Iminikelo Evuyisa Intliziyo KaThixo

ELI asilobali limyoli kangako. UKumkanikazi uAtaliya waba ngukumkanikazi wakwaYuda ngobuqhophololo nokuphalaza igazi. Ekubeni wayecinga ukuba zibulewe zonke iindlalifa zasebukhosini, wazibeka njengokumkanikazi. Ngenkalipho, uYehoshebha owayeyinkosazana, nowayemthanda gqitha uYehova noMthetho wakhe, wafihla uYehowashe owayengowomlibo wasebukhosini. Yena nomyeni wakhe, uYehoyada owayenguMbingeleli Omkhulu, bayifihla le ndlalifa iminyaka emithandathu kwindawo ababehlala kuyo etempileni.—2 Kumkani 11:1-3.

Xa uYehowashe wayeneminyaka esixhenxe ubudala, uMbingeleli Omkhulu uYehoyada wayesele ekulungele ukubhukuqa uAtaliya owayengukumkanikazi ngondlela-mnyama. Wayilanda kwindawo awayeyifihle kuyo le nkwenkwana waza wayithwesa ubukhosi. UKumkanikazi uAtaliya ongendawo wankalwa phantsi ngaphandle kwetempile ngumkhosi wasebukhosini waze wafa, nto leyo eyazisa isiqabu novuyo kubantu. Izenzo zikaYehoyada noYehoshebha, zaba negalelo elikhulu ekuvuselelweni konqulo lokwenyaniso kwaYuda. Eyona nto ibalulekileyo, kukuba balondoloza umlibo wobukhosi bukaDavide, owawuza kuvelisa uMesiya.—2 Kumkani 11:4-21.

Ukumkani omtsha owayesandul’ ukumiselwa naye wayeza kwenza umnikelo owawuza kuvuyisa intliziyo kaThixo. Indlu kaYehova yayifuna ukuhlaziywa. Amabhongo ka-Ataliya okuba ngukumkanikazi wakwaYuda aphumela ekubeni ingahoywa itempile zaza nezinto ezazikuyo zaphangwa. UYehowashe wayezimisele ukuyilungisa nokuyihlaziya itempile. Ngaphandle kokulibazisa, wakhupha umyalelo wokuba kuqokelelwe imali ukuze kuvuselelwe indlu kaYehova. Wathi: “Yonke imali yeminikelo engcwele eziswe endlwini kaYehova, imali alinganiselwe ngayo ngamnye, imali yemiphefumlo ngokwexabiso lomntu, yonke imali ekuthe qatha entliziyweni yakhe ngamnye ukuba ayizise endlwini kaYehova, ababingeleli mabazithabathele yona, ngamnye kulowo amqhelileyo; yaye bona mabavale iintanda zendlu naphi na apho kufunyanwa khona uthanda.”—2 Kumkani 12:4, 5.

Abantu banikela ngokuvumayo. Noko ke, ababingeleli babengawukhuthalelanga umsebenzi wabo wokuhlaziywa kwetempile. Ngenxa yoko ukumkani wagqiba ekubeni awenze ngokwakhe wayalela ukuba yonke iminikelo ifakwe kwibhokisi ekhethekileyo. Wamisela uYehoyada ukuba avelele lo msebenzi, ibe ingxelo ithi: “UYehoyada umbingeleli wathabatha isikhongozelo waza wagqobhoza umngxuma esicikweni saso wasibeka ecaleni kwesibingelelo ngasekunene xa umntu engena endlwini kaYehova, yaye apho ababingeleli, abagcini-mnyango, babeka yonke imali eyayisiziswa endlwini kaYehova. Yaye kwakusithi kamsinya nje bakubona ukuba kukho imali eninzi esikhongozelweni, unobhala kakumkani nombingeleli omkhulu beze, bayibophe baze bayibale imali eyayifumaneka endlwini kaYehova. Yaye banikela ngemali eyayilinganisiwe ezandleni zabo babesenza umsebenzi ababemiselwe endlwini kaYehova. Baza bona bahlawula ngayo abo babesebenza ngomthi nabakhi ababesebenza endlwini kaYehova, nabo babexhola amatye nabaqingqi bamatye, bathenga namaplanga namatye aqingqiweyo okuvala iintanda zendlu kaYehova nako konke okwakuchithiwe endlwini ukuze ilungiswe.”—2 Kumkani 12:9-12.

Abantu basabela kakuhle kakhulu. Indlu yokunqula uYehova yahlaziywa kwaza kwanqulwa ngendlela enesidima. Yonke imali ekwakunikelwe ngayo yasetyenziswa kakuhle. UKumkani uYehowashe waqinisekisa ukuba yonke into ihamba kakuhle!

