IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w19 Aprili iphe. 26-30
  • Sayifumana “Iperile Yexabiso Eliphakamileyo”

No video available for this selection.

Sorry, there was an error loading the video.

  • Sayifumana “Iperile Yexabiso Eliphakamileyo”
  • IMboniselo Evakalisa UBukumkani BukaYehova (Efundwayo)—2019
  • Amanqaku Afanayo
  • Amadoda Nabafazi—Ngaba Ngokwenene Bathetha Ngokwahlukileyo?
    Vukani!—1994
  • IBhayibhile Iyabutshintsha Ubomi Babantu
    IMboniselo Evakalisa UBukumkani BukaYehova—2011
  • Ndiyavuya Kuba Ndaye Ndakhetha Lo Msebenzi
    Amabali Obomi AmaNgqina KaYehova
  • Ukungevani Ngokupheleleyo Nemichiza—Isifo Esingumnqa
    Vukani!—2000
Khangela Okunye
IMboniselo Evakalisa UBukumkani BukaYehova (Efundwayo)—2019
w19 Aprili iphe. 26-30
UWinston noPam Payne bahleli phezu kwelitye ngaselwandle besebatsha

IBALI LOBOMI

Sayifumana “Iperile Yexabiso Eliphakamileyo”

Kubalisa UWinston noPamela Payne

UWINSTON noPamela (Pam) Payne bakhonza kwiofisi yesebe yaseAustralasia. Nangona bebonwabile kodwa bebenazo iingxaki. Ezinye zazo kukuzama ukuqhelana nendlela abantu bezinye iintlanga abaphila ngayo nokuswelekelwa ngumntwana wabo ongekazalwa. Bahlala bemthanda uYehova, abantu nentsimi nangona kwakusenzeka zonke ezi zinto. Siye sancokola nabo sabacela ukuba basibalisele ngezinye izinto eziye zenzeka ebomini babo.

Winston, khawusibalisele ukuba wamazi njani uThixo.

Ndakhulela kwifama yaseQueensland, eOstreliya ibe ekhaya sasingengobantu benkonzo. Kuba le fama yayikude nezinye iindawo, ndandingakhe ndidibane nabanye abantu ngaphandle kwabasekhaya. Ndaqala ukufuna ukwazi ngoThixo ndineminyaka eyi-12. Ndathandaza kuye ndimcela ukuba andincede ndimazi kakuhle. Ethubeni ndemka efama ndaza ndayosebenza eAdelaide, eMzantsi Ostreliya. Xa ndandineminyaka eyi-21, ndadibana noPam ndiseholideyini eSydney. Wandixelela ngeqela lecawa elibizwa ngokuba yiBritish-Israel, elithi abantu baseBritani bayinzala yezizwe ezilahlekileyo zakwaSirayeli. Eli qela lithi, ezo zizwe zizizwe ezilishumi zobukumkani basemntla ezathinjwa kwiminyaka yoo-700 ngaphambi kwexesha eliqhelekileyo. Ukubuyela kwam eAdelaide, ndancokola ngale nto nomnye umfo endandiphangela naye owayefunda iBhayibhile namaNgqina KaYehova. Kwadlula iiyure ezimbalwa sincokola, ibe eyona nto sasithetha kakhulu ngayo zizinto amaNgqina KaYehova azikholelwayo. Emva kwencoko yethu ndabona ukuba umthandazo endawenza ndisemncinci uyaphendulwa. Ndandifundiswa inyaniso ngoMdali nangoBukumkani bakhe! Ndafumana “iperile yexabiso eliphakamileyo.”​—Mat. 13:45, 46.

Nawe Pam wayikhangela le perile usemncinci. Wayifumana njani?

Ndakhulela kwidolophu yaseCoffs Harbour, eNew South Wales. Sasingabantu becawa ekhaya. Abazali bam, umakhulu notatamkhulu babekholelwa izinto ezazifundiswa yiBritish-Israel. Mna, umnakwethu, usisi nabazala bam sakhula sifundiswa ukuba uThixo uthanda abantu abanezinyanya ezingamaBritani. Kodwa mna andizange ndizikholelwe ezo zinto ibe ndandingaziva ndisondele kuThixo. Xa ndandineminyaka eyi-14, ndaya kwiicawa ezininzi ezahlukeneyo ezinjengeTshetshi, iBhaptizi neSabatha. Kodwa azizange zindincede ndimazi uThixo.

Ekuhambeni kwexesha, intsapho yasekhaya yafudukela eSydney, apho ndadibana khona noWinston eseholideyini. Njengokuba sele etshilo, izinto esasincokola ngazo zamenza wafunda iBhayibhile namaNgqina. Emva koko, iileta awayendibhalela zona zaziba neZibhalo ezininzi! Xa ndithetha inyani, ekuqaleni le nto yayindikhathaza ide indicaphukise. Kodwa ndade ndabona ukuba ezi zinto wayezibhala ziyinyani.

