Umsebenzi—Ngaba Uyintsikelelo Okanye Sisiqalekiso?

‘Akukho nto elunge ngakumbi emntwini kunokuba abone okulungileyo ngenxa yokusebenza kwakhe nzima.’—INtshumayeli 2:24.

“NDIBUYA ndidinwe ndiyimfe emsebenzini.” Ngokutsho kohlolisiso lwakutshanje, leyo yindlela avakalelwa ngayo umsebenzi omnye kwabathathu. Oku akungomnqa ekubeni abantu becinezelekile; besebenza ixesha elide baze omnye umsebenzi baye kuwenzela ekhaya—ngoxa abaphathi babo bengasoze bakhuphe nelimdaka ukubancoma.

Ukuveliswa kwezinto ngamanani amakhulu kusetyenziswa oomatshini kuye kwenza abasebenzi abaninzi bavakalelwa kukuba inkonzo yabo ayibalulekanga. Ukhuthazo nokuphuculwa kweendlela zokusebenza kusoloko kubekelwa bucala. Ngokuzenzekelayo, oku kuyasichaphazela isimo sengqondo sabantu ngomsebenzi. Umdla uyaphela emsebenzini. Umntu unokuyeka ukuba nomnqweno wokwenza umsebenzi osemagqabini nophum’ izandla. Ezi zinto zinokubenza abantu bawuthiye umsebenzi bade bathiye nokusebenza.

Ukuhlolisisa Isimo Sengqondo Sethu

Kuyavunywa ukuba asinakusoloko sikwazi ukutshintsha iimeko esisebenza phantsi kwazo. Kodwa singakwazi ukulungelelanisa isimo sengqondo sethu. Ukuba ufumanisa ukuba ngomlinganiselo othile uye waphenjelelwa sisimo sengqondo esingafanelekanga ngomsebenzi, uya kuba wenza kakuhle ukuhlolisisa imbono nemigaqo kaThixo ephathelele lo mbandela. (INtshumayeli 5:18) Abaninzi baye bafumanisa ukuba xa besebenzisa la macebiso baye bafumana umlinganiselo othile wolonwabo nolwaneliseko.

UThixo Ngumsebenzi Obalaseleyo. UThixo ngumsebenzi. Mhlawumbi asizange sikhe sicinge ngolo hlobo xa sicinga ngaye, kodwa leyo yindlela azichaza ngayo kwasekuqaleni kweBhayibhile. Ingxelo yeGenesis ivula ngamazwi achaza uYehova edala amazulu nehlabathi. (Genesis 1:1) Cinga ngeendima ezahlukeneyo awaziphumezayo uThixo xa wayedala—waba ngumyili, umlungelelanisi, injineli, igcisa, ingcaphephe yokukhetha izinto zokwakha, umcwangcisi woko kumele kwenziwe, ingcali ngemichiza, ngezinto eziphilayo nezilwanyana, umyili weenkqubo eziza kusetyenziswa ukuphumeza loo msebenzi, nesazi ngeelwimi, oku kukukhankanya nje ezimbalwa.—IMizekeliso 8:12, 22-31.

Wawunjani umsebenzi kaThixo? IBhayibhile ithi ‘wawulungile,’ ‘wawulunge gqitha.’ (Genesis 1:4, 31) Ngokwenene, indalo ‘ivakalisa uzuko lukaThixo,’ ibe nathi sifanele simdumise!—INdumiso 19:1; 148:1.

Noko ke, umsebenzi kaThixo awuzange uphelele ekudalweni kwamazulu, komhlaba nabantu bokuqala. UNyana kaYehova, uYesu Kristu, wathi: “UBawo uyasebenza kude kube ngoku.” (Yohane 5:17) Ewe, uYehova usaqhubeka esebenza kuba ulungiselela izidalwa zakhe, enyamekela indalo nabanquli bakhe abanyanisekileyo. (Nehemiya 9:6; INdumiso 36:6; 145:15, 16) Ude asebenzise nabantu, “abasebenzi abangamadlelane kaThixo,” ukuze bancedise ekwenzeni imisebenzi ethile.—1 Korinte 3:9.

