Funda Uze Ufundise Imigaqo Yokuziphatha YamaKristu
“Ngaba, noko ke, wena ufundisa uthile ongomnye, akuzifundisi na wena?”—ROMA 2:21.
1, 2. Ziziphi izizathu onazo zokufuna ukufundisisa iBhayibhile?
UNEZIZATHU ezininzi zokufundisisa iLizwi likaThixo. Usenokuba unokuthile ofuna ukukwazi kulo—ngokuphathelele abantu, iziganeko, iindawo nezinye izinto. Ufuna ukwazi inyaniso esisiseko, into eyahlukileyo kwiimfundiso zonqulo ezingachananga, njengekaBathathu Emnye okanye eyesihogo somlilo. (Yohane 8:32) Kwakhona usenokuba ufuna ukumazi kakuhle ngakumbi uYehova ukuze ube njengaye yaye uhambe ngendlela ethe tye.—1 Kumkani 15:4, 5.
2 Esinye isizathu nesibalulekileyo sokufundisisa iLizwi likaThixo kukuze likuncede ukwazi ukufundisa abanye—abo ubathandayo, izinxulumane zakho kwanabo ungabaziyo. Lo asingombandela nje wokuzikhethela kumaKristu okwenyaniso. UYesu waxelela abafundi bakhe: “Hambani ke ngoko niye kubenza abafundi abantu beentlanga zonke, . . . nibafundisa ukuba bazigcine zonke izinto endiniyalele zona.”—Mateyu 28:19, 20.
3, 4. Kutheni kulilungelo elizukileyo ukufundisa njengoko uYesu wayalela?
3 Ukufundisisa iBhayibhile unomnqweno wokunceda abanye yinto entle gqitha leyo yaye kusenokuzisa ulwaneliseko olungapheliyo. Ukufundisa kuye kwaba ngumsebenzi oxabisekileyo kangangexesha elide. IEncarta Encyclopedia ithi: “Phakathi kwamaYuda, abantu abadala abaninzi bebebagqala abafundisi-ntsapho njengabantu abakhokelela kwimpumelelo yaye babebabongoza abantwana ukuba babahlonele abafundisi-ntsapho nangaphezu kwabazali babo.” Kubaluleke gqitha ukuba amaKristu azifundise ngokufundisisa iBhayibhile andule ke afundise abanye.
4 “Baninzi abantu abenza umsebenzi wokufundisa kunokuba kunjalo ngeminye imisebenzi. Amadoda namabhinqa amalunga nezigidi ezingama-48 ehlabathini lonke angabafundisi-ntsapho.” (The World Book Encyclopedia) Umfundisi-ntsapho unikwe ilungelo lokuxonxa iingqondo zabaselula yaye usenokuba nempembelelo kubo kangangethuba elide. Oku kusenokuba nemiphumo ehlala ixesha elide gqitha ukuba uthobela umyalelo kaYesu wokufundisa abanye; imfundiso yakho isenokulichaphazela ikamva labo ngonaphakade. Umpostile uPawulos wayibalaselisa le ngongoma xa wabongoza uTimoti esithi: “Zilumkele wena nemfundiso yakho. Hlala kwezi zinto, kuba ngokwenza oko uya kuzisindisa wena nabo bakuphulaphulayo.” (1 Timoti 4:16) Ewe, imfundiso yakho inento yokwenza nosindiso.
5. Kutheni imfundiso yamaKristu iyeyona ibalulekileyo?
5 Ukuzifundisa nokufundisa abanye kungumyalelo yaye umiselwe ngoYena Uphakamileyo, uMongami wendalo iphela. Oku kukodwa nje kwenza lo msebenzi wokufundisa ube ngobaluleke ngakumbi kunokufundisa nje okuqhelekileyo, enoba kukumabanga aphantsi, ubuchule bomsebenzi okanye kwanemfundo ekhethekileyo kwezonyango. Imfundiso yamaKristu iyalela umfundi ukuba afunde ukuxelisa uNyana kaThixo, uYesu Kristu, nokufundisa abanye ukuba nabo benjenjalo.—Yohane 15:10.
Kutheni Ufanele Uzifundise?