Namhlanje intlangano kaYehova ebonakalayo iyaqinisekisa ukuba yonke imali ekunikelwa ngayo isetyenziswa kakuhle ukuze ihambisele phambili unqulo lukaYehova, kwaye amaKristu okwenyaniso aye asabela njengamaSirayeli kuba aye anikela ngeentliziyo ezivumayo. Mhlawumbi ungomnye wabo baye banikela ukuze kuhanjiselwe phambili izilangazelelo zoBukumkani kulo nyaka wenkonzo uphelileyo. Makhe sithi gqabagqaba ngendlela eye yasetyenziswa ngayo iminikelo yenu.

UKUPAPASHA

Ehlabathini jikelele, kuye kwashicilelwa ezi mpapasho zilandelayo ukuze zifundwe okanye zisasazwe:

• Iincwadi ezingama: 47 490 247

• Iincwadana ezizizi: 6 834 740

• Iincwadana ezinemifanekiso ezili: 167 854 462

• Iikhalenda ezizizi: 5 405 955

• Amaphephancwadi ali: 1 179 266 348

• Amaphecana angama: 440 995 740

• Iividiyo ezizizi: 3 168 611

Umsebenzi wokushicilela wenziwa eAfrika, eAsiya, eMntla, eMbindi naseMzantsi Merika, kwiziqithi zePasifiki naseYurophu—kumazwe ali-19 ewonke.

“Igama lam ndinguKatelyn May. Ndineminyaka esibhozo ubudala. Ndinemali ezii-R192, ndicela nihlawulele ngayo oomatshini bokushicilela. Udade wenu oselula, uKatelyn.”

“Kwintlanganiso yentsapho siye saxubusha ngaba matshini batsha. Abantwana bethu abaneminyaka eli-11 neli-9 ubudala baye bagqiba ekubeni bacaphule kwimadlana yabo ukuze banikele. Umnikelo wabo siwuquke kulo wethu.”

UKWAKHA

Apha ngezantsi sinezakhiwo eziye zakhiwa ukuze kuxhaswe umsebenzi wamaNgqina kaYehova:

• IiHolo ZoBukumkani ezakhiwa kumazwe ahlelelekileyo: 2 180

• IiHolo ZeNdibano: 15

• AmaSebe: 10

• Amatshantliziyo amazwe ngamazwe akwinkonzo yexesha elizeleyo: 2 342

“Kule mpela-veki siye sanentlanganiso yethu yokuqala kwiHolo yoBukumkani entsha. Asikwazi kuzibamba yimincili kuba ngoku sinendawo efanelekileyo yokudumisa uBawo wethu, uYehova uThixo. Siyambulela uYehova nani ngokuzibek’ esweni iintswelo zethu ngokusakhela iiHolo zoBukumkani ezingakumbi. Ewe, iHolo yoBukumkani yethu iliqhayiya ngokwenene elumelwaneni.”—EChile.

“Abazalwana noodade bayalubulela uncedo abalufumana kwintlangano kaYehova. Nanamhla oku, sisathetha ngexesha elimnandi esalichitha nabazalwana ababesakha.”—EMoldova.

“Kutshanje mna nomkam siye sagqiba iminyaka engama-35 sitshatile. Sasicinga ngezipho esinokuthengelana zona kwesi sikhumbuzo, kodwa sagqiba ekubeni sinikele kuYehova nakwintlangano yakhe, kuba wawungenakuphumelela umtshato wethu ngaphandle kwakhe. Singathanda ukuba imali elapha isetyenziselwe ukuncedisa ekwakheni iHolo yoBukumkani kumazwe ahlelelekileyo.”

“Kutshanje ndiye ndafumana ilifa, ekubeni zimbalwa izinto endizisweleyo, ndicela ukuba le mali isetyenziselwe ukwakha iiHolo zoBukumkani, ezifuneka gqitha kwamanye amazwe.”

UKUNCEDA XA KUKHO INTLEKELE

Kule mihla yokugqibela iintlekele zifika zingabhungisanga. AmaNgqina kaYehova amaninzi anikela ngakumbi ukuze kuncedwe abazalwana bawo abakumazwe athwaxwe zezo ntlekele. Ukwenzela nje ukunikhumbuza, iminikelo yokunceda amaxhoba entlekele inikelwa njengomnikelo kumsebenzi owenziwa ehlabathini lonke. Kwezi ndawo zilandelayo amaNgqina kaYehova aye anceda amaxhoba entlekele:

• EAfrika

• EAsiya

• Kwiziqithi ezikwiCaribbean

• Kwiziqithi ezikulwandle lwePasifiki

“Mna nomyeni wam sinibulela kakhulu ngoncedo eniye nasithumelela lona xa besihlaselwe yinkanyamba. Siye sakwazi ukuxhoma indlu yethu. Kusivuyisile ukusabela kwenu ngokukhawuleza.”

“Igama lam ndinguConnor, ndineminyaka eli-11 ubudala. Xa ndabona intlekele eyabangelwa yitsunami, ndafuna ukunceda. Ndiyathemba ukuba lo mnikelo uya kubanceda abazalwana noodade.”

