Ibali Lobomi

Ndanyamezela Njengejoni LikaKristu

KUBALISA UYURII KAPTOLA

“Ngoku ndeyisekile ukuba unalo ngokwenene ukholo!” La mazwi athethwa ngumntu endandingamlindelanga—athethwa lipolisa lomkhosi waseSoviet—yaye andikhuthaza kanye ngexesha endandiwafuna ngalo. Ndandijamelene nokugwetywa iminyaka eliqela entolongweni yaye ndambongoza uYehova ukuba andixhase. Eli xesha lalinzima gqitha yaye kwakufuneka ndinyamezele.

NDAZALWA ngo-Oktobha 19, 1962 ndaza ndakhulela kwintshona yeUkraine. Kwangaloo nyaka, utata owayenguYurii naye wadibana namaNgqina kaYehova. Kungekudala waba ngumnquli kaYehova wokuqala kwidolophana yethu. Umsebenzi wakhe wabhaqwa ngabasemagunyeni ababewachasile amaNgqina kaYehova.

Noko ke, abamelwane abaliqela babebahlonela abazali bam ngenxa yokuba babeneempawu zamaKristu yaye babexhalabele nabanye. Abazali bam benza konke okusemandleni ukuze babethelele uthando ngoThixo kum nakoodadewethu abathathu yaye le nto yandinceda ndakwazi ukujamelana neengxaki eziliqela esikolweni. Enye ingxaki yavela xa bonke abantwana besikolo kwakufuneka banxibe ibheji ebonisa ukuba bangamalungu eLenin’s October Children. Ngenxa yokuba ngundilele kwam njengomKristu andizange ndiyinxibe ibheji yaye ndandahlukile.—Yohane 6:15; 17:16.

Kamva xa ndandifunda ibanga lokuqala, bonke abantwana besikolo kwakufuneka babe ngamalungu amaKomanisi abizwa ngokuba ziiYoung Pioneers. Ngenye imini iklasi yethu yakhutshwa phandle ukuze sibhaliswe. Ndandifile kukoyika, ndilindele ukugculelwa nokuthukwa. Bonke abantwana besikolo ngaphandle kwam beza nezikhafu zabo ezibomvu zePioneer, yaye bonke bema ngaphambili ukuze babonwe ngootitshala nangabo bafunda kumabanga aphakamileyo. Xa abafundi bamabanga aphakamileyo baxelelwa ukuba basinxibise izikhafu zethu, ndatshonisa intloko ndaza ndajonga phantsi, ndinethemba lokuba akukho mntu uza kundibona.

Sasiwa Kwiintolongo Ezikwanti

Xa ndandineminyaka eli-18 ubudala, ndagwetywa iminyaka emithathu ngenxa yokuba ngundilele njengomKristu. (Isaya 2:4) Kunyaka wam wokuqala ndandikwidolophu yaseTrudovoye, kwiSithili saseVinnitskaya, eUkraine. Ngoxa ndandilapho ndadibana namanye amaNgqina kaYehova amalunga nama-30. Sabiwa saba ngababini kwiindawo esasisebenza kuzo, kuba abasemagunyeni babengafuni sibe ndawonye.

NgoAgasti 1982, mna noEduard—elinye iNgqina—safakwa kumakhareji kaloliwe saza sathunyelwa kumantla eeNtaba zeUral kunye namanye amabanjwa. Sanyamezela ubushushu nokuxinana kangangeentsuku ezisibhozo de saya kufika kwiNtolongo yaseSolikamsk, kwiSithili sasePermskaya. Mna noEduard savalelwa kwizisele ezahlukeneyo. Emva kweeveki ezimbini, ndasiwa emantla kwidolophana yaseVels, kummandla waseKrasnovishersky.

Imoto yethu yafika ezinzulwini zobusuku, yaye kwakumnyama thsu. Kumnyama kunjalo, ipolisa lathi masiwele umlambo ngesikhephe. Sasingawuboni umlambo kwanesikhephe eso! Sekunjalo, safunisela de sasifumana isikhephe, nangona sasifile kukoyika, sakwazi ukuwela umlambo. Sathi sakufika elunxwemeni sakhawuleza sasibona isibane esasibonakala endulini, apho safumana iintente ezimbalwa. Eli yayiza kuba likhaya lethu elitsha. Ndandihlala kwintente eyayinkulu noko namanye amabanjwa amalunga nama-30. Ebusika sasinyamezela amaqondo obushushu ayesehla abe ngaphantsi kwama-40 ngokukaCelsius, yaye yayingafudumali intente. Umsebenzi wamabanjwa endandihlala nawo yayikukugawula imithi, kodwa mna ndandisakha izindlu zamabanjwa.

