UThixo Waba Nenceba Kum

Kubalisa uBolfenk Moc̆nik

“Uqine.” Lawo ngamazwi uMama awandikhuthaza ngawo xa wayendanga. Amajoni asahlukanisa yaye ityala laqhubeka. Ekugqibeleni ndagwetywa iminyaka emihlanu entolongweni. Mhlawumbi abantu abaninzi babeya kudimazeka. Enyanisweni, ekugqibeleni ndandinoxolo lwengqondo. Makhe ndikubalisele.

ESI SIGANEKO singasentla senzeka ngowe-1952 eSlovenia.a Kodwa okwenzeka ebomini bam kwenzeka ngaphezu kweminyaka engama-20 ekuqaleni kweminyaka yee-1930. Kuxa Abafundi beBhayibhile, njengokuba amaNgqina kaYehova ayebizwa ngaloo ndlela, balungiselele ukuba iqela lonke libhaptizwe ngosuku olunye kwilizwe lakowethu. Abazali bam, uBerta noFranz Moc̆nik babephakathi kwabo babebhaptizwa. Ndandineminyaka emithandathu ubudala yaye udadewethu uMajda wayeneminyaka emine ubudala. Indlu yasekhaya eyayikwisixeko saseMaribor zaziqhutyelwa kuyo iintlanganiso zamaKristu.

Ngowe-1933 uAdolf Hitler walawula iJamani yaye waqalisa ukutshutshisa amaNgqina. AmaNgqina amaninzi aseJamani afudukela eYugoslavia ukuze aye kunceda kumsebenzi wokushumayela. Abazali bam babekuvuyela ukumema abo bazalwana bathembekileyo. Omnye umzalwana endimkhumbulayo owayekhe wamenywa ekhaya nguMartin Poetzinger, kamva owachitha iminyaka esithoba kwiinkampu zoxinaniso zamaNazi. Emva kokuqengqeleka kweminyaka, ukususela ngowe-1977 de wamnabel’ uqaqaqa ngowe-1988 ebelilungu leQumrhu Elilawulayo lamaNgqina kaYehova.

Xa uMartin esityelele wayedla ngokulala ebhedini yam ndize mna nodadewethu silale nabazali bethu. Wayene-encyclopedia encinane enemibalabala neyandikhuthazayo ukususela ebuntwaneni. Ndandikuthanda ukufunda le ncwadi.

Ixesha Leemvavanyo Eziqatha

Ngowe-1936, njengokuba uHitler wayesel’ elawula, abazali bam baya kwindibano yezizwe ngezizwe eLucerne, eSwitzerland. Ekubeni uTata wayenelizwi elikhulu wakhethwa ukuba ashicilele iintshumayelo zeBhayibhile ezaziza kudlalelwa bonke abanikazi-mzi baseSlovenia. Kamsinya nje emva kwaloo ndibano ingalibalekiyo, amaNgqina aseYurophu aqalisa ukutshutshiswa ngokuqatha. Abaninzi babandezeleka yaye bafela kwiinkampu zoxinaniso zamaNazi.

Imfazwe Yehlabathi Yesibini yaqalisa ngoSeptemba 1939 yaye ngoAprili 1941 imikhosi yaseJamani yayilawula iinxalenye ezithile zeYugoslavia. Izikolo zaseSlovenia zavalwa. Salelwa ukuba sithethe ulwimi lwethu esidlangalaleni. Ngenxa yokuba amaNgqina kaYehova engondilele kulo lonke ungquzulwano lwezopolitiko, ala ukuncedisa emfazweni.b Ngenxa yoko, amaninzi avalelwa yaye amanye agwetywa—kuquka ityendyana endandilazi uFranc Drozg. AmaNazi adubula abantu kumgama omalunga neemitha ezilikhulu ukususela ekhayeni lethu. Ndikhumbula uMama eval’ indlebe zakhe ngelaphu esenzela ukuba angayiva loo mipu. Amazwi okugqibela okuvalelisa eleta kaFranc awayeyibhalela umhlobo wakhe osenyongweni wathi: “Ndiza kukubona eBukumkanini bukaThixo.”

