Abaphumelele EGiliyadi Bafumana Imfundo Eshukumisa Iintliziyo

NGOSEPTEMBA 9, 2006, uthweso-zidanga lweklasi ye-121 yeSikolo SeBhayibhile SeWatchtower SaseGiliyadi lwenziwe kwiZiko Lemfundo LeWatchtower ePatterson, eNew York. Ibilucwangciso olukhuthaza gqitha.

UGeoffrey Jackson, olilungu leQumrhu Elilawulayo lamaNgqina kaYehova, uvule ucwangciso ngokwamkela abafundi abangama-56 kunye nabaphulaphuli abavela kumazwe ngamazwe abangama-6 366. Uxubushe INdumiso 86:11, ethi: “Ndiyalele, Yehova, ngendlela yakho. Ndiya kuhamba enyanisweni yakho. Yenze imanyane intliziyo yam ukuba iloyike igama lakho.” UMzalwan’ uJackson uchaze izinto ezintathu ezigxininiswa yile ndinyana. Uthe: “Kwisivakalisi sokuqala, ngumyalelo; kwesesibini, kukuwusebenzisa; yaye kwesesithathu, yintshukumisa. Ezi zinto zintathu zibalulekile ngokukhethekileyo kuni bavangeli basemazweni njengoko niza kuya kwizabelo zenu.” Emva koko ubize izithethi ezilandelayo nabo bebeza kuqhuba udliwano-ndlebe abaye bazigxininisa zonke ezi zinto zintathu.

Imfundiso Ekhuthazayo

UWilliam Malenfant, osebenza kwikomkhulu lamaNgqina, uye wanikela intetho enomxholo othi “Obona Bomi Bumnandi Onokubuphila.” Uthethe ngomzekelo kaMariya, udadeboMarta. Ngeny’ imini xa uYesu wayetyelele kwikhaya labo, uMariya wakhetha ukuhlala ezinyaweni zakhe ukuze amphulaphule ibe yayiyeyona nto iphambili kuye leyo. UYesu wathi kuMarta: “UMariya unyule isahlulo esilungileyo, yaye asiyi kususwa kuye.” (Luka 10:38-42) Isithethi sithe: “Khawufan’ ucinge nje. UMariya uya kuyikhumbula ngonaphakade into yokuba yena wahlala ezinyaweni zikaYesu waza waphulaphula inyaniso emangalisayo—ngenxa nje yokuba enze ukhetho olufanelekileyo.” Emva kokuncoma abo baphumeleleyo ngokhetho oluhle abalwenzileyo, uthe: “Ukhetho lwenu lunikhokelele kobona bomi bumnandi eninokubuphila.”

Emva koko uAnthony Morris, olilungu leQumrhu Elilawulayo, uxubushe umxholo othi “Yambathani INkosi UYesu Kristu,” osekelwe kwey abaseRoma 13:14. Sinokuyenza njani loo nto? ‘Ukwambatha iNkosi uYesu Kristu’ kuquka ukuxelisa indlela iNkosi eyayizenza ngayo izinto. Loo nto ithetha ukuxelisa umzekelo nesimo sengqondo sikaYesu. Isithethi sithe: “UYesu wayebenza bakhululeke abantu, kuba wayenomdla wokwenene kubo, ibe nabo babeyibona loo nto.” Emva koko isithethi siye sathetha ngendlela abafundi abaye bangenelwa ngayo kwiiklasi zaseGiliyadi “ukuze . . . nicacelwe . . . engqondweni koko bukuko ububanzi nobude nokuphakama nobunzulu” benyaniso, njengoko eyabase-Efese 3:18 isitsho. Kodwa ubakhumbuze ngendinyana 19, ethi “nilwazi nothando lukaKristu olugqwesa ulwazi.” UMzalwan’ uMorris ubongoze abafundi ngelithi: “Njengoko niqhubeka nifundisisa, camngcani ngendlela eninokuwuxelisa ngayo umsa wothando kaKristu nize ‘nambathe iNkosi uYesu Kristu.’”

Amacebiso Okugqibela Avela Kubahlohli

Intetho elandelayo inikelwe ngumhlohli waseGiliyadi uWallace Liverance, kwaye umxholo wakhe ubusekelwe kw iMizekeliso 4:7. Uthe ngoxa ubulumko bukaThixo buyeyona nto ibalulekileyo, simele ‘sizuze nokuqonda,’ okubandakanya ukudibanisa izibakala ezahlukeneyo uze ukwazi ukubona indlela ezinxibelelana ngayo, utsho ukwazi nokuqonda izinto ezibalulekileyo. Isithethi sibonise ukuba ukuzuza ukuqonda kusenza sonwabe. Ngokomzekelo, ngemihla kaNehemiya, abaLevi ‘babecacisa umthetho’ ukuze abantu ‘baqonde.’ Emva koko, abantu baqhubeka “baba nemihlali kakhulu, kuba babewaqondile amazwi ababewazisiwe.” (Nehemiya 8:7, 8, 12) UMzalwan’ uLiverance uqukumbele ngokuthi: “Uvuyo lubangelwa kukuqonda iLizwi likaThixo eliphefumlelweyo.”

