Ukubethana Kwezimvo Ngomsebenzi
“Yinto emnandi gqitha ukwazi ukuba sisenomsebenzi esimele siwenze.”—UKatherine Mansfield, umbhali (1888-1923).
NGABA unale mbono ichazwe ngasentla ngomsebenzi? Uwujonga njani umsebenzi? Ngaba uvakalelwa kukuba umsebenzi ngumsina ndozele obambezela ulonwabo lweempelaveki? Okanye ngaba ulikhoboka lomsebenzi?
Inkoliso yabantu, ichitha ixesha elininzi emsebenzini. Umsebenzi esiwenzayo unokugqiba ngendawo esihlala kuyo nangohlobo lobomi esibuphilayo. Abantu abaninzi basebenza ukususela ebutsheni babo de baye kudla umhlala-phantsi. Abanye bethu bafumana ulwaneliseko olukhulu emsebenzini. Kwabanye ukubaluleka komsebenzi kuxhomekeke kwimali abahlawulwa yona ngawo okanye udumo oza nalo, ngoxa abanye bewujonga njengento yokuhambisa ixesha okanye inkcitha xesha.
Abanye basebenzela ukuba bakwazi ukuziphilisa, abanye baphilela umsebenzi; abanye bade bafe besebenza okanye bafele emsebenzini. Ngokomzekelo, ngokwengxelo yakutshanje ekhutshwe ziZizwe Ezimanyeneyo, umsebenzi unkqenkqeza phambili ngokubangela iintlungu nokufa kwabantu “kuneemfazwe okanye iziyobisi nokusetyenziswa kwakubi kotywala zidibene.” Ligqabaza ngalo mbandela iphephandaba laseLondon iThe Guardian lathi: “Bangaphezu kwezigidi ezibini abantu ababulawa ziingozi okanye zizifo ezinxulumene nomsebenzi nyaka ngamnye . . . Ukuchanabeka eluthulini, kwimichiza, kwingxolo nemitha yamachiza [kubangela] umhlaza, isifo sentliziyo nestroke.” Ukusetyenziswa kwabantwana nokusetyenziswa ngebhaxa zezinye zeemeko ezimbi ekusetyenzwa phantsi kwazo namhlanje.
Ukongezelela koko, kukho oko isazi ngengqondo uSteven Berglas sikubiza ngokuba “yintlekele yokudinwa kwengqondo.” Uchaza imeko yomntu oye wafikelela kwelona nqwanqwa liphezulu emsebenzini wakhe suke emva koko abe “noloyiko, anxunguphale, aphelelwe lithemba okanye adandatheke ezo zinto zimenza avakalelwe kukuba wenza umsebenzi angenakuze awuyeke okanye afumane ulwaneliseko kuwo.”
Ukukhuthala Nokuba Likhoboka Lomsebenzi
Kweli hlabathi linabantu abasebenza ixesha elide, kuhle ukwazi umahluko phakathi komntu okhutheleyo nolikhoboka lomsebenzi. Amakhoboka omsebenzi amaninzi ajonga indawo yomsebenzi njengendawo yokuzikhusela ezingozini, nakwihlabathi eliguquguqukayo; ngoxa abantu abakhutheleyo umsebenzi bewujonga njengento ebalulekileyo bade maxa wambi bawujonge njengembopheleleko. Amakhoboka omsebenzi avumela umsebenzi ukuba ube yeyona nto iphambili ebomini bawo; abantu abakhutheleyo bayalazi ixesha lokucima ikhompyutha, lokunikela ingqalelo kwezinye izinto, ngokomzekelo njengokubakho xa kukhunjulwa umhla womtshato. Amakhoboka omsebenzi ayaneliseka ngokweemvakalelo xa esebenza kakhulu aze akhuthazeke; ngoxa abantu abakhutheleyo bengavakalelwa ngaloo ndlela.
Abantu bale mihla benza kube nzima ukwahlula phakathi kwezi ndidi zimbini zabantu kuba bakhuthaza isimo sengqondo sokuba likhoboka lomsebenzi. Iimodem, iicell phone, neepager zenza ungacaci umahluko xa umntu esemsebenzini naxa esekhaya. Xa abantu benokusebenza naphi na okanye nanini na, baye basebenzele ukuzibulala.
Basabela njani abanye abantu kwimeko engentle ngolo hlobo? Izazi ngezentlalo ziye zaphawula ukuba abantu abasebenza kakhulu nabacinezelekileyo banomkhwa wokuvuba nje bedibanisa izinto zokomoya nezinto zomsebenzi. ISan Francisco Examiner iye yanikela ingxelo yokuba “ukuxutywa kwezinto zokomoya nomsebenzi yinto esele ithande ukuxhaphaka.”
Ingxelo ephathelele iSilicon Valley, umzi-mveliso wezinto zobugcisa waseUnited States, ibonisa ukuba: “Xa kubalwa inani leemoto ezimisa kulo mzi-mveliso zimbalwa xa zithelekiswa nezo zimisa kwindawo ekufundelwa kuyo iBhayibhile ngamarhatya.” Enoba yintoni unobangela woko, abantu abaninzi ehlabathini baye bafumanisa ukuba iBhayibhile iye yabanceda kwindlela abawujonga ngayo umsebenzi, nto leyo eye yaphumela ekubeni babe nembono elungelelene ngakumbi ngobomi.
Ingasinceda njani iBhayibhile sibe nembono elungeleleneyo ngomsebenzi? Ngaba ikhona imigaqo yeZibhalo enokusinceda simelane neemeko ekusetyenzwa phantsi kwazo namhlanje? Inqaku elilandelayo liza kuxubusha le mibuzo.