Umsebenzi unokuba yintsikelelo. Ngaba iBhayibhile ayithi umsebenzi sisiqalekiso? Kubonakala ngathi iGenesis 3:17-19 ithetha ukuba uThixo wamohlwaya uAdam noEva ngokuvukela kwabo ngokubanika umsebenzi onzima. Xa wayewisa isigwebo kwabo bantu bokuqala, uThixo wathi kuAdam: “Uya kudla isonka sokubila kobuso bakho ude ubuyele emhlabeni.” Ngaba kwakuqalekiswa kwanto kuthiwa ngumsebenzi?

Akunjalo, kunoko, ngenxa yokungathobeli kuka-Adam noEva, ukwandiswa kweParadesi yase-Eden kwakuza kunqumama. Umhlaba waqalekiswa nguThixo. Umntu wayeza kusebenza nzima ngaphambi kokuba afumane ukutya.—Roma 8:20, 21.

Kunokuba iBhayibhile ithi umsebenzi sisiqalekiso, iwuchaza njengentsikelelo efanele ixatyiswe. Njengokuba kuboniswe ngasentla, uThixo ukhuthele. Ekubeni wadala abantu ngomfanekiso wakhe, uYehova uye wabanika amandla negunya lokulawula umhlaba. (Genesis 1:26, 28; 2:15) Abantu babehleli beza kusebenza ngaphambi kokuba uThixo athethe amazwi akwiGenesis 3:19. Ukuba umsebenzi wawusisiqalekiso kwaye ungendawo, uYehova ngengazange akhuthaze abantu ukuba basebenze. UNowa nentsapho yakhe babenomsebenzi omninzi ababefanele bawenze ngaphambi nasemva koMkhukula. Ngexesha lamaKristu, abafundi bakaYesu babongozwa ukuba basebenze.—1 Tesalonika 4:11.

Sekunjalo, sonke siyazi ukuba umsebenzi unokuba luxanduva kweli xesha lethu. Ukucinezeleka, iingozi, ukudinwa, ukuphoxeka, ukhuphiswano, ukuqhatha nokungabikho kokusesikweni, ezo zinto ngamanye “ameva nenkunzane” anxulunyaniswa nomsebenzi. Kodwa wona umsebenzi awusosiqalekiso. KwiNtshumayeli 3:13, iBhayibhile ithi umsebenzi nesiqhamo sawo sisipho esivela kuThixo.—Bona ibhokisi ethi “Ukuhlangabezana Noxinezeleko Lwasemsebenzini.”

Ungamzukisa uThixo ngomsebenzi wakho. Umsebenzi okumgangatho ophezulu nosemagqabini usoloko uqhwatyelwa izandla. Umgangatho womsebenzi yenye yezinto ezibalulekileyo ngokweBhayibhile. NoThixo uwenza kakuhle umsebenzi wakhe. Usinike iziphiwo, ubugcisa kwaye ufuna sizisebenzise kakuhle. Ngokomzekelo, xa kwakusakhiwa umnquba kuSirayeli wamandulo, uYehova wanika amadoda anjengoBhetsaleli no-Oholiyabhi ubulumko, ukuqonda, nolwazi, izinto ezazibenza bakwazi ukwenza imisebenzi ethile yobugcisa. (Eksodus 31:1-11) Oku kubonisa ukuba uThixo wayenomdla okhethekileyo kumsebenzi wokukrola, wokuyila nakwezinye izinto ababezenza.

