Ndafumana Eyona Nto Ixabisekileyo Ebomini

Kubalisa uGaspar Martínez

Ibali lam lelenkwenkwana elihlwempu yasemaphandleni eyafika esixekweni yafumana ubutyebi. Kodwa uza kuphawula ukuba ubutyebi endabufumanayo ayibubo obo ndandibulindele.

NDAKHULELA kwilali esemagqagaleni ngeminyaka yee-1930 kummandla waseRioja emntla Speyin. Xa ndandineminyaka elishumi, kwafuneka ndiyeke esikolweni kodwa ndandisele ndikwazi ukufunda nokubhala. Ndandisebenza emasimini kunye nabantwana basekhaya abathandathu, sisalusa iigusha yaye ngamany’ amaxesha sasilima.

Kuba sasingamahlwempu, izinto eziphathekayo sasizigqala njengeyona nto ibalulekileyo. Sasibamonela abantu abanezinto esingenazo. Sekunjalo, ubhishophu wakha wathi loo lali yethu “yeyona lali inabantu abakhuthalele unqulo kuso sonke eso sithili sakhe.” Wayengazi ukuba ekuhambeni kwexesha abaninzi babeza kuyeka ukuba ngamaKatolika.

Ukufuna Ubomi Obubhetele

Ndatshata noMercedes owayehlala kwakuloo lali yethu. Emva koko saba nonyana. Ngowe-1957 safudukela kwisixeko esikufuphi saseLogroño. Kungekudala ndafumanisa ukuba, ekubeni ndingenabugcisa, kwakuza kuba nzima ukufumana umsebenzi ophucukileyo. Ndandingazi ukuba mandiqale ngaphi. Ndaya kumzi wogcino-zincwadi nakuba ndandingayazi eyona nto mandiyikhangele.

Emva koko ndeva kunomathotholo ukuba umntu uyakwazi ukufunda iBhayibhile ngembalelwano. Ukugqiba kwam ukufunda ndabizwa ngamaProtestanti. Emva kokuya apho izihlandlo eziliqela ndabona ukuba kukho ukungavisisani phakathi kweenkokeli. Andizange ndiphinde ndiye apho kuba ndabona ukuba zonke iicawa ziyafana.

Ndavuleka Amehlo

Ngowe-1964 satyelelwa ngumfana ogama linguEugenio. WayeliNgqina likaYehova, yaye ndandiqala ukuva ngaloo nkonzo. Kodwa ndandikuthanda ukuthetha ngeBhayibhile. Ndandicinga ukuba ndiyazazi iZibhalo. Kuloo ncoko yethu ndandityhila iindinyana endandizifunde kwizifundo zam zeBhayibhile. Nakuba ndandizama ukuthethelela iimfundiso ezithile zamaProtestanti, eneneni nam ndandingazikholelwa.

Emva kokuncokola naye izihlandlo ezibini, ndabona ukuba uEugenio uyalazi iLizwi likaThixo. Kwakundimangalisa ukubona indlela azazi ngayo iZibhalo nendlela awayezicacisa ngayo nakuba imfundo yakhe yayingaphantsi nakweyam. UEugenio wandifundela eBhayibhileni iindinyana ezibonisa ukuba siphila kwimihla yokugqibela yaye uBukumkani bukaThixo buza kuzisa iparadesi apha emhlabeni. Kwandichukumisa oku.—INdu. 37:11, 29; Isa. 9:6, 7; Mat. 6:9, 10.

Ndavuma ukuqhutyelwa isifundo seBhayibhile. Phantse yonke into endandiyifunda ndandiqala ukuyiva. Ndatsho ndayibona eyona nto ixabisekileyo ebomini. Ndayifumana into endandiyifuna. Kwakungasabalulekanga ukufumana umsebenzi ophucukileyo. Ndafunda ukuba ukugula nokufa kuza kupheliswa.—Isa. 33:24; 35:5, 6; ISityhi. 21:4.

Zisuka nje ndaxelela izalamane zam ngezinto endizifundileyo, ndazixelela nokuba uThixo uthembisa ukuba uza kuzisa iparadesi ekuza kuhlala kuyo abantu abathembekileyo ngonaphakade.

Intsapho Yam Yamkela Inyaniso YeBhayibhile

Mna nezinye izalamane zam sasidibana qho ngeeCawa kwaTat’ omncinci ukuze sithethe ngeBhayibhile. Sasichitha iiyure zibe mbini okanye zibe ntathu ngeveki kwezi ngxubusho. Wathi uEugenio akubona ukuba zininzi izalamane zam ezinomdla eBhayibhileni, walungiselela ukuba afundele ntsapho nganye ngexesha elahlukileyo.

Ezinye izalamane zam zazihlala eDurango, idolophana ekumgama omalunga neekhilomitha ezili-120 nekwakungekho maNgqina kuyo. Emva kweenyanga ezintathu, ndathatha iholide yeentsuku ezimbalwa ukuze ndiye kubaxelela ngonqulo lwam olutsha. Sasihlanganisana sibe malunga neshumi ngeengokuhlwa yaye sasithetha ngeBhayibhile de kuse. Babephulaphula ngomdla bonke. Ndahamba ndibashiyele iiBhayibhile neencwadi. Emva koko saqhubeka siqhagamshelana.

