Ukuvalelwa Etrongweni Zange Kundahlukanise NoYehova

Sabuyela eUkraine ngo-1966. Xa ndandina-4 ndikhumbula siyokubona utatomkhulu owayevalelwe etrongweni. Mna nomama sakhwela itreyini esuka eKryvyi Rih eUkraine, ekwitrongo eseMordovia ekumbindi Rashiya. Sahlala iiyure ezimbini notatomkhulu sigadiwe kodwa kwavunywa ukuba andifunqule.

Ndathembela NgoYehova Xa Ndandisesikolweni

Xa ndandikhula eUkraine, kwakusoloko kufuneka ndibonise ukuba ndimthembile uYehova. Ngokomzekelo, xa abantwana beqalisa isikolo kwakufuneka banxibe ibheji enobuso bukaLenin.a Emva kweminyaka embalwa, kwakuye kufuneke abantwana banxibe izikhafu ezibomvu emqaleni ezazibonisa ukuba bayamxhasa uLenin. Zange ndivume ukunxiba ezo zinto zazixhasa iipolitiki kuba ndandisazi ukuba uYehova ufuna sizinikele kuye ngokupheleleyo.

Abazali bam bandinceda ngokundicacisela isizathu sokuba singazixhasi izinto zepolitiki. Lento yandinceda ndakwazi ukwenza isigqibo sokuba ndihlale ndithembekile kuYehova. Baphinda bandikhuthaza ukuba ndizimisele esikolweni, ibe loo nto yayiza kuzukisa uYehova.

Ngenye imini esikolweni sethu kwaye kwafika umntu osuka kwimagazini ethi, Nauka i religiia (Isayensi Nokukhonza) ekhuthaza abantu ukuba bangakholelwa kuThixo. Ootitshala bam bandibeka ngaphambili ngoxa lo mntu wayecacisa ngale ncwadi ikhuthaza abantu ukuba bangakholelwa kuThixo.

Emva kokuba besicacisele, baye bandithatha bandisa ngasemva baza bacela loo nondaba ukuba athethe nam. Wandibuza ukuba ndikhonza phi, ndakhawuleza ndamphendula ndathi: “NdiliNgqina likaYehova.” Zange athethe nto kodwa wandibulela kuba ndandimamele ngoxa ebecacisa. Le nto yabacaphukisa kakhulu ootitshala bam.

Sathembela KuYehova Njengentsapho

Njengentsapho, sasimthembile uYehova ukuba uza kusinceda sikwazi ukuprinta iincwadi zeBhayibhile size sizihambise ebantwini. Utata yena wayekhonza njengomveleli wesiphaluka kumbindi Ukraine, etyelela amabandla namaqela alapho.

Ngenye imini ngoFebruwari 1978 kwiintsuku nje ezimbini ngaphambi kokuba kuzalwe ubhuti wam omncinci uPavlik—ndafika ekhaya iimpahla zithe saa zonke endlini. Amapolisa aye afika agqogqa ikhaya lethu azithatha zonke iincwadi zethu.

Ngemini elandelayo esikolweni, ootitshala babesijonge ngendlela engaqhelekanga sinobhuti wam omncinci uMykhailo. Babecinga ukuba abazali bethu ngabantu ababethuthela abantu baseMerika iindaba! Ekuhambeni kwexesha, ootitshala bethu baye babona ukuba lento babeyicinga ngathi yayingeyonyani. Abanye abantwana esasifunda nabo bade baba ngamaNgqina.

Ngo-1981, ikhaya lethu laphinda lagqogqwa. Nangona ndandingekabina-18, kwaye kwafuneka ndihambe notata notatomkhulu siye kwiofisi yomtshutshisi. Umcuphi owayelapho wazama ukundoyikisa esithi uza kundivalela etrongweni. Kwangaxeshanye, enye indoda eyayilapho inganxibanga yunifom yathi xa ndinokubaxelela yonke into ubomi babuza kuba bhetele. Omnye wayendoyikisa ngento ebuhlungu, omnye endithembisa ngento ebhetele. Kuba babefuna ndibancede bandikhumbuza ngexesha ekwakubanjwe ngalo utata, utatomkhulu nomalume. Amapolisa ayengayiqondi into yokuba lento ayendikhumbuza yona yandenza ndabona ukuba uYehova angakwazi ukundinceda ndikwazi ukunyamezela etrongweni.—Filipi 4:13.

Ndandimthembile UYehova Xa Ndandisetrongweni

Xa ndandineminyaka eyi-18 ndaye ndafumana ileta eyayisithi kufuneka ndiye emkhosini. Kuba ndandingafuni ukuya emkhosini ndaye ndavalelwa, kodwa ityala lam lalingekaxoxwa. Lento yayithetha ukuba ndandiza kuvalelwa kwiseli enamadoda ayi-85 awayemane etshintshana ngokulala kwiibhedi eziyi-34. Sasivunyelwa ukuba sihlambe kanye ngeveki.

