Abaphumelele Kwiklasi Ye-130 Yesikolo SaseGiliyadi
Imini Yolindelo Nemincili
NGOKUNGATHANDABUZEKIYO, abaphumelele kwiklasi ye-130 yeSikolo seBhayibhile seWatchtower saseGiliyadi babenolindelo olukhulu nemincili. NgoMgqibelo kaMatshi 12, 2011, abantu abangaphezu kwama-8 500 bahlanganisana kwitheko lokuvuyisana nabo baphumeleleyo, kuquka abafundi, iintsapho kunye nezihlobo. Abantu babeyilindele ngolangazelelo le mini, kodwa babekhangele phambili nakwikamva laba bathunywa bevangeli ababeza kuthunyelwa ehlabathini lonke ukuze bafundise iinyaniso zeBhayibhile ebantwini.
“Banoyolo Bonke Abo Bahlala Bemlindele” UYehova
Loo mazwi akhuthazayo, athathwe kuIsaya 30:18, ayengumxholo wentetho eyayinikelwa nguGeoffrey Jackson, ilungu leQumrhu Elilawulayo lamaNgqina kaYehova nowayekwangusihlalo wolo cwangciso. Ethetha ngelizwi elifudumeleyo noburharha, wavuyisana nabafundi kuba beye baphumelela kwisikolo saseGiliyadi waza wabaqinisekisa ukuba baza kuphumelela nangolu suku. Luluphi ulindelo ababenokuba nalo abafundi ngekamva? Wathetha ngeengongoma ezintathu ezisekelwe kuIsaya 30:18-21.
Okokuqala, uMzalwana uJackson wathi, “Ninokulindela ukuba uYehova uza kuyiva imithandazo yenu.” Wathetha ngesiqinisekiso esikwivesi ye-19: “Nakanjani na [uThixo] uya kukubabala esandini sesikhalo sakho.” UMzalwana uJackson wathi isimela bizo esisetyenziswe apha ngesiHebhere sibhekisela kumntu omnye, kungekhona abaninzi, wabonisa ukuba uYehova uphulaphula ngamnye wethu xa ethandaza. Wathi: “NjengoBawo, uYehova akabuzi ukuba, ‘Kutheni ungafani nobani bani nje?’ Kunoko umphulaphula ngenyameko ngamnye wethu. Kwaye uyaphendula.”
Okwesibini, esi sithethi sathi simele sizilindele iingxaki. “UYehova akathembisi ukuba ubomi buza kuba lula; kodwa uya kusinceda.” Njengokuba ivesi 20 ibonisa, uThixo waxela kwangaphambili ukuba, xa uSirayeli erhangqiwe, ukuxinezeleka nokubandezeleka kwakuza kuxhaphaka njengesonka namanzi. Sekunjalo, uYehova uhlala ekulungele ukunceda abantu bakhe. Nabafundi baseGiliyadi baza kudibana neengxaki nangona isenokungabi zezo bazilindeleyo! Umzalwana uJackson wolek’ umsundulo wathi: “Kodwa ninokulindela ukuba uYehova uya kuninceda nijamelane nezo ngxaki.”
Okwesithathu, uMzalwana uJackson wakhumbuza abafundi ukuba njengokuba ivesi yama-20 neyama-21 ibonisa, “unokulufumana ulwalathiso—lukhangele!” Namhlanje umKristu ngamnye umele aphulaphule njengoko uYehova ethetha esebenzisa iBhayibhile neempapasho ezisekelwe eBhayibhileni. Wabongoza abafundi ukuba bafunde iBhayibhile rhoqo, kuba oko kuthetha ubomi.
“Vumelani Ukunkwantya KuYehova Kube Kuni”
UAnthony Morris weQumrhu Elilawulayo wachaza oko kuthethwa libinzana eliseZibhalweni elithi “ukunkwantya kuYehova.” (2 Kronike 19:7) Loo mazwi awathethi ukutyhwatyhwa, kunoko athetha umnqweno wokufuna ukwenza into elungileyo nentlonelo enyanisekileyo ekwenza woyike. UMzalwana uMorris wathi: “Hambani nolo loyiko niye nalo kwizabelo zenu zabathunywa bevangeli.” Banokulubonisa njani olo loyiko kuYehova? Isithethi sagxininisa iinkalo ezimbini.