ABAKHONZI ABAKHETHEKILEYO BEXESHA ELIZELEYO

Kukho iqela lamaKristu akhonza kumakhaya aseBheteli okanye axakeke ngumsebenzi wokushumayela. Wambi amatshantliziyo axhaswa ngeminikelo yokuzithandela. Amanye awo akhonza:

• Njengabavangeli basemazweni: 2 635

• Abaveleli abahambahambayo: 5 325

• Kumakhaya aseBheteli: 20 092

“Ekubeni ndingenakukhonza eBheteli ngoku [inkwenkwana eneminyaka emihlanu ubudala] ndithe mandithumele lo mnikelo. Xa ndimdala ndiza kukhonza eBheteli.”

Ukuhambisela Phambili Imfundo YeBhayibhile

UYesu Kristu wathuma abalandeli bakhe ukuba ‘benze abafundi abantu beentlanga zonke.’ (Mateyu 28:19) Ekubeni ethobela amazwi akhe, amaNgqina kaYehova axakekile eshumayela isigidimi seBhayibhile kumazwe angama-235. Apapasha aze asasaze uncwadi lweBhayibhile ngeelwimi ezingama-413.

Enyanisweni, owona mnikelo ubalaseleyo anokunikela ngawo umKristu ukuze ancede abantu bafunde ngoThixo neenjongo zakhe, lixesha lakhe. AmaNgqina kaYehova anikela ngexesha namandla awo ukuze ancede abamelwane bawo. Ngesisa aye anikela nangemali, kwaye yonke iminikelo yawo eyahlukeneyo, iye yanegalelo ekwaziseni igama nenjongo kaYehova kuwo wonke umhlaba. Ngamana uYehova angaqhubeka eyisikelela imigudu eyenziwayo yokunceda abanye bamazi. (IMizekeliso 19:17) Ukukulungela ukunceda kuyayivuyisa intliziyo kaYehova!—Hebhere 13:15, 16.

[Ibhokisi ekwiphepha 28-30]

Iindlela Abanye Abakhetha Ukunikela Ngazo

IMINIKELO EYA KUMSEBENZI OWENZIWA EHLABATHINI LONKE

Abaninzi babekela bucala imali ethile okanye baqingqe imali abaza kunikela ngayo kwibhokisi ebhalwe “Iminikelo Eya Kumsebenzi Owenziwa Ehlabathini Lonke—Mateyu 24:14.”

Nyanga nganye, amabandla athumela le mali kwiofisi yamaNgqina kaYehova enyamekela ilizwe lawo. Iminikelo yokuzithandela inokuthunyelwa ngokungqalileyo kwiWatch Tower Bible and Tract Society of Pennsylvania, Attention Accounting Office, Private Bag X2067, Krugersdorp, 1740, South Africa, okanye kwiofisi yesebe yamaNgqina kaYehova enyamekela ilizwe lakho. Iitsheki ezithunyelwa kule adresi ingasentla zimele zibhalwe “Watch Tower.” Kusenokunikelwa ngezinto ezenziwe ngamatye anqabileyo okanye ezinye izinto ezixabisekileyo. Le minikelo ifanele iphelekwe yileta emfutshane echazayo ukuba yiminikelo.

UKUNIKELA OKUCETYIWEYO

Ukongezelela kwiminikelo yemali enikelwa phantsi kweemeko ezithile, zikho nezinye iindlela zokunikela kwinkonzo yoBukumkani ehlabathini lonke. Ezi ziquka:

I-inshorensi: IWatch Tower inokubhaliswa njengemele ifumane imali kwi-inshorensi yobomi okanye kwilungiselelo lemali yomhlala-phantsi.

Imali Eselugcinweni NeeBond: Kunokunikelwa ngemali eselugcinweni neebond kwiWatch Tower njengesipho.

Izindlu Nemihlaba: Izindlu nemihlaba enokuthengiswa inokunikelwa njengesipho okanye, kwimeko yendawo yokuhlala, ngokuzigcina zikwilungelo lalowo wenze umnikelo, onokuqhubeka ehlala kuzo ngethuba esaphila. Qhagamshelana neofisi yesebe ekwilizwe lakho ngaphambi kokubhalisa izindlu nemihlaba.

Iminqophiso Yamafa: Izinto okanye imali inokushiyelwa iWatch Tower ngomnqophiso welifa osemthethweni.

Ukuze ufumane inkcazelo engakumbi, unokuqhagamshelana neAccounting Office, ngokuyibhalela okanye ngokutsalela umnxeba, kwidilesi ebhalwe apha ngezantsi okanye kwiofisi yesebe lamaNgqina kaYehova enyamekela ilizwe lakho.

Accounting Office:

Watch Tower Bible and Tract Society of Pennsylvania

Private Bag X2067

Krugersdorp, 1740 South Africa

Inombolo Yomnxeba: (011) 761 1000

[Inkcazelo Ngomfanekiso okwiphepha 27]

Faithful video: Stalin: U.S. Army photo