“Ixesha Lokuthi Cwaka”

KUHLE ukuthetha xa kufanelekile, kodwa kuyafuneka nokuthula ngamanye amaxesha. Ngokutsho kweBrewer’s Dictionary of Phrase and Fable, kukho iqhalo lesiHebhere elithi: “Ukuba ufumana ishekele ngokuthetha, uya kufumana zibe mbini xa uthule.” UKumkani uSolomon wakwaSirayeli wamandulo owayesisilumko wathi: “Yonke into inexesha layo elimisiweyo, nomcimbi wonke unexesha lawo phantsi kwamazulu . . . kukho ixesha lokuthi cwaka nexesha lokuthetha.”—INtshu. 3:1, 7.

Noko ke, kunini apho kufanelekileyo ukuthula? Igama elithi ‘ukuthi cwaka’ livela izihlandlo ezininzi eBhayibhileni. Indlela elisetyenziswe ngayo eli gama kwezi ndinyana, ibonisa ukuba kukho iinkalo ezintathu ekuyingenelo ukuthi cwaka kuzo. Siza kubona ukuba ukuthi cwaka kuluphawu lwentlonelo, kubonisa ukuba nengqiqo nokuqonda kwaye kuluncedo xa ucamngca.

Uphawu Lwentlonelo

Ukuthi cwaka luphawu lwentlonelo. Umprofeti uHabhakuki wathi: “UYehova usetempileni yakhe engcwele. Mawuthi cwaka phambi kwakhe, umhlaba wonke!” (Hab. 2:20) Abanquli bokwenyaniso bafanele ‘balulindele, bethe cwaka, usindiso lukaYehova.’ (IZili. 3:26) Umdumisi wathi: “Yithi cwaka phambi koYehova uze ulindele kuye ngolangazelelo. Musa ukuvutha ngumsindo nakubani na owenza indlela yakhe iphumelele.”—INdu. 37:7.

Ngaba singamdumisa uYehova sithe cwaka? Eneneni, ngaba maxa wambi asisuki sithi nkamalala aze aphel’ emqaleni xa sibukele ubuhle bendalo? Ngaba xa sicinga ngobo buhle asimzukisi uMdali wethu entliziyweni? Umdumisi uDavide waqalisa enye indumiso yakhe ngala mazwi: “Owu Thixo, iza kuwe indumiso—ukuthula—Thixo, eZiyon; yaye isibhambathiso siya kufezekiswa kuwe.”—INdu. 65:1.

Ekubeni simele simhlonele uYehova, simele silihlonele nelizwi lakhe. Ngokomzekelo, xa umprofeti kaThixo uMoses wayethetha nohlanga lwakwaSirayeli okokugqibela, yena nabanye ababingeleli bathi kubo bonke ababekho: “Yithi cwaka . . . , uze uliphulaphule ilizwi likaYehova uThixo wakho.” Nabantwana bamaSirayeli kwakufuneka baphulaphule xa amaSirayeli ehlanganisene ukuze afunde uMthetho kaThixo. UMoses wathi: ‘Uze ubahlanganise abantu, amadoda nabafazi nabantwana ukuze bafunde.’—Dut. 27:9, 10; 31:11, 12.

Nabanquli bakaYehova banamhlanje bafanele baphulaphule ngentlonelo kwiintlanganiso zamaKristu, kuquka iindibano ezinkulu! Xa kunikelwa iintetho ezisekelwe eBhayibhileni eqongeni, ngaba ukuncokola bekungayi kubonisa ukungabi nantlonelo ngeLizwi likaThixo nangentlangano yakhe? Xa kuqhubeka ucwangciso, simele sithi cwaka siphulaphule.

Naxa sincokola nabanye abantu, ukuphulaphula xa omnye ethetha kubonisa intlonelo. Ngokomzekelo, usolusapho uYobhi wathi kwabo babemtyhola: “Ndiyaleleni, yaye mna ndiya kuthi cwaka.” UYobhi wayezimisele ukuthi cwaka xa bethetha. Kwathi kwakufika ithuba lokuba athethe, wabacela wathi: “Yithini cwaka phambi kwam, ukuze ndithethe.”—Yobhi 6:24; 13:13.

Kubonisa Ukuba Nengqiqo Nokuqonda

IBhayibhile ithi: “Oyinqandayo imilebe yakhe wenza ngokunengqiqo.” “Umntu onokuqonda okuphangaleleyo uthi cwaka.” (IMize. 10:19; 11:12) Phawula ukuba uYesu wabonisa ingqiqo nokuqonda ngokuthi cwaka. Wathi akubona ukuba akuncedi nto ukuthetha neentshaba zakhe ezinomsindo, “uYesu wathi cwaka.” (Mat. 26:63) Kamva, xa wayephambi koPilato, uYesu “akazange aphendule.” Waqonda ukuba uza kuthethelelwa yindlela aziwa ngayo.—Mat. 27:11-14.