UMark Noumair, naye ongumhlohli waseGiliyadi, unikele intetho ethi “Ngubani Kanye Kanye Utshaba Lwakho?” Emfazweni, amajoni amaninzi aye abulawe kukudutyulwa ngoogxa bawo ngempazamo. Ubuze wathi: “Kuthekani ngemfazwe yokomoya esikuyo? Ukuba asilumkanga, sisenokungalwazi olona tshaba lwethu size sizibone sele sisenzakalisa amajoni akwicala lethu.” Umona uyabaphazamisa abanye abantu. Wabangela ukuba uKumkani uSawule azame ukubulala uDavide, umzalwana wakhe, ngoxa olona tshaba lwakhe yayingamaFilisti. (1 Samuweli 18:7-9; 23:27, 28) Isithethi siqhubeke sathi: “Kuthekani ukuba nikhonza nomvangeli wasemazweni oneziphiwo eziliqela? Ngaba uya kulenzakalisa ijoni elikwicala lakho ngokuligxiba, okanye ngaba uya kuyamkela into yokuba bakho abanye abantu abaya kukwegqitha kwizinto ezahlukeneyo? Ukuqwalasela iimpazamo zabanye kunokusenza siphele sele singasazi nokuba ngubani kanye kanye utshaba lwethu. Yilwani nolona tshaba lwethu, uSathana.”

Amava Amnandi Nodliwano-ndlebe Olwakhayo

Intetho elandelayo, ebinomxholo othi, “Yenza Umsebenzi Womvangeli,” inikelwe ngumhlohli waseGiliyadi uLawrence Bowen kwaye ibiquka udliwano-ndlebe namava. Owona msebenzi womvangeli wasemazweni oqeqeshwe eGiliyadi kukushumayela iindaba ezilungileyo, yaye le klasi iyenzile loo nto naphi apho ibifumana khona abantu.” Kubaliswe amava amnandi aza alinganiswa.

Emva koko kulandele iintetho ezimbini ezinikelwe nguMichael Burnett noScott Shoffner, bobabini abakhonza eBheteli. Baye badlan’ indlebe namalungu eeKomiti Zamasebe aseOstreliya, eBarbados, eKorea, naseUganda. Amagqabaza amalungu ezi komiti abonise imigudu eyenziwayo yokunyamekela iimfuno zabavangeli basemazweni, kuquka ukubalungiselela indawo yokuhlala kunye nonyango olufanelekileyo. Amalungu eekomiti abethelele isibakala sokuba ukuze abavangeli basemazweni baphumelele kumsebenzi wabo bafanele baziqhelanise nezinto zaloo ndawo babelwe kuyo.

Umqukumbelo Ovus’ Umdla Nokhuthazayo

Intetho eyintloko kolu cwangciso ebinomxholo othi “Yoyika UThixo Uze Umzukise,” inikelwe nguJohn E. Barr, olilungu leQumrhu Elilawulayo elisele liligqala. Uxubushe ISityhilelo 14:6, 7, esithi: “Ndabona enye ingelosi iphaphazela esazulwini sezulu, ineendaba ezilungileyo ezingunaphakade ukuba izivakalise njengesigidimi esichulumancisayo kwabo bahleli emhlabeni, nakuzo zonke iintlanga nezizwe neelwimi nabantu, isithi ngelizwi elikhulu: ‘Moyikeni uThixo nimzukise, kuba lifikile ilixa lokugweba kwakhe.’”

UMzalwan’ uBarr ubongoze abafundi ukuba bakhumbule izinto ezintathu ngokuphathelele loo ngelosi. Okokuqala, kwakufuneka ivakalise iindaba ezilungileyo zokuba ngoku uKristu uyalawula kwaye unegunya elipheleleyo loBukumkani. Isithethi sithe: “Seyiseke ngokupheleleyo ukuba uye wabekwa etroneni ngowe-1914. Ngenxa yoko, ezi ndaba zimnandi zimele zivakaliswe kuwo wonke umhlaba.” Okwesibini, ingelosi yathi: “Moyikeni uThixo.” Isithethi siye saxelela abo baphumeleleyo ukuba kufuneka bancede izifundo zabo ukuba zibe nentlonelo ngoThixo ukuze zingamoni. Okwesithathu, ingelosi yayalela yathi: ‘Mzukiseni uThixo.’ Abafundi babongozwe ngala mazwi: “Ningaze nilibale ukuba sikhonza ngenjongo yokuzukisa uThixo, kungekhona iziqu zethu.” Xa ebethetha ‘ngelixa lomgwebo,’ uMzalwan’ uBarr uthe: “Siya sisondela kwixesha apho kuya kuphunyezwa umgwebo wokugqibela. Baninzi abantu kwintsimi yethu abasafanele basive isigidimi seendaba ezilungileyo ngaphambi kokuba bashiywe lixesha.”

Athe esankenteza njalo loo mazwi ezindlebeni zabaphumeleleyo abangama-56, banikwa iidiploma zabo baza bathunyelwa eziphelweni zomhlaba. Iintliziyo zabo kunye nezabanye abebezimase lo msitho zichukunyiswe kakhulu sisiluleko esikhuthazayo abasifumene ngolu suku lumnandi.

[Ibhokisi ekwiphepha 17]

INKCAZELO ENGABAFUNDI

Inani lamazwe abavela kuwo: 6

Inani lamazwe abathunyelwe kuwo: 25

Inani labafundi: 56

Umlinganiselo wobudala: 35,1

Umlinganiselo weminyaka besenyanisweni: 18,3

Umlinganiselo weminyaka bekwinkonzo yexesha elizeleyo: 13,9

[Umfanekiso okwiphepha 18]

Iklasi Ye-121 Yabaphumelele KwiSikolo SeBhayibhile SeWatchtower SaseGiliyadi

Kuludwe olungezantsi, kuqalwa ukusuka kuluhlu olungaphambili ukusa kolungasemva, yaye amagama adweliswe ukusuka ekhohlo ukusa ekunene kuluhlu ngalunye.

(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.