Lutsha, Hambani Ngokumfaneleyo UYehova

OLUNYE ulutsha olungamaKristu kuye kwafuneka lushiye iintsapho namabandla alo okwexeshana. Lumbi luye lwenjenjalo ukuze lwandise ubulungiseleli balo. Olunye kuye kwafuneka lushiye amakhaya alo ngenxa yokungathabathi cala kwimicimbi yeli hlabathi. (Isaya 2:4; Yohane 17:16) Kumazwe athile, “uKesare” uye wavalela ulutsha olugcina ingqibelelo entolongweni okanye walunika imisebenzi yeenkonzo zoluntu.a—Marko 12:17; Tito 3:1, 2.

Ngoxa lusentolongweni ngenxa yokuba lungoondilele, olu lutsha lunokuvalelwa neenjubaqa kangangethuba elithile. Ukuba kude nekhaya ngenxa yezinye izizathu kuye kwanyanzela olunye ulutsha ukuba lusebenze kwindawo enabantu abaziphethe kakubi. La maKristu aselula okanye abanye ekuye kwanyanzeleka ukuba babe kwimeko enjalo anokuhlangabezana njani ngokuphumelelayo neengcinezelo anokujamelana nazo njengoko ezabalazela ‘ukuhamba ngokumfaneleyo uThixo?’ (1 Tesalonika 2:12) Abazali bawo banokuwanceda njani akwazi ukuhlangabezana nazo naziphi na iingxaki ezinokuwavelela?—IMizekeliso 22:3.

Ezinye Zeengxaki Olunokujamelana Nazo

UTákis oneminyaka engama-21 ubudala, owanyanzeleka ukuba achithe iinyanga ezingama-37 kude nekhaya uthi: “Ukuba kude nokhuseleko lwabazali nenyameko yabadala kwakunzima yaye kusoyikisa.”b Wongezelela esithi: “Maxa wambi, ndandiziva ndinganqabisekanga.” UPétros oneminyaka engama-20 ubudala kwafuneka abe kude nekhaya ngaphezu kweminyaka emi-2. Uyavuma esithi: “Okwesihlandlo sokuqala ebomini bam, kwafuneka ndizenzele izigqibo ngendlela yokuzonwabisa nabantu endinxulumana nabo, yaye ndandingasoloko ndisenza izigqibo zobulumko.” Wandula ke athi: “Maxa wambi yayindixhalabisa imbopheleleko enkulu endandinayo eyayibangelwa kukuba nenkululeko engakumbi.” UTássos, umKristu ongumdala odla ngokudibana nolutsha olungamaKristu olukwimeko enjalo, wathi: “Intetho engcolileyo, imvukelo, nogonyamelo olwenziwa ngoontanga abangakholwayo lunokuphembelela ulutsha olungaphaphanga nolusesichengeni.”

Ngoxa luhlala yaye lusebenza nabantu abangayihloneliyo imigaqo yeBhayibhile, olo lutsha lungamaKristu lufanele luphaphele isilingo sokufuna ukuxelisa iindlela zoontanga balo zokuziphatha okubi nezingavisisaniyo neZibhalo. (INdumiso 1:1; 26:4; 119:9) Kusenokubonakala kunzima ukuhlala unocwangciso oluhle lokufundisisa, ukuya kwiintlanganiso nasentsimini. (Filipi 3:16) Ukuzibekela usukelo lokomoya nokusebenzela kulo nako kusenokungabi lula.

Ngokuqinisekileyo ulutsha olungamaKristu oluthembekileyo lufuna ukukholisa uYehova ngehambo yalo nangendlela oluthetha ngayo. Ngokunyaniseka luzama ukuphulaphula isimemo soYise walo wasezulwini esithi: “Yiba nobulumko, nyana wam, uze uyenze ibe nemihlali intliziyo yam, ukuze ndimphendule ondingcikivayo.” (IMizekeliso 27:11) Luyaqonda ukuba indlela olujongwa noluziphatha ngayo inempembelelo kwindlela abanye abamjonga ngayo uYehova nabantu bakhe.—1 Petros 2:12.

