16:15) Ngoko ke, kubalulekile ukuba sonke—abaselula nabakhulileyo, amadoda namabhinqa—sibonise ukuba ukhokelo lukaKristu lulokwenene kuthi. Noko ke, sinokukubonisa njani kubomi bethu bemihla ngemihla ukuba uMesiya yiNkokeli yethu?
Lutsha—‘Qhubekani Nisenza Inkqubela Ebulumkweni’
4. (a) Kwenzeka ntoni xa uYesu oneminyaka eli-12 ubudala etyelela eYerusalem ngexesha lePasika? (b) Wayenolwazi olungakanani uYesu xa wayeneminyaka eli-12 kuphela ubudala?
4 Khawucinge ngomzekelo iNkokeli yethu eyawumisela abaselula. Nangona kungekho nto ingako siyaziyo ngobomi bukaYesu esengumntwana, isiganeko nje esinye sityhila okuninzi. Xa uYesu wayeneminyaka eli-12 ubudala, abazali bakhe baya naye kwiPasika yaminyaka le eYerusalem. Ngoxa babelapho wabandakanyeka kwingxubusho yeZibhalo, yaye intsapho yakowabo ingaqondanga yamshiya. Kwiintsuku ezintathu kamva abazali bakhe ababekhathazekile, uYosefu noMariya, bamfumana etempileni, “ehleli phakathi kwabafundisi, ebaphulaphule yaye ebabuza.” Ngaphezu koko, “bonke abo babemphulaphule bahlala bethe manga kukuqonda kwakhe naziimpendulo zakhe.” Khawufan’ ucinge, ngoxa wayeneminyaka eli-12 kuphela ubudala, uYesu akazange abuze imibuzo ebangela umdla, nephathelele imibandela yokomoya nje kuphela kodwa wayenikela neempendulo ezibonisa ukuba wayekrelekrele! Alithandabuzeki elokuba, wayencedwe luqeqesho lwabazali.—Luka 2:41-50.
5. Abantu abaselula banokusihlolisisa njani isimo sabo sengqondo ngokuphathelele isifundo seBhayibhile sentsapho?
5 Kusenokwenzeka ukuba uselula. Ukuba abazali bakho ngabakhonzi bakaThixo abazinikeleyo, mhlawumbi ninocwangciso oluthe rhoqo lwesifundo seBhayibhile sentsapho ekhayeni lakho. Usijonga njani isifundo sentsapho? Kuyingenelo ukucinga ngemibuzo efana nale: “Ngaba ndilixhasa ngentliziyo yam yonke ilungiselelo lesifundo seBhayibhile entsatsheni yasekhaya? Ngaba ndenza ngokuvisisana nalo, ndingenzi nantoni na eya kuphazamisa ixesha elibekelwe isifundo?” (Filipi 3:16) “Ngaba ndiba nenxaxheba ngokuzeleyo kwesi sifundo? Xa kufanelekile, ngaba ndibuza imibuzo ngokuphathelele inkcazelo efundiswayo ndize ndinikele amagqabaza ngendlela enokusetyenziswa ngayo? Njengoko ndisenza inkqubela ngokomoya, ngaba ndihlakulela uthando ‘ngokutya okuqinileyo kwabantu abaqolileyo’?”—Hebhere 5:13, 14.
6, 7. Lubaluleke kangakanani ucwangciso lokufunda iBhayibhile yonke imihla kulutsha?
6 Ucwangciso lokufunda iBhayibhile yonke imihla lubalulekile. Umdumisi wavuma ingoma esithi: “Unoyolo umntu ongahambanga ngecebo labangendawo, . . . kodwa oyoliswa ngumthetho kaYehova, efunda emthethweni wakhe ngesandi esiphantsi imini nobusuku.” (INdumiso 1:1, 2) Ilandela likaMoses, uYoshuwa, ‘wafunda kwincwadi yomthetho ngesandi esiphantsi imini nobusuku.’ Oku kwabangela ukuba enze izinto ngobulumko yaye wasiphumeza ngempumelelo isabelo sakhe awayesinikwe nguThixo. (Yoshuwa 1:8) INkokeli yethu, uYesu Kristu, uthi: “Kubhaliwe kwathiwa, ‘Akaphili ngasonka sodwa umntu, uphila ngamazwi onke aphuma emlonyeni kaYehova.’” (Mateyu 4:4) Ukuba ukutya kokwenyama sikufuna yonke imihla, kukangakanani ke ngokutya kokomoya!
