IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w10 8/1 iphe. 28-31
  • Abathunywa Bevangeli Bathunywa Ukuba Baye “Kwenza Abafundi”

No video available for this selection.

Sorry, there was an error loading the video.

  • Abathunywa Bevangeli Bathunywa Ukuba Baye “Kwenza Abafundi”
  • IMboniselo Evakalisa UBukumkani BukaYehova—2010
  • Imixholwana
  • Amanqaku Afanayo
  • “Abafundi BakaYesu Babengazukuhlala Emakhayeni Abo”
  • “Qhayisani”
  • “Ngaba Niza Kuziphumeza Izabelo Zenu?”
  • Ezinye Iimbalasane Zocwangciso
  • Amava Nodliwano ndlebe
  • Imini Yolindelo Nemincili
    IMboniselo Evakalisa UBukumkani BukaYehova—2011
  • Umoya Wokuzinikela Uqhuba Abantu Baze EGiliyadi
    IMboniselo Evakalisa UBukumkani BukaYehova—2001
  • Bashukunyiselwa Ukuba Bakhonze
    IMboniselo Evakalisa UBukumkani BukaYehova—2000
  • Abathunywa Bevangeli Bathunyelwa “Nakwezona Nxalenye Zikude Zomhlaba”
    IMboniselo Evakalisa UBukumkani BukaYehova—2010
Khangela Okunye
IMboniselo Evakalisa UBukumkani BukaYehova—2010
w10 8/1 iphe. 28-31

Abaphumelele Kwiklasi Ye-128 Yesikolo SaseGiliyadi

Abathunywa Bevangeli Bathunywa Ukuba Baye “Kwenza Abafundi”

“UKUZE abantu bazo zonke iintlanga beve iindaba ezilungileyo kwakuza kufuneka amanye amaKristu ashiye iintsapho namakhaya awo ukuze aye kushumayela kwamanye amazwe.” UDavid Splane weQumrhu Elilawulayo lamaNgqina kaYehova walivula ngaloo mazwi itheko lokuvuyisana nabo babephumelele kwiSikolo saseGiliyadi.

NgoMatshi 13, 2010, abantu abamalunga nama-8 000 babekho kwitheko lokuvuyisana nabo baphumelele kwiklasi ye-128 yeSikolo seBhayibhile seWatchtower saseGiliyadi. Kwelo theko kwakukho abahlobo, izalamane neendwendwe ezivela kumazwe angama-27.

“Abafundi BakaYesu Babengazukuhlala Emakhayeni Abo”

Umzalwana uSplane owayengusihlalo watshayelela elo theko ngokucaphula amazwi kaYesu athi: “Hambani ke ngoko niye kubenza abafundi abantu beentlanga zonke.” (Mateyu 28:19, 20) Wathi uYesu wathuma abafundi bakhe ebantwini. Kuyinyaniso ukuba ngePentekoste yowama-33 C.E. abantu baseMesopotamiya, kuMntla Afrika nakwezinye iindawo zoBukhosi baseRoma beza eYerusalem baza beva iindaba ezilungileyo. Lo kaSplane wathi, nakuba kunjalo “abafundi babengenakulindela ukuba abantu beentlanga zonke beze kubo. Kwakuza kufuneka bahambe baye nakwezona ndawo zikude zomhlaba ukuze bafumane abantu.”—IZenzo 1:8.

UMzalwana uSplane wathi, “uYesu akazange abaxelele nje into ababefanele bayenze abafundi bakhe. Wabafundisa nendlela yokuyenza. Akazange abaxelele nje ukuba bathandaze kodwa wabafundisa ukuthandaza. Akazange abayalele ukuba bashumayele kodwa wababonisa nendlela yokushumayela. Akazange athi bafanele bakwazi ukufundisa nje kuphela kodwa wababonisa indlela yokufundisa ephumelelayo.”

Xa wayethetha nabazali babafundi, usihlalo wacaphula amazwi awathethwa nguYesu xa wayeqinisekisa abafundi bakhe esithi: “Khangelani! ndinani yonke imihla de kube sekuphelisweni kwenkqubo yezinto.” (Mateyu 28:20) UMzalwana uSplane waqinisekisa ababekho ukuba uYesu wayeza kubanyamekela abafundi kwizabelo zabo.

