Ngaba Uyakhumbula?

Ngaba uye wakuvuyela ukufunda iinkupho zakutshanje zeMboniselo? Ukuba kunjalo, bona enoba unokuyiphendula kusini na le mibuzo ilandelayo:

• Yayiyintoni iComplutensian Polyglot, yaye yayibaluleke ngantoni?

YiBhayibhile eyayishicilelwe ngeelwimi ezahlukahlukeneyo, ibhalwe eludinini, ingowona mbhalo ubalulekileyo owawufumaneka ngesiHebhere, isiGrike, nesiLatini yaye wawuneenxalenye ezithile zesiAramiki. Le Bhayibhile yeelwimi ezahlukahlukeneyo yahlahl’ indlela ekuvelisweni kombhalo ochane ngakumbi ngeelwimi zantlandlolo.—4/15, iphepha 28-31.

• Abantu banokumvuyisa njani uThixo?

Njengomntu ophilayo, uYehova uyacinga, uyenza, yaye uneemvakalelo. ‘UnguThixo owonwabileyo’ yaye uyavuyiswa kukuphumeza iinjongo zakhe. (1 Timoti 1:11; INdumiso 104:31) Okukhona siyiphaphela indlela avakalelwa ngayo uThixo, kokukhona siya kukwazi oko sinokukwenza ukuze sivuyise intliziyo yakhe.—5/15, iphepha 4-7.

• Kwakutheni ukuze uDavide avumele umfazi wakhe uMikali ukuba abe nomfanekiso womlonde-khaya?

Xa uKumkani uSawule wayeceba ukubulala uDavide, uMikali wamncedisa ekubalekeni, wabeka esingqengqelweni into eyayingathi ngumntu. Kusenokwenzeka ukuba wayenomlonde-khaya ngenxa yokuba intliziyo yakhe yayingatyekelanga kuThixo. Kusenokwenzeka ukuba uDavide wayengazi nto ngalo mlonde-khaya okanye wawunyamezela kuba wayeyintombi kaKumkani uSawule. (1 Kronike 16:25, 26)—6/1, iphepha 29.

• Yintoni eyayibangela ukuba uThixo akhuphe imiyalelo ngokuphathelele igazi?

Okwathethwa nguThixo emva koMkhukula, nakuMthetho kaMoses, noko kufumaneka kwiZenzo 15:28, 29, kwakubhekisela kwidini elaliquka igazi likaYesu elaphalalayo. Sinokuxolelwa size sibe seluxolweni noThixo kuphela ngelo gazi. (Kolose 1:20)—6/15, iphepha 14-19.

• Mingaphi imimangaliso eyenziwa nguYesu echazwe eBhayibhileni?

Iingxelo zeVangeli zithetha ngemimangaliso kaYesu engama-35. Kodwa alichazwanga inani layo yonke imimangaliso awayenzayo. (Mateyu 14:14)—7/15, iphepha 5.