Ukudla Kokomoya Kufikelela Kwanti

Yayindim kuphela iNgqina kulo mmandla; sekunjalo uYehova akazange andilahle. Ngenye imini ndafikelwa yipasile eyayivela kumama, owayesahlala kwintshona yeUkraine. Xa omnye umlindi wavula le pasile, wabona iBhayibhile encinane. Wayithabatha waza wamana eyityhila. Ndazama ukucinga into eyayiza kwenza ukuba angabuthathi obu butyebi bokomoya. “Yintoni le?” wabuza rhabaxa umlindi. Ngaphambi kokuba ndicinge impendulo, omnye umphathi owayemi kufutshane wathi: “Sisichazi-magama eso.” Yaye andizange nditsho elibi nelihle. (INtshumayeli 3:7) Umphathi wayigqogqa yonke loo pasile waza wandinika yona kunye neBhayibhile yam exabisekileyo. Ndandivuya gqitha kangangokuba ndampha iinqoba ezazikuloo pasile. Ukufumana kwam le pasile ndandisazi ukuba uYehova wayengandilibalanga. Wandinceda gqitha wanyamekela neentswelo zam zokomoya.—Hebhere 13:5.

Ukushumayela Ngaphandle Kokuyekelela

Kwiinyanga ezimbalwa kamva, ndamangaliswa kukufumana ileta eyayivela komnye umzalwana ongumKristu owayesentolongweni kumgama oziikhilomitha ezingama-400. Wandicela ukuba ndikhangele enye indoda eyayibonise umdla eyayisenokuba ikule nkampu ndandikuyo ngoku. Yayingebobulumko ukubhala ileta enjalo ngenxa yokuba iileta zethu zazihlolisiswa. Ayimangalisi into yokuba elinye ipolisa landibizela eofisini laza landiyala kabukhali ukuba ndingashumayeli. Lathi mandityobele uxwebhu olwalusithi ndiza kuyeka ukwabelana nabanye ngeenkolelo zam. Ndaphendula ndathi andisazi isizathu sokuba kufuneka ndityobele uxwebhu olunjalo, ekubeni wonke umntu wayesazi ukuba ndingomnye wamaNgqina kaYehova. Ndathi amanye amabanjwa afuna ukwazi ukuba ndibanjelwe ntoni na. Ndithini kuwo? (IZenzo 4:20) Eli polisa laqonda ukuba alikwazi ukundigrogrisa, ngoko lagqiba kwelokuba ndithunyelwe kwenye inkampu.

Ndathunyelwa kwidolophana yaseVaya malunga neekhilomitha ezingama-200 ukusuka apho. Abaphathi balapho babekuhlonela ukuma kwam njengomKristu yaye abazange bandithumele kumsebenzi wamajoni—okokuqala ndaba ngumchweli, emva koko ndaba ligcisa kwezombane. Kodwa le misebenzi yayinolwayo ucelomngeni. Ngesinye isihlandlo, ndaxelelwa ukuba ndithabathe izixhobo zam ndize ndiye kwenye iholo yaloo dolophana. Ukufika kwam amajoni avuya xa endibona. Ayenengxaki engakwazi ukulayita izibane ezikhanyisa imifuziselo yasemkhosini. Ayefuna ndiwancede ndizilungise ngenxa yokuba ayelungiselela umbhiyozo owenziwa minyaka le weRed Army Day. Emva kokuba ndiwuthandazele lo mbandela, ndawaxelela ukuba andinakukwazi ukwenza umsebenzi onjalo. Ndawanika izixhobo zokusebenza ndaza ndahamba. Axelela isekela lomphathi, yaye yandimangalisa into yokuba aphulaphule zonke izikhalazo ngam aze athi: “Ndiyamhlonela ngenxa yaloo nto. Uyindoda enomthetho.”

Ukhuthazo Olwaluvela Kumthombo Ongalindelekanga

NgoJuni 8, 1984, emva kokuvalelwa iminyaka emithathu, ndakhululwa. Ndakufika eUkraine, kwafuneka ndibhalise emkhosini njengomntu owayelibanjwa ngaphambili. Abasemagunyeni bandixelela ukuba ndiza kuphinda ndigwetywe emva kweenyanga ezintandathu, ngoko kubhetele ndihambe kweso sixeko. Ngoko ndahamba eUkraine ekugqibeleni ndafumana umsebenzi eLatvia. Ndahlala ithuba apho ndishumayela yaye ndinxulumana neqela elincinane lamaNgqina awayehlala kwikomkhulu lalapho eRiga nakufuphi apho. Noko ke, emva konyaka nje omnye ndaphinda ndabizwa ukuba ndiye kungenelela inkonzo yasemkhosini. Kwiofisi yokubhalisa ndalixelela ipolisa ukuba ndandiyalile inkonzo yasemkhosini. Ekuphenduleni lathi: “Ngaba uyayazi kanye kanye le nto uyenzayo? Siza kubona ukuba uza kuthini kumphathi-mkhosi!”

