IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w05 4/1 iphe. 29
  • Imibuzo Evela Kubafundi

No video available for this selection.

Sorry, there was an error loading the video.

  • Imibuzo Evela Kubafundi
  • IMboniselo Evakalisa UBukumkani BukaYehova—2005
  • Amanqaku Afanayo
  • Ngaba Uyakhumbula?
    IMboniselo Evakalisa UBukumkani BukaYehova—2005
  • Okwenzeka Ehlabathini
    Vukani!—2015
  • Khangela Esona Sipho Siza Kuthandwa
    IMboniselo Evakalisa UBukumkani BukaYehova (Kawonke-wonke)—2017
  • Ukulwa Nokunganyaniseki Ngekrele Lomoya
    IMboniselo Evakalisa UBukumkani BukaYehova—2000
Khangela Okunye
IMboniselo Evakalisa UBukumkani BukaYehova—2005
w05 4/1 iphe. 29

Imibuzo Evela Kubafundi

Ngaba umKristu ufanele ashiyele umsebenzi waseburhulumenteni amaqithiqithana okanye isipho xa emenzele nto ithile, okanye ngaba oko kunokujongwa njengokunyoba?

Naphi na apho akhoyo, amaKristu azabalazela ukusebenzisa ubulumko xa esingatha iimeko zasekuhlaleni, ekhumbula ukuba into eyamkelekileyo nesemthethweni kwelinye ilizwe inokuba yinto engamkelekanga nekukwaphul’ umthetho kwelinye. (IMizekeliso 2:6-9) Ewe, umKristu ufanele ahlale eyikhumbula into yokuba nabani na ofuna ukuba “lundwendwe ententeni [kaYehova]” umele akuphephe ukunyoba.—INdumiso 15:1, 5; IMizekeliso 17:23.

Yintoni ukunyoba? Ngokutsho kweThe World Book Encyclopedia, “ukunyoba kuthetha ukupha okanye ukuthembisa into yexabiso . . . kumntu oligosa likawonke wonke, oya kuthi yena aphule umthetho ukuze abuyekeze lowo umphe into.” Ngaloo ndlela, enoba umntu uhlala phi na, kukunyoba ukupha umgwebi okanye ipolisa imali okanye isipho ngenjongo yokuba ligqwethe isigwebo okanye ukupha umhloli isipho ukuze agatye isiphako esithile. Kukunyoba nokusebenzisa isipho ukuze uphathwe ngendlela ekhethekileyo, njengokuba ubekwe phambili kuludwe lwabalindileyo okanye udlule abanye emgceni. Ikhondo elinjalo libonisa ukuba akunalo uthando.—Mateyu 7:12; 22:39.

Kodwa ngaba kukunyoba ukupha umntu isipho okanye amaqithiqithana, ngokomzekelo, igosa likawonke-wonke ngenjongo yokuba ufumane inkonzo ekufaneleyo okanye uphephe ukuphathwa ngendlela engekho sikweni? Ngokomzekelo, kwamanye amazwe amagosa asenokurhuq’ iinyawo ukubhalisa abantwana esikolweni, ukwamkela umntu esibhedlele, okanye ukubeka isitampu kumaxwebhu aseburhulumenteni atyobelwa xa ufudukela kwelinye ilizwe. Okanye asenokulibazisa xa elungisa izicelo zokuhlaziya iilayisensi namaphepha-mvume.

Imikhwa yokushiya amaqithiqithi kunye nendlela ejongwa ngayo iyahluka kwiindawo ngeendawo. Kwindawo apho kuyinto eqhelekileyo ukwenza ezi zinto okanye kuyinto elindelekileyo ukuba uyenze, amanye amaKristu asenokuvakalelwa ukuba ekubeni engaphuli mthetho ngokuzenza, akaphuli mgaqo weBhayibhile xa eshiyela igosa amaqithiqithana ukuze lenze umsebenzi walo. Kwamanye amazwe abantu banokude bajonge loo maqithiqithi njengentlawulo eyongezelela kumvuzo omncinci wegosa elo. Ukhumbule ke ukuba kukho umahluko phakathi kokupha umntu into ngenxa yomsebenzi abefanele akwenzele wona kakade, nokunyoba umntu ukuba akwenzele into abengafanelanga akwenzele yona.

Kwelinye icala, xa amanye amaNgqina kaYehova ecela ukwenzelwa into esemthethweni aye akavuma ukupha abahloli, amagosa ahlola abantu abaya kwamanye amazwe, okanye abanye kwanaxa ukuwanika isipho esinjalo kuyinto eqhelekileyo. Ekubeni amaNgqina esaziwa ekuhlaleni njenganaloo nkolelo ngenxa yezazela zawo yaye esaziwa nangokunyaniseka kwawo, maxa wambi aye aphathwe ngendlela efanayo neyabo bahlawulayo.—IMizekeliso 10:9; Mateyu 5:16.

Ekuqukumbeleni, umkhonzi kaYehova ngamnye ufanele azigqibele enoba uya kuwashiyela amaqithiqithi kusini na amagosa ngomsebenzi ofanelekileyo awenzayo okanye ukuze aphephe ukuphathwa ngendlela engekho sikweni. Okona kubaluleke ngaphezulu kukuba akafanele enze into eya kumshiya nesazela esenzakeleyo, into eya kuzisa ugculelo kwigama likaYehova, nento eya kubakhubekisa abanye.—Mateyu 6:9; 1 Korinte 10:31-33; 2 Korinte 6:3; 1 Timoti 1:5.

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share