Kuhle ukuba nathi sithi cwaka, ingakumbi xa sicatshukiswa. Omnye umzekeliso uthi: “Ozeka kade umsindo unokuqonda okuninzi, kodwa ongenamonde uphakamisa ubudenge.” (IMize. 14:29) Ukukhawuleza uphendule xa ucaphukile, kunokukwenza uzisole kamva. Sinokuthetha ubudenge, kuze oko kusenze siphazamiseke.

Ukubala amazwi ingakumbi xa siphakathi kwabantu abangalunganga, kubonisa ukuba nengqiqo. Xa sidibana nabagculeli entsimini, kunokuba kuhle ukuba sithule. Ngapha koko, ngaba maxa wambi akubobulumko ukuthula xa abantu esifunda nabo okanye esisebenza nabo besenza iziqhulo ezingcolileyo okanye bethuka? (Efe. 5:3) Umdumisi wathi: “Ndiya kubeka isicheme njengomlindi emlonyeni wam, logama nje kukho ongendawo phambi kwam.”—INdu. 39:1.

Umntu “onokuqonda okuphangaleleyo” akawadizi amahlebo. (IMize. 11:12) UmKristu onyanisekileyo akanakuthetha izinto eziyimfihlo. Abadala abangamaKristu bamele bakulumkele ukuthetha izinto eziyimfihlo ukuze bathenjwe ngamalungu ebandla.

Ukuthi cwaka kunokuba yingenelo. Ethetha ngomnye umhlobo wakhe, umbhali oliNgesi wenkulungwane ye-19 uSydney Smith wathi: “Kumnandi ukuncokola naye kuba uyathula ngamanye amaxesha.” Enyanisweni, xa abahlobo bencokola kufuneka baphulaphulane. Umntu okwaziyo ukuncokola ubonakala ngokuphulaphula xa abanye bethetha.

USolomon walumkisa: “Ebuninzini bamazwi akusweleki kunxaxha, kodwa oyinqandayo imilebe yakhe wenza ngokunengqiqo.” (IMize. 10:19) Xa umntu engathethi kakhulu, akunakufane kwenzeke ukuba athethe izinto zobudenge. Enyanisweni, “kwanesidenge, xa sithe cwaka, siya kugqalwa njengesilumko; novala imilebe yakhe, unjengoqondayo.” (IMize. 17:28) Ngoko ke, masicele uYehova ukuba ‘abeke umlindi kumnyango wemilebe yethu.’—INdu. 141:3.

Kuluncedo Xa Ucamngca

Xa zithetha ngomntu olilungisa, iZibhalo zithi ‘ufunda umthetho kaThixo ngesandi esiphantsi imini nobusuku.’ (INdu. 1:2) IBhayibhile yesiXhosa yowe-1996 ithi: ‘Imiyalelo yakhe uyetyisa emini nasebusuku.’ Sinokucamngca kwindawo enjani yaye ngaliphi ixesha?

UIsake, unyana kasolusapho uAbraham, “wayephumile . . . ehamba-hamba ukuze acamngce entsimini xa kuhlwayo.” (Gen. 24:63) Wakhetha ixesha nendawo ethe cwaka ukuze acamngce. UKumkani uDavide wacamngca ebudeni bemilindo yasebusuku. (INdu. 63:6) Xa wayefuna ukucamngca, uYesu ofezekileyo, wayesuka phakathi kwezihlwele, aye kwindawo ethe cwaka, njengasezintabeni, ezinkqantosini nakwiindawo ezingasese.—Mat. 14:23; Luka 4:42; 5:16.

Akukho bani unokukhanyela ukuba ukuthi cwaka kuneengenelo. Ukuthi cwaka kusinika ithuba lokuzihlola—nto leyo ebalulekileyo xa sifuna ukuphucula ubuntu bethu. Ukuthi cwaka kunokusenza sibe noxolo lwengqondo. Ukucamngca kwindawo ethe cwaka kunokusenza sithozame yaye sithobeke size sibe noxabiso ngezona zinto zibalulekileyo ebomini.

Nangona ukuthi cwaka kubalulekile, likho “nexesha lokuthetha.” (INtshu. 3:7) Namhlanje abanquli abanyanisekileyo baxakeke kukushumayela iindaba ezilungileyo zoBukumkani bukaThixo “kuwo wonke umhlaba omiweyo.” (Mat. 24:14) Ngenxa yoko baxokozela ngemincili kuba besiya besanda. (Mika 2:12) Masenze konke okusemandleni, ukuze sivakalise ngenkuthalo iindaba ezilungileyo zoBukumkani size sithethe ngemisebenzi kaThixo emangalisayo. Njengoko sisenza lo msebenzi ubalulekileyo, ngamana singahlala sikuqonda ukuba kubalulekile ukuthula ngamanye amaxesha.

[Umfanekiso okwiphepha 3]

Xa sikwiintlanganiso zamaKristu, sifanele siphulaphule yaye sifunde

[Umfanekiso okwiphepha 4]

Kunokuba kuhle ukuthula xa sigculelwa entsimini

[Umfanekiso okwiphepha 5]

Ukuthi cwaka kuyingenelo xa sicamngca