Buxabiseke Kangakanani Ubomi Bakho?

NGOXA abantu abaninzi bebesifa eYurophu ebudeni beMfazwe Yehlabathi I, bekukho abantu abebezama ukusindisa ubomi babantu eAntarctica. Umhloli wamazwe oliNgesi waseIreland uErnest Shackleton nabantu awayehamba nabo behlelwa yintlekele xa inqanawa yabo, uEndurance, yabetheka kumkhenkce yaze yazika. Lo kaShackleton wakwazi ukubasindisa abo bantu ngokomlinganiselo othile— kwiElephant Island kuMzantsi woLwandlekazi lwaseAtlantiki. Kodwa babesajamelene nengozi enkulu.

UShackleton waqonda ukuba babeza kusinda kuphela xa becela uncedo kwisiqithi saseSouth Georgia. Loo ndawo yayikwiikhilomitha ezili-1 100, yaye wayenephenyane lokuhlangula eliziimitha ezisi-7 awayelithabathe kwinqanawa uEndurance. Babengenathemba.

Noko ke, ngoMeyi 10, 1916, emva kweentsuku ezili-17 ezinzima, uShackleton neqela nje elincinane labanye abantu bafika eSouth Georgia, kodwa ngenxa yamaza olwandle bafikela kwelinye icala lesi siqithi. Kwafuneka bahambe iikhilomitha ezingama-30 phezu kweentaba ezingabhalwanga maphini nezinekhephu ukuze bafike apho babesinge khona. Kuloo manzithinzithi—kwimozulu eqhaqhazelisa amazinyo yaye bengenazo nezixhobo ezifanelekileyo zokunyuka intaba—uShackleton nabantu ababehamba naye bafika apho babesinge khona yaye ekugqibeleni wabasindisa bonke abo bantu babesengxakini. Kwakutheni ukuze uShackleton enze umzamo ongaka? Umbhali uRoland Huntford ubhala esithi: “Injongo yakhe yayikukusindisa wonke umntu.”

“Akukho Nanye Esalayo”

Yintoni eyasindisa abantu ababehamba noShackleton njengoko babelinde nje “kummandla ongumqwebedu nonomkhenkce nowawuziikhilomitha ezingama-30 ukusuka kwelinye icala ukuya kwelinye”? Kukuba nethemba lokuba inkokeli yabo iza kusigcina isithembiso sayo sokubahlangula.

Abantu namhlanje bayafana naloo madoda asengxakini kwiElephant Island. Abaninzi baphila phantsi kweemeko ezibuhlungu nezibatsalisa nzima ukuze baqhubeke bephila. Sekunjalo, bathembele ngokupheleleyo ukuba uThixo uya “kumhlangula oxhwalekileyo” kwingcinezelo nakwinkxwaleko. (Yobhi 36:15) Qiniseka ukuba uThixo ugqala ubomi bomntu ngamnye njengobubalulekileyo. UYehova uThixo, uMdali uthi: “Nindibize ngemini yokubandezeleka. Ndiya kunihlangula, yaye niya kundizukisa.”—INdumiso 50:15.

Ngaba ukufumanisa kunzima ukukholelwa ukuba uMdali ukugqala—wena mntu mnye phakathi kwamawaka ezigidi zabantu emhlabeni—uxabisekile? Ngoko phawula oko kwabhalwa ngumprofeti uIsaya ngamawaka ezigidi zeenkwenkwezi ezikwiminyele ekummandla wendalo iphela osingqongileyo. Wathi: “Phakamiselani amehlo enu phezulu nize nibone. Ngubani na odale ezi zinto? NguLowo uzisa umkhosi wazo kanye ngokwenani, uzibiza nangegama xa zizonke. Ngenxa yamandla amakhulu, kanjalo womelele ngamandla, akukho nanye esalayo.”—Isaya 40:26.

Ngaba uyakuqonda oko kuthethwa koku? UmNyele wethu—oyinxalenye nje yommandla wezijikelezi-langa—ubuncinane uneenkwenkwezi ezingamawaka ezigidi ezili-100. Yaye mingaphi eminye iminyele ekhoyo? Akakho mntu owaziyo ngokuqinisekileyo, kodwa abanye baqikelela ukuba inokuba ngamawaka ezigidi ezili-125. Hayi indlela ezininzi ngayo ezo nkwenkwezi! Sekunjalo, iBhayibhile ithi uMdali wendalo iphela uzazi iinkwenkwezi ngamagama.

