1 UThixo Akanakwaziwa—Ngaba Yinyaniso?
Mhlawumbi wakhe weva kusithiwa: “UThixo usebenza emfihlakalweni.”
“UBawo akanakuqondwa, uNyana akanakuqondwa noMoya Oyingcwele awunakuqondwa.”—ISivumo Sokholo Sika-Athanasius, sichaza imfundiso kaBathathu Emnye efundiswa ziicawa zeNgqobhoko.
Oko kufundiswa yiBhayibhile: UYesu wathi abo ‘bangenisa ulwazi ngokuphela koThixo oyinyaniso’ baya kusikelelwa. (Yohane 17:3) Kodwa sinokumazi njani uThixo ukuba akanakwaziwa? Kunokuba azifihle, ufuna wonke umntu amazi.—Yeremiya 31:34.
Kakade ke, asinakuze sazi yonke into ngoThixo. Loo nto imele ibe njalo kuba iingcinga neendlela zakhe ziphakamile kunezethu.—INtshumayeli 3:11; Isaya 55:8, 9.
Indlela ekukunceda ngayo ukwazi inyaniso: Ukuba uThixo akanakwaziwa, uzidubelani ngokufuna ukumazi? Sekunjalo, akasincedi nje simqonde, kodwa ufuna sibe nobuhlobo obusenyongweni naye. UThixo wabiza indoda ethembekileyo uAbraham ngokuba ‘ngumhlobo wam,’ yaye uKumkani uDavide wakwaSirayeli wabhala wathi: “Ukusondelelana noYehova kokwabo bamoyikayo.”—Isaya 41:8; INdumiso 25:14.
Ngaba ukuba nobuhlobo obusondeleyo noThixo kuvakala kuyintsomi? Mhlawumbi kunjalo, kodwa khawuve ukuba zithini iZenzo 17:27: ‘UThixo akakude kuye ngamnye wethu.’ Ngayiphi indlela? UThixo usebenzisa iBhayibhile ukuze asincede simazi kakuhle.a
Usixelela igama lakhe, elinguYehova. (Isaya 42:8) Uye wayibhala phantsi indlela aqhubana ngayo noluntu ukuze sazi ukuba ungumntu onjani. Ngaphezu koko, uThixo uyazichaza iimvakalelo zakhe. ‘Unenceba nobabalo, uzeka kade umsindo, unobubele bothando obuninzi nenyaniso.’ (Eksodus 34:6) Izinto esizenzayo zinokumchaphazela. Ngokomzekelo, uhlanga lwamandulo lwakwaSirayeli lwamenza ‘waziva ebuhlungu’ lakumvukela, kodwa abo bathi ngobulumko bamthobela bamvuyisa.—INdumiso 78:40; IMizekeliso 27:11.
[Umbhalo osemazantsi]
a Ukuze ufumane inkcazelo ngoko kuthethwa yiBhayibhile ngoThixo, funda isahluko 1 sencwadi ethi Yintoni Ngokwenene Efundiswa YiBhayibhile? epapashwe ngamaNgqina kaYehova.
[Amagama acatshulweyo akwiphepha 4]
Ukuba uThixo unguBathathu Emnye ongaziwayo, besiza kumazi njani?
[Inkcazelo Ngomfanekiso okwiphepha 4]
The Trinity c.1500, Flemish School, (16th century)/H. Shickman Gallery, New York, USA/The Bridgeman Art Library International