Okokuqala, uMzalwan’ uMorris wabongoza abafundi ukuba basebenzise isiluleko esikuYakobi 1:19 esithi: “Wonke umntu umele akhawuleze ukuva, acothe ukuthetha.” Wathi abafundi zininzi izinto abazifundileyo kwezi nyanga zintlanu, kodwa bafanele balumke bangaqhayisi. Wahlabela mgama wathi: “Phulaphula kuqala. Phulaphula ibandla nabo bathabatha ukhokelo kwelo lizwe nikhonza kulo; phulaphula izinto abazithethayo ngelizwe nangenkcubeko. Ungoyiki ukuthi, ‘Andazi.’ Ukuba ufundiswe kakuhle, okukhona ufunda, kokukhona uya kubona ukuba awazi nto.”
Okwesibini, uMzalwan’ uMorris wafunda iMizekeliso 27:21 ethi: “Imbiza yokusulungekisa yeyesilivere, neziko lelegolide; nomntu uvumelana nokudunyiswa kwakhe.” Wabonisa ukuba njengokuba igolide nesilivere zifuna ukucikidwa, okanye zicocwe, sinokucikideka ngokudunyiswa. Njani? Ukudunyiswa kunokusivavanya. Kunokusenza sibe nekratshi size siwe, okanye kunokusinceda sivume ukuba sixhomekeke kuYehova size sizimisele singaze sisilele kwimilinganiselo yakhe. Ngaloo mazwi, uMzalwan’ uMorris wabongoza abafundi ukuba bakusebenzise kakuhle—njengethuba lokubonisa ukuba banako “ukunkwantya kuYehova.”
“Luxabiseni Uthumo Lwenu”
UGuy Pierce weQumrhu Elilawulayo wanikela intetho engumxholo wocwangciso. Wathetha ngalo mxholo ungasentla, echaza ukuba igama elithi “umthunywa” lithetha “umntu othunyiweyo.” Ayothusi ke into yokuba bebaninzi abathunywa abathunywe izinto ezahlukeneyo. Abanye banomdla ekuphiliseni abantu nokusebenzisa ezopolitiko ukuze bacombulule iingxaki zehlabathi. Kodwa wathi, “Nina nahlukile.” Njani?
Xa abafundi bebefunda iBhayibhile, zininzi izinto abaye bazifunda ngokuphilisa. Xa uYesu wavusa intombazana, abazali bayo “bathi phithi kwaoko bethabatheke ngokugqithiseleyo.” (Marko 5:42) Ngendlela efanayo, xa abantu abaziimfama baphiliswa ngokungummangaliso, bavuya gqitha. Esinye isizathu sokuba kwenziwe loo mimangaliso yayikukusibonisa oko kuza kwenziwa nguKristu kwihlabathi elitsha elizayo apho “isihlwele esikhulu” samalungisa esiza kusinda xa kuphela le nkqubo yezinto ingendawo siza kuphiliswa kuzo zonke izigulo. (ISityhilelo 7:9, 14) Abantu babo ababathandayo abaza kubamkela eluvukweni, baza kube bephile qete, kuquka nabo baza kuvuswa. Khawuthelekelele uvuyo oluya kuba lapho!
Noko ke, njengoko uMzalwan’ uPierce wayecacisa, ukupheliswa kwezigulo zabantu akusoze kube yeyona ndlela ibalulekileyo yokuphilisa. Abantu abagulayo abaphiliswa nguYesu baphinda bagula kwakhona. Abantu abafileyo awabavusayo baphinda bafa kwakhona. Kwaneemfama awaziphilisayo zaphinda zazimfama zisakufa. Eyona nto eyayibalulekile yayikukuphilisa kukaYesu abantu ngokomoya. Abathunywa bevangeli baseGiliyadi banothumo lokuphilisa abantu ngokomoya. Banceda abantu baxolelaniswe noBawo wethu wasezulwini ukuze baphile ngokomoya. Ngabo baphilileyo ngokomoya kuphela abaya kuphila ngonaphakade. UMzalwan’ uPierce wathi, “Oko kuphilisa ngokomoya, kuko okuzukisa uThixo. Kukunceda uphumelele kubulungiseleli bakho.”