6, 7. (a) Kutheni sifanele siqale ngokuzifundisa? (b) AmaYuda enkulungwane yokuqala asilela ngayiphi indlela njengabafundisi?
6 Kutheni kusithiwa kufanele siqale sizifundise? Kaloku, asinakufundisa abanye kakuhle ukuba asizifundisanga thina kuqala. UPawulos wakubethelela oku kwisicatshulwa esibangela umdla esasibhekiselwe kumaYuda ngelo xesha, kodwa esinentsingiselo ebalulekileyo kumaKristu namhlanje. UPawulos wabuza: “Ngaba, noko ke, wena ufundisa uthile ongomnye, akuzifundisi na wena? Wena, ushumayela usithi ‘Uze ungebi,’ ngaba uyeba na? Wena, uthi ‘Uze ungakrexezi,’ ngaba uyakrexeza na? Wena, ubonakalisa ukuzenyanya izithixo, ngaba uphanga iitempile na? Wena, uqhayisa ngomthetho, ngaba uyamhlazisa na uThixo ngokwaphula kwakho uMthetho?”—Roma 2:21-23.
7 Ngombuzo-buciko, uPawulos wathetha ngezinto ezimbini eziphosakeleyo ekuthethwa ngazo ngokungqalileyo kwiMithetho Elishumi ezizezi: Uze ungebi, yaye uze ungakrexezi. (Eksodus 20:14, 15) AmaYuda athile kumhla kaPawulos ayenelunda ngoMthetho kaThixo.‘Ayeyalelwe ngomlomo ngokuphuma kuwo uMthetho; kwaye eyisekile ukuba angabakhokeli beemfama, ukhanyiselo lwabo basebumnyameni, abafundisi beentsana.’ (Roma 2:17-20) Noko ke, wambi ayengabahanahanisi kuba xa engabonwa ayesiba okanye akrexeze. Oku kwakuya kuwuhlazisa uMthetho noMniki-mthetho wasemazulwini. Usenokubona ukuba ayengakufanelekelanga ukufundisa abanye, ayengazifundisi nokuzifundisa.
8. AmaYuda athile omhla kaPawulos kusenokuba ‘ayeziphanga njani iitempile’?
8 UPawulos wakhankanya ukuphangwa kweetempile. Ngaba ngokwenene amaYuda athile ayekwenza oko? Wayecinga ngantoni uPawulos? Ngeliphandle, ngenxa yenkcazelo encinane esinayo ngale ndinyana, asiqiniseki ngendlela amanye amaYuda ‘awayeziphanga ngayo iitempile.’ Ngaphambilana unobhala wesixeko sase-Efese wathi amaqabane kaPawulos ‘aye ngengobaphangi betempile,’ nto leyo ebonisa ukuba ubuncinane abantu abathile babecinga ukuba kwakufanele kutyholwe amaYuda ngesi senzo. (IZenzo 19:29-37) Ngaba ayesebenzisa okanye ethengisa izinto zexabiso ezazikwiitempile zabahedeni ezazithinjwe ngabo babeboyisile okanye nababenenzondelelo yonqulo? Ngokutsho koMthetho kaThixo, igolide nesilivere yezithixo kwakufuneka itshatyalaliswe, kungabikho mntu uzithathelayo. (Duteronomi 7:25)a Ngoko ke kusenokwenzeka ukuba uPawulos wayebhekisela kumaYuda awatyeshela umyalelo kaThixo aza asebenzisa okanye azithathela izinto ezazivela kwiitempile zabahedeni.
9. Ziziphi izinto ezimbi ezazisenziwa kwitempile yaseYerusalem ezazifana nokuphanga itempile?
9 Kwelinye icala, uJosephus wathetha ngobuqhetseba obenziwa ngamaYuda amane eRoma, inkokeli yawo ingumfundisi woMthetho. Abo bantu bane baqhatha ibhinqa elingumRoma, iguquka elingumYuda, ukuba libanike igolide nezinye izinto zexabiso njengomnikelo oya kwitempile yaseYerusalem. Emva kokuba libanikile ezi zinto, bazithabathela njengobutyebi babo—nto leyo eyayifana nje nokuphanga itempile.b Abanye ngandlel’ ithile babephanga itempile kaThixo ngokunikela iminikelo eneziphako yaye bekhuthaza unaniselwano lokubawa kumabala etempile, beyenza itempile “umqolomba wabaphangi.”—Mateyu 21:12, 13; Malaki 1:12-14; 3:8, 9.
