Ngaba Uyakhumbula?
Ngaba uye wakuvuyela ukufunda iiMboniselo zakutshanje? Khawubone ukuba unokuyiphendula kusini na le mibuzo ilandelayo:
• Ziziphi ezinye iingxaki ezinzima aye ajamelana nazo amanye amaKristu emva kokutshata, ibe yintoni amele azabalazele ukuyenza?
Wambi amaKristu asenokufumanisa ukuba zimbalwa izinto afanelana ngazo namaqabane awo omtshato. Ngenxa yokwazi ukuba uqhawulo-mtshato olungekho zibhalweni alusosicombululo, aye asebenze nzima ukuze alondoloze imitshato yawo.—4/15, iphepha 17.
• Ziziphi iingxaki anokujamelana nazo umKristu ohlala kwikhaya labalupheleyo?
Usenokungaliqheli ibandla lendawo ahlala kuyo. Abaninzi abahlala kwelo khaya basenokuba neenkolelo ezahlukileyo kwezakhe baze bazame ukumbandakanya kwizinto zonqulo lwabo. Izalamane zakhe namalungu ebandla elikuloo ndawo ahlala kuyo amele azazi ezi ngxaki aze amnyamekele.—4/15, iphepha 25-27.
• Ngawaphi amanyathelo amane anokunceda amaqabane omtshato alungise iingxaki zawo?
Bekani ixesha lokuxubusha ngeengxaki. (INtshu. 3:1, 7) Phalaza uluvo lwakho ngokunyaniseka nangentlonelo. (Efe. 4:25) Liphulaphule iqabane lakho uze uhlonele indlela elivakalelwa ngayo. (Mat. 7:12) Fikelelani kwisicombululo nize nisebenzisane ukusiphumeza. (INtshu. 4:9, 10)—5/1, iphepha 10-12.
• Xa uYesu wayesithi masithandazele ukuxolelwa amatyala ethu, ngawaphi la matyala wayethetha ngawo?
Xa sithelekisa uMateyu 6:12 noLuka 11:4 sitsho sibone kakuhle ukuba uYesu wayengathethi ngamatyala emali. Wayebhekisela kwizono zethu. Simele sixelise uThixo sikulungele ukuxolela abanye.—5/15, iphepha 9.
• Ziziphi iikomiti akhonza kuzo amalungu eQumrhu Elilawulayo?
IKomiti Yabanxibelelanisi; IKomiti Yabasebenzi; IKomiti Yokupapasha; IKomiti Yenkonzo; IKomiti Yokufundisa; IKomiti Yokubhala.—5/15, iphepha 29.
• Singaqiniseka njani ukuba uMkhukula womhla kaNowa wenzeka emhlabeni wonke?
UYesu wayekholelwa ukuba uMkhukula wenzeka emhlabeni wonke. Izilumkiso eziseBhayibhileni zisekelwe kwizinto ezenzeka ngokwenene kuMkhukula womhlaba wonke.—6/1, iphepha 8.
• Ngaba ukuziphatha ekuthethwa ngako kweyabaseRoma 1:24-32 kubhekisela kumaYuda okanye kubantu beentlanga?
Kunokubhekisela kubo bonke, kodwa umpostile uPawulos wayebhekisela ngokukhethekileyo kumaSirayeli amandulo awasilelayo kangangeenkulungwane ukuthobela uMthetho. Ayeyazi imithetho yobulungisa kaThixo, kodwa akaphila ngokuvisisana nayo.—6/15, iphepha 29.
• Siphi Isixeko saseTel Arad, yaye kutheni sibalulekile nje?
Le nduli yakwaSirayeli iphawula isixeko samandulo saseArad kwintshona yoLwandle Olufileyo. Abembi bezinto zakudala bafumana kule ndawo izinto zodongwe ezazisetyenziswa njengamacwecwe okubhala. Amanye kula macwecwe anamagama afumaneka eBhayibhileni, ibe abonisa ukuba igama likaThixo lalisetyenziswa kumaxwebhu emicimbi yoluntu.—7/1, iphepha 23-24.
• Kutheni ukuzibekela usukelo olusengqiqweni kusenza sonwabe nje?
Ukuba sizibekela usukelo olungaphaya kwengqondo, siya kuba sizenzela nje uxinezeleko olungeyomfuneko. Kwangaxeshanye, sifanele silumke singayekeleli umxakatho, sisithele ngento yokusikelwa kwethu umda, size sithi yanele loo ntwana siyenza kubulungiseleli bamaKristu.—7/15, iphepha 29.
• Yintoni enokwenza abazali bangakwazi ukuthetha nabantwana babo abafikisayo?
Ezinye izinto ezinokuba ngumqobo kukungazithembi, ukufuna inkululeko, nokungafuni ukuphazanyiswa kwabantwana. Abazali basenokuzama ukukhuthaza abantwana ukuba bathethe xa kuncokolwa ngezinto ezingenamsebenzi baze bazame ukubona oko akucingayo.—8/1, iphepha 10-11.