Intlungu Ebangelwa Kukufa
“INTOMBAZANA ENEMINYAKA EMITHANDATHU UBUDALA IZIBULELE.” Lo mxholo wawuthetha ngokufa kwentombazana egama linguJackie. Unina wayesandul’ ukubulawa sisifo esinganyangekiyo. Ngaphambi kokuba uJackie azinyathelise ngololiwe, waxelela abantwana bakowabo ukuba ufuna ukuba ‘yingelosi ukuze akwazi ukuya kuhlala nonina.’
Xa wayeneminyaka eli-18 ubudala uIan waya kubuza kumfundisi wakhe isizathu sokuba uyise abulawe ngumhlaza. Umfundisi wamxelela ukuba uyise wayelungile, ngoko uThixo ebefuna ukuba aye kuhlala naye ezulwini. Wathi akuva oko, uIan akabi safuna kuva kwanto ngoThixo okhohlakele ngolo hlobo. Ekubeni oko kwenza wabona ubomi njengento engenanjongo, uIan wagqiba ekubeni aphilele ukuzonwabisa. Ngenxa yoko, waba likhoboka lotywala, leziyobisi nokuziphatha okubi. Ubomi bakhe baya buwohloka.
“Abaphilayo Bayazi Ukuba Baya Kufa”
Zozibini ezi ziganeko zibuhlungu ziyenza icace indlela ukufa okunokonakalisa ngayo ubomi babantu, ngakumbi xa kufike ngequbuliso. Yinyaniso ukuba, bonke abantu bayawaqonda amazwi eBhayibhile athi: “Abaphilayo bayazi ukuba baya kufa.” (INtshumayeli 9:5) Noko ke, abaninzi bakhetha ukuwabetha ngoyaba. Kuthekani ngawe? Asinalo kwaphela ixesha yaye zininzi izinto ezifuna ingqalelo yethu kangangokuba sinokude singafuni nokucinga ngokufa.
IThe World Book Encyclopedia ithi: “Inkoliso yabantu yoyika ukufa kangangokuba ayifuni nokucinga ngako.” Ukanti, izinto ezifana nengozi yemoto okanye ukugula gqitha zinokusenza sicingisise ngako. Umngcwabo womhlobo okanye wesalamane unokusenza sicinge ngentlungu elindelwe luluntu lonke.
Sekunjalo, abantu abazilileyo basoloko besithi, “Ubomi bumele buqhubeke.” Ibe ngokwenene buyaqhubeka. Enyanisweni, ubomi bubonakala buqupha kangangokuba abantu bakhawuleza bajamelane neengxaki zokwaluphala. Kuthi kwakuba njalo kubonakale kusemnyango ukufa. Mininzi imingcwabo ekufuneka uye kuyo uze unyamezele intlungu yokufelwa ngoontanga bakho. Abantu abaninzi abalupheleyo bahlala bezibuza oku: “Liya kufika nini elam ithuba lokufa?”
Umbuzo Otshis’ Ibunzi
Nakuba engekho umntu okuphikayo ukufa, owona mbuzo utshis’ ibunzi ngowokuba kwenzeka ntoni emntwini xa efile. Kangangendlela ezininzi nezingqubana ngayo iimpendulo zalo mbuzo, umntu othandabuzayo angazibona njengokufun’ isity’ ebumnyameni. Umntu onengqiqo unokugqiba ngelithi ekubeni “uphila kube kanye,” umele uzonwabise kangangoko kunokwenzeka.
Ngokwahlukileyo koko, abanye abafuni kuyikholelwa into yokuba ukufa kuthetha isiphelo sento yonke. Sekunjalo, abazi ukuba kwenzeka ntoni emva kokufa. Abanye bacinga ukuba ubomi buyaqhubeka kwindawo ethile yolonwabo lukanaphakade, ngoxa abanye becinga ukuba baya kuphinda bazalwe ukuze baphile kwakhona kwixa elizayo babe ngabantu abahlukileyo kwaba bangabo ngoku.
Umbuzo ohlal’ unkenteza engqondweni yabo bafelweyo ngulo, “Baphi abafileyo?” Kwiminyaka eliqela eyadlulayo, iqela elithile lebhola ekhatywayo lalisiya kudlala xa ikhombi yalo yantlithwa yilori, yaza yaphum’ endleleni. Elo qela lafelwa ngamalungu alo amahlanu. Kususela loo mini wafa ngayo kuloo ngozi unyana wakhe, omnye umama laba ngathi litshon’ emini akabi sayazi eyona nto ayiphilelayo. Uhlala efun’ ukwazi apho akhoyo unyana wakhe. Usoloko esiya kwingcwaba lakhe aze akhwaze ethetha naye kangangeeyure. Uthi: “Andikholelwa tu ukuba akukho nto yenzekayo emva kokufa, nto nje andiqinisekanga.”
Kucacile ukuba, indlela esikujonga ngayo ukufa inokubuchaphazela ubomi bethu. Ngenxa yendlela abasabela ngayo abantu xa befelwe, kuphakama imibuzo eliqela. Khawucinge indlela onokuyiphendula ngayo. Ngaba simele sikuphose kwelokulibala ukufa siqhubeke nobomi? Ngaba simele sivumele intlungu yokufa yonakalise ubomi bethu? Ngaba isihlobo esifelweyo simele sihlale sizibuza ngendawo akuyo lowo ufileyo? Ngaba ukufa kumele kuhlale kuyintsumantsumane?