“Siya Kwahlulwa Kukufa”

BANGAPHI abantu abaye batsho la mazwi ngosuku lwabo lomtshato—mhlawumbi bengacingi nokucinga ukuba ukufa kuya kugadla nhyani ngenye imini kuze kubahlukanise? Ukwaluphala, ukugula okanye iingozi zizinto ezixhaphakileyo ezinokusuba ubomi bomntu, nto leyo eshiya elinye iqabane lililolo yaye lisentlungwini.—INtshumayeli 9:11; Roma 5:12.

Amanani abonisa ukuba isiqingatha sabafazi abaneminyaka engama-65 ubudala nangaphezulu bangabahlolokazi. Ekubeni abafazi benamathuba angakumbi okufelwa kunamadoda, ezinye iintlanga zithi intlungu yokufelwa liqabane “yinto yabafazi.” Kodwa loo nto ayithethi ukuba amadoda awabi buhlungu. Inyaniso kukuba izigidi zabantu zikhe zafelwa. Ngaba nawe ukhe wafelwa?

Enokuba uyindoda okanye ibhinqa, yintoni onokuyenza xa ufelwe? Ngaba iBhayibhile inokukuthuthuzela? Bancedwe yintoni abanye abantu abaye bafelwa? Nangona benganakuncedwa yinto enye bonke abantu, ikho imigaqo namacebiso aluncedo.

Ukuyamkela Imeko Yakho

Nangona abanye becinga ukuba ukukhala kukuba buthathaka okanye kuyingozi, isazi ngengqondo uGqr. Joyce Brothers naye ongumhlolokazi uthi iinyembezi zifana noncedo lokuqala. Ukukhala kuyinto eqhelekileyo kubantu abasentlungwini yaye kuyayidambisa intlungu. Musa ukuba neentloni zokukhala. Umzekelo woku ufumaneka eBhayibhileni. UAbraham wayenokholo ngendlela ebalaseleyo yaye wayede abizwe ngokuba ngumhlobo kaThixo. Kodwa wathi akubhujelwa ngumfazi wakhe othandekayo, “waya kumenzela isijwili uSara, wamlilela.”—Genesis 23:2.

Nangona kuyinto eqhelekileyo ukufuna ukuba ukhe ube wedwa, musa ukuzenza ikheswa. IMizekeliso 18:1 ilumkisa isithi: “Ozahlulayo uya kufuna ulangazelelo lwakhe lokuzingca.” Ngoko ke, chitha ixesha nezalamane nabahlobo abanovelwano. Ibandla lamaKristu linokukunceda kakhulu kule nkalo kuba kaloku apho kukho amadoda okholo naqolileyo, anokukuxhasa aze akucebise xa kuyimfuneko.—Isaya 32:1, 2.

Abanye baye bakufumanisa kuluncedo ukuphendula iileta namakhadi abaye bathuthuzelwa ngawo. Eli thuba unokulisebenzisela ukubhala izinto ezintle ozikhumbulayo ngeqabane lakho. Ukuzibhala encwadini izinto ozikhumbulayo uze ufake iifoto neeleta kunokukunceda uchache.

Kuyinto eqhelekileyo ngomntu osandula ukufelwa ukuba azive ephantsi yaye engenamdla wanto, kodwa ukuqhubeka nezinto obuzenza imihla ngemihla kuya kukunceda. Ngokomzekelo, ukuba unexesha oqhele ukulala, ukuvuka, ukutya, nokwenza ezinye izinto zama ukunamathela kulo. Zicebe kwangaphambili izinto oza kuzenza ngeempela-veki nangeentsuku ezikhethekileyo, njengosuku enatshata ngalo, apho uye uzive ulikhumbula kakhulu iqabane lakho. Kubalulekile ukuqhubeka nocwangciso lwakho lwezinto zokomoya.—1 Korinte 15:58.