Okuncomekayo kukuba, inkoliso yolo lutsha yenza unako nako ukuba ifane nabazalwana balo benkulungwane yokuqala abathandazelwa ngumpostile uPawulos esithi: ‘Hambani ngokumfaneleyo uYehova nize nimkholise ngokupheleleyo njengoko niqhubeka nivelisa isiqhamo kuwo wonke umsebenzi olungileyo ukuze ninyamezele ngokupheleleyo nize nizeke kade umsindo ninovuyo.’ (Kolose 1:9-11) IBhayibhile inemizekelo yolutsha oluhlonel’ uThixo olwaphumelelayo ukuhamba ngokumfaneleyo uThixo phakathi kwabantu olungabaziyo, abanentiyo nabanqula izithixo.—Filipi 2:15.

“UYehova WayenoYosefu”

Eselula, uYosefu, unyana oyintanda kaYakobi noRakeli, waba kude nokhuseleko lukayise ohlonel’ uThixo. Wathengiswa ukuze abe likhoboka eYiputa. UYosefu wamisela umzekelo omhle wokuba ngumfana okhutheleyo, othembekileyo noziphethe kakuhle. Nangona wayelikhoboka likaPotifare—umntu owayengamnquli uYehova—uYosefu wayethembekile yaye ekhuthele, kangangokuba ekugqibeleni inkosi yakhe yammisela waba ngumveleli wako konke okusendlwini yayo. (Genesis 39:2-6) UYosefu wagcina ingqibelelo yakhe kuYehova, yaye xa oku kwaphumela ekubeni afakwe entolongweni, akazange agqibe ngelithi: “Kunceda ntoni ukugcina ingqibelelo?” Kwanasentolongweni wabonakalisa iimpawu ezintle, yaye kungekudala wanyamekela izinto ezininzi ezazisenziwa apho. (Genesis 39:17-22) UThixo wamsikelela, yaye njengoko kuchazwe kwiGenesis 39:23, “uYehova wayenoYosefu.”

Hayi indlela engekwaba lula ngayo ngoYosefu, owayengahlali nentsapho yakhe ehlonel’ uThixo, ukuba enze izinto ezazisenziwa ngabahedeni ababemngqongile, elandela indlela yokuphila yamaYiputa yokuziphatha okubi! Kunoko, wagcina imigaqo kaThixo waza wahlala ecocekile phezu kwazo nje izilingo ezinzima. Xa umfazi kaPotifare wamcenga ngokuphindaphindiweyo ukuba aziphathe kakubi naye, impendulo yakhe eqinileyo yathi: “Ndingathini ukwenza obu bubi bukhulu kangaka ndize eneneni ndone kuThixo?”—Genesis 39:7-9.

Namhlanje, ulutsha olungamaNgqina lufanele luthobele izilumkiso ezisekelwe eBhayibhileni eziphathelele unxulumano olubi, ukuzonwabisa ngokuziphatha okubi, imifanekiso engamanyala nomculo othob’ isidima. Luyaqonda ukuba “amehlo kaYehova akuzo zonke iindawo, ahlala ekhangele ababi nabalungileyo.”—IMizekeliso 15:3.

UMoses Wakugatya “Ukuziyolisa Ngesono”

UMoses wakhulela kwibhotwe likaFaro elalinabantu abanqula izithixo nabathe phithi ziziyolo. IBhayibhile ithi ngaye: “Ngokholo uMoses . . . wala ukubizwa ngokuba ungunyana wentombi kaFaro, enyula ukuphathwa kabuhlungu kunye nabantu bakaThixo kunokuziyolisa ngesono okwexeshana.”—Hebhere 11:24, 25.

Ubuhlobo nehlabathi bunokuzisa iingenelo ezithile, kodwa zezokwexeshana. Sekunjalo, zinokuhlala nje ixesha elingephi eliselele eli hlabathi. (1 Yohane 2:15-17) Ngaba bekungayi kuba kuhle ukulandela umzekelo kaMoses? IBhayibhile ithi “waqhubeka eqinile ngokungathi uyambona Lowo ungabonakaliyo.” (Hebhere 11:27) Wahlala enikele ingqalelo kwilifa lokomoya lookhokho bakhe abahlonel’ uThixo. Wenza injongo kaYehova yaba yinjongo yakhe ebomini, ezibekela usukelo lokwenza ukuthanda kukaThixo.—Eksodus 2:11; IZenzo 7:23, 25.