7 Ngenxa yokuqonda intswelo yakhe yokomoya, uNicole oneminyaka eli-13 ubudala waqalisa ukufunda iBhayibhile yonke imihla.a Ngoku, uneminyaka eli-16 ubudala yaye sele efunde iBhayibhile wayigqiba kwaye ngoku kusele isiqingatha ukuba ayigqibe okwesihlandlo sesibini. Ilula indlela enza ngayo. Uthi: “Ndiyaqiniseka ukuba ndifunda ubuncinane isahluko esinye ngosuku.” Kuye kwamnceda njani ukufunda iBhayibhile yonke imihla? Uphendula esithi: “Zininzi iimpembelelo ezimbi namhlanje. Yonke imihla ndijamelana neengcinezelo ezivavanya ukholo lwam esikolweni nakwezinye iindawo. Ukufunda iBhayibhile yonke imihla kuyandinceda ndikhumbule ngokukhawuleza imiyalelo nemigaqo yeBhayibhile endikhuthaza ukuba ndizixhathise ezi ngcinezelo. Ngenxa yoko, ndiziva ndisondelelene ngakumbi noYehova noYesu.”
8. Yintoni awayeyenza rhoqo uYesu kwindlu yesikhungu, yaye abaselula banokumxelisa njani?
8 Kwakulisiko likaYesu ukuphulaphula nokuba nenxaxheba ekufundeni iZibhalo kwindlu yesikhungu. (Luka 4:16; IZenzo 15:21) Hayi indlela okuyingenelo ngayo ukuba abaselula balandele loo mzekelo ngokuya kwiintlanganiso zamaKristu rhoqo, apho kufundwa yaye kufundisiswa khona iBhayibhile! Evakalisa umbulelo anawo ngeentlanganiso ezinjalo, uRichard oneminyaka eli-14 ubudala uthi: “Iintlanganiso zibalulekile kum. Apho ndihlala ndikhunjuzwa ngoko kulungileyo noko kuphosakeleyo, ngoko kusesikweni noko kungekho sikweni, oko kububuKristu noko kungebubo. Akuyomfuneko ukuba ndide ndibetheke ukuze ndikwazi oko.” Ewe, “isikhumbuzo sikaYehova sikholosekile, simenza abe nobulumko ongenamava.” (INdumiso 19:7) UNicole naye uyaqiniseka ukuba uya kuzo zonke iintlanganiso ezintlanu zebandla veki nganye. Uchitha iiyure ezimbini ukusa kwezintathu elungiselela.—Efese 5:15, 16.
9. Abantu abaselula ‘banokuqhubeka njani besenza inkqubela ebulumkweni’?
9 Ixesha lobutsha lixesha elifanelekileyo lokuzuza ‘ulwazi ngokuphela koThixo oyinyaniso, nangalowo amthumileyo, uYesu Kristu.’ (Yohane 17:3) Kusenokwenzeka ukuba wazi abantu abaselula abaninzi abachitha ixesha elininzi befunda iincwadi ezinamabali ahlekisayo, bebukela umabonwakude, bedlala imidlalo yevidiyo okanye bejonge i-Internet. Kutheni umele uxelise bona ngoxa unokulandela umzekelo omhle weNkokeli yethu? Ngoxa yayiseyinkwenkwana, yayikunandipha ukufunda ngoYehova. Yaye waba yintoni umphumo? Ngenxa yokuba wayezithanda izinto zokomoya, “uYesu waqhubeka esenza inkqubela ebulumkweni.” (Luka 2:52) Nawe unokwenjenjalo.