Fundisa Imigaqo Yokuziphatha YamaKristu
10. Yiyiphi ingongoma esingafanele silahlekelwe yiyo ngokuphathelele amazwi kaPawulos abhalwe kweyabaseRoma 2:21-23?
10 Enoba yayiziziphi izinto zenkulungwane yokuqala eziquka ubusela, ukukrexeza nokuphanga itempile uPawulos awayethetha ngazo, masingalahlekelwa yeyona ngongoma yamazwi akhe. Wabuza: “Wena ufundisa uthile ongomnye, akuzifundisi na wena?” Kubalulekile ukuphawula ukuba imizekelo uPawulos awayethetha ngayo yayiphathelele imigaqo yokuziphatha. Apha lo mpostile akazange agxininise kwiimfundiso okanye kwimbali yeBhayibhile. Ukuzifundisa nokufundisa abanye uPawulos awayebhekisela kuko kwakunxulumene nendlela amaKristu aziphatha ngayo.
11. Kutheni ufanele unikele ingqalelo kwimigaqo yokuziphatha yamaKristu njengoko ufundisisa iLizwi likaThixo?
11 Ukuze thina sikwazi ukusebenzisa isifundo esikwabaseRoma 2:21-23 kuthetha ukufunda imigaqo yokuziphatha yamaKristu ngokuphuma kwiLizwi likaThixo, size senze ngokuvisisana noko sikufundayo, yaye sifundise abanye benze okufanayo. Ngoko ke, njengoko ufundisisa iBhayibhile, phawula izinto ezalatha kwimilinganiselo kaYehova, izinto esekelwe kuzo imigaqo yokuziphatha yamaKristu okwenyaniso. Camngca ngesiluleko nangeemfundiso ozifumana eBhayibhileni. Yandula ke ukusebenzise ngenkalipho oko ukufundayo. Yaye ukwenjenjalo kufuna inkalipho nokuzimisela. Kulula ngabantu abangafezekanga ukuzingxengxezela, benezizathu zokutyeshela imigaqo yokuziphatha kwamaKristu kwiimeko ezithile. Mhlawumbi amaYuda uPawulos awayethetha ngawo ayeziincutshe kwiingcamango ezinjalo zokuzingxengxezela okanye zokulahlekisa abanye. Ngoko ke, amazwi kaPawulos abonisa ukuba imigaqo yamaKristu yokuziphatha ayifanele ithatyathwe lula okanye ubani akhethe nje ukuyityeshela.
12. Ukuziphatha kakuhle okanye kakubi kumchaphazela njani uYehova uThixo, yaye kutheni kuluncedo ukusoloko sikukhumbula oku?
12 Lo mpostile wabalaselisa isizathu esiyintloko sokufunda nokusebenzisa imigaqo yokuziphatha efumaneka eBhayibhileni. Ukuziphatha okubi kwamaYuda kwakumchaphazela uYehova kuba wathi: “Wena, uqhayisa ngomthetho, ngaba uyamhlazisa na uThixo ngokwaphula kwakho uMthetho? Kuba ‘igama likaThixo liyanyeliswa ngenxa yenu phakathi kweentlanga.’” (Roma 2:23, 24) Kuyafana nangoku, ukuba siyayityeshela imigaqo yokuziphatha yamaKristu, siyamhlazisa Oyena Uphakamileyo. Ngokufanayo, ukuba sibambelela ngokuqinileyo kwimigaqo kaThixo, oko kuyamdumisa, kumzukise. (Isaya 52:5; Hezekile 36:20) Ukukwazi oku kusenokukwenza uzimisele ngakumbi ukuxhathisa xa ujamelene nezilingo okanye iimeko ekubonakala kulula kuzo ukutyeshela imigaqo yokuziphatha yamaKristu okanye kubonakala kuyinzuzo ukwenjenjalo. Ngaphezu koko, amazwi kaPawulos asifundisa enye into. Phezu kwako nje ukwazi ukuba indlela oziphethe ngayo iyamchaphazela uThixo, njengoko ufundisa abanye, bancede babone ukuba indlela abayisebenzisa ngayo imigaqo yokuziphatha abayifundayo iya kumchaphazela uYehova. Imigaqo yokuziphatha yamaKristu ayisibangeli nje sibe nolwaneliseko kuphela ize isikhusele ngokwasempilweni. Kwakhona imzisela igama elihle Lowo uyimiseleyo nokhuthaza imigaqo yokuziphatha enjalo.—INdumiso 74:10; Yakobi 3:17.
