Ibali Lobomi

Sazimisela Ukubufeza Ubulungiseleli Bethu

Kubalisa uLena Davison

Ilizwi lingavakali, umqhubi wenqwelo-moya wathi: “Kunkungu. Andiboni kakuhle.” Kungekudala, akazange akwazi ukuyilawula inqwelo-moya encinane esasikhwele kuyo yaye wayethe folokohlo esitulweni, waf’ isiqaqa. Umyeni wam nakuba wayengazi nto ngeenqwelo-moya wazama ukumvusa. Ngaphambi kokuba ndikubalisele ngokusinda kwethu chebetshu, makhe ndikuchazele okwabangela ukuba sibe kuloo nqwelo-moya eyayiphezu kwePapua New Guinea, enye yezona ndawo zikwanti emhlabeni.

NDALIBONA ilanga ngowe-1929 eOstreliya, yaye ndakhulela eSydney, ikomkhulu laseNew South Wales. UTata, uBill Muscat wayeliKomanisi kodwa into engaqhelekanga kukuba wayekholelwa nakuThixo. Ngowe-1938 wavuma ukutyobela isicelo sokuba uJoseph F. Rutherford, owayesuka kwikomkhulu lehlabathi lamaNgqina kaYehova, aye kushumayela kwiHolo yeDolophu yaseSydney.

UTata wathi: “Ufanele ukuba unayo into ebalulekileyo aza kuyithetha.” Emva kweminyaka esibhozo, sayiqonda intsingiselo yalo mazwi. UTata wamema uNorman Bellotti owayengumshumayeli wexesha elizeleyo wamaNgqina kaYehova ukuze bancokole ngeBhayibhile. Ekhaya sayamkela inyaniso eseBhayibhileni yaye kungabanga thuba lide sasisiya entsimini.

Phakathi kwiminyaka yee-1940 ndayeka ukufunda ukuze ndiye kunyamekela umama owayenesifo esinganyangekiyo. Ndandiziphilisa ngokuthunga impahla ndize ndiyithengise. Ngokuhlwa ngeMigqibelo, mna nodadewethu omkhulu, uRose, sasidla ngokuhamba neqela loovulindlela, sinikel’ ubungqina esitratweni ngaphandle kweHolo yeDolophu yaseSydney. Ngowe-1952 ubhuti, uJohn, waphumelela kwisikolo sabavangeli basemazweni saseGiliyadi esasiseUnited States yaye wabelwa ukuba aye kushumayela ePakistan. Ndandiyithanda intsimi yaye ndandifuna ukulandela umzekelo wakhe. Ngoko ke, ngonyaka olandelayo ndaba nguvulindlela othe ngxi.

Umtshato Nokuba Ngumvangeli Wasemazweni

Kungekudala emva koko, ndadibana noJohn Davison, owayesebenza kwiofisi yesebe lamaNgqina kaYehova eOstreliya. Ndachukumiseka yindlela awayethobeke ngayo, kukuzimisela kwakhe kodwa engacel’ injezu nokuziphatha kwakhe kakuhle. Ebudeni beMfazwe Yehlabathi II wavalelwa entolongweni kangangezihlandlo ezithathu ngenxa yokungangeneleli kwakhe kwezobupolitika. Sagqiba ekubeni ukushumayela kube ngumsebenzi wobomi bethu bonke.

NgoJuni 1955 ndatshata noJohn. Sathenga ibhasi sinenjongo zokuyitshintsha ibe yindlu enamavili. Usukelo lwethu yayikukuyisebenzisa xa sishumayela kwiindawo ezikwanti zaseOstreliya. Kunyaka olandelayo kwacelwa amaNgqina anokufudukela eNew Guinea, ekumntla-mpuma wesiqithi esikhulu esikumntla weOstreliya.a Saya kweso sabelo.

Ngelo xesha, ekuphela kwendlela owawunokungena ngayo eNew Guinea kungokutyobela isivumelwano sokufumana umsebenzi wengqesho ixesha elizeleyo, ngoko ke uJohn wafuna umsebenzi. Wafumana umsebenzi kwindawo yokuchwela amaplanga eNew Britain, kwisiqithi esincinane esiyinxalenye yeNew Guinea. NgoJulayi 1956, saya kwisabelo sethu esitsha eRabaul, eNew Britain. Apho salinda kangangeentsuku ezintandathu silinde iphenyane elaliza kusisa eWaterfall Bay.

