ISikolo SaseGiliyadi—Iminyaka Engama-60 Yokuqeqeshwa Kwabavangeli Basemazweni
“NGENXA yokuyifundisisa ngokunzulu iBhayibhile, siye sasondela ngakumbi kuYehova saza safunda okungakumbi ngentlangano yakhe. Oku kwasenza sasilungela ngakumbi isabelo sethu sasemazweni.” Le yindlela omnye wabaphumeleleyo kwiklasi yokuqala awazichaza ngayo izifundo zeSikolo seBhayibhile seWatchtower saseGiliyadi. Ukususela ekusekweni kwaso iminyaka engama-60 eyadlulayo, iSikolo saseGiliyadi besisoloko sithumela abavangeli basemazweni kwamanye amazwe. NgoMatshi 8, 2003, ucwangciso lokuthwesa izidanga kwabo baphumelele kwiklasi ye-114 lwaqhutyelwa kwiZiko Lemfundo leWatchtower ePatterson, eNew York. Abantu abangama-6 404 ababehlanganisene kwiholo nakwiindawo ezaziqhagamshelwe ngomabonwakude baluphulaphula ngenyameko olu cwangciso, olwaluneentetho, udliwano-ndlebe neengxubusho.
UTheodore Jaracz, ilungu leQumrhu Elilawulayo, wayengusihlalo. Kumazwi akhe okuvula wakhankanya ukuba abantu ababelapho babesuka kumazwe ngamazwe, iindwendwe ezivela eAsia, eCaribbean, kuMbindi naseMzantsi Merika naseYurophu. Ethetha ngokusekelwe kweyesi-2 kuTimoti 4:5, uMzalwan’ uJaracz wagxininisa owona msebenzi uyintloko womvangeli wasemazweni oqeqeshwe eGiliyadi—‘ukwenza umsebenzi womvangeli.’ Abavangeli basemazweni banikela ubungqina ngenyaniso ngokufundisa abantu iBhayibhile.
Abafundi Bafumana Uqeqesho Lokugqibela
Eqalisa intetho yokuqala kungcelele lweentetho ezimfutshane, uJohn Larson, ilungu leKomiti yeSebe laseUnited States, wathetha ngomxholo owomeleza ukholo othi “Ukuba UThixo Ungakuthi, Ngubani Na Oya Kuba Nxamnye Nathi?” (Roma 8:31) Esi sithethi sachaza isizathu esisekelwe eBhayibhileni sokuba aba bafundi bafanele bathembele ngokupheleleyo kumandla kaYehova ukuze abancede bakwazi ukoyisa nayiphi na imiqobo abanokujamelana nayo kwizabelo zabo. Esebenzisa amaRoma 8:38, 39, uMzalwan’ uLarson wabongoza aba bafundi esithi: “Khaninqumame nje kancinane, nize nicinge ngamandla uThixo aninika wona, yaye khumbulani ukuba akukho nto enokuphelisa umdla uYehova anawo kuni.”
Kwandula ke kwalandela uGuy Pierce, ilungu leQumrhu Elilawulayo. Wathetha ngomxholo othi “Gcinani Amehlo Enu Enoyolo!” (Luka 10:23) Wacacisa ukuba ulonwabo lokwenene luquka ukwazi uYehova nokuqonda injongo yakhe yangonaphakade kwanokubona indlela iziprofeto zeBhayibhile ezizaliseka ngayo. Naphi na apho baya khona, aba bafundi banokuhlala bonwabile ngokwenene ngokugcina amehlo abo enoyolo. UMzalwan’ uPierce wakhuthaza aba baphumeleleyo ukuba bacamngce ngokunzulu ngokulunga kukaYehova baze bagcine iingqondo neentliziyo zabo zicinga ngokwenza ukuthanda Kwakhe. (INdumiso 77:12) Ngokuba nesimo sengqondo esihle, abo baphumeleleyo banokuzoyisa naziphi na iingxaki abanokujamelana nazo.