Ikhondo Endazisola Kakhulu Ngalo

Ngoko ndandineminyaka eli-19 ubudala. Nangona ndandimncoma uFranc ngokuma kwakhe eqinile, ndandisoyika. Ngaba nam ndandiza kumnabel’ uqaqaqa? Ukholo lwam lwalungomelelanga kangako yaye ndandingenalwalamano lusondeleyo noYehova uThixo. Ndabizelwa emkhosini. Uloyiko endandinalo lwalongamela ukholo lwam, ngenxa yoko ndaya emkhosini.

Ndathunyelwa kwindawo apho umkhosi wawusilwa neRashiya. Kungekudala ndabona amaqabane esifa ecaleni kwam. Imfazwe yayihlasimlis’ umzimba yaye inogonyamelo. Isazela sam sasindikhathaza. Ndambongoza uYehova ndicela andixolele aze andiphe amandla okuhamba endleleni efanelekileyo. Xa umkhosi wahlasela ibutho lethu ndafumana ithuba lokuqhwesha.

Ndandisazi ukuba, ukuba ndingabhaqwa ndandiza kubulawa. Kwinyanga ezisixhenxe ezalandelayo ndafumana iindawo ezahlukahlukeneyo zokuzimela. Ndafumana nethuba lokuthumela ileta kuMajda eyayinamazwi athi: “Ndimshiyile umqeshi wam yaye ngoku ndisebenzela omnye.” Ndanditheth’ ukuthi ndizimisele ukusebenzela uYehova ngoku kodwa kwathabath’ ixesha ngaphambi kokuba ndikwenze oko.

NgoAgasti 1945, emva kweenyanga ezintathu iJamani ixhomile kuMazwe Amanyeneyo, ndakwazi ukubuyela eMaribor. Okumangalisayo kukuba, sonke—utata, umama, nodadewethu—sasinda kulo mfazwe imanyumnyezi. Ngelo xesha amaKomanisi ayelawula yaye ayetshutshisa amaNgqina kaYehova. Umsebenzi wokushumayela wavalwa ngokusemthethweni kodwa amaNgqina aqhubeka eshumayela emfihlekweni.

NgoFebruwari 1947, amaNgqina amathathu athembekileyo—uRudolf Kalle, uDus̆an Mikić noEdmund Stropnik—bagwetyel’ ukufa. Kamva isigwebo satshintsha saba yiminyaka engama-20 bethothoza entolongweni. Amajelo eendaba ayethetha ngako oku kangangezihlandlo ezininzi yaye abantu abaninzi babona indlela ayephethwe kakubi ngayo amaNgqina. Xa ndifunda loo manqaku eendaba intliziyo yayisiba lihlwili. Ndandiyazi into endandifanele ndiyenze.

Ndaphinda Ndomelela Ngokomoya

Ndibuhlungu ndandiyazi into endandifanele ndiyenze ukuze ndimele iinyaniso zeBhayibhile, ngenxa yoko ndazibhokoxa kumsebenzi wokushumayela owawusenziwa emfihlekweni. Ngenxa yokuzimisela kwam ekufundeni iBhayibhile, umoya oyingcwele kaThixo wandipha amandla okuba ndiyeke imikhwa emibi, njengokutshaya.

Ngowe-1951 ndabhaptizwa ndifuzisela uzahlulelo lwam kuThixo yaye ndabuyela kubomi bam bangaphambili. Ekugqibeleni, ndambona uYehova njengoBawo wokwenyaniso—othembekileyo, onyanisekileyo nonothando olungatshitshiyo. Nangona ndenza isigqibo sobuyatha ngoxa ndandiselityendyana, ndachukumiseka sisiqinisekiso seBhayibhile sokuba uThixo uyaxolela. NjengoBawo onothando, uThixo waqhubeka enditsala “ngeentambo zothando.”—Hoseya 11:4.

Ebudeni belo xesha linzima, iintlanganiso zamaKristu sasiziqhubela emfihlekweni kumakhaya awahlukahlukeneyo amaNgqina yaye saqhubeka sishumayela ngokungacwangciswanga. Ngaphantsi nje konyaka ndibhaptiziwe ndabanjwa. UMama wandibona nje ixeshana ngaphambi kokuba ndiye etyaleni. Njengokuba bendisele nditshilo ekuqaleni kweli nqaku, wandanga waza wandibongoza esithi: “Uqine.” Xa kwawiswa isigwebo sokuba ndiza kuba sentolongweni kangangeminyaka emihlanu, ndazola yaye ndabambelela kwisigqibo sam.