Ngo-1962, ndafudukela eAdelaide ukuze ndibe kufutshane noWinston. Wandizamela indawo yokuhlala emzini wamaNgqina, uThomas noJanice Sloman ababekade bengabathunywa bevangeli ePapua New Guinea. Babenobubele nyhani. Ndandineminyaka eyi-18 nje qha ibe bandinceda ndamazi kakuhle uYehova. Ngoko, nam ndaqalisa ukufundelwa ibe ndaqiniseka ukuba ndiyifumene inyaniso. Emva nje kokuba sitshatile noWinston, saqalisa inkonzo eyasinceda sasikelelwa nguYehova yaza yasenza sayixabisa nangakumbi le perile sayifumanayo nangona sasineengxaki.

Winston, khawusibalisele ngezinto ezenzeka kwiminyaka yokuqala ukwinkonzo yexesha elizeleyo.

Imaphu ebonisa iindawo ebabehamba kuzo xa babekumsebenzi wokujikeleza; izitampu zeposi zezinye iziqithi; isiqithi saseFunafuti kwilizwe laseTuvalu

A. Imaphu ebonisa iindawo esasihamba kuzo xa sasikumsebenzi wokujikeleza

B. Izitampu zeposi zezinye iziqithi. IKiribati neTuvalu zazikade zibizwa ngokuba ziziqithi zaseGilbert naseEllice

C. Isiqithi esihle saseFunafuti kwilizwe laseTuvalu. Esinye seziqithi esaya kuzo ngaphambi kokuba abathunywa bevangeli baye khona

Emva nje kokuba sitshatile noPam, uYehova wasivulela owokuqala ‘kwiminyango emikhulu’ ekhokelela kumsebenzi omkhulu. (1 Kor. 16:9) Sakhuthazwa ngumzalwana uJack Porter nenkosikazi yakhe uRoslyn ukuba sibe ngoovulindlela abathe ngxi. Wayengumveleli wesiphaluka sethu ibe ngoku sobabini singamalungu eKomiti YeSebe laseAustralasia. Mna noPam saba ngoovulindlela iminyaka emihlanu. Xa ndandineminyaka eyi-29, sacelwa ukuba siye kumsebenzi wokujikeleza kwiziqithi ezikuMzantsi Pasifiki, ezaba phantsi kwesebe laseFiji ekuhambeni kwexesha. Ezi ziqithi yayiyiAmerican Samoa, iSamoa, iKiribati, iNauru, iNiue, iTokelau, iTonga, iTuvalu neVanuatu.

Ngezo ntsuku, abantu abahlala kwiziqithi ezikude babengawathembi amaNgqina KaYehova. Ngoko kwakufuneka silumke. (Mat. 10:16) Amabandla ayemancinci, ibe kwamanye sasingayifumani indawo yokuhlala. Ngoko sasiyicela kubantu abangengomaNgqina ibe babesiphatha ngobubele.

Uyawuthanda umsebenzi wokuguqulela Winston. Yintoni eyakwenza wawuthanda?

UWinston Payne uqhuba isikolo sabadala eSamoa

Ndiqhuba isikolo sabadala eSamoa

Ukuqala kwethu ukukhonza kwiziqithi zaseTonga, abazalwana babenamaphecana neencwadana ezimbalwa ezibhalwe ngolwimi lwesiPolynesia, isiTonga. Entsimini babefunda nabantu incwadi yesiNgesi ethi Inyaniso Ekhokelela Kubomi Obungunaphakade. Ngoko xa kwakukho isikolo sabadala esathatha iiveki ezine, abadala abathathu baguqulela le ncwadi ngesiTonga nakubeni babengasazi kangako isiNgesi. UPam wazibhala izinto ababeziguqulela ibe sayithumela kwisebe laseMerika ukuze iprintwe. Kwathatha iiveki ezisibhozo ukuguqulela le ncwadi. Nangona le ncwadi ingazange iguqulelwe kakuhle ncam, yanceda abantu abaninzi abathetha isiTonga bafunda inyaniso. Mna noPam asingobaguquleli, kodwa ukuguqulela le ncwadi kwasenza sawuthanda umsebenzi wokuguqulela.

Pam, zazahluke njani izinto eziqithini naseOstreliya?

