Ibali Lobomi
Umzekelo Wabazali Bam Wandomeleza
KUBALISA UJANEZ REKELJ
Kwakungowe-1958. Mna nenkosikazi yam uStanka, sasiphezulu kwiiNtaba zeKarawanken kumda weYugoslavia neOstriya, sizama ukubalekela eOstriya. Oku kwakuyingozi ngenxa yokuba amajoni axhobileyo aseYugoslavia ayezimisele ukuthintela nabani na ofuna ukunqumla apho. Njengoko sasihamba safika ngaseliweni elimqengqelezi. Mna noStanka sasingazange sibone ngaphaya kweentaba zaseOstriya ngaphambili. Saya empuma de saya kufika kwithambeka elinamahlalutye. Sazibophelela ngelaphu eliqinileyo sehlela ngaphaya kweentaba singazi nokuba siza kuphelela phi.
MAKHE ndibalise indlela esazifumana ngayo sikule meko nendlela umzekelo wabazali bam wokuthembeka owandikhuthaza ngayo ukuba ndihlale ndithembekile kuYehova xa kunzima.
Ndakhulela eSlovenia, namhlanje eyidolophu encinane ekuMbindi Yurophu. Imi kwiiNtaba zaseYurophu, iOstriya yona isemantla, i-Itali isentshona, iCroatia isemazantsi, yaye iHungary isempuma. Noko ke, xa abazali bam uFranc noRozalija Rekelj babezalwa, iSlovenia yayiyinxalenye yoBukhosi baseOstriya naseHungary. Ekupheleni kweMfazwe Yehlabathi I, iSlovenia yaba yinxalenye yelizwe elitsha elalibizwa ngokuba buBukumkani babantu baseSerbia, abaseCroatia naseSlovenia. Ngowe-1929 igama lelo lizwe latshintshwa kwathiwa yiYugoslavia, ngokoqobo lithetha “uMzantsi Slavia.” Ndazalwa ngoJanuwari 9 ngaloo nyaka, ngaphandle kwedolophana yasePodhom, kufuphi neChibi elihle iBled.
UMama wayekhuliswe ngamaKatolika angqongqo. Omnye wootatomncinci bakhe wayengumfundisi, yaye oodadobawo bakhe abathathu babengoonongendi. Wayenomnqweno onzulu wokuba neBhayibhile, ayifunde aze ayiqonde. Noko ke, uTata wayengenamdla kangako elunqulweni. Wayeyithiyile into yokubandakanyeka konqulo kwiMfazwe Enkulu yowe-1914-18.
Ndafunda Inyaniso
Kwixesha elingephi emva kwemfazwe, umza kaMama uJanez Brajec nowakwakhe uAnčka, baba ngaBafundi beBhayibhile, njengokuba ayesaziwa njalo amaNgqina kaYehova. Ngelo xesha, babehlala eOstriya. Ukususela ngowe-1936 ukusa phambili, uAnčka wayetyelela uMama kangangezihlandlo eziliqela. Wamnika iBhayibhile, wakhawuleza wayifunda kuquka imibhalo yeeMboniselo nezinye iimpapasho ngeSlovenia. Ekugqibeleni ngenxa yokulawula kukaHitler eOstriya ngowe-1938, uJanez noAnčka babuyela eSlovenia. Ndikhumbula ukuba babesisibini esifundileyo nesiqiqayo esasimthanda ngokwenene uYehova. Sasisoloko sixubusha ngeBhayibhile noMama, yaye loo nto yambangela ukuba azahlulele kuYehova. Wabhaptizwa ngowe-1938.
UMama wabothusa abantu ekuhlaleni xa wayeka ukwenza izinto ezingabhalwanga eBhayibhileni, njengokubhiyozela iKrismesi; ukungatyi isoseji eyenziwe ngegazi; yaye ngokukhethekileyo xa waqokelela yonke imifanekiso eqingqiweyo waza wayitshisa. Ngokukhawuleza kwaqalisa inkcaso. Oodadobawo bakaMama, ababengoonongendi, baqiniseka ukuba bayambhalela, bezama ukumeyisela ekubeni abuyele kuMariya nasecaweni. Noko ke, xa uMama wababhalela ecela iimpendulo kwimibuzo yeBhayibhile awayenayo akazange afumane mpendulo. UTatomkhulu wam naye wamchasa ngokukrakra uMama. Wayengengomntu ukrwada kodwa wayengcungcuthekiswa zizalamane nangabantu basekuhlaleni. Ngenxa yoko, walutshabalalisa lonke uncwadi lweBhayibhile lukaMama, kodwa akazange ayichukumise iBhayibhile yakhe. Wamcenga ukuba abuyele ecaweni yakhe. Wada wamoyikisa ngokuba uza kumhlaba ngemela. Noko ke, uTata akazange amfihlele utatomkhulu wamxelela ukuba akakwazi ukunyamezela ukuphathwa kanjalo.
