Ngaba Uyakhumbula?

Ngaba uye wakuvuyela ukufunda iiMboniselo zakutshanje? Ukuba kunjalo, khawubone ukuba unokuyiphendula kusini na le mibuzo ilandelayo:

• Ziziphi ezinye zezizathu ezibangela ukuba kubekho ubungendawo obungaka namhlanje?

Esinye isizathu sezenzo zobungendawo kukuba abantu batyekele ebubini. (Genesis 8:21) Esinye kukuba abona bantu baninzi abanalwazi luchanileyo ngokuthanda kukaThixo. Ukongezelela, uSathana, umsunguli wobubi, uyangenelela kwimicimbi yabantu.—1/1, iphepha 4-6.

• Linokuba nemiphumo enjani ilizwi elithethwe ngexesha elifanelekileyo? (IMizekeliso 12:25)

Linokumkhuthaza lize limenze loo mntu athembele kulowo ulithethileyo. Kwakhona ngokubancoma abanye, siyancedakala kuba sibona iimpawu ezintle kubo.—1/1, iphepha 16-17.

• Ityeya yomnqophiso yayinantoni?

Yayinamacwecwe amabini amatye oMthetho kuquka nenxalenye ethile yemana. Emva kokuvukela kukaKora, intonga ka-Aron yabekwa kwityeya ukuze ibe ngumqondiso kwizizukulwana ngezizukulwana. (Hebhere 9:4) Intonga nemana zashenxiswa kwiTyeya ngaphambi kokuba kunikezelwe itempile kaSolomon.—1/15, iphepha 31.

• Kwakutheni ukuze kufuneke amaYuda omhla kaNehemiya eze neenkuni etempileni?

Lalingekho ilungiselelo lokuthezwa kweenkuni kuMthetho kaMoses. Kodwa ngomhla kaNehemiya kwakufuneka iinkuni ezininzi ukuze kutshiswe amadini esibingelelweni.—2/1, iphepha 11.

• Yintoni iMuratorian Fragment?

Yinxalenye yombhalo-ngqangi wesiLatini. Wabhalwa ngesiGrike ngasekupheleni kwenkulungwane yesibini yeXesha Eliqhelekileyo. Inoludwe lweencwadi ezamkelekileyo kwimibhalo engcwele yeZibhalo zamaKristu zesiGrike kuquka namagqabaza ezincwadini nababhali bazo.—2/15, iphepha 13-14.

• Kwakutheni ukuze uKumkanikazi wasePersi uVashti ale ukuza kukumkani? (Estere 1:10-12)

IBhayibhile ayiyichazi intsusa yesenzo sakhe. Bambi abaphengululi bacingela ukuba ukumkanikazi akazange athobele kuba engafuni ukuthob’ isidima sakhe phambi kwezihandiba zikakumkani ezizitshize ngentombi kaLudiza. Okanye mhlawumbi kuba wayeyimbelukazi wayengathobekanga, ngenxa yoko wayengumzekelo ombi owawuya kuphembelela abanye abafazi kuMaphondo amaPersi.—3/1, iphepha 9.

• Intlawulelo isisindisa njani?

Idini likaYesu linokusisindisa kwisono esisizuze njengelifa yaye linokusikhulula kwimiphumo ebulalayo yesono. (Roma 6:23) Eli dini liwenza amaKristu okwenyaniso ahlale enesazela esicocekileyo. Yaye xa sibonisa ukholo kwintlawulelo asibi naloyiko ngokuphathelele ukuma kwethu noThixo. (1 Yohane 2:1)—3/15, iphepha 8.

• Yintoni esiyifundayo kuMthetho owalela ukungaphekwa kwetakane ngobisi lukanina? (Eksodus 23:19)

Ukupheka itakane yayisisithethe sobuhedeni esasisenziwa ukuze kuze imvula. (Levitikus 20:23) UThixo wenza ubisi ukuze londle itakane lize likhule. Ukupheka itakane ngobisi lukanina bekuya kubonisa ukungalisiso ulwalamano olumiselwe nguThixo phakathi kwetakane nonina. Umthetho onxamnye noku ubonisa imfesane anayo uThixo.—4/1, iphepha 31.