Lahamba nam landisa kwelinye igumbi elikumgangatho wesibini apho umphathi-mkhosi wayehleli etafileni enkulu. Wandiphulaphula ngenyameko njengoko ndandichaza waza wandixelela ukuba ndisenalo ixesha lokuba ndisihlolisise kwakhona isigqibo sam ngaphambi kokuba ndiye kwikomiti yokubhalisa. Ukuphuma kwethu kwiofisi yomphathi-mkhosi, ipolisa elalikhe landithuka lathi: “Ngoku ndeyisekile ukuba unalo ngokwenene ukholo!” Xa ndavela phambi kwekomiti yasemkhosini, ndaphinda laa nto yokuba ngundilele kwam, emva koko kwathiwa mandihambe.”

Ngelo xesha ndandihlala ehostele. Ngenye ingokuhlwa, ndeva kunkqonkqozwa emnyango. Ndavula ndaza ndafumanisa ukuba yenye indoda enxibe isuti iphethe ibrifkheyisi. Yathi xa izichaza: “Ndivela kwiKomiti Yezokhuseleko. Ndiyazi ukuba unengxaki yaye uza kugwetywa entolongweni.” Ndaphendula ndathi: “Ewe kunjalo.” Le ndoda yaqhubeka yathi: “Singakunceda ukuba uyavuma ukusisebenzela.” Ndathi: “Ayinakwenzeka loo nto. Ndiza kuhlala ndinyanisekile kwiinkolelo zam zobuKristu.” Ayizange iphinde indicenge, yasuka yahamba.

Ndabuyela Entolongweni, Ndashumayela

NgoAgasti 26, 1986, iNkundla Ephakamileyo yaseRiga yandigweba iminyaka emine yomsebenzi onzima, ndasiwa kwiNtolongo yaseRiga. Ndafakwa kwisisele esikhulu kunye namanye amabanjwa angama-40, yaye ndazama ukushumayela kuwo onke. Amanye ayesithi ayakholelwa kubukho bukaThixo; amanye ayesuka ahleke. Ndabona ukuba la madoda angamaqela, yaye emva kweeveki ezimbini iinkokeli zawo zandixelela ukuba andivumelekanga ukuba ndishumayele, ekubeni ndandingahambisani nemithetho yazo. Ndazixelela ukuba ndandibanjelwe kanye eso sizathu—ndandiphila ngemithetho eyahlukileyo.

Ndaqhubeka ndishumayela ngokufihlakeleyo, yaye xa ndafumana abantu abanomdla kwizinto zokomoya, ndafundisisa iBhayibhile kunye nabane kubo. Xa ndandixubusha nabo, babezibhala phantsi iimfundiso ezisisiseko zeBhayibhile kwincwadana yabo. Kwiinyanga ezimbalwa kamva ndathunyelwa kwenye inkampu ekwakungqongqo gqitha kuyo kwidolophu yaseValmiera apho ndasebenza njengegcisa lezombane. Apho ndakwazi ukufundisisa iBhayibhile nelinye igcisa lezombane elaba liNgqina likaYehova emva kweminyaka emine.

NgoMatshi 24, 1988, ndasiwa kwinkampu enqabisekileyo kufuphi nenye inkampu. Le yaba yintsikelelo ngokwenene ekubeni yandinceda ndakwazi ukukhululeka. Ndabelwa ukuba ndisebenze kwiziza zokwakha eziliqela, yaye ndandiwaphaphela amathuba okushumayela. Ndandingasoloko ndisenkampini, ndandishumayela kude kube ngorhatya, yaye andizange ndifumane ngxaki xa ndibuyela enkampini.

UYehova wayisikelela imigudu yam. Kwakukho amaNgqina ambalwa awayehlala kufuphi nenkampu, kodwa edolophini kwakukho elinye kuphela uVilma Krūmina—udade owayesele ekhulile. Mna nodade Krūmina saqhuba izifundo zeBhayibhile eziliqela nabantu abaselula. Maxa wambi abazalwana noodade babesuka eRiga ukuze babe kunye nathi kubulungiseleli, yaye abanye oovulindlela abathe ngxi babevela naseLeningrad (ngoku eyiSt. Petersburg). UYehova wasinceda sakwazi ukuqalisa izifundo zeBhayibhile eziliqela, yaye kungekudala ndabhalisela inkonzo yobuvulindlela, ndichitha iiyure ezingama-90 kumsebenzi wokushumayela nyanga nganye.

NgoAprili 7, 1990, kwachotshelwa ityala lam kwiNkundla yaBantu yaseValmiera. Xa lalichotshelwe ndabona ukuba ndiyamazi umtshutshisi. Yayingumfana endandikhe ndaxubusha naye iBhayibhile! Wandibona wancuma akatsho nelinjani. Ndisayikhumbula nanamhlanje into eyathethwa yijaji kum ngemini yetyala: “Yurii, isigqibo sokuba ufakwe entolongweni kwiminyaka emine eyadlulayo sasingekho semthethweni. Babengafanelanga ukukugweba.” Ndakhululeka ndingalindelanga!