Xa ulutsha oluhlonel’ uThixo luphakathi kwabantu abangahlonel’ uThixo nabangenabuhlobo, lunokomeleza ulwalamano lwalo noYehova ngofundisiso lobuqu, ukuze lumazi ngakumbi “Lowo ungabonakaliyo.” Ukuba nocwangciso lwemisebenzi yamaKristu, kuquka ukuya rhoqo kwiintlanganiso nasentsimini, kuya kunceda olu lutsha luhlale lunikela ingqalelo kwizinto zokomoya. (INdumiso 63:6; 77:12) Lufanele luzabalazele ukuhlakulela ukholo nethemba elomelele njengelikaMoses. Lufanele luzabalazele ukucinga nokwenza izinto ngendlela afuna ngayo uYehova, luze lukuvuyele ukuba ngabahlobo bakhe.

Yasebenzisa Ulwimi Lwayo Ekudumiseni UThixo

Omnye oselula owaba ngumzekelo ngoxa wayekude nekhaya yintombazana yomSirayeli eyathinjwa ngamaSiriya ngemihla yomprofeti kaThixo uElisha. Yaba sisicakakazi somfazi wentloko yomkhosi wamaSiriya eneqhenqa, uNahaman. Le ntombazana yathi kwinkosikazi kaNahaman: “Akwaba inkosi yam ibiphambi komprofeti oseSamariya! Ubeya kuyiphilisa kwiqhenqa layo.” Ngenxa yokunikela kwayo ubungqina, uNahaman waya kuElisha kwaSirayeli yaye wahlanjululwa kwiqhenqa. Ngaphezu koko, uNahaman waba ngumnquli kaYehova.—2 Kumkani 5:1-3, 13-19.

Lo mzekelo wale ntombazana ugxininisa imfuneko yokuba ulutsha lusebenzise ulwimi lwalo ngendlela edumisa uThixo, kwanaxa lukude nabazali balo. Ukuba loo ntombazana yayiqhele ukusebenzisa ‘intetho yobudenge okanye ukuqhula okungamanyala,’ ngaba yayiza kuziva ikhululekile ukusebenzisa ulwimi lwayo kakuhle njengoko yenzayo xa kwavela ithuba? (Efese 5:4; IMizekeliso 15:2) UNíkos, umfana okwiminyaka yama-20 ubudala owavalelwa entolongweni ngenxa yokuba ngundilele ukhumbula oku: “Xa ndandikunye nabanye abazalwana abaselula kwintolongo ekulinywayo kuyo, sikude negunya labazali nelebandla, ndaphawula ukuba incoko yethu iya iphelelwa sisidima. Yayingamzukisi kwaphela uYehova.” Okuvuyisayo kukuba, uNíkos nabanye baye bancedwa ukuba bathobele isiluleko sikaPawulos kulo mbandela, esithi: “Uhenyuzo nako konke ukungahlambuluki nokubawa makungakhe kukhankanywe kwaukukhankanywa phakathi kwenu, kanye njengoko kubafaneleyo abantu abangcwele.”—Efese 5:3.

UYehova Wayengowokwenene Kuwo

Oko kwenzeka kumaqabane kaDaniyeli amathathu angamaHebhere kwiBhabhiloni yamandulo kungqina ubunyaniso bomgaqo uYesu awathetha ngawo wokuba ukuthembeka kwizinto ezincinane kubangela ukuba umntu athembeke kwezinkulu. (Luka 16:10) Xa ayejamelene nengxaki yokutya ukutya okwalelweyo kuMthetho kaMoses, ayenokuzithethelela ngelithi angabathinjwa kwilizwe lasemzini, ngenxa yoko akanakwenza ngakumbi. Hayi indlela asikelelwa ngayo ngenxa yokuthabatha nzulu kwanento eyayibonakala incinane! Ayekhangeleka ondlekile yaye elumkile kunabanye abathinjwa ababesitya izibiliboco zikakumkani. Ngokungathandabuzekiyo, ukuthembeka kwezi zinto zincinane kwawomeleza, kangangokuba xa ayejamelene novavanyo olukhulu lokuqubuda kumfanekiso wesithixo, akazange alalanise.—Daniyeli 1:3-21; 3:1-30.

UYehova wayengowokwenene kwaba bafana bathathu. Nangona babekude namakhaya abo nakwisazulu sonqulo lukaThixo, babezimisele ukuhlala bengenabala ehlabathini. (2 Petros 3:14) Ulwalamano lwabo noYehova lwaluxabiseke kangangokuba babekulungele ukunikela ngobomi babo ngenxa yalo.

