IBhayibhile Iyabutshintsha Ubom Babantu

INDODA eyayikade ihamba nemigulukudu itshaya nentsangu kwafuneka ithabathe waphi amanyathelo ukuze yoyise loo mikhwa mibi? Yintoni eyenza umntu owayethanda umculo ongxolayo wacheba iinwele zakhe ezinde waze wawuyeka umculo awayewuthanda? Yintoni eyatshintsha indoda eyayikade ivukela unqulo norhulumente ukuze isebenzele inkonzo? Khawuve njengoko betyatyadula.

“Ndahlukana nomkhwa wam ombi.”—PETER KAUSANGA

IMINYAKA YOBUDALA: 32

ILIZWE: NAMIBIA

UBOM BANGAPHAMBILI: WAYENGUMGULUKUDU OTSHAYA INTSANGU

INDLELA ENDANDIKADE NDIPHILA NGAYO: Ndakhulela eKehemu enye yeelokishi ezine ezinkulu zedolophu yaseRundu. Abantu balapho babephila ngokuthengisa amazimba, iinkuni namalahle.

Umama wasweleka xa ndandineminyaka emibini kuphela ubudala ndaza ndakhuliswa ngumakhulu. Sasingathath’ intweni. Ndandingengomntwana ungevayo kodwa ke ndangena ezingxakini ngenxa yoontangandini. Esikolweni ndatshomana nootsotsi. Ngenxa yoko sasithanda ukulwa, sixhaphaza abanye abantu, sisiba, sithengisa iidayimani, sinxila yaye sitshaya neziyobisi. Ndakhe ndaphoswa ngaphaya kwezitshixo kabini ngenxa yokuqhekeza nokuba.

Esikolweni ndaphuma kwibanga lesibhozo ndaza ndemka kwidolophu endandihlala kuyo ndayishiya nemigulukudu yeetshomi zam. Ndandifuna ukuyitshintsha indlela endandiphila ngayo. Kodwa ke ndandiseyingedle yentsangu. Ndandikhe ndihambe imigama emide ukuze ndiye kufumana intsangu.

INDLELA EBUTSHINTSHE NGAYO UBOMI BAM IBHAYIBHILE: Ekuqaleni kowe-1999, ndadibana namaNgqina kaYehova awayenika abantu iincwadi esitratweni. Athetha nam ngembeko aza andiphatha ngesidima ibe yandichukumisa gqitha loo nto. Izinto endazifunda kwiincwadi awandinika zona zandenza ndaqonda ukuba ndandifumene icawa yenyaniso. Ndaqalisa ukufunda iBhayibhile ngokuzimisela ibe kungekudala ndaqonda ukuba kwakuza kufuneka nditshintshe ukuba ndifuna ukukhonza uYehova uThixo.

Ndazibekela usuku endandiza kuyeka ngalo ukutshaya ndaza ndalahla zonke izinto zam zokutshaya. Kwakhona ndaxelela iitshomi zam ukuba ziyeke ukundincazela ndaza ndazicela ukuba zingatshayi xa ndikho. Nakuba kunjalo izinto azizange zihambe ngendlela endandicebe ngayo. Ndakha ndoyisakala ndaza ndatshaya icuba nentsangu izihlandlo ezibini. Kodwa loo nto ayizange indityhafise. Ndandisoloko ndikhumbula amazwi abhalwe kwiMizekeliso 24:16 athi: “Ilungisa lisenokuwa kasixhenxe, yaye ngokuqinisekileyo liya kuvuka.” Ekugqibeleni ndayeka ngokupheleleyo ukutshaya.

Ndaya ndifuna ukumenza umhlobo uYehova njengoko ndandisiya ndifunda ngaye. Enye yeevesi zeBhayibhile ezandifikelela intliziyo yiNdumiso 27:10, ethi: “Nokuba ubawo noma bangandishiya, ke yena uYehova uya kundithabatha.” Njengoko ndandiqhubeka nokufunda iBhayibhile, ndabubona ubunyaniso baloo mazwi. Ndaya ndimbona uYehova esiba nguTata wokwenene nonenkathalo kum.

Kwakhona ndandichitha ixesha elininzi namaNgqina kaYehova. Ndayibona indlela awayesovana yaye ethandana ngayo. Ndandingazange ndakhe ndayibona loo nto ngaphambili.

INDLELA ENDINGENELWE NGAYO: UYehova namaNgqina akhe baye bandinceda ndayiphucula indlela endizilungisa ngayo, endiziphatha nendithetha ngayo. Xa ndikhangela emva, ndicinga ukuba buye batshintsha ubomi bam busuka ekubeni njengesibungu esibi baza bafana nebhabhathane elihle. Izalamane zam ziyandithemba. Ngoku nditshatile yaye ndisoloko ndizama ukumthanda umfazi kunye nabantwana bam.

