Ukuba Noxabiso Nangona Ndehlelwa Ziintlekele—Indlela Eyandinceda Ngayo IBhayibhile Ndakwazi Ukunyamezela

Kubalisa uEnrique Caravaca Acosta

KwakungoAprili 15, 1971. Ndandisiya kutyelela intsapho yakowethu eyayihlala efama. Ekubeni ndandibagqibele kudala kwakungathi andisafik’ ekhaya ngendlela endandikuxhinele ngayo ukubabona. Ndandizibuza enoba ndandizakufika bekho bonke na yaye yayingubani endandiza kuqale ndimbone. Ukufika kwam ekhaya ndothuka ndabanda ndakubona abantu basekhaya abane—kuquka nomama—bequngquluzile begetyengiwe!

NDOTHUKA andakwazi nokuthetha. Kwakwenzeke ntoni? Ndandiza kwenza ntoni? Kwakungekho mntu endandiza kubuza kuye yaye ndandididekile. Ngaphambi kokuba ndiqhubeke neli bali makhe ndikuthele tshuphe ngemvelaphi yam. Kaloku lo nto iza kukunceda uyiqonde bhetele indlela endavakalelwa ngayo ngeli shwangushwa kunye nezinye iintlekele ezandehlelayo ebomini.

Ukufumana Kwethu Inyaniso

Ndazalelwa eQuirimán, ngaseNicoya, eCosta Rica. Ngowe-1953, xa ndandineminyaka engama-37 ubudala, ndandihlala nabazali bam kwifama yentsapho yakowethu. Nangona sasikhuliselwe kwicawa yamaKatolika, sasingaziginyi ncam iimfundiso ezithile yaye sasinemibuzo emininzi esasingazifumani iimpendulo zayo.

Ngenye intsasa, kwafika indoda ethile kowethu, uAnatolio Alfaro, yaza yasikhuthaza ukuba sifunde iBhayibhile. Yathetha nathi ngeemfundiso zeBhayibhile. Mna, utata, umama, umntakwethu, udadewethu, kunye netshomi yakhe eyayihlala nathi samphulaphula njengoko wayesifundisa. Sancokola imini yonke kwade kwasebusuku. Sasinemibuzo emininzi.

UAnatolio walalisa waza wahlala nathi nangosuku olulandelayo. Sasichulumancile koko sakuvayo kwaye saba nemincili ngakumbi xa imibuzo yethu yaphendulwa ngeBhayibhile. Loo ncoko yayitshintsha kakhulu indlela esasizijonga ngayo izinto. Sacingisisa ngezinto esasizifundisiwe yaye saqonda ukuba sasiyifumene inyaniso. UAnatolio wasishiyela amaphephancwadi asekelwe eBhayibhileni kunye nezinye iincwadi. Intsapho yethu yayihlanganisana ngamarhatya ukuze izifunde kunye ezi ncwadi. Kwakungeyonto ilula le kuba sasingenawo umbane. Ngaphambi kokuba sihlale phantsi, ngamnye wethu wayesogquma iinyawo zakhe ngengxowa yeetapile enkulu ukuze azikhusele kwiingcongconi.

Kwiinyanga ezintandathu kamva, amalungu amahlanu entsapho yakowethu, kuquka mna kunye nabazali bam, abhaptizwa. Indlela esasivuya ngayo yasenza saqalisa ukungena kwizindlu ngezindlu ukuze sixelele abanye ngezinto esasizifundile. Sasibetha ngezikaTshiwo iiyure ezimbini, ngamanye amaxesha ngamahashe ukuya kwidolophu yaseCarrillo ukuze siye kuhlangana nelinye iqela lamaNgqina kaYehova awayehlala apho. UAnatolio waqhubeka esifundisa iBhayibhile. Emva koko kwaqaliswa ukuqhutywa iintlanganiso ekhayeni lethu yaye kwakusiza abantu abasibhozo. Ekugqibeleni bonke abo bantu babhaptizwa. Kungekudala elo qela lakhula laba libandla elincinane labantu abangama-20.

Ukusebenzela UThixo Ngokusisigxina

Ekuhambeni kwexesha, iofisi yesebe yamaNgqina kaYehova yaseCosta Rica yakhuthaza abo babenokukwazi ukwenza umsebenzi wokushumayela iindaba ezilungileyo ngokusisigxina ukuba benze lo msebenzi. Ngowe-1957, ndaqalisa ukwenza lo msebenzi wokushumayela ngokusisigxina. Yayingumsebenzi omnandi ke lowo. Amaxesha amaninzi ndandihamba ndedwa kangangeeyure ndisiya kubantu ababehlala ezilalini. Abantu babendigxotha ngamanye amaxesha. Ndikhumbula izihlandlo ezithathu endandifuna ukuhlaselwa ngazo ngamadoda awayephethe oocelemba efuna ukwazi ukuba ndandingubani yaye ndize ngabuni apho.