Ndandikwisisele esincinane kunye namanye amabanjwa amathathu, ngoko ke ndafumana ithuba lokuncokola ngeenyaniso zeBhayibhile nendoda eyayingazange ive kwanto ngazo. Nangona ndandingenaBhayibhile neencwadi, ndamangaliswa kukuba ndandizikhumbula izibhalo nengcaciso zazo ngenxa yesifundo seBhayibhile sobuqu. Ndandisoloko ndichazela amanye amabanjwa ukuba, ukuba ndandiza kuhlala entolongweni kangangeminyaka emihlanu, uYehova wayeza kundinika amandla. Noko ke, usenokundivulela iingcango lingekapheli elo xesha. Ukuba wenjenjalo ndiyazibuza ukuba ngubani onokuluvala?

Ukukhonza Ukhululekile Ukusa Kumlinganiselo Othile

NgoNovemba 1953 urhulumente wakhupha umyalelo wokuba; onke amaNgqina kaYehova akhululwe entolongweni. Ndafumanisa ukuba imiqathango yashenxiswa kusasele iinyanga ezimbini ngaphambi kwexesha elalimiselwe. Ngokukhawuleza emva koko kwabakho amabandla yaye kwaqhutyekwa nomsebenzi wokushumayela. Safumana indawo yeentlanganiso kumgangatho ongaphantsi kwesakhiwo kumbindi weMaribor. Sabhala eludongeni sathi: “AmaNgqina kaYehova—Ibandla LaseMaribor.” Ukukhonza uYehova sikhululekile kwazivuyisa iintliziyo zethu.

Ngasekuqaleni kowe-1961 ndangenelela inkonzo yexesha elizeleyo, njengovulindlela. Emva kweenyanga ezintandathu, ndamenywa ukuba ndiye kusebenza kwiofisi yesebe lamaNgqina kaYehova yaseYugoslavia. YayiseZagreb, eCroatia. Eli sebe lalinegumbi elincinane namadoda amathathu. AmaKristu ahlala kufuphi ayesiza emini ukuza kuncedisa ekushicilelweni kweMboniselo ngeelwimi zasekuhlaleni.

Oodade ababehlala kufuphi nabo babencedisa kulo msebenzi. Eminye yemisebenzi yabo yayikukudibanisa amaphephancwadi. Ndandisenza imisebenzi eyahlukahlukeneyo equka ukuhlola iimpazamo, ukuguqulela, ukuhambisa izinto nokubhala iingxelo.

Ukutshintsha Isabelo

Ngowe-1964 ndabelwa ukuba ndibe ngumveleli ohambahambayo, ndityelela rhoqo amabandla amaninzi amaNgqina ngenjongo yokuwomeleza ngokomoya. Ndandiwuthanda kakhulu lo msebenzi. Amaxesha amaninzi ndandisebenzisa ibhasi okanye uloliwe xa ndisuka kwelinye ibandla ndisiya kwelinye. Ukuze ndiye kufika kumaNgqina akwiidolophana ezincinane ndandisebenzisa ibhayisekile okanye ndihambe ngenyawo, maxa wambi ndihamba nasemigxobhozweni.

Zazikho izinto ezazidla ngokusihlekisa. Omnye umzalwana wandikhwelisa kwinqwelo yamahashe xa ndandisiya kwelinye ibandla. Njengokuba sasihamba kwindlela yomhlaba, elinye ivili lale nqwelo laphuma saze sawa. Njengokuba sasisemhlabeni, sajonga ihashe yaye lalisithe ndwanya ngamehlo. Nakuba sele kudlule iminyaka emininzi kwenzekayo oko kusasihlekisa nangoku. Uthando lokwenene lwabo bahlobo ndiya kuhlala ndiluxabisa.

Kwidolophu iNovi Sad ndaqhelana noMarika onguvulindlela. Uthando lwakhe ngeenyaniso zeBhayibhile nenzondelelo anayo ekushumayeleni yandishukumisela ekubeni nditshate naye. Emva kwexesha elithile sitshatile, sakhonza amabandla kunye kumsebenzi wokuhambahamba.