“Kwaneenwele Ezi Zentloko Yenu Zibaliwe Zonke”

Omnye umntu unokuthi: ‘Kodwa, ukwazi nje amawaka ezigidi zeenkwenkwezi ngamagama—okanye amawaka ezigidi zabantu—akuthethi ukuba uyabakhathalela.’ Ikhompyutha enamandla kakhulu inako ukugcina amawaka ezigidi zamagama abantu. Sekunjalo, akakho umntu onokucinga ukuba ikhompyutha ibakhathalele abo bantu. Noko ke, iBhayibhile ithi uYehova uThixo, akazi nje kuphela amagama amawaka ezigidi zabantu, kodwa ukhathalele mntu ngamnye. Umpostile uPetros wabhala esithi: “Liphoseni kuye lonke ixhala lenu, kuba unikhathalele.”—1 Petros 5:7.

UYesu Kristu wathi: “Ngaba oongqatyana ababini abathengiswa ngengqekembe exabiso lincinane na? Kanti akukho namnye kubo oya kuwela emhlabeni ngaphandle kolwazi lukaYihlo. Nina ke, kwaneenwele ezi zentloko yenu zibaliwe zonke. Ngoko ke musani ukoyika: Nixabiseke ngaphezu koongqatyana abaninzi.” (Mateyu 10:29-31) Phawula ukuba uYesu akazange athi uThixo uza kuyazi nje into eyenzeka koongqatyana nasebantwini. Wathi: “Nixabiseke ngaphezu koongqatyana abaninzi.” Kutheni uxabiseke ngaphezu kwabo? Ngokuba wenziwe “ngokomfanekiso kaThixo”—unamandla okuhlakulela nokubonakalisa iimpawu zokuziphatha, ubulumko neempawu zokomoya ezibonakalisa iimpawu zikaThixo eziphakamileyo.—Genesis 1:26, 27.

“Yadalwa Ngumntu Othile Okrelekrele”

Ungakhohliswa ngabantu abakukhanyelayo ukuba kukho uMdali. Ngokutsho kwabo, ubekho ngenxa yamandla asuke nje azivelela nangaziwayo. Bathi akwenziwanga “ngokomfanekiso kaThixo,” yaye akwahlukanga kwizilwanyana ezikwesi sijikelezi-langa—kuquka noongqatyana.

Ngaba kuvakala kusengqiqweni kuwe ukuba ubomi bazenzekela nje ngamabona-ndenzile? Isazi sebhayoloji yeemolekyuli uMichael J. Behe uthi “inkqubo yemichiza emangalisayo nentsonkothileyo” elawula ubomi yenza ukuba loo ngcinga ibonakale ingekho ngqiqweni kwaphela. Uthi, ubungqina benzululwazi ngemichiza bukwenza kucace ukuba “ubomi emhlabeni nendalo engatshonkothanga kangako . . . yadalwa ngumntu othile okrelekrele.”—Darwin’s Black Box—The Biochemical Challenge to Evolution.

IBhayibhile isixelela ukuba ubomi emhlabeni enoba yindalo engantsonkothanga kangako idalwe ngumntu othile okrelekrele. Yaye isixelela ukuba lo Mntu okrelekrele ngolo hlobo nguYehova uThixo, uMdali wendalo iphela.—INdumiso 36:9; ISityhilelo 4:11.

Isibakala sokuba sifanele sinyamezele ihlabathi elizele yintlungu nakukubandezeleka masingakwenzi ungakholelwa ukuba kukho uMdali noMyili womhlaba nabo bonke ubomi obukuwo. Cinga ngeenyaniso ezimbini ezisisiseko. Eyokuqala kukuba uThixo akazange ayile ukungafezeki okusingqongileyo. Eyesibini kukuba uMdali wethu unesizathu esivakalayo sokuba akuvumele okwexeshana. Kanye njengokuba eli phephancwadi lidla ngokutsho, uYehova uThixo uvumele ububi bubekho kangangexesha elithile ukuze ngokusisigxina kupheliswe iimbambano ezaphakanyiswa ngexesha laxa abantu balutyeshelayo ulongamo lwakhe.a—Genesis 3:1-7; Duteronomi 32:4, 5; INtshumayeli 7:29; 2 Petros 3:8, 9.