13. (a) IBhayibhile isinceda njani ngokuphathelele imigaqo yokuziphatha? (b) Chaza umongo wesiluleko esikweyoku-1 kwabaseTesalonika 4:3-7.
13 Indlela esiziphatha ngayo ichaphazela nabanye abantu. Usenokukubona oku kwimizekelo ekwiLizwi likaThixo ebonisa ukubaluleka kokusebenzisa imigaqo kaThixo yokuziphatha nemiphumo yokuyityeshela. (Genesis 39:1-9, 21; Yoshuwa 7:1-25) Kwakhona usenokufumana isiluleko esingqalileyo ngokuziphatha njengesithi: “Kukuthanda kukaThixo, ukuba ningcwaliswe, nikhwebuke kuhenyuzo; ukuze ngamnye wenu akwazi ukusizuza esakhe isitya ngobungcwalisa nembeko, kungekhona ngenkanuko yesini njengeentlanga ezingamaziyo uThixo; ukuze kungabikho [bani usa kwinqanaba lokwenzakalisa aze atyhobozele kumalungelo omzalwana wakhe; INguqulelo Yehlabathi Elitsha YeZibhalo ZamaKristu ZesiGrike] kulo mbandela, kuba . . . uThixo akasibizelanga ekungcoleni, kodwa ebungcwaliseni.”—1 Tesalonika 4:3-7.
14. Yintoni onokuzibuza yona ngesiluleko esikweyoku-1 kwabaseTesalonika 4:3-7?
14 Phantse nabani na unokubona ngokusuka kule ndinyana ukuba ukuziphatha okubi ngokwesini akuvisisani nemigaqo yokuziphatha yamaKristu. Sekunjalo, usenokubona nezinye iingongoma. Ezinye iindinyana zinikela iingongoma esinokuzifundisisa size sicamngce ngazo, nto leyo enokusenza siziqonde ngakumbi. Ngokomzekelo, usenokucinga ngoko uPawulos wayekuthetha xa wayesithi ukuhenyuza kunokwenza ubani “atyhobozele kumalungelo omzalwana wakhe kulo mbandela.” Ngawaphi amalungelo aqukiweyo, yaye ukukuqonda kakuhle oku kuya kukunceda njani ugcine imigaqo yokuziphatha yamaKristu? Oku ukufumene kuphando olunjalo kuya kukwenza ukulungele ngakumbi njani ukufundisa abanye nokubanceda bazukise uThixo?
Fundisisa Ukuze Ukwazi Ukufundisa
15. Ziziphi izixhobo onokuzisebenzisa ukuzifundisa kufundisiso lobuqu?
15 AmaNgqina kaYehova anezixhobo azisebenzisayo ukuze aphande ngemibuzo okanye ngemibandela evelayo njengoko efundisisa ukuze azifundise okanye afundise abanye. Esinye isixhobo esifumaneka ngeelwimi ezininzi yiWatch Tower Publications Index. Ukuba iyafumaneka, unokuyisebenzisa ukuze ufumane inkcazelo kwiimpapasho zamaNgqina kaYehova ezisekelwe eBhayibhileni. Unokwenza uphando ngokukhangela umbandela okanye kuludwe lweendinyana zeBhayibhile. Esinye isixhobo esifumanekayo kumaNgqina kaYehova kwiilwimi ezininzi eziyintloko yiWatchtower Library. Le nkqubo yekhompyutha ekwiCD-ROM ineempapasho ezininzi ezifumaneka nge-elektroniki. Inkqubo yayo yenza ukuba ubani akwazi ukuphanda imixholo neengxubusho zezibhalo. Ukuba unaso esinye sezi zixhobo okanye zombini, zisebenzise rhoqo njengoko ufundisisa iLizwi likaThixo ukuze ufundise abanye.