Xa umntu edandathekile usenokungakwazi ukwenza izigqibo ezifanelekileyo. Imeko yakhe isenokumenza abe sisisulu sabantu abakhohlakeleyo. Ngoko ke musa ukuzenza buphuthuphuthu izigqibo ezinje ngokuthengisa indlu, ukutyala iimali ezinkulu, ukufuduka okanye ukuphinda utshate. Kukho umzekeliso othi: “Amacebo okhutheleyo ngokuqinisekileyo ayingenelo, kodwa wonk’ ubani ongxamayo ngokuqinisekileyo usingisa ekusweleni.” (IMizekeliso 21:5) Umele ungenzi nasiphi na isigqibo esibalulekileyo de uchache.

Ukubona izinto ebezikade zisetyenziswa ngumfi kunokukwenza buhlungu ingakumbi ukuba nanichithe ixesha elininzi nikunye, kodwa nayo loo nto inokukunceda. Ukulinda ixesha elide ngaphambi kokuba uzibone kunokukwenza ungachachi ngokukhawuleza. (INdumiso 6:6) Abanye baye bakhethe ukukwenza bodwa oku; abanye bona bakufumanisa kuluncedo ubukho bomhlobo osenyongweni. Usenokucela umhlobo okanye isalamane ukuba sikuncede kwizinto ezithile, njengokufumana isiqinisekiso sokufa; ukwazisa abasemagunyeni; ibhanki; neendawo ebe namatyala kuzo; ukutshintsha igama ebhaliswe ngalo indlu; ukufumana iimali zomfi nokuhlawula iindleko zonyango.

Ukhumbule ukuba siphila kwihlabathi eliziphethe kakubi. Ekubeni ngoku uwedwa, kuza kubakho izilingo. Amazwi kampostile uPawulos asasebenza nanamhlanje: “Ngamnye wenu akwazi ukusizuza esakhe isitya ngobungcwalisa nembeko, kungekhona ngenkanuko yesini njengeentlanga ezingamaziyo uThixo.” (1 Tesalonika 4:4, 5) Kuya kuba bubulumko ukungabukeli iimovie okanye ukuphulaphula umculo uze ufunde iincwadi zothando okanye ezikhuthaza isini.

Kwakhona, khumbula ukuba ukuchacha kuthatha ixesha. Iphephandaba ekuthiwa yiUSA Today lithi uphando olwenziwa lisebe lezentlalo leYunivesithi yaseMichigan lubonisa ukuba abantu abafelwe ngamaqabane bachacha ubuncinane emva kweenyanga ezili-18. Thandaza kuThixo ukuze ukwazi ukunyamezela yaye isiqhamo somoya kaThixo siya kukunceda kule nkalo. (Galati 5:22, 23) Nangona kusenokuba nzima ukuyikholelwa lento okwangoku, kodwa ke suku ngalunye oludlulayo uya kuya uchacha.

Into Encede Abanye Banyamezela

UAnna owayeneminyaka engama-40 etshatile waba buhlungu gqitha ukusweleka komyeni wakhe. Uthi: “Umama wasweleka xa ndandineminyaka eli-13, emva koko kwalandela utata, abantakwethu ababini kunye nodade wethu. Kodwa ndingalitsolisa elokuba kuzo zonke ezi zihlandlo akuzange kube buhlungu njengaxa kwasweleka umyeni wam. Kwakungathi ndisikwe ngaphakathi ibe ndandisezintlungwini ezingathethekiyo.” Yintoni eye yamnceda kule meko? Uthi: “Ndiye ndenza incwadi enkulu eneeleta namakhadi awayencoma iimpawu ezintle zikaDarryl. Nganye yazo incoma uphawu lwakhe oluthile. Ndiqinisekile ukuba noYehova uyamkhumbula ibe uza kumvusa.”

UEsther oneminyaka engama-88 anesibhozo anesibhozo ubudala usichazela into eye yamnceda: “Esona silingo siye saba qatha ibe kukulahlekelwa liqabane emva kweminyaka engama-46 sitshatile. Kodwa ndiye ndaphawula ukuba ukuxakeka zizinto zonqulo kuluncedo kakhulu. Khange ndiyeke ukuya kwintlanganiso zamaKristu, ukufunda nokufundisa abanye ngeBhayibhile. Ukungazenzi ikheswa kuye kwandinceda. Ndiye ndifune ukuhlala nabahlobo abaza kundiphulaphula. Abasoloko bendithuthuzela, kodwa ndiyayixabisa into yokuba bandinike ixesha labo baze bandiphulaphule.”