UTata waqhubeka emkhuthaza uMama ukuba afundisise iBhayibhile aze azenzele izigqibo ngokuphathelele iinkolelo zakhe. Ngowe-1946 naye wabhaptizwa. Ukubona indlela uYehova awamomeleza ngayo uMama ukuba ayimele inyaniso phezu kwayo nje inkcaso nendlela uYehova awamvuza ngayo ngokholo lwakhe kwandikhuthaza ukuba nam ndakhe olwam ulwalamano noThixo. Kwakhona ndangenelwa kakhulu kwinto awayethanda ukuyenza uMama yokundifundela iBhayibhile neempapasho ezisekelwe eBhayibhileni ngokuvakalayo.
Kwakhona uMama wayethanda ukuxubusha nodadewabo omncinane uMarija Repe, yaye ekugqibeleni mna noMakazi uMarija sabhaptizwa ngemini enye phakathi kuJulayi wowe-1942. Kwafika umzalwana eze kunikela intetho emfutshane yaye sabhaptizwa kwikhaya lethu kwibhafu enkulu eyenziwe ngamaplanga.
Ukunyanzelwa Ngomsebenzi Ebudeni BeMfazwe Yehlabathi II
Ngowe-1942, xa yayisaqhubeka iMfazwe Yehlabathi II, iJamani neItali zahlasela iSlovenia zaza zahlulelana neHungary. Abazali bam bala ukuba ngamalungu eVolksbund, umbutho wamaNazi. Mna ndala ukukhahlela uHitler esikolweni. Kuyabonakala ukuba utitshala waxelela abasemagunyeni.
Safakwa kuloliwe sanyanzelwa ukuba siye kwidolophana ekufuphi yaseHüttenbach, eBavaria, apho kwakusetyenziswa abantu kabuhlungu ezinkampini. UTata wandilungiselela indawo yokuhlala nomnye umbhaki kunye nentsapho yakhe. Ngeli xesha, ndafunda ukuba ngumbhaki, yaye oku kwandinceda gqitha. Ekuhambeni kwexesha yonke intsapho yakowethu (kuquka uMakazi uMarija nentsapho yakhe) yathunyelwa kwinkampu eseGunzenhausen.
Ekupheleni kwemfazwe, ndandiza kuhamba nelinye iqela ndiye kwindawo eyayihlala abazali bam. Ngengokuhlwa eyayingaphambi kokuba ndihambe, uTata wafika ndingalindelanga. Andazi ukuba ngendandiphelele phi ukuba ndandihambe nelo qela, kuba lalingathembekanga. Kwakhona ndaphinda ndalubona uthando lukaYehova njengokuba wayesebenzisa abazali bam ukuze bandikhusele baze bandiqeqeshe. Mna noTata sahamba iintsuku ezintathu sisiya kwindawo eyayikuyo intsapho yakowethu. NgoJuni 1945 sonke sabuyela ekhaya.
Emva kwemfazwe, amaKomanisi awayekhokelwa nguMongameli uJosip Broz Tito alawula eYugoslavia. Loo nto yabangela ukuba zande ngakumbi iingxaki zamaNgqina kaYehova.
Ngowe-1948 kwafika umzalwana owayevela eOstriya waza wanandipha isidlo kunye nathi. Kuyo yonke indawo awayehamba kuyo amapolisa ayemlandela aze abambe nabo bazalwana abatyeleleyo. Naye uTata wabanjwa ngenxa yobo bubele wabubonakalisa kuye nokungamxeli emapoliseni, yaye uTata wahlala iminyaka emibini entolongweni. Eli yayilixesha elinzima gqitha kuMama kungekhona ngenxa yokuba uTata wayengekho kodwa nangenxa yokuba mna nomntakwethu sasiza kuvavanywa ubundilele bethu.
Ukuvalelwa EMakedoniya
NgoNovemba 1949, ndamenyelwa emkhosini. Ndahamba ndaya kuchaza isizathu sokuba ndingafuni ukuya apho ngenxa yesazela sam. Abasemagunyeni babengafuni ukundiphulaphula bandithumela namanye amalungu amatsha eMakedoniya, kwelinye icala leYugoslavia.
Ndahlukana nentsapho yam nabazalwana kangangeminyaka emithathu yaye ndandingenalo uncwadi ndingenayo neBhayibhile. Kwakunzima gqitha. Ndomelezwa kukucamngca ngoYehova nangomzekelo woNyana wakhe, uYesu Kristu. Nomzekelo wabazali bam wandomeleza. Ukongezelela, ukusoloko ndithandazela amandla kwandinceda andaphelelwa lithemba.