“Qhayisani”

UAnthony Morris weQumrhu Elilawulayo wakhuthaza abafundi ukuba ‘baqhayise.’ Wathi kukho ukuqhayisa okufanelekileyo nokungafanelekanga. Ukuqhayisa okungafanelekanga kwenzelwa ukuzizukisa. Ukanti ukuqhayisa okufanelekileyo kuchazwe kweyoku-1 kwabaseKorinte 1:31: “Lowo uqhayisayo, makaqhayise ngoYehova.” UMzalwana uMorris wathi: “Ufanele uqhayise xa unokuqonda nolwazi ngoYehova uThixo. Enyanisweni elona lungelo likhulu sinalo kukuthwala igama elingcwele lokuba ngamaNgqina kaYehova.”—Yeremiya 9:24.

Emva koko esi sithethi sabalaselisa ukubaluleka kokwazisa igama likaYehova ngokubalisa amava omthunywa wevangeli waseAfrika. Le ndoda yayihamba nomfazi wayo besiya kushumayela ngeBhayibhile. Bemiswa ngamajoni aza akhomba indoda ngompu eyibuza igama layo. Umfazi wayo wakhumbula izinto ababezifundiswe eGiliyadi waza wayisebezela esithi, “Mxelele ukuba uliNgqina likaYehova yaye uya kushumayela ngeBhayibhile.” Yalimamela icebiso lakhe yaye bavunyelwa ukuba bahambe. Ngemini elandelayo beva umongameli ethetha kunomathotholo esithi amajoni makakhangele ababulali abathi bangabathunywa bevangeli. Aba bantu basindiswa kukuzibiza ngokuba ngamaNgqina kaYehova kunokuba bathi bangabathunywa bevangeli. UMzalwana uMorris waqukumbela intshumayelo yakhe ngala mazwi: “Xa nifika kwizabelo zenu, qhayisani. Qhayisani ngezinto aza kuziphumeza uYehova njengoko esebenzisa nina ukuze azukiswe ngonaphakade.”

“Ngaba Niza Kuziphumeza Izabelo Zenu?”

UGeoffrey Jackson, olilungu leQumrhu Elilawulayo nowakha waba ngumthunywa wevangeli wanceda abo babephumelele ukuba bacinge ngalo mbuzo ungasentla. Wabuza ukuba: “Sithetha ukuthini xa sisithi umntu ngumthunywa wevangeli?” Wathi igama elithi “umthunywa wevangeli” livela kwelesiLatini elibhekisela kumntu okanye iqela labantu eliye lafumana isabelo esikhethekileyo. Isabelo sethu thina maNgqina kaYehova kukushumayela iindaba ezilungileyo nokunceda abanye babe nokholo. Xa sisenza lo msebenzi sixelisa uYesu Kristu, owayesoloko eyikhumbula inkonzo yakhe. Kwirhuluneli yaseRoma uPontiyo Pilato uYesu wathi: “Ndizele oku ehlabathini, ukuze ndiyingqinele inyaniso.”—Yohane 18:37.

Isithethi sakhumbuza abafundi ngebali leBhayibhile elingedabi laseYeriko. Kangangeentsuku ezintandathu umkhosi wakwaSirayeli wawuvuka ekuseni, unxibe impahla yomkhosi, ujikeleze isixeko saseYeriko uze uphinde ubuyele ekhaya. UJackson wathi, “kubantu loo nto yayibonakala ingenangqiqo.” Wathi kusenokwenzeka ukuba namanye amajoni ayesithi ‘yinkcitha xesha.’ Kodwa ke ngosuku lwesixhenxe amaSirayeli ayalelwa ukuba asijikeleze kasixhenxe isixeko aze emva koko amemeze. Waba yintoni umphumo? Iindonga zeYeriko zawa bhuma.—Yoshuwa 6:13-15, 20.

UMzalwan’ uJackson wathi sifunda izifundo ezine kwibali laseYeriko. (1) Sifanele sithobele. Sifanele sizenze ngendlela kaYehova izinto kungekhona ngendlela esibona ngayo. (2) Kubalulekile ukuba nokholo nokumthemba uYehova. ‘Indonga zaseYeriko zawiswa lukholo’ kungakhange kuliwe. (Hebhere 11:30) (3) Simele sibe nomonde. Ekuhambeni kwexesha uYehova uya ‘kunisikelela.’ (Duteronomi 28:2) (4) Musa ukunikezela. Ningaze nilulibale uthumo lwenu. Xa wayequkumbela intshumayelo yakhe uMzalwan’ uJackson wathi, “ukuba anizilibali ezi zinto sithethe ngazo apha, niya kuluzalisekisa uthumo lwenu kuze kuzukiswe uYehova.”