“Ndifumene injongo ebomini.”—MARCOS PAULO DE SOUSA

IMINYAKA YOBUDALA: 29

ILIZWE: BRAZIL

UBOMI BANGAPHAMBILI: WAYELILUNGU LEQELA LOMCULO ONGXOLAYO

INDLELA ENDANDIKADE NDIPHILA NGAYO: Intsapho yakowethu yayihlala kwidolophu yaseJaguariuna eSão Paulo. Abazali bam babengamaKatolika avuthayo yaye xa ndandimncinane ndandincedisa umfundisi xa kusenziwa idini leMisa. Ngenxa yoko abantwana endandifunda nabo esikolweni bandithiya igama elithi Mfundisi. Kodwa ke xa ndandineminyaka eli-15 ubudala ndaqalisa ukudlala umculo werock. Ndaqalisa ukuhamba nabantu ababedlala loo mculo ndaza ndakhulisa neenwele. Ngowe-1996 utata wandithengela izixhobo zokudlala umculo.

Ngowe-1998 ndajoyina iqela lomculo. Umculo esasiwudlala wawunobusathana, ukrwada unawo namanyala. Ndandiluthanda ugonyamelo. Umculo wawuphembelela indlela endandicinga ngayo, ukuziphatha kwam nesimo sengqondo. Ndaya ndisiba nguphuma silwe.

INDLELA EBUTSHINTSHE NGAYO UBOMI BAM IBHAYIBHILE: Ndaqala ukudibana namaNgqina kaYehova ngowe-1999. Acela ukundifundela iBhayibhile, ndavuma, nangona ndandingenamdla kangako. Noko ke, oko ndandikufunde eBhayibhileni kwatshintsha indlela endandibujonga ngayo ubomi.

Abantu babendibiza ngokuba “ndingu laa mfo unenwele ezinde” okanye “imvumi yerock.” Kodwa kungekudala ndaqaphela ukuba ukucula nelo qela kwakundenze umntu onekratshi ndaza ndathi phithi lukhuphiswano yaye ndandingayithandi loo nto. Ndatsho ndabona ukuba iimvumi endandizinqula zaziphila ubomi obungenanjongo. Ndaqonda ukuba, ukuba ndandifuna ukukholisa uYehova uThixo, kwakuza kufuneka ndahlukane nolu hlobo lomculo nendlela yokuphila ekhuthaza ukuziphatha okubi nonqulo zithixo olunxulumene nalo.

Ndandiwuthanda lo mculo kunye neenwele zam ezinde. Ndandingatsho ukuba ndingaze ndikwazi ukuphila ngaphandle kwazo. Ndandingumntu onephuku yaye ndandisazi ukuba kwakuza kufuneka ndiyilungise loo nto. Noko ke, ukufunda kwam iBhayibhile kwandenza ndamthanda nangakumbi uYehova. Ukufunda ngothando lukaThixo, umonde nenceba yakhe kwandenza ndamthanda. Ndathandaza kuYehova ndimcela ukuba andincede nditshintshe ibe uye wandinceda. Ndiye ndazibonela ubunyaniso bamazwi akumaHebhere 4:12 athi: “Ilizwi likaThixo liphilile, linamandla.”

Ukuqalisa kwam ukuya enkonzweni yamaNgqina kaYehova ndaphawula ukuba ahlukile. Ndandiqala ngqa ukulubona ukuba luyintoni kanye kanye uthando. Olu thando lwalubonakala kakhulu xa sikwiinkonzo zawo ezinkulu. Ndandiyithanda indlela awayesebenza ngayo ngokuzithandela ukuze enze abanye bazinandiphe ezo nkonzo.

INDLELA ENDINGENELWE NGAYO: UYehova uye wandinceda ndawoyisa umsindo. Ndicinga ukuba ngoku andisenalo ikratshi.

Mandivume kona ukuba ayekho amaxesha endandikhe ndilikhumbule ikakade lam kodwa ke ndayilibala yonke loo nto ngoku. Ndiphila ubomi obunenjongo yaye kuyandivuyisa ukufunda ukuba nomdla kwabanye abantu nakwimpilo ntle yabo.