Intsapho yasekhaya yanyamezela obayo ubunzima ebudeni bokuvalwa komsebenzi. Utata watyholwa ngokusebenza notshaba ebudeni bemfazwe yaye waphelelwa ngumsebenzi. Walwa idabi angazange aliphumelele yaye oko ekugqibeleni kwamdimaza. Kangangexeshana ukholo lwakhe lwaba buthathaka kodwa waphinda womelela ngaphambi nje kokuba afe. Wayekhuthele kwibandla awayekulo yaye wasutywa kukufa ngowe-1984. Umama wam othobekileyo wafa ethembekile ngowe-1965. UMajda usesebandleni laseMaribor.

Umsebenzi Wethu Wokushumayela EAustria

Ngowe-1972, mna noMarika safumana isimemo sokuya kushumayela eAustria kubantu baseYugoslavia abasebenza kwelo lizwe. Ukufika kwethu eVienna, ikomkhulu lalapho, sasingayicingi nokuyicinga into yokuba singaphelela apho. Ngokuthe ngcembe, amabandla amatsha namaqela athetha iilwimi ezisetyenziswa eYugoslavia amiselwa kwiAustria yonke.

Ekuhambeni kwexesha ndasebenza njengomveleli ohambahambayo ndityelela la mabandla namaqela akweli lizwe. Kamva sacelwa ukuba siye kutyelela eJamani naseSwitzerland nalapho kwakukho la maqela. Ndanceda ekulungiseleleni indibano ezinkulu nezincinane kuloo mazwe.

Maxa wambi kwezo ndibano zinkulu kwakutyelela amalungu eQumrhu Elilawulayo, ngenxa yoko ndadibana noMartin Poetzinger kwakhona. Sancokola ngezinto ezazisenzeka kwiminyaka engama-40 eyadluleyo xa wayedla ngokuba lundwendwe ekhaya. Ndambuza ukuba, “Usakhumbula ndithand’ ukufunda iencyclopedia yakhe encinane.

Watheth’ ehamba ephuma kwelo gumbi: “Yima kancinane.” Wabuya eyiphethe lo ncwadi waze wandinika esithi, “yithathe ndikuphile.” Le ncwadi nangoku isekwithala lam.

Iingxaki Zempilo—Kodwa Sisakhuthele

Ngowe-1983 kwafunyaniswa ukuba ndinesifo somhlaza. Kamsinya nje emva koko ndaxelelwa ukuba ndiza kufa. Kwakubuhlungu ngokukodwa kuMarika, kodwa ngenxa yenyameko yakhe nenkxaso yabazalwana abaninzi abangamaKristu ndisaphila nangoku.

Mna noMarika sisashumayela ixesha elizeleyo eVienna. Amaxesha amaninzi, ngeentseni ndidla ngokuya esebeni ndiye kuncedisa kumsebenzi wokuguqulela yaye uMarika udla ngokushumayela esixekweni. Ndiye ndivuye kakhulu xa ndibona indlela eliye lakhula ngayo iqela elalilincinane laseYugoslavia ngoku elinamaNgqina ali-1 300. Mna noMarika siye sanelungelo lokunceda uninzi lwawo ukuba lufunde inyaniso yeBhayibhile.

Kwiminyaka yakutshanje, ndiye ndanelungelo lokubakho xa kunikezelwa iofisi zamasebe ezintsha njengakumazwe awayesakuba yinxalenye yeYugoslavia—elinye lanikezelwa ngowe-1999 eCroatia laza elaseSlovenia lanikezelwa ngowama-2006. Ndandingomnye womakad’ enetha ababebalisa ngendlela owaqala ngayo umsebenzi wokushumayela kula mazwe kwiminyaka engama-70 eyadlulayo.

Enyanisweni uYehova nguBawo onothando okulungeleyo ukuxolela iimpazamo zethu. Ndiyambulela ngokuba akalindi iziphoso zethu. (INdumiso 130:3) Ngokuqinisekileyo uye waba nobubele nenceba kum.

[Imibhalo esemazantsi]

[Umfanekiso okwiphepha 27]

Ukususela ekhohlo ukuya ekunene: Abazali bam, uBerta noFranz Moc̆nik, uMajda nam eMaribor eSlovenia ngeminyaka yee-1940

[Umfanekiso okwiphepha 29]

Ndikunye nenkosikazi yam uMarika