Ekugqibeleni ndathunyelwa kwintolongo yaseIdrizovo, kufuphi naseSkopje. Kule ntolongo, amabanjwa ayesenza imisebenzi eyahlukahlukeneyo. Ekuqaleni, ndandicoca emva koko ndaba ngumthunywa. Nangona ndandisoloko ndixhatshazwa lelinye ibanjwa elalikhe lalipolisa, ndandisebenza kakuhle nabanye abantu—abalindi, amabanjwa kwanomphathi wentolongo.
Kamva, ndafumanisa ukuba kwakufuneka umbhaki entolongweni. Kwiintsuku ezimbalwa kamva, umphathi weza eze kuhlola abakhoyo. Wafika wema phambi kwam emgceni waza wathi, “Ngaba ungumbhaki?” Ndaphendula: “Ewe Mnumzana.” “Ngomso ekuseni kufuneka uye kwindawo yokubhaka,” waphendula ngelitshoyo. Ibanjwa elalindiphethe kakubi lalidla ngokudlula ngakwindawo yokubhaka kodwa lalingenakwenza nto ngoko. Ndasebenza apho ukususela ngoFebruwari ukusa kuJulayi wowe-1950.
Emva koko ndathunyelwa kwezinye izisele zaseVolkoderi, kumazantsi eMakedoniya, kufuphi neChibi iPrespa. Kuba ndandikwidolophu yaseOtešovo ekufuphi ndandikwazi ukubhalela ekhaya. Ndandisakha iindlela, kodwa ixesha elininzi ndandisebenza kwindawo yokubhaka izonka, loo nto yandenzela lula izinto. Ndakhululwa ngoNovemba wowe-1952.
Xa ndandingekho ePodhom, kwasekwa ibandla kuloo mmandla. Ekuqaleni, iintlanganiso zaziqhutyelwa kwihotele encinane eSpodnje Gorje. Kamva, uTata wavula elinye igumbi ekhaya ukuze siqhubele iintlanganiso kulo. Ndakuvuyela gqitha ukuba kunye nabo ukubuya kwam eMakedoniya. Saqhubeka nobuhlobo bethu noStanka, endandidibene naye phambi kokuba ndiye entolongweni. NgoAprili 24, 1954, satshata. Noko ke, lalisondele ixesha lokuba ndiphumle.
Kwintolongo YaseMaribor
NgoSeptemba 1954, ndaphinda ndabizwa. Ngeli xesha, ndagwetywa iminyaka engaphezu kwemithathu enesiqingatha eMaribor, engasekupheleni kwempuma yeSlovenia. Ndakhawuleza ndathenga amaphepha nezinto zokubhala. Ndaqalisa ukubhala yonke into endandiyikhumbula—izibhalo, iingcaphulo zeMboniselo, nezinye izinto endandizikhumbula ezivela kwezinye iimpapasho zamaKristu. Ndandiwafundisisa la manqaku ndandiwabhalile yaye ndandisongeza namanye endiwakhumbulayo. Ekugqibeleni, ukuphuma kwam incwadi yam yayizele qhu, yaye le nto yandibangela ukuba ndihlale ndibambelele enyanisweni ndize ndihlale ndomelele ngokomoya. Umthandazo nokucamngca kwandinceda gqitha kwandomeleza ngokomoya kwaza kwandinceda ukuba ndibe nesibindi ndize ndikwazi ukwabelana nabanye ngenyaniso.
Ngelo xesha, ndandivunyelwe ukufumana ileta ibe nye ngenyanga nokutyelelwa kangange-15 lemizuzu ngenyanga. UStanka wayehamba ubusuku bonke ngololiwe ukuze abe sentolongweni kwakusasa xa eze kundityelela, yaye wayebuyela ekhaya kwangaloo mini. Ndandikuxabisa gqitha ukutyelelwa nguye. Emva koko ndazama icebo lokuba ndifumane iBhayibhile. Mna noStanka sasihlala sijongane etafileni kukho nonogada osigadileyo. Xa unogada wayengajonganga, ndafaka ileta ebhegini yakhe ndimcela ukuba andiphathele iBhayibhile xa ephinda esiza kundityelela.
UStanka nabazali bam baqonda ukuba oku kuyingozi yaye bakrazula amaphepha eZibhalo ZamaKristu ZesiGrike baza bawafaka phakathi kwamaqebengwane. Ndayifumana ngaloo ndlela iBhayibhile. Ndazifumana ngaloo ndlela neeMboniselo, ezikhutshelwe ngesandla nguStanka. Ndandiphinda ndibhale enye ngesandla ndize ndilahle le bendiyifumene ukuze kungabikho bani oya kufumanisa ukuba bendizifumene phi.