Oku kuyichaphazela kakhulu indlela esibusebenzisa ngayo ubuchule bethu nendlela esisebenza ngayo. Oku kuya sinceda sibujonge njengesipho esivela kuThixo, esingamele sithatyathwe lula. Ngaloo ndlela, amaKristu abongozwa ukuba xa esebenza makasebenze ngokungathi umsebenzi wawo uza kuhlolwa nguThixo: “Nayiphi na into eniyenzayo, yenzeni ngomphefumlo uphela ngokungathi niyenzela uYehova, kungekhona abantu.” (Kolose 3:23) Abakhonzi bakaThixo bayalelwa ukuba benze umsebenzi omhle, ngaloo ndlela besenza isigidimi samaKristu sibe nomtsalane kwabo basebenza nabo nakwabanye.—Bona ibhokisi ethi “Ukusebenzisa Imigaqo YeBhayibhile Emsebenzini.”

Ekubeni umsebenzi wethu unokuzukisa uThixo, simele sizixhalabise ngokuba semgangathweni komsebenzi wethu nendlela esiwenza kakuhle ngayo. Ngaba uThixo uyakholiswa yindlela esisebenza ngayo? Ngaba sanelisekile yindlela esiwenza ngayo umsebenzi wethu? Ukuba asanelisekanga, oko kuthetha ukuba sinokuphucula.—IMizekeliso 10:4; 22:29.

Lungelelanisa umsebenzi nezinto zokomoya. Nangona ukukhuthala kuyinto entle, kukho into ebalulekileyo eyenza umsebenzi nobomi zanelise. Kukuba nolwalamano oluhle noThixo. UKumkani uSolomon, owayekhuthele waba nabo bonke ubutyebi nobutofotofo obunokufunyanwa ebomini, wafikelela kwesi sigqibo: “Yoyika uThixo oyinyaniso uze ugcine imiyalelo yakhe. Kuba oku kuyimbopheleleko yomntu.”—INtshumayeli 12:13.

Kucacile ukuba, simele sihlolisise ukuthanda kukaThixo ngaphambi kokuba senze nantoni na. Ngaba sisebenza ngokuvisisana nokuthanda kwakhe, okanye ngokuchasene nako? Ngaba sizama ukukholisa uThixo, okanye sizama ukuzikholisa? Ukuba asikwenzi ukuthanda kukaThixo, ekugqibeleni siya kuphelelwa lithemba, sibe ngamalolo size sizive singento yanto.

USteven Berglas wacebisa ukuba xa amalungu esigqeba ediniwe ‘makenze omnye umsebenzi awuthandayo aze awenze inxalenye yobomi bawo.’ Alikho ikhondo elilunge ngakumbi kunokukhonza Lowo wasinika ubugcisa nobuchule ukuze senze umsebenzi onentsingiselo. Ukwenza umsebenzi okholisa uMdali akuyi kusishiya singanelisekanga. KuYesu, umsebenzi awayewunikwe nguYehova wawufana nokutya, usanelisa uhlaziya njengokutya. (Yohane 4:34; 5:36) Ukongezelela koko, simele sikhumbule ukuba uThixo, uMsebenzi Obalaseleyo, uyasimema ukuba sibe “ngabasebenzi abangamadlelane.”—1 Korinte 3:9.

Ukunqula uThixo nokukhula ngokomoya kusixhobisela umsebenzi ovuzayo nembopheleleko. Ekubeni emsebenzini kudla ngokubakho ingcinezelo, ukomelela elukholweni ngokomoya kunokusinika amandla njengoko sizama ukuba ngabaqeshwa okanye abaqeshi ababhetele. Kwelinye icala, izinto ezenzeka ebomini, kweli hlabathi lingamoyikiyo uThixo zinokutyhila iinkalo esimele siphucule kuzo ngokomoya.—1 Korinte 16:13, 14.