16, 17. (a) Unokuzifumana phi iingongoma ezibalulekileyo ezithetha ngamalungelo akhankanywe kweyoku-1 kwabaseTesalonika 4:6? (b) Ziziphi iindlela uhenyuzo olunokutyhoboza ngazo kumalungelo abanye?
16 Makhe sisebenzise umzekelo ocatshulwe ngentla, weyoku-1 kwabaseTesalonika 4:3-7. Kuye kwabuzwa ngamalungelo. Ngamalungelo kabani lawo? Yaye kunokutyhobozelwa njani kuloo malungelo? Ngezi zixhobo zokufundisisa zikhankanyiweyo, mhlawumbi unokufumana iingongoma ezithile ezibalulekileyo ngezi ndinyana, kwanangamalungelo uPawulos wayethetha ngawo. Ezo ngongoma usenokufunda ngazo kwi-Insight on the Scriptures, Umqulu 1, iphepha 863-4; Uxolo Nonqabiseko Lokwenyaniso—Unokulufumana Njani? iphepha 145, IMboniselo, kaNovemba 15, 1989, iphepha 31.
17 Njengoko uqhubeka nofundisiso olo, uya kubona ukuba ezo mpapasho zibonisa indlela ayinyaniso ngayo amazwi kaPawulos. Umntu ohenyuzayo wona uThixo yaye uzichanaba kwizifo. (1 Korinte 6:18, 19; Hebhere 13:4) Indoda ehenyuzayo ityhobozela kumalungelo amaninzi ebhinqa eyenze esi sono nalo. Iliphulukanisa nokuziphatha okunyulu nesazela esicocekileyo. Ukuba alitshatanga, ilihlutha ilungelo lalo lokutshata liyintombi enyulu nelungelo lalowo uza kuba ngumyeni walo lokulindela ukuba libe njalo. Ibenza buhlungu abazali belo bhinqa nomyeni walo ukuba litshatile. Indoda eziphethe kakubi ngokwesini ihlutha intsapho yayo ilungelo lokuba negama elicocekileyo ngokuziphatha. Ukuba ililungu lebandla lamaKristu, izisa ugculelo kulo, ingcolisa igama lalo.—1 Korinte 5:1.
18. Unokuzuza njani kufundisiso lweBhayibhile ngokuphathelele imigaqo yokuziphatha yamaKristu?
18 Ngaba iingongoma ezingamalungelo azisincedi siyijonge ngelinye iliso le ndinyana, size sibone ukubaluleka kwesigidimi sayo? Ngokuqinisekileyo ufundisiso olunjalo luxabiseke kakhulu. Njengoko ufundisisa ngaloo ndlela, uyazifundisa. Uya uqiniseka ngakumbi ngobunyaniso nendlela esinamandla ngayo isigidimi sikaThixo. Uzimisela ngakumbi ukubambelela kwimigaqo yokuziphatha yamaKristu nokuba sekumnyam’ entla. Yaye cinga ngendlela oya kuba nempumelelo ngayo njengomfundisi! Ngokomzekelo, ngoxa ufundisa abanye ngenyaniso yeBhayibhile, unokucacisa oko kuthethwa yeyoku-1 kwabaseTesalonika 4:3-7, usandisa ulwazi noxabiso lwabo ngemigaqo yokuziphatha yamaKristu. Ngaloo ndlela, ufundisiso lwakho lusenokukunceda wena nabanye abaninzi ukuba nizukise uThixo. Yaye apha sikhankanye nje umzekelo omnye, kwincwadi kaPawulos eyayisiya kwabaseTesalonika. Kukho ezinye iinkalo ezininzi zemigaqo yokuziphatha yamaKristu, yaye kukho nemizekelo emininzi nesiluleko seBhayibhile esivisisana nayo, onokufundisisa ngazo, uzisebenzise uze uzifundise abanye.