Ngenxa yokuqhubeka ndizingisa ekushumayeleni amanye amabanjwa athi ndandiza kungena engxakini. Ngesinye isihlandlo, ndandixubusha iBhayibhile nelinye ibanjwa. Seva xa kufakwa isitshixo emnyango yaye emva koko kwangena unogada. Ndakhawuleza ndacinga ukuba ndiza kuvalelwa ndedwa kwezimnyama izisele. Kodwa unogada wayengazelanga loo nto. Wayeyivile ingxubusho yaye wayefuna ukuyiphulaphula. Emva kokuba anelisekile ziimpendulo, wahamba waza watshixa umnyango.
Kwinyanga yokugqibela yesigwebo sam, umphathi owayejongene namabanjwa aguqukayo wandincoma ngenxa yokumela kwam inyaniso. Ndavakalelwa kukuba ngumvuzo omkhulu lo wemizamo yam yokwazisa igama likaYehova. NgoMeyi 1958, ndaphinda ndakhululwa entolongweni.
Ndabalekela EOstriya, Emva Koko Ndaya EOstreliya
NgoAgasti 1958 uMama wafa. Wayegule kangangexesha elithile. Emva koko ngoSeptemba 1958, ndaphinda ndabizwa okwesithathu. Ngaloo ngokuhlwa mna noStanka senza izigqibo ezasikhokelela ekubeni siwele umda esiwuchaze ngaphambili. Singazange sixelele mntu, sapakisha iibhegi zethu saza sazibophelela ngelaphu eliqinileyo sehla ngefestile sisiya kumda weOstriya kwintshona yeNtaba iStol. Kuyabonakala ukuba uYehova wasinceda kanye ngexesha awayesazi ngalo ukuba sifuna uncedo.
Abasemagunyeni baseOstriya basithumela kwinkampu yeembacu kufuphi naseSalzburg. Kwiinyanga ezintandathu esazichitha apho, sasisoloko sihleli namaNgqina asekuhlaleni, ngoko sasingahlali ixesha elide enkampini. Abanye enkampini babemangaliswa yindlela esakhawuleza senza ngayo abahlobo. Saya ngeli xesha kwindibano yethu yokuqala. Enye into eyayimnandi gqitha kukuba sakwazi ukushumayela kwindlu ngendlu ngokukhululekileyo. Kwakunzima kuthi ukushiya abahlobo bethu xa kwakufuneka sihambe.
Abasemagunyeni baseOstriya basinika ithuba lokuba sifudukele eOstreliya. Asizange siyiphuphe nokuyiphupha into yokuba singaze siye kude kangaka. Sahamba ngololiwe sisiya eGenoa, eItali, emva koko sakhwela inqanawa eya eOstreliya. Ekugqibeleni sahlala kwisixeko saseWollongong, eNew South Wales. Unyana wethu uPhilip, wazalelwa apha ngoMatshi 30, 1965.
Ukuhlala eOstreliya kuye kwavula amathuba amaninzi enkonzo, kuquka ukufumana ithuba lokushumayela kwabo baye bafuduka kwiindawo ezazisaziwa njengeYugoslavia. Siyayibulela intsikelelo kaYehova, kuquka ukukwazi ukumkhonza njengentsapho emanyeneyo. UPhilip nowakwakhe uSusie, banelungelo lokukhonza kwiofisi yesebe yamaNgqina kaYehova yaseOstreliya, yaye bebenelungelo lokuchitha iminyaka emibini kwiofisi yesebe yaseSlovenia.
Phezu kwabo nje ubunzima obubangelwa kukukhula nokungabikho kwempilo, mna nenkosikazi yam sisakunandipha ukukhonza uYehova. Ndiwuxabisa gqitha umzekelo wokuthembeka kwabazali bam! Uyandikhuthaza, yaye uyandinceda ukuba ndenze oko kwathethwa ngumpostile uPawulos: “Yibani nemihlali ngalo ithemba. Yinyamezeleni imbandezelo. Emthandazweni zingisani.”—Roma 12:12.
[Umfanekiso okwiphepha 16, 17]
Abazali bam ekupheleni kweminyaka yee-1920
[Umfanekiso okwiphepha 17]
UMama, ekunene, nomza wakhe uAnčka, owamfundisa inyaniso
[Umfanekiso okwiphepha 18]
Ndikunye nenkosikazi yam uStanka, emva kokuba sitshatile
[Umfanekiso okwiphepha 19]
Amalungu ebandla awayehlanganisana ekhaya ngowe-1955
[Umfanekiso okwiphepha 20]
Ndikunye nenkosikazi yam, unyana wethu uPhilip, nenkosikazi yakhe uSusie