“Uya Kumhlangula Lowo Ulihlwempu Ukhalela Uncedo”

Kakade ke, naphantsi kweemeko ezibuhlungu abantu ekusafuneka baphile phantsi kwazo namhlanje, ubomi busesisipho esihle. Yaye senza konke okusemandleni ukubulondoloza. Ubomi uThixo abuthembisayo kwixesha elizayo bungaphezulu kokulwela nje ukuze sihlale siphila kwiimeko ezibuhlungu—njengabantu ababekunye noShackleton kwiElephant Island. Injongo kaThixo kukusihlangula kwintlungu nokuphila ubomi obulilize esibuphilayo ngoku, size sifumane “ubomi benene” uThixo abulungiselele abantu bakhe.—1 Timoti 6:19.

UThixo uya kwenza konke oku kuba ngamnye wethu ubalulekile emehlweni akhe. Walungiselela uNyana wakhe, uYesu Kristu, ukuze anikele ngedini lentlawulelo elalifuneka ukuze lisikhulule kwisono, kukungafezeki nokufa esakuzuza ilifa kubazali bethu bokuqala, uAdam noEva. (Mateyu 20:28) UYesu Kristu wathi: “UThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani obonisa ukholo kuye . . . abe nobomi obungunaphakade.”—Yohane 3:16.

UThixo uya kubenzela ntoni abo ngoku bathwaxwa yintlungu nayingcinezelo? Lithetha ngoNyana wakhe, iLizwi likaThixo eliphefumlelweyo lisixelela oku: “Uya kumhlangula lowo ulihlwempu ukhalela uncedo, kwanalowo uxhwalekileyo nabani na ongenamncedi. Uya kuba nosizi ngesisweli nangehlwempu, nemiphefumlo yabangamahlwempu uya kuyisindisa. Uya kuwukhulula umphefumlo wabo kwingcinezelo nakugonyamelo.” Uza kukwenzela ntoni oku? Ngenxa yokuba ‘igazi labo [okanye ubomi babo] liya kuxabiseka emehlweni akhe.’—INdumiso 72:12-14.

Kangangeenkulungwane abantu bebetsala nzima ngenxa yesono nokungafezeki, ngokungathi ‘bayagcuma’ yintlungu nakukubandezeleka. UThixo uye wakuvumela oku kuba esazi ukuba uya kuwulungisa umonakalo oye wabangelwa koko. (Roma 8:18-22) Kungekudala uza “kubuyisela izinto zonke” esebenzisa urhulumente obuBukumkani bakhe obulawulwa nguNyana wakhe, uYesu Kristu.—IZenzo 3:21; Mateyu 6:9, 10.

Oko kuquka nokuvusa abantu abaye babandezeleka baza bafa kwixesha eladlulayo. Bakhuselekile kwinkumbulo kaThixo. (Yohane 5:28, 29; IZenzo 24:15) Kungekudala baza kufumana ubomi “ngokuyintabalala”—ubomi obungunaphakade nobufezekileyo kumhlaba oyiparadesi ongenantlungu nakubandezeleka. (Yohane 10:10; ISityhilelo 21:3-5) Wonke umntu ophila apho uya kukwazi ukuphila ubomi obumnandi aze ahlakulele iimpawu nobuchule obuhle obufumaneka kwabo benziwe “ngokomfanekiso kaThixo.”

Ngaba uza kuphila ukuze ufumane ubomi uYehova akuthembise bona? Oko kuxhomekeke kuwe. Siyakubongoza ukuba uwaxhakamfule amalungiselelo uThixo akulungiselele wona okuba ufumane zonke ezi ntsikelelo. Abapapashi beli phephancwadi bangakuvuyela ukukunceda wenjenjalo.

[Umbhalo osemazantsi]

[Umfanekiso okwiphepha 4, 5]

Abantu ababehamba noShackleton babenethemba lokuba uza kusigcina isithembiso sakhe sokubahlangula

[Inkcazelo]

© CORBIS

[Umfanekiso okwiphepha 6]

“Nixabiseke ngaphezu koongqatyana abaninzi”