UWinston noPam Payne bame ngasebhasini, enye yeendawo ababehlala kuzo xa babekumsebenzi wokujikeleza

Enye yeendawo esasihlala kuzo xa sasikumsebenzi wokujikeleza

Zazahluke kakhulu! Kwezinye iindawo kwakukho iingcongconi, kutshisa kakhulu, kufumile, kukho iimpuku, sigula, ibe ngamanye amaxesha sasingabi nakutya kwaneleyo. Kwelinye icala, sasiphumla kamnandi, kuba qho xa kuphela usuku sasihlala kwindlu yethu enophahla lwengca nevulekileyo emacaleni size sibuke ulwandle. Ngamanye amaxesha, inyanga yayikhanya kakhulu ebusuku, kangangokuba imithi yesundu sasiyibona kakuhle, nenyanga yayibonakala elwandle. Ezi zinto zazisenza sicinge ngoYehova size sithandaze, ibe loo nto yasinceda sacinga ngezinto ezintle kunokuba sicinge ngezimbi.

Abantwana babevuya kakhulu baze bafune ukwazi yonk’ into xa bebona abantu abamhlophe abasuka kwelinye ilizwe, ibe nathi sasibathanda aba bantwana. Xa sasiseNiue, omnye umntwana oyinkwenkwe wabamba uboya obusezingalweni zikaWinston waza wathi: “Ndiyazithanda iintsiba zakho.” Kucacile ukuba wayeqala ukubona umntu onoboya obuninzi kangaka ezingalweni ibe wayengazi ukuba uza kuthi yintoni!

Sasisiba buhlungu xa sibona indlela ababesokola ngayo aba bantu nendlela obabunzima ngayo ubomi babo. Babengqongwe ziindawo ezintle kodwa babegula bengenawo namanzi okusela. Kodwa, abazalwana bethu babengabonakali bekhathazekile. Babekuqhelile ukuphila ngolwa hlobo. Into eyayibavuyisa yayikukuhlala neentsapho zabo, ukuba nendawo yokukhonza nokukwazi ukudumisa uYehova. Umzekelo wabo wasinceda sahoya ezona zinto zibalulekileyo saza saphila ngezinto ezimbalwa.

Pam, ngamanye amaxesha kwakufuneka uyokha amanzi uze upheke ngendlela ongayiqhelanga. Wakwazi njani ukuyenza le nto?

UPam uhlamba iimpahla eTonga esebenzisa ibhafu nebhakethi

UPam uhlamba iimpahla eTonga

Ndancedwa ngutata. Wandifundisa izinto ezininzi ezinjengokubasa, ukupheka ngomlilo nokuphila ngezinto ezimbalwa. Xa sasiseKiribati, sahlala endlwini encinci enophahla lwengca, phantsi iyikorale ibe udonga lwayo lwalenziwe ngomthi woqalo. Xa ndipheka, ndandigrumba umngxuma ndize ndibase umlilo ndisebenzisa iqokobhe lekhokhonathi. Amanzi wona ndandiwakha equleni nabanye abafazi. La manzi babewakha besebenzisa intonga eziimitha ezimbini enentambo ebhityileyo ekupheleni, oku kwentonga yokuloba. Ekupheleni kwale ntonga kwakubotshelelwa iemele. Mntu ngamnye wayefaka le ntonga equleni aze abuye ne-emele igcwele ngamanzi. Ndandicinga ukuba ilula le nto, de yandim okhayo. Ndayifaka ndiyifakile le ntonga, kodwa iemele yayivele ibetheke nje emanzini ize idade! Emva kokuba ndihlekwe ngumntu wonke, elinye ibhinqa leza kundinceda. Abantu basekuhlaleni babesoloko besinceda ibe benobubele.

Nobabini naniwuthanda umsebenzi enaniwenza kwezi ziqithi. Zikhona izinto eningasoze nizilibale eningasibalisela zona?

UWinston: Kwasithatha ixesha ukuqonda indlela abantu ababeqhuba ngayo ekuhlaleni. Ngokomzekelo, xa abazalwana belungiselele ukutya, babephaka baze basinike konke ukutya okukhoyo. Ekuqaleni sasingazi ukuba simele sibashiyele. Ngoko sasikutya sikugqibe! Kodwa sathi sakwazi ukuba simele sibashiyele, sabashiyela. Nangona sasisenza ezi mpazamo, abazalwana babesazi ukuba asenzi ngabom. Babesonwaba kakhulu xa sibatyelela njengoko sasikumsebenzi wokujikeleza. Abazalwana abakwiziqithi babengakhe badibane nabazalwana noodade abakwezinye iindawo ngaphandle kwethu.