“Thobelanani”
10. Yintoni enokunceda ukuze ubomi bentsapho bube ngumthombo woxolo nolonwabo?
10 Ikhaya lisenokuba likhusi loxolo nolwaneliseko okanye indawo yengxabano. (IMizekeliso 21:19; 26:21) Ukwamkela ukhokelo lukaKristu kubangela uxolo nolonwabo entsatsheni. Eneneni, umzekelo kaYesu ngumzekelo omhle kulwalamano lwentsapho. IZibhalo zithi: “Thobelanani ngokoyika uKristu. Abafazi mabathobele amadoda abo njengakuyo iNkosi, ngenxa yokuba indoda iyintloko yomfazi wayo njengokuba noKristu eyintloko yebandla, njengoko yena engumsindisi walo mzimba. . . . Madoda, qhubekani nibathanda abafazi benu, kanye njengokuba noKristu walithandayo ibandla waza wazinikela ngenxa yalo.” (Efese 5:21-25) Umpostile uPawulos wabhalela ibandla laseKolose: “Nina bantwana, bathobeleni abazali benu ezintweni zonke, kuba oko kukholekile eNkosini.”—Kolose 3:18-20.
11. Indoda inokubonisa njani ukuba ukhokelo lukaKristu luyinto yokwenene kuyo?
11 Ukulandela eli cebiso kuthetha ukuba indoda ifanele ikhokele entsatsheni, umfazi wayo ayincede, yaye abantwana bathobele abazali babo. Noko ke, ubuntloko bendoda bubangela ulonwabo kuphela xa busetyenziswa kakuhle. Indoda enobulumko imele ifunde indlela yokusebenzisa ubuntloko ngokuxelisa iNtloko neNkokeli yayo, uKristu Yesu. (1 Korinte 11:3) Nangona kamva uYesu waba ‘yintloko yezinto zonke kulo ibandla,’ weza emhlabeni “kungekhona ukuze alungiselelwe, kodwa ukuze alungiselele.” (Efese 1:22; Mateyu 20:28) Ngokufanayo, indoda engumKristu isebenzisa ubuntloko bayo, kungekhona ngenxa yeengenelo zokuzingca, kodwa inyamekela izilangazelelo zomfazi nabantwana bayo—ewe, intsapho yonke. (1 Korinte 13:4, 5) Ifuna ukuxelisa iimpawu zobuthixo zentloko yayo, uYesu Kristu. NjengoYesu, inobulali yaye ithobekile ngentliziyo. (Mateyu 11:28-30) Amagama anjengathi “uxolo” okanye “unyanisile” akunzima kuyo ukuwatsho xa iphazamile. Umzekelo wayo omhle wenza kube lula ngomfazi ukuba abe ‘ngumncedi,’ “umphelelisi,” ‘neqabane’ lendoda enjalo, efunda kuyo yaye esebenzisana nayo.—Genesis 2:20; Malaki 2:14.
12. Yintoni enokunceda umfazi athobele umgaqo wobuntloko?
12 Ke yena umfazi ufanele ayithobele indoda yakhe. Noko ke, ukuba uphenjelelwa ngumoya wehlabathi, oku kunokuyenza ifiphale imbono yakhe ngomgaqo wobuntloko, yaye ingcamango yokuthobela indoda yakhe inokungathandeki kuye. IZibhalo azithi indoda ifanele ibe ngqwabalala, kodwa zithi abafazi bafanele bathobele amadoda abo. (Efese 5:24) IBhayibhile ithi indoda okanye utata ufanele abe ngumntu okwaziyo ukusingatha imbopheleleko, yaye xa kusetyenziswa isiluleko sayo, oku kubangela uxolo nokulungelelana entsatsheni.—Filipi 2:5.
13. UYesu unikele wuphi umzekelo wokuthobela kubantwana?
13 Abantwana bafanele babathobele abazali babo. Ngokuphathelele oku, uYesu wamisela umzekelo omhle. Emva kokuba uYesu oneminyaka eli-12 ubudala eshiywe etempileni kangangeentsuku ezintathu, “wehla kunye [nabazali bakhe] waza wafika eNazarete, yaye waqhubeka ezithobile kubo.” (Luka 2:51) Xa abantwana bethobela abazali babo, oku kubangela uxolo nemvisiswano entsatsheni. Xa wonke ubani entsatsheni ezithoba kukhokelo lukaKristu, oko kubangela intsapho yonwabe.
14, 15. Yintoni enokusinceda siphumelele xa sijamelene neemeko ezinzima ekhaya? Nika umzekelo.