19. Kutheni kubalulekile ukunamathela kwimigaqo yokuziphatha yamaKristu?
19 Alithandabuzeki elokuba kukubulumko ukwenjenjalo. UYakobi 3:17 uthi “ubulumko obuvela phezulu,” kuYehova uThixo, “okokuqala nje bunyulu.” Ngokucacileyo oko kukhuthaza ukulandela imigaqo kaThixo yokuziphatha. Enyanisweni, uYehova ufuna ukuba abo bamela yena ekufundiseni iBhayibhile babe yimizekelo ‘kubunyulu.’ (1 Timoti 4:12) Indlela abafundi abanjalo bamandulo njengoPawulos noTimoti ababephila ngayo ibonisa ukuba babenjalo; baluphepha uhenyuzo, kangangokuba uPawulos wabhala: “Uhenyuzo nako konke ukungahlambuluki nokubawa makungakhe kukhankanywe kwaukukhankanywa phakathi kwenu, kanye njengoko kubafaneleyo abantu abangcwele; kwanehambo elihlazo nentetho yobudenge nokuqhula okungamanyala.”—Efese 5:3, 4.
20, 21. Kutheni uvumelana noko umpostile uYohane wakubhalayo, njengoko kubhalwe kweyoku-1 kaYohane 5:3?
20 Ngoxa imilinganiselo yokuziphatha efumaneka kwiLizwi likaThixo icacile yaye ingqalile, ayiloxanduva. Oku kungqinwa nguYohane, oyena mpostile waphila ixesha elide. Ngokusekelwe koko wayekubonile kumashumi eminyaka yokuphila kwakhe, wayesazi ukuba imigaqo yokuziphatha yamaKristu yayingenakwenzakalisa mntu. Kunoko, yangqineka ilungile, iyinzuzo yaye iyintsikelelo. UYohane wakugxininisa oku, xa wabhala esithi: “Kuba oku koko uthando lukaThixo luthetha kona, ukuba sigcine imiyalelo yakhe; ukanti imiyalelo yakhe asiloxanduva.”—1 Yohane 5:3, INguqulelo Yehlabathi Elitsha YeZibhalo ZamaKristu ZesiGrike.
21 Noko ke, phawula ukuba uYohane akabonisi ukuba ukuthobela uThixo ngokugcina imigaqo yokuziphatha yamaKristu kuyeyona ndlela efanele ilandelwe kuba nje isisindisa ezingxakini, kwiziqhamo ezibi ezibangelwa kukwenza ngenye indlela. Oku ukubeka ngendlela efanelekileyo okokuqala evuma ukuba le yindlela esibonakalisa ngayo ukuba siyamthanda uYehova uThixo, ithuba elihle lokubonakalisa uthando esinalo ngaye. Enyanisweni, ukuzifundisa okanye ukufundisa abanye ukuba bathande uThixo kuthetha ukuyamkela nokuyisebenzisa imigaqo yakhe ephakamileyo. Ewe, kuthetha ukuzifundisa nokufundisa abanye imigaqo yokuziphatha yamaKristu.
[Imibhalo esemazantsi]
a Ngoxa ethetha ngamaYuda njengabantu ababenoxabiso ngezinto ezingcwele, uJosephus wakwathetha esithi ngomthetho kaThixo: “Makungabikho mntu unyelisa oothixo abahlonelwayo kwezinye iindawo, zingaphangwa neetempile zasemzini, kungathathwa nobuncwane obunikelwe egameni lothixo othile.” (Akekeliswe sithi.)—Jewish Antiquities, Incwadi 4, isahluko 8, isiqendu 10.
b Jewish Antiquities, Incwadi 18, isahluko 3, isiqendu 5.
Ngaba Uyakhumbula?
• Kutheni simele sifundisise ukuze sizifundise ngaphambi kokuba sifundise abanye?
• Indlela esiziphatha ngayo imchaphazela njani uYehova?
• Umntu ohenyuzayo usenokuba utyhoboza kumalungelo kabani?
• Uzimisele ukwenza ntoni ngemigaqo yokuziphatha yamaKristu?
[Umfanekiso okwiphepha 22]
“Imiyalelo yakhe asiloxanduva”