Ngaba Ubusazi?

Kwakutheni ukuze uYesu avule amehlo endoda eyayiyimfama ngokuthe ngcembe?

KuMarko 8:22-26, sifunda ngoYesu evula amehlo endoda eyimfama eBhethesayida. Le ngxelo ithi uYesu waqala ngokuyitshicela le ndoda emehlweni waza wayibuza ukuba ibona ntoni. Indlela le ndoda eyaphendula ngayo yabonisa ukuba ididekile: “Ndibona abantu, kuba ndibona, okungathi yimithi kodwa kuyahambahamba.” Wandula ke uYesu wabeka izandla zakhe kwakhona emehlweni ale ndoda yaza: ‘Yabona ngokucacileyo, yaphiliswa, yabona yonk’ into kakuhle.’ UYesu wayiphilisa le ndoda ngokuthe ngcembe. Kwakutheni ukuze enjenjalo?

IBhayibhile ayiwuphenduli ngokungqalileyo lo mbuzo kodwa sinokuzicingela ngokusuka kule meko yale ndoda. Ukuqala kwayo ukubona emva kokuba ibe yimfama kangangeminyaka emininzi—okanye ubomi bayo bonke—yenye yezinto ezabangela ukuba iphiliswe ngokuthe ngcembe. Ngokomzekelo: Amahashe amancinane ayesebenza emgodini, ayeqhelene nobumnyama kangangokuba xa ephuma phantsi komhlaba kwakufuneka ahlale imini yonke ukuze aqhelane nokukhanya. Kubekele phi ke kumntu ongaboniyo kuthabatha ixesha elide ukuze aphinde abone. Namhlanje, oogqirha botyando baye batyanda abantu abambalwa abazimfama baye bakwazi ukulungisa amehlo abo ukuze baphinde babone. Noko ke, izigulana ziye zixakwe zizinto ezininzi ezizibonayo. Ngenxa yokuba zibona izinto ezininzi eziyimibalabala, zimile ngeendlela ezahlukahlukeneyo yaye bezibona ngendlela engafaniyo, ziyadideka zide zingazazi nezinto eziqhelekileyo. Ekuhambeni kwexesha ingqondo iyakuchazela le nto uyibonayo.

Ukuphilisa kukaYesu le ndoda ngokuthe ngcembe kubonisa ukuba wayeyithanda. Ekugqibeleni le ndoda ‘yayibona yonk’ into kakuhle.’

Ngomhla kaYesu kutheni ukufundwa komsongo kwakungeyondlwan’ iyanetha?

Ngokuqhelekileyo amaphepha awayesetyenziswa ukwenza umsongo ayesusela kwiisentimitha ezingama-23 ukuya kwezingama-28 ubude neesentimitha ezili-15 ukuya kwezingama-23 ububanzi. La maphepha ayedityaniswa aze ancanyathiselwe okanye athungelwe. Ngamanye amaxesha kwakusetyenziswa amaphepha amade kunala. UmSongo Wolwandle Olufileyo kaIsaya ngemicu eli-17 oluziimitha ezisixhenxe ubude. Umsongo kaIsaya uYesu awayewusebenzisa kwindlu yesikhungu eNazarete nawo unobude obufanayo.—Luka 4:16, 17.

Ngokuphathelele le ngxelo, uAlan Millard uthi kwincwadi yakhe ethi Discoveries From the Time of Jesus: “Umfundi ubamba incwadi [umsongo] aze awuvule ngesandla sakhe sasekhohlo, ngasekupheleni kwawo ngasekunene uyawuvala kwakhona njengokuba efunda umqulu ngamnye. Ukuze atyhile uIsaya 61, isahluko awasifunda kwindlu yesikhungu, uYesu kwafuneka avule imisongo emininzi aze aphinde ayivale.”

Ngelo xesha kwakungekho sahluko nendinyana kwincwadi kaIsaya njengokuba kunjalo namhlanje. Xa umsongo kaIsaya wanikwa uYesu kwindlu yesikhungu eNazarete kwafuneka ayikhangele le ndawo ngoku ekuthiwa kwiiBhayibhile zethu nguIsaya 61:1, 2. UYesu wakhawuleza “wayifumana le ndinyana” nto leyo ebonisa ukuba wayeqhelene neLizwi likaThixo.