Ijoni LikaKristu

NgoJuni 1990, kwakhona kwafuneka ndiye kwiofisi yokubhalisa ukuze ndifumane imvume yokuhlala eRiga. Ndaphinda ndangena kwakulaa ofisi yayinetafile ende, le ndandihleli kuyo kwiminyaka emine ngaphambili apho ndandixelele umphathi-mkhosi ukuba andinakuya emkhosini. Ngesi sihlandlo, waphakama wandibulisa, wandibamba ngesandla waza wathi: “Ilihlazo into yokuba kufuneke ujamelane nayo yonke le nto. Ndicela uxolo ngayo yonke into eyenzekileyo.”

Ndaphendula ndathi: “Ndilijoni likaKristu, yaye ndimele ndiphile ngokuvisisana nothumo lwam. Nawe ingakunceda iBhayibhile ukuba unandiphe oko uKristu akuthembise abalandeli bakhe—ubomi obonwabisayo nobungunaphakade.” (2 Timoti 2:3, 4) Umphathi-mkhosi waphendula: “Bendisandul’ ukuthenga iBhayibhile, ndiyayifunda ngoku.” Ndandiphethe incwadi ethi Unokuphila Ngonaphakade KwiParadisi Esemhlabeni.a Ndayivula kwisahluko esithetha ngemihla yokugqibela ndaza ndambonisa indlela isiprofeto seBhayibhile esinxulumene ngayo nexesha esiphila kulo. Enoxabiso olunzulu umphathi-mkhosi waphinda wandibamba ngesandla waza wandinqwenelela impumelelo emsebenzini wam.

Ngeli xesha intsimi yayisele imhlophe ilungele ukuvunwa eLatvia. (Yohane 4:35) Ngowe-1991, ndaba ngumdala webandla. Kwakukho abadala ababini kuphela kulo lonke elo lizwe! Emva konyaka ibandla laseLatvia lahlulwa laba ngamabandla amabini—kwelinye kuthethwa isiLatvia, kwelinye kuthethwa isiRashiya. Ndaba nelungelo lokukhonza kwibandla elithetha isiRashiya. Kwabakho ulwando kangangokuba kunyaka olandelayo ibandla lethu lahlulwa laba ngamabandla amathathu! Xa ndikhangela ngasemva licacile elokuba nguYehova owayesalathisela izimvu zakhe kwintlangano yakhe.

Ngowe-1998, ndacelwa ukuba ndibe nguvulindlela okhethekileyo eJelgava, kwidolophu emalunga neekhilomitha ezingama-40 kumzantsi-ntshona weRiga. Kwangaloo nyaka ndaba ngumntu wokuqala eLatvia ukumenyelwa kwiSikolo Sokuqeqesha Abalungiseleli esasiqhutywa ngesiRashiya eSolnechnoye, kufuphi naseSt. Petersburg, eRashiya. Ngoxa ndandisesikolweni, ndayibona indlela ekubaluleke ngayo ukuba sibathande abantu ukuze siphumelele kubulungiseleli. Eyona nto yandichukumisa ngakumbi ngaphezu kwezinto esasizifundiswa esikolweni, luthando nengqalelo esasiyinikwa yintsapho yaseBheteli nangootitshala bethu.

Kwenzeka into eyandivuyisa gqitha ebomini bam xa ndatshata noKarina ngowama-2001, udade othandekayo ongumKristu. UKarina waba kunye nam kwinkonzo ekhethekileyo yexesha elizeleyo, yaye yonke imihla ndiyakhuthazeka xa ndibona inkosikazi yam ibuya entsimini yonwabile. Eneneni, kuluvuyo ngokwenene ukukhonza uYehova. Amava abuhlungu endaba nawo ngaphantsi kolawulo lwamaKomanisi andifundisa ukumthemba ngokupheleleyo. Nakuphi na ukuzincama kubalulekile ukuba ubani ufuna ukuhlakulela ubuhlobo noYehova aze axhase ulongamo lwakhe. Ukunceda abanye bafunde ngoYehova kuye kwandinika injongo ebomini. Kuye kwalilungelo elingathethekiyo kum ukukhonza uYehova “njengejoni elihle likaKristu.”—2 Timoti 2:3.

[Umbhalo osemazantsi]

[Umfanekiso okwiphepha 10]

Ndagwetywa iminyaka emine ukuba ndisebenze nzima ngoxa ndandivalelwe kwiNtolongo yaseRiga

[Umfanekiso okwiphepha 12]

Ndikunye noKarina kubulungiseleli