Ngeminyaka yee-1950, iindlela ezininzi zazimbi yaye kwakunzima ukufikelela ebantwini. Sasisiya ngamahashe kwezinye iindawo. Sasiwela imilambo yaye ngezinye izihlandlo silala phandle. Neengcongconi zazizenzela apha kuthi. Kwakufuneka silumkele iinyoka kunye neengwenya. Kodwa nangona kwakunjalo ndandikuthanda kakhulu ukunceda abantu bafunde ngoYehova uThixo. Ndandibuyela ekhaya ndivuya yaye ndanelisekile kuba ndiye ndathetha nabanye abantu ngenyaniso yeBhayibhile. Ndaya ndimthanda ngakumbi uYehova uThixo njengoko ndandisenza umsebenzi wam yaye ndifunda iBhayibhile imihla ngemihla, yaye ndandiziva ndisiya ndisondela ngakumbi kuye.

Emva kwethuba elithile ndajizekwa ngamalungelo angakumbi. Ndanikwa umsebenzi wokuba ngumveleli ohambahambayo, ndityelela yaye ndisomeleza amabandla kangangeminyaka engaphezu kweshumi, ndityelela ibandla elahlukileyo veki nganye. Nangona impilo enkenenkene yandinyanzela ukuba ndiyeke ukuba ngumveleli ohambahambayo kodwa ke ndaqhubeka ndisebenzela uThixo ngokusisigxina.

Yehl’ Intlekele

Ngowe-1971 ngoxa ndandise Nicoya ndaya kubona intsapho yakowethu. Ndathi xa ndingena endlwini ndabona umama wam owayeneminyaka engama-80 ubudala ethe tywa phantsi. Wayedutyuliwe yaye enamanxeba emela. Ndamfumana esaphefumla kodwa ke wafela ezandleni zam emva nje kwemizuzu embalwa. Ndathi xa ndilaqaza ndabona umama owayesiphekela nowayeneenyanga ezisibhozo ekhulelwe naye elele phantsi ekhitshini. Yena wayesel’ ebanda. Kwakungaphelelanga apho kuba ndafumana nomnye udade wasebandleni efele epasejini, ndaza kwigumbi lokuhlambela ndafumana unyana womama owayesiphekela naye ebulewe. Bonke babehlatyiwe baza badutyulwa ngokungenalusini. Ngubani kodwa owayenze into emasikizi ngolu hlobo yaye eyenzela ntoni?

Utata yena ndamfumana phandle. Wayedutyulwe entloko kodwa ke wayesaphila! Ndaxhabasha ukuya kwindlu yomninawa wam owawunokuhamba imizuzu elishumi elinesihlanu ukuya kuyo. Ukufika kwam apho ndafumanisa ukuba omnye umfazi kunye nonyana wakhe nabo babebulewe. Ndothuka ndaphants’ ukuwa xa ndafumanisa ukuba bonke abo bantu babebulewe ngumtshana wam owayeneminyaka eli-17 ubudala nowayengelilo iNgqina yaye engaphilanga kakuhle ngengqondo! Wabaleka emva koko. Kwaqalisa elona phulo lokukhangela isaphuli mthetho lakha lalikhulu eCosta Rica.

Oko kugetyengwa kwabantu ngokungenalusini kwaphuma kumajelo eendaba zelizwe. Emva kweentsuku ezisixhenxe, amapolisa amfumana umtshana owayephethe ibhozo elikhulu kunye nompu awayewuthengiselwe ngomnye umntu nangona wayesazi kakuhle ukuba wayegula ngengqondo. Umtshana wadutyulwa wafa njengoko amapolisa ayezama ukumbamba.

Xa wayekhangelwa, abantu abaninzi bandicebisa ukuba ndisabe kuba besithi wayenokubuya aze kundenzakalisa nam. Ndawuthandazela lo mba kuba ndandicinga ukuba kwakufuneka ndibe kunye nezalamane zam ezazisindile, kunye namalungu ebandla. Ngenxa yoko andizange ndibaleke.

Intlekele Emva Kwenye

Okubuhlungu kukuba utata waphila unyaka omnye nje kuphela. Kunyaka olandelayo udade wethu omncinane owayengumkhonzi kaYehova uThixo othembekileyo naye wabulawa, kwisiganeko esingenanto yokwenza nokubulawa kwentsapho yakowethu ebesithethe ngaso. Kwakhona izalamane zam zothuswa kukusweleka kwelinye ilungu lentsapho. Awekho amazwi anokuchaza iintlungu esasikuyo thina nabahlobo bethu. Kodwa kuzo zonke ezo ntlekele ndaqhubeka ndithembele kuYehova yaye ndimbongoza ukuba andiphe amandla.