Xa ndandingena kweso sisele ndathi xa ndivala ucango, wonke umntu wajonga kum. Enye indoda eyayisekoneni yakhawuleza yabuza ukuba ndibanjelwe ntoni. Nangona ndandisoyika ndaye ndakhumbula ibali eliseBhayibhileni likaDaniyeli lokuba waphuma emngxunyeni weengonyama zingamenzakalisanga. Eli bali laye landinceda kakhulu ndamthemba uYehova, ndatsho ndazola.—Isaya 30:15; Daniyeli 6:21, 22.

Sathi sakugqiba ukutya isidlo sangokuhlwa, omnye endandivalelwe naye wandibuza ngeenkolelo zam. Kancinci kancinci, amanye amabanjwa esasivalelwe nawo kweso sisele aqalisa ukuthula aza amamela incoko yethu. Ndamcacisela iinkolelo zam kwada kwaphela iiyure eziyi-4 okanye 5. Ndandivuya kakhulu kuba uYehova wayendincedile ndakwazi ukuyenza le nto.

Ngaphambi kokuba kuqaliswe ukuxoxwa ityala lam, ndamcela uYehova ukuba andinike ubulumko nesibindi ukuze ndikwazi ukuthethelela iinkolelo zam. Umtshutshisi wathi ndandisithi andikholelwa kuThixo kuba ndingafuni ukuya emkhosini. Ndazama ukuyicacisela inkundla ndathi, ukuba ndingavuma ukuya emkhosini loo nto ingamphoxa kakhulu Oyena mntu ubalulekileyo ebomini. Ngo-1982, inkundla yathi ndinetyala ndaza ndagwetywa iminyaka engaphezu kwemibini kuloo trongo.

Ndavuya xa ndafumanisa ukuba kukho amanye amaNgqina ayi-5 kuloo nkampu. Nangona sasincokola imizuzu embalwa—sasisoloko sithetha ngeBhayibhile. Kwakungekho nomnye kuthi oneBhayibhile, kodwa intsapho nabahlobo babesoloko besibhalela iZibhalo kwiileta—ibe ngamanye amaxesha sasizifumana kwiincwadi zalapho.

Ndandimthembile UYehova Xa Kwafuneka Ndinyangwe Ngokungxamisekileyo

Ngo-1983, xa ndandisebenza etrongweni, ndawelwa ziintsimbi ezazinobunzima obungange-2 metric tons. Ezoo ntsimbi zandiwisa phantsi zaza zacinezela umlenze wam wasekhohlo.

Ndathandaza kuYehova ukuze andincede ndikwazi ukuyinyamezela le ntlungu. Inesi yasetrongweni yathi mandithukise ukuze ndiphelise intlungu, kodwa ndasuka ndacula iingoma zoBukumkani.

Ukuze ndiyokufika esibhedlele kwafuneka ndihambe ngetrakhi, ngesikhephe, nange-ambulensi. Sahamba iiyure eziyi-6 ngelo xesha ndandisoph kakhulu. Ndandiqinisekile ukuba ndiza kutyandwa, ngoko ndathandaza ndicela uYehova ukuba anike oogqirha ubulumko bokuba basihloniphe isigqibo sam esisekelwe eBhayibhileni sokungalithi igazi. Xa ndacacisela ugqirha ngeenkolelo zam wayengafuni ukumamela, kodwa ndamcenga ukuba asihloniphe isigqibo sam. Ndamxelela ukuba ndandikulungele ukwamkela imiphumo yokunyangwa ngaphandle kwegazi. Ndavuya kakhulu xa wavumayo ukundinyanga ngaphandle kokwetha igazi. Kodwa kwafuneka kususwe indawo ethile kumlenze wam wasekhohlo.

Emva kotyando, ndandingenamandla. Kwadlula iiveki ezininzi oogqirha becinga ukuba ndingasweleka nanini na. Ngenye imini omnye unesi wandichazela ukuba endaweni yokuba nditye ukutya esikutyayo etrongweni ndandiza kunikwa ukutya okunezondlo ibe kwakuza kugcinwa kwifriji eyayisecaleni kwale ndawo ndandivalelwe kuyo. Yonke imihla ndandiza kunikwa icephe lobusi, iqanda nebhotolo. Abazali bam balungiselela ukuba ndizifumane ezi zinto emva kokuva ngengozi ebendikuyo. Kodwa umntu owayesebenza kwindawo eyayisamkela izinto esizithunyelelweyo wavuma ukuzithatha kwaba kanye qha.

Isandla sikaYehova asikho sifutshane. (Isaya 59:1) Emva kokutshintsha iibhandeji zam, oonesi babedla ngokundipha ukutya ababeziphathele kona. Nasefrijini babekufaka okwa kutya ndandikudinga. Yonke le nto yandikhumbuza ibali eliseBhayibhileni lomhlolokazi owayenengqayi yeoli eyayingazange iphele.—1 Kumkani 17:14-16.

