Ngaba Uyakhumbula?
Ngaba uye wazifunda ngocoselelo iiMboniselo zakutshanje? Khawubone ukuba unokuyiphendula kusini na le mibuzo ilandelayo:
• Ziziphi iinkalo ezintathu ezibalulekileyo ezinokusinceda sixhathise naluphi na utyekelo lokunganyaniseki?
Zezi: (1) Yoyika uThixo ngendlela efanelekileyo. (1 Pet. 3:12) (2) Hlakulela isazela esiqeqeshwe ngeBhayibhile. (3) Zimisele ngamandla ukuba waneliseke.—4/15, iphepha 6-7.
• Sazi njani ukuba ukungazithathi lula izinto ngoxa sikhonza uThixo akuthethi kuthi masihlale sithinzile okanye singazonwabisi?
Sinokuhlola umzekelo kaYesu. Wayezonwabisa yaye esidla kunye nabanye abantu. Siyazi ukuba wayengekho ngqongqo ngokugqithiseleyo okanye esoloko ethinzile. Abanye abantu nkqu nabantwana, babesondela kuye yaye bengoyiki ukuba kunye naye.—4/15, iphepha 10.
• Yintoni enokwenziwa sisibini esitshatileyo xa siphawula ukuba ulwalamano lwaso luba buthathaka emva kokuba sifumene umntwana?
Simele siqinisekisane ukuba sisathandana. Indoda imele izame ukuwaphelisa onke amathandabuzo asenokuba unawo umfazi wayo. Yaye bobabini bamele bancokolisane baze bathethe ngeemvakalelo neemfuno zabo zokwenyama.—5/1, iphepha 12-13.
• Yintoni eyayifuziselwa ngumnquma ekuthethwa ngawo kwincwadi yabaseRoma isahluko 11?
Umnquma ufuzisela inxalenye yesibini yembewu ka-Abraham, uSirayeli wokomoya. UYehova ufana nengcambu yaye uYesu ufana nesiqu salo mthi womnquma wokomfuziselo. Xa uninzi lwamaYuda emvelo lwamgatyayo uYesu, kwakuza kufakwa abeeNtlanga ababa ngamakholwa, baze ngaloo ndlela benze inani elipheleleyo lenxalenye yesibini yembewu ka-Abraham.—5/15, iphepha 22-25.
• Ziziphi iindaba ezilunge ngokukhethekileyo esinokuzixelela amahlwempu?
Iindaba ezilungileyo zithi: UThixo umisele uYesu njengoKumkani. Ungoyena Mlawuli uya kuphelisa ubuhlwempu. Ngoba? Kuba uza kulawula bonke abantu yaye unamandla okwenza izinto; unemfesane ngamahlwempu; yaye unokuwuphelisa unobangela wobuhlwempu, utyekelo lokuzingca esaluzuza njengelifa.—6/1, iphepha 7.
• Wayethetha ukuthini uYesu xa wathi kuKayafa: “Nawe utsho”?—Mat. 26:63, 64.
Ibinzana elithi “nawe utsho” kubonakala ukuba laliqhele ukusetyenziswa ngamaYuda xa eqinisekisa ubunyaniso bento ethethwayo. UYesu wabuzwa nguKayafa, uMbingeleli Omkhulu, enoba unguKristu uNyana kaThixo kusini na. Impendulo kaYesu ethi: “Nawe utsho.” yamshiya engenamathandabuzo umbingeleli omkhulu.—6/1, iphepha 18.
• Ngaba kwakunokwenzeka ukuba inzala eyayinokuphuma kwindoda efezekileyo uYesu ibe yinxalenye yentlawulelo?
Akunjalo. Nangona uYesu ngewayezele iibhiliyoni zabantu abafezekileyo, loo nzala yayingenakuba yinxalenye yentlawulelo. Ubomi bukaYesu bubodwa babulingana nobuka-Adam. (1 Tim. 2:6)—6/15, iphepha 13.
• AmaKristu anokubonisa njani ukuba ayasiphulaphula isilumkiso nxamnye nabafundisi bobuxoki esibhalwe kwiZenzo 20:29, 30?
Akabamkeli emakhayeni awo okanye ababulise abafundisi bobuxoki. (Roma 16:17; 2 Yoh. 9-11) AmaKristu ayaluphepha uncwadi lwabawexuki, iinkqubo zabo zikamabonwakude, neeweb site ezineemfundiso zabo.—7/15, iphepha 15-16.
• Ngubani ofanele afundise abantwana ngoThixo?
Utata nomama bafanele bancedisane kuloo nto, ngokuvisisana nesiluleko seBhayibhile. (IMize. 1:8; Efe. 6:4) Uphando lubonisa ukuba xa abazali bobabini bebandakanyekile, umphumo uba mhle ebantwaneni.—8/1, iphepha 6-7.