Ezinye Iimbalasane Zocwangciso

“Thanda IBhayibhile Nombhali Wayo.” Lowo yayingumxholo wentshumayelo kaMaxwell Lloyd, olilungu leKomiti yeSebe laseUnited States. Wathi kubafundi, “Nifanele niyithande iBhayibhile.” Emva koko wabakhuthaza esithi: Lungaze lwethe uthando lwenu ngoYehova uThixo. Musani ukucinga ukuba wonke umntu uyayiva into eniyifundisayo. Yifundiseni ngendlela elula iBhayibhile ukuze nifikelele iintliziyo zabafundi yaye thobekani. Musani ukuzenza ngathi nazi yonke into kodwa yibani yimizekelo. Yenza abantu obafundisayo babone ukuba uyayithanda iBhayibhile.

‘Qwalaselani amahlungulu.’ UMichael Burnett, ongumhlohli kwisikolo saseGiliyadi nowayekade engumthunywa wevangeli wenza intshumayelo eyayinalo mxholo ungasentla. Wathi, maxa wambi siza kuxhalaba. Kodwa khumbulani isiluleko sikaYesu esithi: “Phawulani kakuhle ukuba amahlungulu akahlwayeli mbewu yaye akavuni, . . . ukanti uThixo uyawondla.” (Luka 12:24) UMthetho kaSirayeli wawusithi amahlungulu akahlambulukanga ngenxa yoko ayengatyiwa ibe ayenezothe. (Levitikus 11:13, 15) Nakuba kunjalo uThixo uyawondla. UMzalwan’ uBurnett, wathi: “Xa kukho into enixhalabisayo nize nikhumbule ihlungulu. Ukuba uThixo wondla intaka enezothe, ngaba akayi kwenza ngakumbi kuni nina bantu bacocekileyo emehlweni akhe.”

“Andikonanga nganto.” UMark Noumair naye ngumhlohli waseGiliyadi, wathetha ngomzekeliso kaYesu ongabasebenzi basesidiliyeni. Abanye babo basebenza imini yonke. Kodwa abanye basebenza iyure nje enye. Nakuba kunjalo bonke bafumana umvuzo ofanayo. Abo babesebenze imini yonke bakhalaza. Umnini sidiliya wathi kubo: ‘Andinonanga nganto. Benivumelene nam ngedenariyo, akunjalo? Thathani okwenu nize nihambe.’ (Mateyu 20:13, 14) Sifunda ntoni apha? Ungaze uzithelekise nabanye. UMzalwan’ uNoumair wathi: “Ukuzithelekisa nabanye kuya kukwenza ungonwabi. Okona kubi nangakumbi kukuba kusenokukwenza usishiye isabelo sakho.” Lo mzalwana wakhumbuza iklasi ukuba uYesu walathisa umsebenzi wokushumayela yaye unokwenza nantoni na ayifunayo kubalandeli bakhe. Ukuba uYehova noYesu bagqiba ekubeni banike abanye okungakumbi, abakoni nganto. Jonga nje okwakho yaye ungavumeli “umvuzo” wabanye uphazamise umsebenzi akunike wona uYehova.

Amava Nodliwano ndlebe

Xa bengekho sesikolweni, abafundi baseGiliyadi bashumayela namaNgqina kaYehova asekuhlaleni. USam Roberson ongomnye wabahlohli baseGiliyadi wadlan’ indlebe nabafundi. Ngokomzekelo, udade Alessandra Kirchler wadibana nenye inkosikazi eyayikhathazwa ngunyana wayo owayetshaya. UAlessandra waphinda waya kuyibona eyiphathele uVukani! owayethetha ngokutshaya. Wafika kungekho mntu ekhaya kodwa ke wayishiya incwadi. Ekugqibeleni uAlessandra wade wayifumana le nkosikazi. Yalithanda kakhulu eli phephancwadi yaza yathi, “Bendisoloko ndizibuza ukuba yintoni afuna ukundifundisa yona uThixo ngazo zonke ezi zilingo andifaka kuzo.” UAlessandra wayibonisa eBhayibhileni ukuba uThixo akabangeli ukuba sehlelwe zizinto ezibuhlungu. (Yakobi 1:13) Ngoku le nkosikazi kunye nonyana wayo bafunda iBhayibhile.