Ngowe-1985 ndaya kwisikolo sokuqeqesha abadala abangamaKristu esathabatha iintsuku ezintathu kwisixeko esilikhomkhulu, iSan José. Ekupheleni kweso sikolo ndaziva ndihlaziyekile elukholweni. Ekuseni ngoMvulo ndemka ndaya kukhwela ibhasi egodukayo. Njengoko ndandisiya kwisikhululo sebhasi ndakhuthuzwa ngootsotsi baza bandikrwitsha. Yonke lento yenzeka ngephanyazo kangangokuba andizange ndibabone ebusweni. Esi siganeko sandenza andakwazi ukuthetha ngendlela eqhelekileyo yaseCosta Rica. Kaloku apha kweli phondo laseGuanacaste, amadoda abulisana ngokukhwaza xa edibana okanye ukuze atsale ingqalelo yamanye. Ngaphambi kokuba ndikrwitshwe, ndandikwazi ukukhwaza, kodwa emva koko andizange ndiphinde ndikwazi.

Ngowe-1979 ndatshata noCelia, udade oliNgqina webandla lasebumelwaneni. UCelia wayeyithanda iBhayibhile. Sasifunda iBhayibhile kunye yonke imihla. Okubuhlungu kukuba naye wandishiya, ebulawa ngumhlaza ngoJulayi 2001. Maxa wambi ndiziva ndililolo, kodwa ukholo lwam luqiniswa lithemba lovuko.—Yohane 5:28, 29.

Ukuvuya Nangona Kukho Iimvavanyo

Nangona kusenokwenzeka ukuba ndiye ndehlelwa ziintlekele ngaphezu kwabantu abaninzi, ezi mvavanyo ndizijonga njengethuba lokubonisa uYehova ukuba ndithembekile yaye ndinyanisekile kuye. (Yakobi 1:13) Ukuze ndibe nembono elungeleleneyo ngezinto eziye zandehlela, ndihlala ndizikhumbuza ukuba “bonke behlelwa lixesha nasisihlo esingenakubonwa kwangaphambili.” (INtshumayeli 9:11) Kwakhona ndiyakhumbula ukuba la ‘ngamaxesha amanqam ekunzima ukujamelana nawo,’ kuba abantu bazindlobongela yaye abakwazi kuzeyisa. (2 Timoti 3:1-5) Andiwulibali nomzekelo kaYobhi. Nangona wehlelwa zizinto ezibuhlungu ezininzi—ukufelwa yintsapho yakhe, ukulahlekelwa zizinto awayenazo—uYobhi wathi: “Maliqhubeke libongwa igama likaYehova.” UYehova wamsikelela uYobhi kuba engazange amlahle. (Yobhi 1:13-22; 42:12-15) Zezi ndinyana zeBhayibhile eziye zandinceda ndahlala ndivuya nangona ndineengxaki ezininzi.

UYehova ebesoloko endinceda ukuba ndiqhubeke ndimbeka kwindawo yokuqala ebomini bam. Ukufunda iBhayibhile imihla ngemihla kuye kwandithuthuzela kwaza kwandinika amandla okunyamezela. Ngenxa yokuthandaza kuYehova, ndiyakwazi ukunandipha “uxolo lukaThixo olungaphaya kokuqonda.” (Filipi 4:6, 7) Lento indenza ndibe noxolo lwengqondo. Ukuya kwiintlanganiso zamaKristu nako kuye kwalomeleza ukholo lwam.—Hebhere 10:24, 25.

Nangona sele ndiyingwevu ngoku, ndiyambulela uYehova ngokuba ndisenawo amandla okusebenza namanye amakholwa nawokufundisa abanye abantu iBhayibhile. Ukunceda abanye ngezi ndlela kundenza ndikwazi ukunyamezela. Ndimbulela ngentliziyo yam yonke uYehova ngezinto andenzele zona nangona ndiye ndehlelwa ziintlekele ezininzi ebomini.a

[Umbhalo osemazantsi]

[Amagama acatshulweyo akwiphepha 20]

Ukufunda iBhayibhile imihla ngemihla kuye kwandithuthuzela kwaze kwandinika namandla okunyamezela

[Umfanekiso okwiphepha 19]

Intetho yam yokuqala yeBhayibhile

[Umfanekiso okwiphepha 20]

Ndisentsimini xa ndandisemtsha noko