Uyakhumbula Na?
Ngaba uye wakunandipha ukufunda iinkupho zakutshanje zeMboniselo? Ukuba kunjalo, khawubone ukuba unokuyiphendula kusini na le mibuzo ilandelayo:
• Ziziphi ezinye zeendlela uRute awamisela ngazo umzekelo omhle?
Wamisela umzekelo omhle ngokuba nothando ngoYehova, nokuba nothando olunyanisekileyo ngoNahomi, kwakhona wayekhuthele yaye ethobekile. Akumangalisi ke ngoko ukuba abantu bamgqale ‘njengomfazi obalaseleyo.’ (Rute 3:11)—4/15, iphepha 23-6.
• Sazi njani ukuba uYehova ubakhathalele abantu abaqhelekileyo?
Waxelela amaSirayeli, awayephethwe ngenkohlakalo eYiputa ukuba angabadlakazelisi abantu abangamahlwempu. (Eksodus 22:21-24) UYesu, owayexelisa uYise, wabonakalisa umdla wokwenene kubantu abaqhelekileyo, yaye wakhetha abantu “abangenamfundo nabaqhelekileyo” ukuze babe ngabapostile. (IZenzo 4:13; Mateyu 9:36) Nathi sinokuxelisa uThixo ngokubakhathalela abanye, njengabantu abaselula.—4/15, iphepha 28-31.
• Sinokuqiniseka njani ukuba uYehova uyakuphawula oko sikwenzayo?
Iingxelo zeBhayibhile zibonisa ukuba uYehova uyaziphawula izinto ezenziwa ngabantu. Waliphawula idini elanikelwa nguAbheli, yaye uyawuphawula ‘umbingelelo wethu wendumiso, isiqhamo semilebe.’ (Hebhere 13:15) UYehova wabona ukuba uEnoki wayezibhokoxa efuna ukumkholisa ngokuphila ubomi obucocekileyo ngokuziphatha. Yaye uThixo waphawula indlela umhlolokazi ongenguye umSirayeli waseTsarefathi awampha ngayo oko kuncinane awayenako umprofeti uEliya. Kwakhona uYehova uyaziphawula izenzo zethu zokholo.—5/1, iphepha 28-31.
• Kutheni kunokuthiwa emva kwePentekoste yowama-33 C.E., amaYuda angamaKristu ayefanele azahlulele kuThixo?
Ngowe-1513 B.C.E., amaSirayeli amandulo azahlulela kuYehova. (Eksodus 19:3-8) Ukususela ngoko, amaYuda ayezalelwa kuhlanga oluzahluleleyo phantsi komnqophiso woMthetho. Kodwa uYehova wawushenxisa umnqophiso woMthetho ngokufa kukaKristu ngowama-33 C.E. (Kolose 2:14) Emva koko, amaYuda awayefuna ukukhonza uThixo ngokwamkelekileyo ayefanele azahlulele kuye aze abhaptizwe egameni likaYesu Kristu.—5/15, iphepha 30-1.
• Ngaba ukutshisa isiqhumiso kwamkelekile kunqulo lokwenyaniso namhlanje?
Ukusetyenziswa kwesiqhumiso kwakuyinxalenye yonqulo lokwenyaniso kuSirayeli wamandulo. (Eksodus 30:37, 38; Levitikus 16:12, 13) Kodwa umnqophiso woMthetho, kuquka ukusebenzisa isiqhumiso, kwaphela xa uKristu wafayo. AmaKristu anokuzigqibela enoba ayafuna ukusebenzisa isiqhumiso ngeenjongo ezingenanto yakwenza nonqulo, kodwa oko akuseyonxalenye yonqulo lokwenyaniso namhlanje. Kwakhona kufanele kucingelwe iimvakalelo zabanye ukuze bangakhutyekiswa.—6/1, iphepha 28-30.
• Yiyiphi into yakutshanje esezindabeni eye yenza abaninzi bacinga ngakumbi ngesibakala sokuba uYesu wakha waphila emhlabeni?
Kuye kwathethwa kakhulu ngebhokisi yamathambo abantu abafileyo, eyafunyanwa kwaSirayeli. Kubonakala ukuba ivela kwinkulungwane yokuqala, yaye kuyo kukho umbhalo okroliweyo ofundeka ngolu hlobo: “UYakobi, unyana kaYosefu, umntakwaboYesu.” Bambi bathi obu “bobona bungqina bakudala bobukho bukaYesu ngokwenzululwazi ngezakudala obungekhoyo eBhayibhileni.”—6/15, iphepha 3-4.
• Umntu ukufunda njani ukuthanda?
Abantu bafunda ukuthanda okokuqala ngomzekelo nangoqeqesho lwabazali babo. Xa indoda nomfazi bebonakalisa uthando yaye behlonelana, abantwana baya kufunda ukuthanda. (Efese 5:28; Tito 2:4) Kwanaxa umntu engaphumi kwintsapho enothando, unokufunda ukuhlakulela uthando ngokwamkela ulwalathiso lobubele lukaYehova, ngokufumana uncedo lomoya oyingcwele, nangokufumana inkxaso kubazalwana abangamaKristu.—7/1, iphepha 4-7.
• Wayengubani uEusebius, yaye sinokufunda ntoni kubomi bakhe?
UEusebius wayengumbhali-mbhali wamandulo owathi, ngowe-324 C.E., wagqiba ukubhala incwadi eyimiqulu elishumi enomxholo othi History of the Christian Church. Nangona wayekholelwa ukuba uYise wayekho ngaphambi koNyana, uEusebius wamkela imbono eyahlukileyo kwibhunga laseNicaea. Kubonakala ukuba wakutyeshela oko kwathethwa nguYesu esithi abalandeli Bakhe bangabi “yonxalenye yehlabathi.” (Yohane 17:16)—7/15, iphepha 29-31.
• Ngaba indlela uYehova asijonga ngayo isithembu itshintshile?
Akunjalo, uYehova akayitshintshanga indlela asijonga ngayo isithembu. (Malaki 3:6) Ilungiselelo likaThixo ngendoda yokuqala lalikukuba “inamathele emfazini wayo” ize ibe nyamanye naye. (Genesis 2:24) UYesu wathi ukuqhawula umtshato neqabane elingakhange lihenyuze, aze ubani aphinde atshate, uyakrexeza. (Mateyu 19:4-6, 9) UYehova wasiphelisa isithembu ngexesha lokusekwa kwebandla lamaKristu.—8/1, iphepha 28.