“Ndivuyiswa kukunceda abanye abantu.”—GEOFFREY NOBLE

IMINYAKA YOBUDALA: 59

ILIZWE: UNITED STATES OF AMERICA

UBOMI BANGAPHAMBILI: WAYEVUKELA UNQULO NORHULUMENTE

INDLELA ENDANDIKADE NDIPHILA NGAYO: Ndakhulela eIpswich, eMassachusetts, idolophu yabantu abafumileyo. Kodwa ke ndathi ndisakukhula ndakhetha ukuya kuhlala kumaphandle aseVermont. Xa sithelekiswa nabantu baseMntla Merika, mna nentokazi endandihlalisana nayo sasingamahlwempu. Sasingenambane yaye ngenxa yoko sasibasa phantsi. Indlu yethu yangasese yayingumngxuma esasiwembe phandle yaye sasingenawo amanzi kaMasipala. Sasingafuni nokuyibona into enorhulumente phakathi kwaye loo nto wawuyibona kwakwindlela esasiphila ngayo. Kwakhe kwadlula iinyanga ezintandathu ndingakhange ndizikame inwele zam yaye ndandinebhongo ngaloo nto.

Ngeloo xesha iUnited States yayisilwa imfazwe neVietnam. Loo nto yandenza ndalithiya igunya. Urhulumente necawa ndandibabona njengabahanahanisi. Ndandisithi akukho mpendulo unokuzifumana apho ngoko umntu ngamnye ufanele ahambe ngayibonayo. Ngenxa yoko ndandisiba nantoni na endiyifunayo ndize ndingadliwa sisazela.

INDLELA EBUTSHINTSHE NGAYO UBOMI BAM IBHAYIBHILE: Mna nesinqanda mathe sam saqalisa ukufunda iBhayibhile kodwa sasingayiva. Ndanditshaya iziyobisi kodwa ke ndandifuna ukuziyeka. Naye ke usisi lo wayefuna ukutshata aze abe nabantwana. Kwathi kusenjalo kwafika iNgqina likaYehova ekhaya laza laqalisa ukusifundisa iBhayibhile.

Akuzange kube kudala ndahlukana nemikhwa emibi; noko ke, kwakunzima ukuthobela igunya. Ndandisele ndiqhele ukuphikisa yonke into le. Zazimbalwa izinto endandizithobela ebomini ngoko kwakunzima ukuyamkela imithetho yomnye umntu.

Ndandikholelwa ukuba wayekho uMdali, kodwa ndandingenalwazi luphangaleleyo ngaye. Kodwa ndamqonda kakuhle ukuba unjani uYehova uThixo njengoko ndandiqhubeka ndifunda iBhayibhile. Ndatsho ndazi ukuba izinto awayefuna ndizenze zazicace gca. Kwakhona ndafunda ukuba wayefuna umhlaba ube yiparadesi. (2 Petros 3:13) Ezi nyaniso zandenza ndafuna ukutshintsha indlela endandiphila ngayo ukuze ndimkhonze.

Ndandikuthanda kakhulu ukungafuni kwamaNgqina ukuncedisa emfazweni. Ayikho enye icawa endandiyazi ukuba yayiwuthobela loo mgaqo weBhayibhile.

Ndandisazi ukuba kwakuza kufuneka ndicoceke ukuba ndifuna ukukhonza uYehova. Ekuqaleni kwakunzima ukunxiba njengamaNgqina. Mna nabahlobo bam sasingenayo impahla yokuswenka njengehempe, iblukhwe okanye isihlangu. Phofu ndandingenalo nelo qhina. Kodwa ke ndazicheba iinwele. Nakuba kunjalo, ndisawukhumbula umhla wokuqala endaya kushumayela kwindlu ngendlu ngawo. Kwakungathi ndizijonge esipilini yaye ndandizibuza ukuba, ‘Kazi yintoni le ndiyenzileyo?’ Noko ke, ndada ndayiqhela le ndlela intsha endandizilungisa ngayo.

INDLELA ENDINGENELWE NGAYO: Ndayitshata laa ntokazi ndandihlala nayo ibe sise kunye nanamhlanje. Siye sakwazi ukukhulisa abantwana bethu abathathu ukuba bakhonze uYehova. Kwakhona ndiye ndanceda nabanye abantu bafunda iinyaniso zeBhayibhile nabo.

Ndandikade ndinebhongo ngokuba ndingayikhathalelanga into eyayicingwa ngabanye abantu ngam. Ngoku kundivuyisa gqitha ukunyamekela abanye abantu nokubabona bendikhathalela nabo.

[Amagama acatshulweyo akwiphepha 26]

“Ndandikhe ndihambe imigama emide ukuze ndiye kufumana intsangu”

[Amagama acatshulweyo akwiphepha 28]

“Oko ndandikufunde eBhayibhileni kwatshintsha indlela endandibujonga ngayo ubomi.”

[Amagama acatshulweyo akwiphepha 29]

“Kwakunzima ukunxiba njengamaNgqina”