UYehova Akayi Kunishiya

Xa ulutsha lukude nabo lubathandayo nelibathembayo, lunokuziva lunganqabisekanga, lungaqinisekanga yaye luxhalabile. Noko ke, lunokujamelana neemvavanyo nezilingo lunentembelo epheleleyo yokuba ‘uYehova akayi kulushiya.’ (INdumiso 94:14) Ukuba olo lutsha ‘luyabandezeleka ngenxa yobulungisa,’ uYehova uya kulunceda ukuba luhlale luhamba “kumendo wobulungisa.”—1 Petros 3:14; IMizekeliso 8:20.

UYehova waqhubeka ebomeleza yaye wabasikelela ngendlela engathethekiyo ooYosefu, uMoses, intombazana yakwaSirayeli eyayilikhoboka namaHebhere amathathu aselula. Namhlanje, usebenzisa umoya wakhe oyingcwele, iLizwi lakhe nentlangano yakhe ukomeleza abo ‘balwa umlo omhle wokholo,’ ebanika umvuzo ‘wobomi obungunaphakade.’ (1 Timoti 6:11, 12) Ewe, ninako ukuhamba ngokumfaneleyo uYehova, yaye kububulumko ukwenjenjalo.—IMizekeliso 23:15, 19.

[Imibhalo esemazantsi]

[Ibhokisi ekwiphepha 25]

BAZALI—BAXHOBISENI ABANTWANA BENU!

“Njengeentolo esandleni sendoda enamandla, banjalo oonyana bobutsha.” (INdumiso 127:4) Utolo alulufikeleli ngamabona-ndenzile ixhoba lalo. Lumele lujoliswe ngobuchule. Ngokufanayo, abantwana abanakukwazi ukujamelana neengxaki zokuhlala kude nekhaya ngaphandle kolwalathiso olufanelekileyo lwabazali.—IMizekeliso 22:6.

Abaselula badla ngokwenza bengacinganga okanye bayekelele ‘kwiinkanuko zobutsha.’ (2 Timoti 2:22) IBhayibhile iyalumkisa: “Intonga nesohlwayo zinika ubulumko; kodwa inkwenkwe eyekelelwayo iya kumhlazisa unina.” (IMizekeliso 29:15) Ukungamnqandi umntwana kwizinto azenzayo kunokumenza angakwazi ukujamelana neengcinezelo zokuhlala kude nekhaya.

Abazali abangamaKristu bafanele bachazele abantwana babo ngendlela ecacileyo iingxaki, neengcinezelo zobu bomi bale nkqubo yezinto. Bafanele bachazele oselula ngaphandle kokugxeka okanye ukumdimaza ngeemeko ezingentle asenokujamelana nazo ukuba uza kuhlala kude nekhaya. Olu qeqesho, kuquka nobulumko obuvela kuThixo, luya ‘kunika abangenamava ubuqili, nomfana ukwazi namandla okucinga.’—IMizekeliso1:4.

Abazali ababethelela kwiintliziyo zabantwana babo imilinganiselo nemigaqo emihle yokuziphatha kaThixo babanceda bakwazi ukujamelana neengxaki zobomi. Isifundo seBhayibhile sentsapho esiqhutywa rhoqo, ukuncokola ngokukhululekileyo nokuba nomdla onyanisekileyo kwintlalo-ntle yabantwana babo, kunokuba luncedo. Abazali bafanele banikele uqeqesho lobuthixo ngendlela elungeleleneyo kodwa eyakhayo nesengqiqweni, belungiselela abantwana babo ukuba bakwazi ukuzimela ekuhambeni kwexesha. Ngokuba ngumzekelo, abazali banokufundisa abantwana babo ukuba banako ukuba sehlabathini kodwa bangabi yonxalenye yalo.—Yohane 17:15, 16.

[Umfanekiso okwiphepha 23]

Olunye ulutsha olungamaKristu kuye kwafuneka lushiye amakhaya alo

[Imifanekiso ekwiphepha 24]

Ngokuxhathisa izilingo, ulutsha lunokuxelisa uYosefu luze luhlale lucocekile ngokuziphatha

[Imifanekiso ekwiphepha 26]

Xelisa intombazana yakwaSirayeli eyayilikhoboka eyasebenzisa ulwimi lwayo ukuzukisa uYehova