Ukulandela UKristu, Inkokeli Egqibeleleyo
ABO balandela iinkokeli ezingabantu basoloko bephoxeka. Kodwa ke akunjalo kwabo bazithoba kukhokelo lukaKristu. UYesu wathi: “Yizani kum, nonke nina nibulalekayo nenisindwa ngumthwalo, yaye ndiza kunihlaziya. Thabathani idyokhwe yam nize nifunde kum, kuba ndinomoya wobulali, ndithobekile ngentliziyo, kwaye niya kuyifumanela ukuhlaziyeka imiphefumlo yenu.” (Mat. 11:28, 29) Ukhokelo lukaYesu luyahlaziya. Unomdla wenene kwabo bathobekileyo nabacinezelekileyo yaye ubamema ukuba bathwale idyokhwe yakhe yobubele. Noko ke, kuquka ntoni ukulandela ukhokelo lukaYesu?
Umpostile uPetros wathi: ‘UKristu wabandezeleka ngenxa yenu, enishiya nomzekelo, ukuze nilandele emanyathelweni akhe ngokusondeleyo.’ (1 Pet. 2:21) Kubaluleke kangakanani ukulandela emanyathelweni kaYesu? Masithi uhamba neqela labantu ninqumla kwindawo eneziqhushumbisi yaye mnye kuphela umntu phakathi kwenu oyaziyo indlela yokuziphepha. Ngaba ubungayi kulandela amanyathelo akhe ngokusondeleyo, mhlawumbi ude unyathele kanye apho anyathele khona? Ngokufanayo, ukuze sibe nekamva elinqabisekileyo sifanele silandele umzekelo kaYesu kwindlela esiphila ngayo. Ukwenjenjalo kuquka ukumphulaphula, ukumthobela nokusebenzisana nabo bammelayo.
Yiva Uze Uthobele
Ngaphambi kokuba aqukumbele iNtshumayelo yakhe yaseNtabeni, uYesu wathi: “Wonk’ ubani owevayo la mazwi am aze awenze uya kufaniswa nendoda eyingqondi, eyakha indlu yayo phezu kolwalwa. Yagaleleka imvula, zafika nezikhukula, yavuthuza nemimoya, yabetha kuloo ndlu, kodwa ayizange idilike, kuba yayisekwe phezu kolwalwa.”—Mat. 7:24, 25.
UYesu wathi ‘uyingqondi’ umntu ovayo aze athobele amazwi akhe. Ngaba siye sibonise ukuba siyawuxabisa umzekelo kaKristu ngokumthobela ngokusuka entliziyweni, okanye siye sikhethe ukuthobela kuphela imiyalelo kaYesu elula okanye elungele thina? UYesu wathi: “Ndisoloko ndisenza izinto ezikholekileyo [kuThixo].” (Yoh. 8:29) Masizame ukuxelisa loo mzekelo.
Ngenkulungwane yokuqala, abapostile bamisela umzekelo omhle wokuzithoba kukhokelo lukaKristu. Ngesinye isihlandlo uPetros wathi kuYesu: “Khangela! Sishiye zonke izinto sakulandela.” (Marko 10:28) Eneneni, aba bapostile babegqala ukhokelo lukaYesu njengoluxabiseke gqitha kangangokuba babekulungele ukushiya ngasemva ezinye izinto ukuze bamlandele.—Mat. 4:18-22.
Sebenzisana Nabameli BakaKristu
Ngaphambi nje kokufa kwakhe, uYesu wakhankanya enye indlela esinokulandela ngayo ukhokelo lwakhe. Wathi: “Lowo wamkela nabani na endimthumayo wamkela kwanam.” (Yoh. 13:20) Eneneni, uYesu wabhekisela kubameli bakhe abathanjisiweyo ‘njengabazalwana’ bakhe. (Mat. 25:40) Emva kokuba uYesu evuselwe ezulwini, ‘abazalwana’ bakhe bamiselwa njengoonozakuzaku “abasendaweni kaKristu” abamema abanye ukuba baxolelaniswe noYehova uThixo. (2 Kor. 5:18-20) Ukwamkela kwethu ukhokelo lukaKristu kuquka ukuzithoba ‘kubazalwana’ bakhe.
Sifanele sihlole indlela esisabela ngayo kwisiluleko seZibhalo esifika ngexesha nesisifumana kwiimpapasho zethu ezisekelwe eBhayibhileni. Xa sifunda iZibhalo size siye kwiintlanganiso zebandla, sikhunjuzwa amazwi kaKristu. (2 Pet. 3:1, 2) Xa oku kutya kokomoya sikutya rhoqo siya kuba sibonisa uxabiso lokwenene. Noko ke, sifanele sisabele njani xa iziluleko ezithile ziman’ ukudluliselwa ngokuphindaphindiweyo? Ngokomzekelo, iLizwi likaThixo liluleka amaKristu ukuba atshate “kuphela eNkosini.” (1 Kor. 7:39) Sele kungaphezu kwenkulungwane lo mbandela umane uxutyushwa kwiMboniselo. Ngokuqinisekileyo, abazalwana bakaKristu babonisa ngothando indlela abanenkxalabo ngayo ngololwamano lwethu noYehova ngokupapasha amanqaku anesi siluleko nezinye iziluleko eziphefumlelweyo. Ukunikela ingqalelo kwezi zikhumbuzo kuyenye indlela yokubonisa ukuba silandela iNkokeli yethu egqibeleleyo, uYesu Kristu.
IMizekeliso 4:18 ithi: “Umendo wamalungisa unjengokukhanya okuqaqambileyo okuya kukhanya ngokukhanya de kube semini emaqanda.” Eneneni, ukhokelo lukaYesu luqhubela phambili, alumanga ndaweninye. Enye indlela esinokusebenzisana ngayo ‘nabazalwana’ bakaKristu kukwamkela naluphi na utshintsho olwenziwayo kwindlela ebesiyiqonda ngayo inyaniso yeZibhalo epapashwe ‘likhoboka elithembekileyo neliyingqondi.’—Mat. 24:45.
Sikwabonisa ukuba siyazithoba ‘kubazalwana’ bakaKristu xa sisebenzisana nabaveleli abamiselwe kwibandla lamaKristu. Umpostile uPawulos wathi: “Bathobeleni abo bakhokelayo phakathi kwenu nize nibalulamele, kuba bahlala beyilindile imiphefumlo yenu.” (Heb. 13:17) Ngokomzekelo, umdala usenokusikhuthaza ngokubaluleka kokuba nengokuhlwa yoNqulo Lwentsapho rhoqo okanye asinike amacebiso aphathelele iinkalo ezithile zobulungiseleli bethu basentsimini. Umveleli ohambahambayo usenokusinika isiluleko seZibhalo esiluncedo kumba ophathelele indlela yamaKristu yokuziphatha. Xa sisebenzisa ezo ziluleko ngokuzithandela, sibonisa ukuba silandela uYesu iNkokeli yethu.
Ukhokelo lwehlabathi luphuthile. Kodwa kuhlaziya ngokwenene ukulandela ukhokelo lukaKristu lothando! Masizame ngandlela zonke ukuthobela iNkokeli yethu size sisebenzisane nabo ibasebenzisayo namhlanje.
[Imifanekiso ekwiphepha 27]
Ngaba uyasamkela isiluleko esivela kwiZibhalo esithi ungazibopheleli edyokhweni kunye nomntu ongakholwayo?