Iimbalasane Ezintathu Zolo Suku
“Ngaba Le Iza Kuba Yimini Entle?” URobert Rains weKomiti Yesebe laseUnited States waphendula loo mbuzo. Wakhuthaza abafundi ukuba baqinisekise ukuba suku ngalunye kwisabelo sabo luza kuba luhle xa belisebenzisa ngobulumko ixesha labo, bekhangele eLizwini likaThixo xa bejamelene neengxaki, naxa bethembele kuYehova ngomthandazo.
“Ngaba Izinto Ezindala Uya Kuzenza Ntsha?” UMark Noumair, umqhubi wesikolo saseGiliyadi wabuza loo mbuzo kwintetho yakhe. Waxubusha eyoku-1 kaYohane 2:7, 8, apho umpostile uYohane wathetha ‘ngomyalelo omdala owawukwangumyalelo omtsha.’ Yomibini ibhekisela kumthetho omnye—wokuba abalandeli bakaKristu bamele bathandane ngokunyanisekileyo, bakulungele ukuncamelana izinto. (Yohane 13:34, 35) Lo myalelo wawumdala kuba wamiselwa kubalandeli bakaYesu nguKristu ngokwakhe kumashumi eminyaka ngaphambili; kodwa wawumtsha ngengqiqo yokuba amaKristu ayeneengxaki ezintsha yaye ayefanele abonise uthando ngeendlela ezintsha. Abathunywa bevangeli badibana neengxaki ezintsha yaye kufuneka bafunde iindlela zokubonisa uthando ngeendlela ezintsha. Yintoni enokubanceda bakwenze oku?
UMzalwan’ uNoumair wababongoza wathi: “Musa ukuba yiloo nto uyithiyileyo.” Walumkisa ukuba, xa sibona ihambo esingayithandiyo size siyixelise, siba yiloo nto siyithiyileyo—oko kukuzibulala. Kwelinye icala, ukuba sikhangela iindlela ezintsha zokubonisa uthando siya kukhanyisa “ukukhanya kokwenyaniso” obugabula ubumnyama.
“Thwala Umthwalo.” Omnye umhlohli waseGiliyadi, uMichael Burnett, wathetha ngalo mxholo. Wathetha ngabantu bamazwe aseAfrika abathwala izinto ezinzima entloko. Basebenzisa inkatha ebanceda bakwazi ukuncekelela. Abathunywa bevangeli baseGiliyadi baza kuba nomthwalo onzima kwizabelo zabo, kodwa banikwe imfundo yeBhayibhile efana nenkatha. Njengoko besebenzisa izinto abazifundileyo, baya kukwazi ukuwuthwala kakuhle umthwalo.
Amava Nodliwano Ndlebe
Uqeqesho lweSikolo saseGiliyadi luquka ukuchitha ixesha entsimini namabandla asekuhlaleni amaNgqina kaYehova. UWilliam Samuelson, umveleli weSebe leSikolo Sobulungiseleli Sobuthixo, wathetha ngamava abafundi, esebenzisa umxholo othi “Ungasiphumzi Isandla Sakho.” (INtshumayeli 11:6) Bephinda loo mava ngemiboniso, abafundi babonisa indlela ebebeshumayela ngayo kwiinqwelo moya, kwiindawo zokutyela nakwiindawo ezithengisa ipetrol. Babeshumayela kwizindlu ngezindlu, ngokungacwangciswanga nangeeleta. Abaziphumzanga izandla zabo yaye imiphumo yaloo nto iye yamihle kakhulu.