URobert onomfazi owabulawa ngumhlaza emva kweminyaka engama-48 betshatile uthi: “Kunzima ukufelwa liqabane obukade uncokola nalo, nisenza izigqibo kunye, nikhenketha yaye niphila kunye imihla ngemihla. Bekunzima kodwa ke ndizimisele ukuba ndinganikezeli. Kuye kwandinceda ukugcina umzimba nengqondo yam zixakekile. Umthandazo undithuthuzele gqitha.”

Ubomi Obunentsingiselo Emva Kokufelwa

Nangona ukufelwa ngumntu otshate naye kuyenye yezona zinto zibuhlungu, akusosiphelo sobomi. Xa uzijonga ngelinye iliso izinto, uya kuphawula ukuba ngoku unamathuba okwenza izinto obukade ungakwazi ukuzenza. Ezo zinto zinokuwuvala loo msantsa. Kwabanye kusenokuvuleka ithuba lokushumayela ngakumbi. Sinokuqiniseka ukuba siya kuvuya size saneliseke xa sinceda abanye ngale ndlela, kuba uYesu wathi: “Kunoyolo ngakumbi ukupha kunokwamkela.”—IZenzo 20:35.

Musa ukucinga ukuba awunakuze wonwabe kwakhona. Qiniseka ukuba uYehova uThixo ukukhathalele. Umdumisi uDavide wathi: ‘UYehova ukhulula umhlolokazi.’ (INdumiso 146:9) Kuthuthuzela ngokwenene ukwazi ukuba iBhayibhile ayithi uYehova ‘nguYise onenceba noThixo wentuthuzelo yonke’ nje kuphela, kodwa ikwathi ngaye: “Uyasivula isandla sakho uze wanelise umnqweno wayo yonke into ephilayo.” (2 Korinte 1:3; INdumiso 145:16) Yinyaniso ukuba uThixo onothando uYehova unako, uyafuna yaye ukulungele ukubanceda abo bafuna uncedo lwakhe. Ngamana nawe ungavakalelwa njengamaSirayeli amandulo awacula athi: “Ndiya kuwaphakamisela ezintabeni amehlo am. Luya kuvela phi na uncedo lwam? Uncedo lwam luvela kuYehova, uMenzi wezulu nomhlaba.”—INdumiso 121:1, 2.

[Amagama acatshulweyo akwiphepha 19]

Izigidi zikhe zayiva intlungu nobulolo bokufelwa liqabane. Ngaba nawe ungomnye wazo?

[Ibhokisi ekwiphepha 21]

Kuthekani Ngokuphinda Utshate?

IBhayibhile ithi ukufa kuyawuphelisa umtshato kuze kuvulele lowo ufelweyo ithuba lokuphinda atshate. (1 Korinte 7:39) Eso sisigqibo amele azenzele sona. Noko ke, kubalulekile ukuba abantwana basazi isigqibo esenziwa ngumzali baze bamxhase xa bekwazi. (Filipi 2:4) Ngokomzekelo, uAndrés wayengafuni ukuba aphinde atshate utata wabo. Wayemthanda gqitha unina yaye wayevakalelwa kukuba akukho mntu ufanele athabathe indawo yakhe. Uthi: “Kodwa ndakhawuleza ndaqonda ukuba utata wayenze isigqibo esifanelekileyo. Ukutshata kwamenza waphinda wonwaba. Waqalisa ukwenza izinto awayesele enethuba elide engasazenzi. Nam ndiyayixabisa indlela aye wamphatha ngayo umfazi wakhe wesibini.”

[Imifanekiso ekwiphepha 20, 21]

Ukuxakeka nokuthandaza kuThixo kunokukunceda unyamezele uze uchache