Yandula ke le klasi yafumana amazwi okugqibela alukhuthazo avela kubaqeqeshi ababini ababebafundisa imihla ngemihla. Kumxholo wentetho yakhe, uLawrence Bowen wabuza umbuzo othi “Ngaba Ufuna Uzuko?” Inkoliso yabantu icinga ngozuko njengokunconywa, ukubekwa ezimbekweni nokuba ngabantu abakhethekileyo. Noko ke, umdumisi uAsafu waluqonda olona zuko lokwenene—indlela ekuxabiseke kakhulu ngayo ukuba nolwalamano oluhle noYehova. (INdumiso 73:24, 25) Abafundi abaphumeleleyo bakhuthazwa ukuba bahlale benolwalamano olusenyongweni noYehova ngokuqhubeka benofundisiso olunzulu lweBhayibhile. Iingelosi “zinqwenela ukuqondela” kwiinkcukacha eziphathelele nokuzaliseka kwenjongo kaYehova ngoKristu. (1 Petros 1:12) Zifuna ukufunda kangangoko zinako ngoYise ukuze zikwazi ukubonakalisa uzuko lwakhe. Sandula ke isithethi sabongoza aba bafundi ukuba bazukise uYehova kwizabelo zabo zobuvangeli basemazweni ngokunceda abanye bafumane ubuncwane obuxabiseke kakhulu.
Unobhala wesi sikolo, uWallace Liverance waqukumbela olu ngcelele lweentetho ngomxholo othi “Thetha Ngobulumko BukaThixo Kwimfihlelo Engcwele.” (1 Korinte 2:7) Buyintoni obu bulumko bukaThixo umpostile uPawulos awathetha ngabo kumsebenzi wakhe wobuvangeli basemazweni? Yindlela kaYehova enobulumko nenamandla yokuzisa uxolo nomanyano kwindalo iphela. Obu bulumko bungoYesu. Kunokushumayela ngendlela yokuphucula intlalo, uPawulos wanceda abantu babone indlela uThixo aza kuyilungisa ngayo imiphumo yesono sika-Adam. (Efese 3:8, 9) Isithethi sabongoza abo babephulaphule sisithi: “Ilungelo lakho lokukhonza lisebenzise njengoPawulos, owasigqala isabelo sakhe sobuvangeli basemazweni njengethuba lokunceda abantu babone indlela uYehova, aya kuyifeza ngayo injongo yakhe.”
Emva koku, uMark Noumair, omnye umqeqeshi waseGiliyadi, waba nengxubusho enehlombe neqela labafundi baloo klasi. Umxholo owawusithi “Ukufundisisa Ilizwi LikaThixo Kuvelisa Abavakalisi Abanenzondelelo” wawugxininisa amazwi kaPawulos akumaRoma 10:10. Le klasi yabalisa amava asentsimini ngoxa ibisafunda kwesi sikolo. Amava ayo abonisa ukuba xa sifundisisa size sicamngce ngeLizwi likaThixo, izinto ezintle eziphathelele uYehova uThixo noBukumkani bakhe ziya kuhlala zisezintliziyweni zethu yaye siya kuthetha ngazo kwabanye. Ebudeni beenyanga ezintlanu behleli kwiZiko Lemfundo leWatchtower, aba bafundi baqalisa izifundo zeBhayibhile ezingaphezu kwama-30 nabantu abanomdla kwintsimi esetyenzwa rhoqo yamabandla akufuphi.
Abaqolileyo Banikela Amacebiso Asengqiqweni
Ebudeni bezifundo zabo, aba bafundi bazuza kunxulumano ababenalo namalungu entsapho yaseBheteli yaseUnited States. Amalungu esebe uRobert Ciranko noRobert P. Johnson baba nodliwano-ndlebe nabantu abaliqela abebekhonza uYehova ngokuthembeka kangangexesha elide, kuquka nabaveleli abahambahambayo ababesandul’ ukuqeqeshwa kwiZiko Lemfundo leWatchtower. Bonke abo ababekolu dliwano-ndlebe babephumelele eGiliyadi yaye babekhe bangabavangeli basemazweni. Kwakubomeleza abafundi neentsapho zabo kunye nabahlobo babo ukuva amazwi obulumko avela kula madoda aqolileyo ngokomoya.