Omnye umzalwana osebenza eGiliyadi uKenneth Stovall wadlan’ indlebe namadoda amathathu anexesha elide engabathunywa bevangeli—uBarry Hill wakhonza e-Ecuador naseDominican Republic, uEddie Mobley wakhonza eCôte d’Ivoire noTab Honsberger owakhonza eSenegal, eBenin, naseHaiti. Bobathathu bathetha ngomxholo othi “Vavanya UYehova Uze Ufumane Iintsikelelo.” (Malaki 3:10) Ngokomzekelo, uMzalwan’ uHill wathi kwafuneka yena nomfazi wakhe baqhelane nemozulu yase-Ecuador eshushu, enothuli nemanzi. Iminyaka emibini enesiqingatha, uthi kwakufuneka bahlambele ekomini. Kodwa abazange bacinge ngokunikezela; babevakalelwa ukuba isabelo sabo yintsikelelo evela kuYehova. Wathi, “Yayibubomi bethu.”
Ekupheleni kocwangciso, omnye wabafundi wafunda ileta echukumisayo egameni labafundi, ebonakalisa uxabiso abanalo ngesikolo. Yayisithi: “Ukholo lwethu lomeleziwe, kodwa siyazi ukuba usemninzi umsebenzi esifanele siwenze.” Bonke abafundi bafumana iziqinisekiso zabo, emva koko babelwa kumazwe awahlukahlukeneyo. UMzalwan’ uJackson waqukumbela ucwangciso ngokuqinisekisa abafundi ukuba banokulindela ukuncedwa nguYehova kwixa elizayo, ngokukodwa xa beneengxaki. Bonke ababekho bemka benolindelo olukhulu nemincili. Ngokungathandabuzekiyo, uYehova uza kusebenzisa aba bathunywa bevangeli batsha ukuze enze izinto ezinkulu.
[Isicangca/Imaphu ekwiphepha 31]
INKCAZELO NGABAFUNDI
9 inani lamazwe abavela kuwo
34.0 umlinganiselo weminyaka yobudala
18.6 umlinganiselo weminyaka bebhaptiziwe
13.1 umlinganiselo weminyaka bekwinkonzo yexesha elizeyo
[Imaphu]
(Ukuba ufuna inkcazelo ehlahlelwe kakuhle, yiya kwimpapasho)
Abafundi bathunyelwe kumazwe aboniswe ngezantsi
IZABELO ZABATHUNYWA BEVANGELI
ARGENTINA
ARMENIA
BURKINA FASO
BURUNDI
CONGO (KINSHASA)
CZECH REPUBLIC
HAITI
HONG KONG
INDONESIA
KENYA
LITHUANIA
MALAYSIA
MOZAMBIQUE
NEPAL
PAPUA NEW GUINEA
ROMANIA
SENEGAL
TANZANIA
UGANDA
ZIMBABWE
[Umfanekiso okwiphepha 31]
Abaphumelele Kwiklasi Ye-130 YeSikolo SeBhayibhile SeWatchtower SaseGiliyadi
Kuludwe olungezantsi, kuqalwa ukusuka kuluhlu olungaphambili ukusa kolungasemva yaye amagama adweliswe ukusuka ekhohlo ukusa ekunene kuluhlu ngalunye.
(1) Molina, Z.; Bassolino, S.; Alatsis, C.; Arroyo, A.; Niño, L.; Merkling, S.; Clark, M.
(2) Little, C.; Tibaudo, S.; Jakobsson, S.; Moreno, J.; Rodriguez, A.; Lee, K.; Cárdenas, H.; Aguilar, L.
(3) Clairbush, A.; Polley, A.; Caldwell, S.; Adame, J.; Hildebrandt, S.; Shoemaker, I.; Grohman, N.; Galvez, G.
(4) Clark, J.; Bassolino, A.; Packham, K.; Adame, J.; Knaus, M.; Niño, M.; Moreno, R.; Galvez, J.
(5) Rodriguez, D.; Geynes, M.; Molina, J.; Aguilar, A.; Alatsis, I.; Manno, A.; Grohman, R.; Packham, J.
(6) Geynes, S.; Cárdenas, M.; Arroyo, C.; Manno, C.; Merkling, J.; Lee, H.; Clairbush, X.; Jakobsson, P.
(7) Little, J.; Hildebrandt, B.; Shoemaker, M.; Knaus, K.; Caldwell, J.; Tibaudo, F.; Polley, C.