Ekufikeni kwamaNgqina eDurango—indawo ekwakungazange kushunyayelwe kuyo ngaphambili—kwakukho abantu abali-18 ababenomdla wokufunda iBhayibhile. La maNgqina alungiselela ukuba ntsapho nganye iqhutyelwe isifundo.

Ngelo xesha uMercedes wayengekayamkeli inyaniso ngenxa yokoyika abantu. Umsebenzi wamaNgqina kaYehova wawuvaliwe eSpeyin, ngoko wayecinga ukuba abantwana bethu ababini baza kugxothwa esikolweni size sonke sigculelwe. Kodwa wathi akubona ukuba yonke intsapho iyamkele inyaniso naye wavuma ukufunda iBhayibhile.

Kwisithuba nje seminyaka emibini amalungu entsapho yam angama-40 azahlulela kuThixo aza aba ngamaNgqina abhaptiziweyo. Sonke sasinosukelo olufanayo. Ndandifumene eyona nto ixabisekileyo ebomini. Sasisikelelwe ngobutyebi bokwenene.

Ngokuya Ndikhula Ndaqalisa Ukuphila Ubomi Obanelisayo

Kwiminyaka engama-20 elandelayo, ndanikela ingqalelo ekukhuliseni oonyana bethu ababini nakwimisebenzi yebandla. Ekufikeni kwam noMercedes eLogroño, kwakukho amaNgqina angama-20 kuphela kwisixeko esasinabemi abali-100 000. Kungekudala ndafumana iimbopheleleko ezingakumbi ebandleni.

Xa ndandineminyaka engama-56 ubudala inkampani endandisebenza kuyo yavalwa ngequbuliso ndaza ndaphelelwa ngumsebenzi. Kwakukudala ndifuna ukuba kwinkonzo yexesha elizeleyo ngoko ndasebenzisa elo thuba ndaba nguvulindlela. Imali yomhlala-phantsi endandiyifumana yayincinane yaye ngenxa yoko izinto zazingekho lula. Ukuze andincedise, uMercedes wayesenza imisetyenzana yokucoca. Sakwazi ukuxhasa intsapho yethu kwizinto eziyimfuneko. Ndisenguvulindlela nangoku, yaye noMercedes uba nguvulindlela ongumncedani ngamany’ amaxesha kuba uyakuthanda ukushumayela.

UMercedes wayedla ngokushiya amaphephancwadi kwelinye ibhinqa eliselula eligama linguMerche elalikhe lafundelwa iBhayibhile ekukhuleni kwalo. UMerche wawafunda ngomdla amaphephancwadi yaye uMercedes wabona ukuba uMerche wayesenalo uxabiso ngenyaniso. Ekugqibeleni uMerche wavuma ukuqhutyelwa isifundo seBhayibhile waza wenza inkqubela. Kodwa umyeni wakhe uVicente wayeyindla-manzi yaye wayengahlali emisebenzini. Ngenxa yoko wayengamniki mali yaye umtshato wabo wawusecicini lokuqhawuka.

Inkosikazi yam yacebisa uMerche ukuba uVicente athethe nam, yaye weza. Emva kokutyelela izihlandlo ezimbalwa, wavuma ukuqhutyelwa isifundo seBhayibhile. UVicente watshintsha, yaye kwakudlula iintsuku engakhange asele. Ekuhambeni kwexesha kwakudlula iveki nangaphezulu engakhange asele. Ekugqibeleni wayeka ukusela. Watsho waqala ukuba mhle, nentsapho yakhe yamanyana. Intsapho yakhe, equka inkosikazi nentombi yakhe, isebenza ngokukhutheleyo kwibandla elincinane elikwiiCanary Islands, apho bahlala khona.

Izinto Eziye Zandivuyisa Ebomini

Nangona abaninzi kwizalamane zam ezafunda iBhayibhile sele bafa, basebaninzi nabaphilayo, yaye uThixo usisikelele. (IMize. 10:22) Kundivuyisa gqitha ukubona ukuba phantse bonke abo bafunda iBhayibhile kwiminyaka engama-40 eyadlulayo—bona nabantwana babo nabazukulwana babo—basaqhubeka bekhonza uYehova ngokuthembeka!

Ndinezalamane ezininzi ezingamaNgqina yaye ezininzi kuzo zingabadala, izicaka zolungiselelo noovulindlela. Unyana wam wamazibulo nenkosikazi yakhe bakhonza kwiofisi yesebe yamaNgqina kaYehova eseMadrid, eSpeyin. Ukuqala kwam ukuba liNgqina, amaNgqina ayemalunga nama-3 000 eSpeyin. Ngoku angaphezu kwe-100 000. Ndiyayithanda inkonzo yexesha elizeleyo yaye ndiyambulela uThixo ngelungelo andijizeke lona lokumkhonza. Ndingafundanga ndinjalo, ngamany’ amaxesha ndiye ndibambele umveleli wesiphaluka.

Kwiminyaka embalwa edluleyo ndiye ndafumanisa ukuba bambalwa abantu abasahlala kwilali endakhulela kuyo. Ngenxa yobuhlwempu bashiya amasimi nemizi yabo kuba befuna amadlelo aluhlaza. Okuvuyisayo kukuba uninzi lwethu lwafumana ubutyebi bokomoya. Siye safumanisa ukuba ubomi bunenjongo yaye eyona nto ivuyisayo kukukhonza uYehova.

[Umfanekiso okwiphepha 32]

Phantse zonke izalamane zikaMzalwan’ uMartínez ezisenyanisweni