Intsimi YaseWaterfall Bay

Emva kweentsuku eziliqela ezazinamagingxigingxi sade safika eWaterfall Bay, kwitheku elikhulu elimalunga neekhilomitha ezingama-240 kumzantsi weRabaul. Kwakukho indawo enkulu yokuchwela amaplanga. Ngobo busuku xa bonke abasebenzi babehleli etafileni umphathi wathi: “Mnu. noNksk. Davison, ngokomthetho wale nkampani, abantu abasebenza bafanele bachaze unqulo lwabo.”

Sasiqinisekile ukuba akukho ntw’ injalo, nto nje kuba sasingatshayi, basikrokrela. UJohn wamphendula wathi, “SingamaNgqina kaYehova.” Emva koko umphathi akazange atsho nelimdaka. La madoda ayengamagqala eMfazwe Yehlabathi II yaye ayewachasile amaNgqina ngenxa yokuba engazange aye emfazweni. Ukususela ngoko la madoda ayekhangela nantoni na eyayiza kubenza nzima ubomi bethu.

Ekuqaleni umphathi akazange afune ukusinika ifriji nesitovu nakuba sasinelungelo lokuzifumana. Ukutya kwethu konakala yaye sanyanzeleka ukuba sipheke ngesitovu esonakeleyo esasisichole ehlathini. Abemi balo dolophana bayalelwa ukuba bangasithengiseli imifuno, ngoko ke sasiphila nangayiphi na esasiyifumana. Kwakhona sasibekw’ esweni kukhangelwa ukuba asifundisi bantu iBhayibhile na. Ndaba nesifo seengcongconi.

Sekunjalo, sazimisela ukubufeza ubulungiseleli bethu. Sacela amadoda amabini esasisebenza nawo ayethetha isiNgesi ukuba asifundise isiMelanesian Pidgin, ulwimi olwaluthethwa kulo mmandla. Thina sawafundisa iBhayibhile. Ngeempelaveki “sasibuka iindawo.” Njengokuba sasihamba sasishumayela kuye nawuphi na umntu wale dolophana esasinokumfumana. La madoda sasiwafundisa ayesinceda ekuguquleleni. Sasiwela imilambo eneengwenya ezigudle umlambo nezigcakamele ilanga. Sakhe sasinda cebetshu, ngaphandle koko azizange zisenze nto ezo ngwenya zoyikekayo.

Ukwenza Izixhobo Zokufundisa

Njengokuba umsebenzi wokushumayela wawusanda, sagqiba ekubeni sichwetheze isigidimi seBhayibhile size siwudlulisele kubantu abanomdla. La madoda sasiwafundisa asinceda ekuguquleleni esi sigidimi. Sasichitha iingokuhlwa ezininzi sichwetheza amaphecana amaninzi size siwadlulisele ebantwini nakumaphenyane adlulayo.

Ngowe-1957, uJohn Cutforth, umveleli ohambahambayo ongumakad’ enetha wasityelela waza wasikhuthaza.b Wasicebisa ukuba sisebenzise imifanekiso xa sifundisa abantu abangakwaziyo ukufunda iBhayibhile. Senza imizobo ecacileyo, ukuze sicacise iimfundiso ezisisiseko zeBhayibhile. Kamva sasichitha iiyure eziliqela sikhuphela le mifanekiso kwincwadi yokubhala amanqaku. Mntu ngamnye esasimfundisa sasimnika umbhalo wakhe awayewusebenzisa xa naye efundisa abanye. Le ndlela yokufundisa ekugqibeleni yayisetyenziswa kwelo lizwe.

Emva kokuba sineminyaka emibini siseWaterfall Bay, sayigqiba iminyaka esasimele siyiphangele yaye savumeleka ngokusemthethweni ukuba singahlala kwelo lizwe. Ngoko ke sasamkela isabelo sokuba ngoovulindlela abakhethekileyo.

Sabuyela ERabaul

Sisinge emantla eRabaul, iphenyane lethu lema ngakumasimi ekoko eWide Bay. Abanini bamasimi, ababefuna ukuthabatha umhlala-phantsi baze babuyele eOstreliya babefuna ukuqesha uJohn njengomphathi waloo masimi. Sasiwubawela lo msebenzi, kodwa sathetha ngalo nto ngobo busuku yaye savumelana ukuba sasingazelanga ukufuna izinto eziphathekayo eNew Guinea. Sasizimisele ukubufeza ubulungiseleli bethu singoovulindlela. Ngoko ke ngosuku olwalandelayo sachazela umnini wamasimi ngesigqibo sethu yaye saphinda sakhwel’ iphenyane sanduluka.