14 Naxa kuvela iimeko ezinzima ekhaya, undoqo okhokelela kwimpumelelo kukuxelisa uYesu nokwamkela ukhokelo lwakhe. Ngokomzekelo, kumtshato kaJerry oneminyaka engama-35 ubudala noLana, unina wentombi ekwishumi elivisayo, kwaqalisa ingxaki abangazange bayicinge. UJerry uthi: “Ndandisazi ukuba ukuze ndibe yintloko ephumelelayo, ndandifanele ndisebenzise imigaqo yeBhayibhile esetyenziswa zezinye iintsapho eziphumelelayo. Kodwa kungekudala ndafumanisa ukuba ndandifanele ndiyisebenzise ngobulumko nokuqonda okungakumbi.” Intombi yomfazi wakhe yayimgqala njengomntu othile owayeyahlukanisa nonina yaye yayimthiye kakhulu. Kwafuneka uJerry asebenzise ukuqonda ukuze abone ukuba esi simo sengqondo sasichaphazela oko le ntombazana yayikuthetha neyayikwenza. Wayisingatha njani le meko? UJerry uphendula esithi: “Mna noLana savumelana ukuba okwelo xesha, uLana amqeqeshe ngokwakhe njengomzali ngoxa mna ndandinikela ingqalelo ekwakheni ulwalamano oluhle nentombi yakhe. Ekuhambeni kwexesha, le ndlela yaphumelela.”
15 Xa sijamelene neemeko ezinzima ekhaya, sifanele sisebenzise ukuqonda ukuze sifumanise isizathu sokuba amalungu entsapho athethe yaye enze izinto ngendlela enza ngayo. Kufuneka sibe nobulumko ukuze sisebenzise imigaqo kaThixo ngokufanelekileyo. Ngokomzekelo, uYesu wasiqonda ngokucacileyo isizathu sokuba ibhinqa elinethombo legazi limchukumise, yaye waqhubana nalo ngobulumko nangovelwano. (Levitikus 15:25-27; Marko 5:30-34) Ubulumko nokuqonda ziimpawu enazo iNkokeli yethu. (IMizekeliso 8:12) Siyavuya xa sisenza ngendlela ebiya kwenza ngayo.
‘Qhubekani Nifuna Kuqala UBukumkani’
16. Yintoni efanele ize kuqala ebomini bethu, yaye uYesu wakubonisa njani oku ngomzekelo wakhe?
16 UYesu wakwenza kwacaca oko kufanele kuze kuqala ebomini babo bamkela ukhokelo lwakhe. Wathi: “Qhubekani, ke ngoko, nifuna kuqala ubukumkani nobulungisa bakhe [uThixo].” (Mateyu 6:33) Yaye ngomzekelo wakhe, wasibonisa indlela yokwenza oku. Ekupheleni kweentsuku ezingama-40 zokuzila kwakhe ukutya, ecamngca, yaye ethandaza emva kokubhaptizwa kwakhe, uYesu wahlangabezana nesilingo. USathana uMtyholi wathembisa ukumnika ulawulo lwazo “zonke izikumkani zehlabathi.” Khawufan’ ucinge ubomi uYesu awayenokubuphila ukuba wayesamkele isipho sikaMtyholi! Noko ke, uKristu wanikela ingqalelo ekwenzeni ukuthanda kukaYise. Kwakhona waqonda ukuba ubomi obunjalo kwihlabathi likaSathana babuya kuba bufutshane. Ngoko nangoko wasigatya isipho sikaMtyholi, esithi: “Kubhaliwe kwathiwa, ‘NguYehova uThixo wakho omele umnqule, yaye nguye yedwa omele unikele inkonzo engcwele kuye.’” Kungekudala emva koko, uYesu “washumayela esithi: ‘Guqukani, kuba ubukumkani bamazulu busondele.’” (Mateyu 4:2, 8-10, 17) Kubomi bakhe bonke esemhlabeni, uKristu wayengumvakalisi wexesha elizeleyo woBukumkani bukaThixo.