Xa Umsebenzi Uya Kuba Yintsikelelo

Abo bazibhokoxayo ekukhonzeni uThixo ngoku banokukhangela phambili kwixesha lokubuyiselwa kweParadesi emhlabeni xa kuya kwenziwa umsebenzi ohlaziyayo. Umprofeti kaYehova uIsaya, wachaza kwangaphambili ngoko kuya kwenzeka ebomini ngelo xesha wathi: ‘Ngokuqinisekileyo baya kwakha izindlu baze bahlale; batyale izidiliya baze badle isiqhamo sazo. Abayi kwakha kuhlale abanye; abayi kutyala kudle abanye. Umsebenzi wezandla zabanyuliweyo bam baya kuwusebenzisa ngokupheleleyo.’—Isaya 65:21-23.

Hayi indlela oya kuba yintsikelelo ngayo umsebenzi ngeloo xesha! Ngokufunda oko akufunayo uThixo uze wenze ngokuvisisana nako, ngamana ungaphakathi kwabo basikelelweyo nguYehova uze uhlale ‘ubone okulungileyo kuko konke ukusebenza kwakho nzima.’—INtshumayeli 3:13.

[Amagama acatshulweyo akwiphepha 8]

UThixo Ngumsebenzi Obalaseleyo: Genesis 1:1, 4, 31; Yohane 5:17

[Amagama acatshulweyo akwiphepha 8]

Umsebenzi unokuba yintsikelelo: Genesis 1:28; 2:15; 1 Tesalonika 4:11

[Amagama acatshulweyo akwiphepha 8]

Ungamzukisa uThixo ngomsebenzi wakho: Eksodus 31:1-11; Kolose 3:23

[Amagama acatshulweyo akwiphepha 8]

Lungelelanisa umsebenzi nezinto zokomoya: INtshumayeli 12:13; 1 Korinte 3:9

[Ibhokisi/Umfanekiso okwiphepha 6]

UKUHLANGABEZANA NOXINEZELEKO LWASEMSEBENZINI

Oogqirha baluthabatha njengoluyingozi kakhulu uxinezeleko lwasemsebenzini. Lunokubangela izilonda zesisu, udandatheko ibe umntu unokude azibulale. EJapan balubiza ngokuba—yikaroshi, “ukubulawa ngumsebenzi ogqithiseleyo.”

Ziliqela izinto ezinokubangela udandatheko. Aba nobangela baquka ukutshintsha kwamaxesha okungena emsebenzini, okanye kweemeko, ukungavisisani nabasemagunyeni, ukutshintsha kohlobo lomsebenzi owenzayo, okanye umhlala-phantsi nokugxothwa emsebenzini. Abanye baye bazame ukuphuncula kolo xinezeleko, ngokutshintsha umsebenzi okanye baye kuhlala kwenye indawo. Abanye baye bazame ukulucinezela olo xinezeleko, suke luchaphazele ezinye iinkalo zobomi, ngokuqhelekileyo entsatsheni. Abanye abantu bade babandezeleke ngokweemvakalelo baze badandatheke baphelelwe lithemba.

AmaKristu axhotyiswe ngokwaneleyo ukuze akwazi ukumelana noxinezeleko olubangelwa ngumsebenzi. IBhayibhile inemigaqo emininzi enokusomeleza ngokomoya nangokweemvakalelo ngamaxesha anzima. Ngokomzekelo, uYesu wathi: “Musani ukuxhalela ingomso, kuba ingomso liya kuba namaxhala alo. Imini nganye inobayo ububi obuyilingeneyo.” Apha kukhuthazwa ukuba sinikel’ ingqalelo kwiingxaki zanamhlanje, kungekhona ezangomso. Ngaloo ndlela siyakuphepha ukubaxa iingxaki zethu, nto leyo enokusenza sixinezeleke ngakumbi.—Mateyu 6:25-34.

Kubalulekile ukuba amaKristu akholose ngoThixo kungekhona ngeziqu zawo. Xa sivakalelwa kukuba siphelelwe ngamandla, uThixo angasinika uxolo novuyo ezintliziyweni zethu, aze asinike ubulumko bokuhlangabezana nobo bunzima. Umpostile uPawulos wabhala wathi: “Qhubekani nizuza amandla eNkosini nasekomeleleni kwayo.”—Efese 6:10; Filipi 4:7.