Kancinci kancinci, ndaba bhetele. Enye into eyandithuthuzelayo yaza yandikhuthaza ziileta eziyi-107 endazifumana kwintsapho yam nabahlobo ibe ndaziphendula zonke! Ndade ndafumana nesipho kubazalwana ababekwenye itrongo.

Emva kweenyanga ezimbini, ndaphinda ndakwazi ukuhlamba! Ibe kwabangathi ndingabuyela etrongweni ukuze ndibe kunye nabazalwana.

Xa omnye woogqirha wayelungiselela amaphepha okundikhulula esibhedlele, wandibizela eofisini yakhe waza wandibuza imibuzo emininzi ngezinto endizikholelwayo. Emva koko, wathi akwaba ndinokuhlala ndinesibindi sokumela izinto endizikholelwayo. Ndothuka ukuva loo mazwi kumntu onxibe iyuniform yasemkhosini!

NgoAprili 1984, ndandikwintlanganiso nabasemagunyeni kuba babeza kuceba ukuba ndikhululwe na etrongweni. Ndabuzwa ukuba ndingaya na emkhosini. Ndaphendula ndathi kuba ndinomlenze omnye ibe ndihamba ngeentonga loo mbuzo andifanelanga ukuba ndiyawubuzwa. Ekuhambeni kwexesha, bandibuza bathi: “Ukuba ubunemilenze emibini ubuza kuthini?” Ndabachazela ukuba ndandingazukuvuma ibe ndandizimisele ukuhlala ndithembekile kuThixo wam. Bathi baza kuqinisekisa ukuba ndiza kuhlala etrongweni ndide ndisigqibe isigwebo sam. Kodwa ndakhululwa kwiinyanga ezimbini neentsuku eziyi-12 ngaphambi kokuba ndisigqibe isigwebo sam.

Ndandimthembile UYehova Nasemva Kokukhululwa Etrongweni

Emva kokukhululwa etrongweni, ndafumana umlenze ofakelwayo. Kuthatha iyure ukuwunxiba yonke imihla. Ebusika kuba nzima kakhulu ukuwufaka ibe umlenze wam awukhawulezi ukufudumala ngenxa yokuba igazi alihambi kakuhle. Ndagqibela ndina-19 ukubaleka, kodwa ndiyazi ukuba ndiza kubaleka kakhulu kwihlabathi elitsha.—Isaya 35:6.

Kwakunzima ukufumana umsebenzi, ibe abaqeshi abaninzi babengafuni ukuqesha umntu onesiphene. Kodwa nangona ndinomlenze ofakelweyo azange ndibe nomsebenzi ondihlalisa phantsi imini yonke. Ndandingumakhenikhi okwexeshana ndilungisa iimoto ezahlukahlukeneyo. Emva koko, ndasebenza elwakhiweni.

Ngo-1986, ndatshata udade othandekayo onguSvitlana. Umakhulu notatomkhulu kaSvitlana nabo babengamaNgqina njengabam. USvitlana usoloko esithi uyavuya kuba xa sasithandana ngaphambi kokuba sitshate senza isigqibo sokuba uYehova uza kuba ngoyena ubalulekileyo emtshatweni wethu.

Abantwana bethu uOlia noVolodia bafunda ubuchule bokwakha njengoko babendincedisa ukulungisa indlu esasihlala kuyo. Njengoko babekhula babekuvuyela kakhulu ukuncedisa kulwakhiwo lweeHolo zoBukumkani. Baba ngoovulindlela. UOlia ngoku usebenza elwakhiweni, ibe uVolodia ngumdala.

USvitlana usoloko endixhasa ibe loo nto indenze ndakwazi ukwenza imisebenzi eyahlukeneyo yasebandleni. Ngoo-1990 amabandla amaninzi eUkraine ayenabavakalisi abangaphezu kwe-200 kuze kubekho umdala omnye okanye ababini kuphela. Ibe kanye ngenyanga, okanye ngempelaveki ndandidla ngokusa iimpapasho kumabandla akumbindi Ukraine.

Ndihlala Ndithembela KuYehova Nakula Maxesha

Ngo-2022, mna noSvitlana sagqiba ekubeni sishiye ikhaya lethu iKryvyi Rih. Ibe ngoku sikhonza kwibandla eliseAustria.

Abantu endizalana nabo abangamaNgqina babengumzekelo omhle wokuhlala benyanisekile, nangona babejamelene neengxaki ibe loo nto ndayifunda ndisemncinci. IBhayibhile isinceda simazi kakuhle uMdali wethu size sikwazi ukusondela kuye. (Yakobi 4:8) Ukusondela kuye kusenza sibe nento esiyiphilelayo. Ndiyavuya kuba nangona bendineengxaki ezininzi, ndiye ndakwazi ukunika uYehova uzuko olumfaneleyo.