La madoda acebisa ngelithi: “Zigcine uxakekile kangangoko kunokwenzeka kubulungiseleli nasebandleni.” “Ungazicingeli ngokugqithiseleyo. Hlala ucinga ngenjongo yakho njengomvangeli wasemazweni, uze uyenze indawo owabelwe kuyo ibe likhaya lakho.” Amanye amacebiso aluncedo abonisa indlela uqeqesho lwaseGiliyadi olumxhobisela ngayo umlungiseleli umsebenzi olungileyo, enoba wabelwe phi na. Nanga amanye awo: “Siye safunda ukusebenzisana.” “Esi sikolo siye sasinceda sazamkela iindlela ezintsha zokuphila.” “Siye safundiswa ukusebenzisa iZibhalo ngendlela eyahlukileyo.”
UJohn E. Barr, osele elilungu leQumrhu Elilawulayo kangangexesha elide, wanikela intetho engumxholo kolu cwangciso. Umxholo wakhe osekelwe eZibhalweni wawusithi “Intlokoma Yabo Yaphuma Yaya Kuwo Wonke Umhlaba.” (Roma 10:18) Wabuza lo mbuzo, Ngaba abantu bakaThixo baye bakwazi ukwenza lo msebenzi unzima namhlanje? Kunjalo kanye! Ukususela ngowe-1881, abafundi bephephancwadi IMboniselo babebuzwa: “Ngaba uyashumayela?” Sandula ke isithethi sabakhumbuza bonke ababekho ngesicelo esenziwa kwindibano yowe-1922 eCedar Point, eOhio, eUnited States esithi: “Mbhengezeni uKumkani noBukumkani bakhe!” Ekuhambeni kwexesha, inzondelelo yabakhonzi bakaThixo abathembekileyo yabashukumisela ukuba bashumayele iinyaniso ezintle zoBukumkani kuzo zonke iintlanga. Ngeencwadi nangamazwi, iindaba ezilungileyo ziye zafikelela kuzo zonke iindawo—konke oku kuyamzukisa kuze kumdumise uYehova. Equkumbela ngendlela echukumisayo, uMzalwan’ uBarr wabongoza aba baphumeleleyo ukuba bacinge ngeentsikelelo abanazo, esithi: “Suku ngalunye, xa uthandaza kuYehova ukwisabelo sakho, mbulele ngokusuka entliziyweni ngenxalenye oye wanayo ekuzalisekiseni la mazwi athi, ‘Intlokoma yabo yaphuma yaya kuwo wonke umhlaba.’”
Emva kwale ntetho, kwadluliselwa imibuliso, yaye usihlalo wanika ngamnye waba baphumeleleyo idiploma. Emva koko, engaqinisekanga enoba avuye okanye abe lusizi, ummeli wale klasi wafunda isigqibo esichukumisayo esiya kwiQumrhu Elilawulayo nentsapho yaseBheteli, echaza indlela aba baphumeleleyo bazimisele ngayo ukudumisa uYehova “ukususela ngoku kuse phambili nokusa kwixesha elingenammiselo.”—INdumiso 115:18.
Sithandazela ukuba aba baphumeleleyo bangaqhelana namakhaya abo amatsha baze bancedise ekuhambiseleni phambili umsebenzi wokushumayela emhlabeni wonke, kanye njengabo abaye benjenjalo ngaphambi kwabo kangangeminyaka engama-60 eyadlulayo.
[Ibhokisi ekwiphepha 23]
INKCAZELO ENGABAFUNDI
Inani lamazwe abavela kuwo: 12
Inani lamazwe ababelwe kuwo: 16
Inani labafundi: 48
Umlinganiselo wobudala: 34,4
Umlinganiselo weminyaka besenyanisweni: 17,6
Umlinganiselo weminyaka bekwinkonzo yexesha elizeleyo: 13,5
[Umfanekiso okwiphepha 24]
Iklasi Ye-114 Yabaphumelele KwiSikolo SeBhayibhile SeWatchtower SaseGiliyadi
Kuludwe olungezantsi, kuqalwa ukusuka kuluhlu olungaphambili ukuya kolungasemva, yaye amagama adweliswe ukusuka ngasekhohlo ukuya ngasekunene kuluhlu ngalunye.
(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.