Ukanti, neemeko ezicinezelayo zinokuvelisa imiphumo emihle. Iimvavanyo zinokusenza sifune uYehova size sikholose ngaye. Zinokusinceda sihlakulele ubuntu bobuKristu namandla okunyamezela ngaphantsi kweemeko ezicinezelayo. UPawulos usibongoza esithi: “Masigcobe ngoxa sisezimbandezelweni, ekubeni sisazi ukuba imbandezelo ivelisa unyamezelo; unyamezelo luvelisa ukukholeka; ukukholeka kuvelisa ithemba.”—Roma 5:3, 4.

Ngaloo ndlela, kwaneemeko ezicinezelayo zinokusenza sikhule ngokomoya kunokuba zisenze siphelelwe lithemba size sibe sezintlungwini.

[Ibhokisi/Umfanekiso okwiphepha 7]

UKUSEBENZISA IMIGAQO YEBHAYIBHILE EMSEBENZINI

Isimo sengqondo somKristu nendlela aziphatha ngayo emsebenzini zinokwenza isigidimi seBhayibhile sibe nomtsalane kwabo asebenza nabo nakwabanye. Kwileta awayibhalela uTito umpostile uPawulos wabongoza abo bakwimeko efana neyabasebenzi ukuba ‘bathobele [abaphathi] babo ezintweni zonke, yaye babakholise kakuhle, bangaphendulani nabo, bangebi, kodwa babonise ukunyaniseka okulungileyo ngokupheleleyo, khon’ ukuze bayihombise imfundiso yoMsindisi wethu, uThixo, ezintweni zonke.’—Tito 2:9, 10.

Ngokomzekelo, khawuve ileta eyabhalelwa ikomkhulu lamaNgqina kaYehova yenye indoda engusomashishini: “Ndicela imvume yokuqesha amaNgqina kaYehova. Ndifuna ukuqesha wona kuba ndiyazi anyanisekile, athembekile kwaye akakhohlisi. Ekuphela kwabantu endibathembayo ngamaNgqina kaYehova. Ndincedeni.”

UKyle ngumKristu osebenza njengomamkeli zindwendwe kwisikolo sabucala. Ngenxa yokungaqondani okuthile, ugxa wakhe wasemsebenzini, wamthuka phambi kwabafundi. UKyle uthi, “kwafuneka ndizibambe ukuze lingagculelwa igama likaYehova.” UKyle uthi kwadlula iintsuku ezintlanu ecinga ngendlela anokuyisebenzisa ngayo imigaqo yeBhayibhile. Omnye ufumaneka kwabaseRoma 12:18 uthi: “Ukuba kunokwenzeka, zamani ngokusemandleni enu, ukuba noxolo nabantu bonke.” Wabhalela ugxa wakhe ngekhompyutha ecela uxolo ngokuba beye baxambulisana. UKyle wacela ukuthetha nogxa wakhe emva komsebenzi ukuze balungise oko kungavisisani. Emva kokuba beye bathetha, ugxa kaKyle wathamba waza wayincoma indlela ayisingathe ngobulumko ngayo uKyle loo ngxabano. Wathi kuKyle, “imele ukuba le ndlela yokulungisa ingxabano wayifundiswa lunqulo lwakho,” waza wamanga xa besahlukana. Sisiphi isigqibo afikelela kuso? “Asinakuze senze impazamo xa sisebenzisa imigaqo yeBhayibhile.”

[Umfanekiso okwiphepha 4, 5]

Abasebenzi abaninzi bavakalelwa kukuba akusekho yabo

[Inkcazelo]

Japan Information Center, Consulate General of Japan in NY

[Inkcazelo Ngomfanekiso okwiphepha 8]

Globe: NASA photo