17. Sinokubonisa njani ukuba izilangazelelo zoBukumkani ziza kuqala ebomini bethu?
17 Sifanele sixelise iNkokeli yethu size singalivumeli ihlabathi likaSathana lisifake kumgibe wokuba senze umsebenzi ohlawula imali eninzi ube lusukelo oluphambili ebomini. (Marko 1:17-21) Hayi indlela ekunokuba bubudenge ngayo ukungena zwabha ekusukeleni izilangazelelo zehlabathi kangangokude izilangazelelo zoBukumkani zibe kwindawo yesibini! UYesu usiphathise umsebenzi wokushumayela ngoBukumkani nokwenza abafundi. (Mateyu 24:14; 28:19, 20) Ewe, sisenokuba neembopheleleko zentsapho okanye ezinye iimbopheleleko esifanele sizinyamekele, kodwa ngaba asikuvuyeli ukusebenzisa iingokuhlwa neempela-veki ukuze siphumeze imbopheleleko yethu yobuKristu yokushumayela nokufundisa? Yaye hayi indlela ekukhuthaza ngayo ukuba ebudeni bonyaka wenkonzo wama-2001, abantu abamalunga nama-780 000 baye bakwazi ukukhonza njengabalungiseleli bexesha elizeleyo, okanye oovulindlela!
18. Yintoni esinceda sibe novuyo kubulungiseleli?
18 Iingxelo zeVangeli zithetha ngoYesu njengendoda yesenzo nanjengomntu onemfesane. Xa wayebona iintswelo zokomoya zabo babemngqongile, wasikwa yimfesane waza wacela ukubanceda. (Marko 6:31-34) Siyabunandipha ubulungiseleli bethu xa sinesabelo kubo ngenxa yokuba sithanda abanye yaye sinomnqweno onyanisekileyo wokubanceda. Kodwa sinokuwuhlakulela njani umnqweno onjalo? Umfana oselula ogama linguJayson uthi: “Xa ndandikwishumi elivisayo, ndandingabunandiphi kangako ubulungiseleli.” Yintoni eyamncedayo ukuba ahlakulele uthando ngalo msebenzi? UJayson uyaphendula: “Entsatsheni yasekhaya, iintsasa zangoMgqibelo zazisoloko zisetyenziselwa inkonzo yasentsimini. Oku kwandinceda, kuba okukhona ndandisiya kubulungiseleli, kokukhona ndandibona imiphumo emihle yaye kokukhona ndandibunandipha.” Nathi sifanele sibe nesabelo kubulungiseleli ngokuthe rhoqo nangenkuthalo.
19. Sifanele sizimisele ukwenza ntoni ngokuphathelele ukhokelo lukaKristu?
19 Eneneni kuyahlaziya yaye kunomvuzo ukwamkela ukhokelo lukaKristu. Xa sisenjenjalo, ubutsha buba lixesha lokwenza inkqubela elwazini nasebulumkweni. Ubomi bentsapho buba ngumthombo woxolo nolonwabo, yaye ubulungiseleli bungumsebenzi ozisa uvuyo nolwaneliseko. Ngoko ke, kubomi bethu bemihla ngemihla nakwizigqibo esizenzayo masizimisele ukubonisa ukuba ukhokelo lukaKristu lulokwenene kuthi. (Kolose 3:23, 24) Noko ke, uYesu Kristu usikhokela nangenye indlela—ngebandla lamaKristu. Kwinqaku elilandelayo kuza kuxutyushwa indlela esinokungenelwa ngayo kweli lungiselelo.
[Umbhalo osemazantsi]
a Amanye amagama aguquliwe.
Ngaba Usakhumbula?
• Kuyingenelo njani kuthi ukulandela iNkokeli emiselwe nguThixo?
• Ulutsha lunokubonisa njani ukuba lufuna ukulandela ukhokelo lukaYesu?
• Lunayiphi impembelelo ukhokelo lukaKristu kubomi bentsapho yabo bazithoba kulo?
• Ubulungiseleli bethu bunokubonisa njani ukuba ukhokelo lukaKristu lulokwenene kuthi?
[Imifanekiso ekwiphepha 9]
Ubutsha lixesha elifanelekileyo lokuzuza ulwazi ngoThixo neNkokeli yethu ayimiseleyo
[Umfanekiso okwiphepha 10]
Ukuthobela ukhokelo lukaKristu kubangela ulonwabo entsatsheni
[Imifanekiso ekwiphepha 12]
UYesu wafuna kuqala uBukumkani. Ngaba nawe wenjenjalo?