Emva kokuba sifikile eRabaul, sasebenza neqela elincinane lamaNgqina asuka kwamanye amazwe afudukele kulo mmandla. Abantu balo mmandla babenomdla kakhulu kwisigidimi soBukumkani yaye saqalisa izifundo zeBhayibhile ezininzi. Iintlanganiso zamaKristu zaziqhutyelwa kwiholo eqeshwayo yaye kwakusiza abantu abali-150. Abantu abaninzi bayamkela inyaniso yaye bancedisa ekusasazweni kweendaba ezilungileyo zoBukumkani bukaThixo nakwezinye iinxalenye zelizwe.—Mateyu 24:14.

Kwakhona satyelela eVunabal, idolophana emalunga nekhilomitha ezingama-50 ukusuka eRabaul yaye apho kwakukho iqela labantu ababenomdla eBhayibhileni. Umntu othile ongumKatolika wakuphawula oko. Ekunye nabantu becawa yakhe, waphazamisa isifundo sethu seeveki ngeeveki seBhayibhile waza wasigxotha kule dolophana. Xa saphawula ukuba kusenokubakho ingxaki nakwiveki elandelayo, sacela amapolisa ukuba asipheleke.

Ngaloo mini, izitrato zalapho zazizaliswe ngamaKatolika eqhankqalaza. Uninzi lwawo lwaluphethe amatye luza kusigibisela ngawo. Umfundisi wayehlanganise amadoda ale dolophana. Amapolisa asiqinisekisa ukuba sinelungelo lokuqhuba iintlanganiso, ngoko ke avula indlela phakathi kweso sihlwele. Noko ke, kungekudala siqalise iintlanganiso zethu, umfundisi waphembelela ihlokondiba. Amapolisa akazange akwazi ukulilawula eli hlokondiba; ngenxa yoko umphathi wamapolisa wasiyalela ukuba sihambe kule ndawo waza wasikhokelela ezimotweni.

Eli hlokondiba lasingqonga, lisifungela, litshica phantsi yaye lisonge amangqindi, ngoxa yena umfundisi esonge izandla kwaye encumile. Emva kokuba sisindile, umphathi wamapolisa wathi uyaqala ukuyibona into enjengale. Nangona abantu baseVunabal babeloyika eli hlokondiba, omnye umfundi weBhayibhile wayimela inyaniso. Ukususela ngoko, abantu abaninzi baseNew Britain bayamkela inyaniso.

Ukuqalisa Komsebenzi ENew Guinea

NgoNovemba 1960, sabelwa eMadang, idolophu enkulu kumntla weNew Guinea, isiqithi esikhulu. Mna noJohn sasithenjiswa ngomsebenzi wengqesho izihlandlo ezininzi. Enye inkampani yayifuna ndibe ngumalathisi kwivenkile yayo yempahla. Enye yayifuna ukuba ndilungise iimpahla. Amanye amabhinqa awayefudukele apha andithembisa ngokundinceda ngemali ndivule ivenkile yokuthung’ impahla. Sicinga ngezona zinto zibalulekileyo, ngentlonelo asizange sikwamkele oku.—2 Timoti 2:4.

Intsimi yaseMadang yayinabantu abanomdla yaye kungekudala kwabakho ibandla. Sasibetha ngezikaTshiwo okanye sihambe ngesithuthuthu sisiya kushumayela kwiidolophana ezisemaphandleni yaye elo phulo lalithabatha iintsuku eziliqela. Njengokuba sihamba sidibana nezindlu ezingasahlali bantu, sasilala kwimfumba yengca esikwe ematyholweni. Ekuphela kwezinto esasinazo kukutya okusezitotini, iibhiskithi nenethi yokuzikhusela kwiingcongconi.

Kolunye uhambo satyelela iqela elinomdla laseTalidig, idolophana emalunga neekhilomitha ezingama-50 kumntla weMadang. Njengokuba eli qela lalisenza inkqubela ngokomoya, inqununu yesikolo sasekuhlaleni ayizange ivume ukuba kufundwe iBhayibhile kwizakhiwo zikarhulumente. Kamva, yantyontyela amapolisa ukuba atshabalalise izindlu zabo aze abagxothe baye emahlathini. Noko ke, usibonda waselumelwaneni walamkela eli qela ukuba lihlale apho. Ekuhambeni kwexesha loo sibonda unobubele wayamkela inyaniso yaye kulo mmandla kwakhiwa iHolo yoBukumkani yezi mini.