UMelvin Jones osebenza kwiSebe leNkonzo wadlan’ indlebe nabazalwana abathathu ababekhe bafunda eGiliyadi: UJon Sommerud, okhonza eAlbania; uMark Anderson, okhonza eKenya noJames Hinderer osebenza kwiSebe leZikolo Zobuthixo. Bobathathu bavuma ukuba eGiliyadi akufundiswa iinyaniso zeBhayibhile nje kuphela kodwa kufundiswa nendlela yokuphila ngazo, kungakhathaliseki ukuba umfundi ngubani yaye uvela phi.

Emva koko, omnye wabafundi wafunda ileta eyayibhalwe yiklasi. UJohn Barr oneminyaka engama-96 ubudala nolelona lungu leQumrhu Elilawulayo lidala waqukumbela ngomthandazo ecela uYehova ukuba asikelele umsebenzi weklasi ye-128 yaseGiliyadi.

[Isicangca/Imaphu ekwiphepha 31]

INKCAZELO NGABAFUNDI

8 inani lamazwe abavela kuwo

54 inani labafundi

27 inani lezibini ezitshatileyo

35.2 umlinganiselo weminyaka yobudala

19.1 umlinganiselo weminyaka bebhaptiziwe

13.8 umlinganiselo weminyaka bekwinkonzo yexesha elizeleyo

[Imaphu]

(Ukuba ufuna inkcazelo ehlahlelwe kakuhle, yiya kwimpapasho)

bathunyelwe kula mazwe angama-25 adweliswe ngezantsi

IZABELO ZABATHUNYWA BEVANGELI

ALBANIA

ARUBA

BOLIVIA

CAMBODIA

CÔTE D’IVOIRE

DOMINICAN REPUBLIC

ECUADOR

GHANA

GUATEMALA

GUINEA

GUYANA

HONDURAS

INDONESIA

KOSOVO

LATVIA

LIBERIA

MADAGASCAR

MONGOLIA

NAMIBIA

NICARAGUA

PARAGUAY

ROMANIA

RWANDA

SERBIA

TAIWAN

(UMSEBENZI WABO UVELELWA LISEBE LASEOSTRELIYA)

[Umfanekiso okwiphepha 30]

Abafundi baseGiliyadi bebonisa indlela yokushumayela

[Umfanekiso okwiphepha 31]

Abaphumelele Kwiklasi Ye-128 YeSikolo SeBhayibhile SeWatchtower SaseGiliyadi

Kuludwe olungezantsi, kuqalwa ukusuka kuluhlu olungaphambili ukusa kolungasemva yaye amagama adweliswe ukusuka ekhohlo ukusa ekunene kuluhlu ngalunye.

(1) Keller, E.; Ostopowich, I.; Jacobsen, S.; Arias, M.; Dieckmann, Y.; Tanaka, J.; Harada, K.

(2) Camacho, L.; Kirchler, A.; Rodríguez, S.; Ward, B.; Trenalone, K.; Victoria, V.; Oxley, F.; Nguyen, K.

(3) Oxley, O.; De Dios, A.; Lindström, C.; Allen, J.; Meads, T.; Waddington, J.; Victoria, E.

(4) Harada, H.; Lindström, A.; Orsini, E.; Logue, D.; Missud, T.; Bergeron, S.; Camacho, G.; Ward, T.

(5) Kirchler, W.; Nguyen, H.; Kremer, E.; Burgaud, C.; Titmas, N.; De Dios, C.; Rodríguez, A.; Waddington, M.

(6) Dieckmann, J.; Allen, C.; Titmas, R.; Arias, J.; Bergeron, E.; Keller, J.; Ostopowich, F.; Burgaud, F.

(7) Tanaka, K.; Kremer, J.; Jacobsen, R.; Trenalone, J.; Logue, J.; Meads, D.; Missud, D.; Orsini, A.

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share