UWinston ukhokela iqela eliya entsimini, kwisiqithi saseNiue, bekhwele izikuta

Ndikhokela iqela eliya entsimini, kwisiqithi saseNiue

Ukutyelela kwethu kwaba nemiphumo emihle nasekuhlaleni. Abantu babecinga ukuba inkonzo yamaNgqina yinkonzo abazalwana basekuhlaleni abaziqalele ngokwabo. Kodwa bathi bakubona mna nenkosikazi sisuka phesheya, babona ukuba le yinkonzo yokwenene enabantu abakhathaleleneyo ibe bachukumiseka.

UPam: Enye yezinto endingasoze ndizilibale yinto eyenzeka kwelinye ibandla elincinci laseKiribati. Kwakukho umdala omnye, uItinikai Matera, ibe wasiphatha kakuhle kakhulu. Ngenye imini wafika esiphathele ibhaskithi eneqanda elinye. Wathi: “Lelenu.” Ngezo ntsuku kwakuyinto enkulu ukutya iqanda lenkukhu. Nangona yayincinci le nto yenziwa ngulo mzalwana, yasichukumisa.

Kwiminyaka eyalandelayo Pam, waswelekelwa ngumntwana ongekazalwa. Yintoni eyakunceda wakwazi ukunyamezela?

Ndakhulelwa ngo-1973 ngoxa sasikuMzantsi Pasifiki. Sagqiba ekubeni sibuyele eOstreliya, ibe emva kweenyanga ezine wasweleka umntwana wethu. Sasikhathazeke kakhulu noWinston. Ekuhambeni kwexesha ndaya ndixola, kodwa ndandimane ndiba buhlungu de ndafunda inqaku elikwiMboniselo ka-Aprili 15, 2009. Kwindawo ethi “Imibuzo Evela Kubafundi,” kwakukho umbuzo othi “Ngaba likho ithemba lovuko ngosana olufa lusesesibelekweni?” Eli nqaku lasiqinisekisa ukuba le nto iza kuxhomekeka kuYehova osoloko esenza izinto ezilungileyo. Uza kuphelisa zonke iintlungu ezibangelwe kukuphila kweli hlabathi njengoko eza kusebenzisa uNyana wakhe ukuze ‘ayichithe imisebenzi kaSathana.’ (1 Yoh. 3:8) Eli nqaku lasinceda sanombulelo ngakumbi ngale “perile” ixabisekileyo sinayo thina bantu bakaYehova! Ngesiphi ukuba besingenawo amathemba anje?

Emva kokuswelekelwa ngumntwana, saphinda sabuyela kwinkonzo yexesha elizeleyo. Sakhonza iinyanga ezimbalwa kwiBheteli yaseOstreliya saza saphindela kumsebenzi wokujikeleza. Sakhonza iminyaka emine kwiilali zaseNew South Wales naseSydney saza ngo-1981, saya kukhonza kwisebe laseOstreliya (ngoku elibizwa ngokuba lisebe laseAustralasia), ibe sisakhonza khona nangoku.

Winston, ngaba ukukhonza kwiziqithi ezikuMzantsi Pasifiki kwakunceda kumsebenzi wakho njengokuba ukwiKomiti YeSebe laseAustralasia?

Ewe, kwandinceda ngeendlela ezininzi. Okokuqala, iOstreliya kwathiwa mayivelele umsebenzi owenziwa eAmerican Samoa naseSamoa. Emva koko, isebe laseNew Zealand ladityaniswa nelaseOstreliya. Ngoku, iindawo eziphantsi kwesebe laseAustralasia yiOstreliya, iAmerican Samoa, iSamoa, iiCook Islands, iNew Zealand, iNiue, iTimor-Leste, iTokelau neTonga. Ndakha ndanenyhweba yokuba ngummeli wesebe kuninzi lwezi ndawo. Ukusebenza naba bazalwana noodade bathembekileyo bezi ziqithi kwandinceda kakhulu njengokuba ngoku ndikhonza kwiofisi yesebe.

UWinston noPam Payne kwisebe laseAustralasia

UWinston noPam kwisebe laseAustralasia

Ndithanda ukugqibezela ngelithi, mna noPam sayibona apha kuthi into yokuba ayingobantu abadala kuphela abafuna ukwazi ngoThixo. Nalo ulutsha luyayifuna le “perile yexabiso eliphakamileyo” enoba abanye abantu entsatsheni abanamdla. (2 Kum. 5:2, 3; 2 Kron. 34:1-3) UYehova uthanda bonke abantu ibe ufuna bafumane ubomi enoba basebatsha okanye sele bekhulile!

Xa mna noPam saqalisa ukufuna ukwazi ngoThixo kwiminyaka eyi-50 eyadlulayo, sasingazi ukuba loo nto iza kusibeka phi. Nyhani inyaniso yoBukumkani iyiperile exabisekileyo! Sizimisele ukuyibamba nkqi le perile!

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share