Umsebenzi Wokuguqulela Nowokutyelela Amabandla

Emva nje kweminyaka emibini sifike eNew Britain ngowe-1956, mna noJohn sacelwa ukuba siguqulele iincwadi zeBhayibhile eziliqela kwisiMelanesian Pidgin. Lo msebenzi waqhubeka kangangeminyaka. Ngoko ke ngowe-1970 samenywa ukuba siye kuba ngabaguquleli kwiofisi yesebe ePort Moresby, ikomkhulu lePapua New Guinea. Kwakhona savula iiklasi zokufundisa ulwimi.

Ngowe-1975 sabuyela eNew Britain ukuze sityelele amabandla. Kangangeminyaka eli-13 eyalandelayo sasihamba ngenqwelo-moya, ngemoto okanye sibethe ngezikaTshiwo phantse kuwo wonke ummandla weli lizwe. Siye sanamava amaninzi awoyikisayo kuquka nala asekuqaleni eli nqaku. Ngesi sihlandlo, xa sasiza kufika eKandrian, eNew Britain, umqhubi wenqwelo-moya waphelelwa ngamandla, elunywa sisisu. Ngoxa inqwelo-moya yayizihambela, yajikeleza phezu kwehlathi ngoxa uJohn wayezama ukuvusa umqhubi owayengekho zingqondweni. Ekugqibeleni waphaphama, amehlo ayeka ukuba luzizi yaye yehla ikhawulezile. Kwakhona waphinda waphelelwa ngamandla.

Savulekelwa Ngomnye Umnyango

Ngowe-1988 sathunyelwa ePort Moresby siye kuncedisa kumsebenzi owandayo wokuguqulela kwelo sebe. Sasingabantu abangama-50 sihlala, sisebenza njengentsapho kwelo sebe yaye sasiqeqesha nabaguquleli abatsha. Mntu ngamnye wayehlala egumbini elincinane. Mna noJohn sasihlala siwuvulile umnyango sisenzela ukuba amalungu entsapho neendwendwe zingene ukuze sizazi. Sasiyintsapho emanyeneyo ngenxa yoko sasithandana yaye sincedana.

Ngowe-1993 uJohn wabulawa yintliziyo. Ndandivakalelwa kukuba enye inxalenye yam ayisekho. Besineminyaka engama-38 sitshatile yaye ixesha elininzi besilichitha kunye sishumayela. Nangoku ndisazimisele ukuqhubeka ngamandla endiwanikwa nguYehova. (2 Korinte 4:7) Ucango lwegumbi endihlala kulo lusahlala luvuliwe yaye abasebatsha bayandityelela. Unxulumano olwakhayo luyandinceda ukuba ndihlale ndinembono elungeleleneyo.

Ngenxa yempilo, ngowama-2003 ndafumana isabelo esitsha kwiofisi yesebe yaseSydney, eOstreliya. Ngoku ndineminyaka engama-77 ubudala, ndisasebenza kwiSebe Lokuguqulela yaye ndisaxakekile kumsebenzi wokushumayela. Abahlobo bam, abantwana nabazukulwana bokomoya bandenza ndihlale ndivuya.

Umnyango wegumbi endihlala kulo eBheteli usahlal’ uvuliwe yaye ndiba neendwendwe iintsuku ezininzi. Xa umnyango wam uvaliwe, abantu bayankqonkqoza beze kukhangela undonakele. Logama nje ndisaphila, ndizimisele ukubufeza ubulungiseleli ndize ndikhonze uThixo wam, uYehova.—2 Timoti 4:5.

[Imibhalo esemazantsi]

[Iimaphu ezikwiphepha 18]

(Ukuba ufuna inkcazelo ehlahlelwe kakuhle, yiya kwimpapasho)

NEW GUINEA

AUSTRALIA

Sydney

INDONESIA

PAPUA NEW GUINEA

Talidig

Madang

PORT MORESBY

NEW BRITAIN

Rabaul

Vunabal

Wide Bay

Waterfall Bay

[Inkcazelo]

Map and globe: Based on NASA/Visible Earth imagery

[Umfanekiso okwiphepha 17]

Ndikunye noJohn endibanweni yesithili eLae, eNew Guinea, ngowe-1973

[Umfanekiso okwiphepha 20]

Ndikwisebe lasePapua New Guinea, ngowama-2002