Amacebiso Ngendlela Yokuqhuba Unqulo Lwentsapho NeSifundo Sobuqu

EKUQALENI kowama-2009, amabandla amaNgqina kaYehova ehlabathini lonke aye enza utshintsho kucwangciso lweentlanganiso. Iintlanganiso eziqhutywa phakathi evekini zadityaniswa, yaye wonke umntu wakhuthazwa ukuba asebenzise ingokuhlwa angenzi nto ngayo ukuze abe nonqulo lwentsapho okanye isifundo sobuqu. Ngaba ubusoloko ulixhakamfula eli lungiselelo litsha? Ngaba ungenelwa ngokupheleleyo kulo?

Abanye bebezibuza ukuba banokufunda ntoni ebudeni bonqulo lwentsapho. Asiyonjongo yeQumrhu Elilawulayo ukumisela indlela enye enokusetyenziswa ziintsapho zonke. Ekubeni iimeko zisahluka, kufanelekile ukuba ntloko-ntsapho nganye okanye mntu ngamnye ahlole indlela esi sihlandlo seeveki ngeeveki esinokusetyenziswa ngayo ngokusemagqabini.

Abanye bebelungiselela iintlanganiso zebandla, kodwa unqulo lwentsapho alumele luphelele kuloo nto. Abanye bebefunda, bexubusha okanye besenza imidlalo yeBhayibhile, ukuze abantwana bangenelwe ngakumbi. Kusenokungasoloko kuyimfuneko okanye kubangel’ umdla ukusebenzisa imibuzo neempendulo, njengoko kusenziwa ezintlanganisweni zebandla. Ukukhululeka xa nifunda kudla ngokwenza ingxubusho ibangele umdla kuze kube lula ukuphakelana ngezimvo. Umoya onjalo ukhuthaza ubuchule bokucinga, nto leyo enokwenza eso sihlandlo sikhumbuleke yaye sinandipheke kubo bonke.

Omnye utata wabantwana abathathu uthi: “Phantse yonk’ into ebesiyenza isekelwe kufundo lweBhayibhile. Ngamnye kuthi ufunda izahluko kusengaphambili, abantwana baphawula iinkalo ezifuna ukuphandwa, baze basibalisele ngoko bakufumeneyo. UMichael [oneminyaka esixhenxe] ebedla ngokuzoba umfanekiso okanye abhale isiqendu. UDavid noKaitlyn [abaneminyaka eli-13 neli-15] ngamanye amaxesha bebebhala ngengxelo yeBhayibhile bezifaka ezihlangwini zomntu obukeleyo. Ngokomzekelo, xa sasifunda ngendlela uYosefu awawatolika ngayo amaphupha ombhaki nomngcamli kaFaro, uKaitlyn wabhala isicatshulwa, ezifaka ezihlangwini zebanjwa elibukele yonke loo nto njengoko iqhubeka.”—Gen., isahl. 40.

Ngokuqhelekileyo, iimeko ziyahlukahlukana. Ukuba into iyamlungela umntu okanye intsapho ethile isenokungabalungeli abanye. Ibhokisi ehamba neli nqaku inamacebiso aliqela anokusetyenziswa ebudeni bonqulo lwentsapho okanye isifundo sobuqu. Usenokucinga nangamanye amacebiso.

[Ibhokisi/Umfanekiso okwiphepha 6, 7]

Iintsapho ezinabantwana abakwishumi elivisayo:

• Fundani nize nixubushe incwadi ethi Imibuzo Yabantu Abaselula—Iimpendulo Eziluncedo.

• Zenzeleni umfanekiso ngqondweni niphila ngamaxesha okubhalwa kweBhayibhile (Funda iMboniselo kaMeyi 15, 1996, iphepha 14, iziqendu 17-18.)

• Thethani ngosukelo olunokufikelelwa njengoko ixesha lihamba kunye nolunokufikelelwa ngokukhawuleza.

• Ngamanye amaxesha, bukelani nize nixubushe ividiyo esekelwe eBhayibhileni.

• Hlolani “Inqaku Labaselula” elikwiMboniselo.

Izibini ezingenabantwana:

• Xubushani izahluko 1, 3, 11-16 zencwadi ethi Imfihlelo Yolonwabo Lwentsapho.

• Xubushani ngezinto enizifumene xa beniphanda ngeengongoma ezikufundo lweBhayibhile.

• Lungiselelani iSifundo SeBhayibhile Sebandla okanye iSifundo SeMboniselo.

• Thethani ngeendlela eninokulandisa ngazo ixesha enilichitha entsimini njengesibini.

Abazalwana noodade abangatshatanga okanye abo bakumakhaya ahluleleneyo ngokonqulo:

• Funda iimpapasho ezintsha ezikhutshwe kwiindibano zesithili.

• Funda iiNcwadi Zonyaka zakutshanje nezexesha elidluleyo.

• Phanda ngemibuzo eqhele ukubuzwa ngabantu abakwintsimi yasekuhlaleni.

• Lungiselela oko uza kukuthetha kwinkonzo yasentsimini.

Iintsapho ezinabantwana abancinane:

• Yenzani imidlalo yeBhayibhile.

• Dlalani neminye imidlalo, efana naleyo ikwiphepha 30 nelama-31 likaVukani!

• Ngezinye izihlandlo, zenzeleni umfanekiso-ngqondweni ngezinto ezithile. (Funda inqaku elithi “Studying the Bible—In the Zoo!” kuVukani! wesiNgesi kaMatshi 8, 1996, iphepha 16-19.)

• Hlolani inqaku leMboniselo elithi “Fundisa Abantwana Bakho.”